San Lucas 19:1-48
19 Rü Ngechuchu rü Yericúgu naxücu rü nawa naxüpetü.
2 Rü yexma naxãchiü̃ ga wüxi ga yatü ga diẽruã̱xü̃chixü̃ ga Chaquéugu ãégaxü̃. Rü nüma nixĩ ga naeru ga yema yatügü ga Rómaarü ãẽ̱xgacüca̱x diẽru ngĩxü̃ ideetanüxü̃.
3 Rü yema Chaquéu rü poraãcü nüxü̃́ nangúchaü̃ nax Ngechuchuxü̃ nadauxü̃, natürü taxucürüwa nüxü̃ nadau, yerü namuxũchi ga duü̃xü̃gü, rü ñu̱xũchi nanuxchanexü̃chi ga nümax.
4 Rü yemaca̱x Ngechuchupe̱xegu nayangu, rü namacüwawa wüxi ga naixtanügu naxĩnagü nax Ngechuchuxü̃ nadauxü̃ca̱x ga yéma naxüpetügu.
5 Rü yexguma yéma naxüpetügu ga Ngechuchu, rü natanügu nadaunagü ga guma nai. Rü ñanagürü nüxü̃: —Pa Chaquéux, ¡paxa írüxĩ i ngéma! Erü cupatagu tá chape i ñu̱xma —ñanagürü.
6 Rü paxa ínarüxĩ ga Chaquéu, rü taãẽãcü Ngechuchuxü̃ nayaxu.
7 Rü yexguma yemaxü̃ nadaugügu ga duü̃xü̃gü, rü guxü̃ma inanaxügüe ga chixri Ngechuchuchiga nax yadexagüxü̃. Rü ñanagürügü: —¿Ñuxãcü i nüma rü wüxi i duü̃xü̃ i pecaduã́xü̃patawa nangu? —ñanagürügü.
8 Rü yexguma ga Chaquéu rü inachi rü ñanagürü Ngechuchuxü̃: —Dücax, Pa Corix, choma rü ngẽma ngearü diẽruã̱xgüxü̃na tá chanaxã i ngãxü̃gu i guxü̃ma i chorü ngẽmaxü̃gü. Rü ngẽxguma chi texé tüxü̃ chawomüxẽẽãcüma tüxü̃́ changíxgu, rü ãgümücüe̱xpü̱xcüna tá tüxü̃́ ngĩxü̃ chatáeguxẽxẽ i ngẽma tümaarü diẽru —ñanagürü.
9 Rü Ngechuchu rü ñanagürü nüxü̃: —Ñoma i ngunexü̃gu cupatawa nangu i maxü̃ i taguma gúxü̃, erü cuma rü ta rü Abraáü̃rüxü̃ cuyaxõ.
10 Rü Tupana Nane ya duü̃xü̃xü̃ ixĩcü, rü ñoma i naanewa naxũ nax naxca̱x yadauxü̃ca̱x i ngẽma duü̃xü̃gü i iyarütauxexü̃ nax namaxẽxẽẽãxü̃ca̱x —ñanagürü.
Ore i diẽrugu ixuxü̃
11 Rü yexguma Ngechuchuarü orexü̃ inaxĩnüeyane ga duü̃xü̃gü, rü nüma ga Ngechuchu rü wüxi ga to ga ore ga cua̱xruxü̃xü̃ namaxã nixu, yerü marü Yerucharéü̃xü̃ ningaica, rü duü̃xü̃gü nagu rüxĩnüegu rü paxa tá ínangu ya Tupana nax ãẽ̱xgacü yixĩxü̃ca̱x.
12 Rü yexguma ga Ngechuchu rü ñanagürü nüxü̃: —Nayexma ga wüxi ga yatü ga ãẽ̱xgacü nane ixĩcü. Rü nüma rü yáxü̃wa naxũ ga to ga nachixü̃anewa nax yéma nüxü̃ yaxǘcuchigüãxü̃ca̱x ga norü nga̱xcueruxü̃ nax nüma rü gumá nawa ne naxũxü̃ne ga ĩanearü ãẽ̱xgacü yixĩxü̃ca̱x.
13 Rü naxü̃pa nax inaxũãchixü̃, rü naxca̱x nangema ga 10 ga norü duü̃xü̃gü. Rü wüxichigüna ngĩxü̃ naxã ga tacü ga diẽru. Rü ñanagürü nüxü̃: “¡Ngĩmaxã pepuracüe rü ngĩxü̃ pimuxẽxẽ i ñaa diẽru ñu̱xmatáta chataegu!” ñanagürü.
14 Natürü yema ĩanecüã̱x ga duü̃xü̃gü rü naxchi naxaie ga gumá yatü. Rü yemaca̱x nawenaãma nayamugü ga ñuxre ga orearü ngeruü̃gü nax nachixü̃anearü ãẽ̱xgacümaxã nüxü̃ yanaxugüxü̃ca̱x nax tama nanaxwa̱xegüxü̃ nax norü ãẽ̱xgacüxü̃ nax yixĩxü̃ca̱x ga gumá yatü.
15 Natürü nachixü̃anearü ãẽ̱xgacü rü nayangucuchixẽẽãma ga gumá yatü. Rü ñu̱xũchi nüma ga gumá yatü rü norü ĩaneca̱x nataegu nax yéma ãẽ̱xgacü nax yixĩxü̃ca̱x. Rü yexguma ínanguxgu rü naxca̱x nangema ga yema 10 ga norü duü̃xü̃gü ga diẽru nüxna ngĩxü̃ naxãxü̃, yerü nüxü̃ nacuáxchaü̃ nax ñuxrechigü ngĩxü̃ nax yamuxẽẽxü̃ ga norü diẽru.
16 Rü yema nüxíra diẽru nüxna ngĩxü̃ naxãxü̃ rü norü corixü̃tawa nangu, rü ñanagürü: “Pa Corix, curü diẽru rü 10 e̱xpü̱xcüna ngĩxü̃ chimuxẽxẽ”, ñanagürü.
17 Rü gumá yatü ga yexwacax ãẽ̱xgacüxü̃ ingucuchicü rü nanangãxü̃, rü ñanagürü: “Wüxi i mexü̃ i chorü duü̃xü̃ quixĩ. Aixcüma meama namaxã cupuracü i ngẽma íxraxü̃ i diẽru i cuxna chaxãxü̃. Rü ñu̱xma rü 10 ya ĩanegüarü ãẽ̱xgacüxü̃ tá cuxü̃ chixĩxẽxẽ”, ñanagürü.
18 Rü yéma nangu ga to ga norü duü̃xü̃, rü ñanagürü: “Pa Corix, curü diẽru rü wüxime̱e̱xpü̱xcüna ngĩxü̃ chimuxẽxẽ”, ñanagürü.
19 Rü norü cori nanangãxü̃ rü ñanagürü nüxü̃: “Cuma rü wüxime̱e̱xpü̱x ya ĩanegüarü ãẽ̱xgacüxü̃ tá cuxü̃ chixĩxẽxẽ”, ñanagürü.
20 Rü yéma nangu ga to ga norü duü̃xü̃ rü ñanagürü nüxü̃: “Pa Corix, ñaa iyixĩ i curü diẽru. Rü wüxi ya dechugu ngĩxü̃ chanuque, rü ngẽmaãcü ngĩmaxã changuxü̃.
21 Yerü cuxca̱x chamuü̃, erü wüxi i yatü i aüxü̃ quixĩ. Rü cunayauxtanü i ngẽma tama cuxrü ixĩxü̃, rü cunayaxu i nanetüarü o i ngextá tama cuma ícutoexü̃wa”.
22 Rü yexguma ga gumá ãẽ̱xgacü rü ñanagürü nüxü̃: “Wüxi i chorü duü̃xü̃ i chixexü̃ quixĩ i cumax. Rü curü oretama nixĩ i cuxü̃ ixuxü̃ nax cuchixexü̃. Marü nüxü̃ cucua̱xchire̱x nax chaxaüxü̃, rü chanayauxtanüxü̃ i ngẽma tama choxrü ixĩxü̃, rü tama ichatoexü̃wa chanayaxu i nanetüarü o.
23 ¿Natürü tü̱xcüü̃ tama bancugu choxü̃́ ngĩmaxã cunguxü̃ i chorü diẽru nax ngéma choxü̃́ ngĩxü̃ yamuxẽẽgüxü̃ca̱x, rü ngẽmaãcü mucü ngĩxü̃ nax chayaxuxü̃ca̱x i ngẽxguma íchanguxgu?” ñanagürü.
24 Rü yexguma ga nüma ga yema ãẽ̱xgacü rü yema yexmagüxü̃maxã nüxü̃ nixu, rü ñanagürü: “¡Nüxna ngĩxü̃ peyaxu i ngẽma diẽru, rü ngẽma 10 i diẽru nüxü̃́ ngẽxmaxü̃wa ngĩxü̃ pexã!” ñanagürü.
25 Rü nümagü rü nanangãxü̃gü, rü ñanagürügü: “Natürü, Pa Corix, nüma rü marü nüxü̃́ ingẽxma i 10 i diẽru”, ñanagürügü.
26 Rü gumá ãẽ̱xgacü nanangãxü̃, rü ñanagürü: “Pemaxã nüxü̃ chixu rü yíxema tüxü̃́ nangẽxmacü rü yexera tá tüxna ngĩxü̃ taxã. Natürü yíxema tüxü̃́ natau̱xcü rü woo ngẽma noxre i tüxü̃́ ngẽxmacü rü tá tüxna ngĩxü̃ tayaxu.
27 Rü yema chorü uanügü ga tama naxwa̱xegüxü̃ nax norü ãẽ̱xgacüxü̃ chixĩxü̃, ¡rü nua penagagü, rü nua chopexegu peyadai!” —ñanagürü.
Ngechuchu rü Yerucharéü̃gu naxücu
28 Rü yema orexü̃ yaxuxguwena ga Ngechuchu, rü inixũchigü ga Yerucharéü̃wa nax naxũxü̃.
29 Rü yexguma marü nawa nangugüchaü̃gu ga gumá ĩanegü ga Bexchagué rü Betánia ga Oribunecüarü Ma̱xpǘnearü ngaicamana yexmagüne, rü Ngechuchu nanamu ga taxre ga norü ngúexü̃gü.
30 Rü ñanagürü nüxü̃: —¡Gua ĩanexacüwa pexĩ! Rü ngẽxma tá nüxü̃ peyangau i wüxi i búru i ngexwaca yáxü̃ i ngẽxma ngãxü̃xü̃ i taguma texé natagu aunagüxü̃. ¡Rü peyawẽxü̃, rü nua penaga!
31 Rü ngẽxguma texé pexna caxgux nax ta̱xacüca̱x peyawẽxü̃xü̃ i ngẽma búru, ¡rü tümamaxã nüxü̃ pixu rü ñapegügü: “Torü Cori nanaxwa̱xe” —ñapegügü tüxü̃!
32 Rü yéma naxĩ ga yema taxre ga norü ngúexü̃gü. Rü yexma nüxü̃ nayangau ga yema búru yema Ngechuchu namaxã nüxü̃ ixuxü̃rüxü̃.
33 Rü yexguma yawẽxü̃güãgu ga yema búru, rü norü yoragü rü yema ngúexü̃güna nacagüe, rü ñanagürügü: —¿Tü̱xcüü̃ peyawẽxü̃ i ngẽma búru? —ñanagürügü.
34 Rü nümagü nanangãxü̃gü, rü ñanagürügü: —Rü tayawẽxü̃ erü torü Cori nanaxwa̱xe —ñanagürügü.
35 Rü Ngechuchuxü̃tawa nanagagü ga yema búru. Rü yema norü ngúexü̃gü rü norü gáuxü̃chirumaxã nanatütagü. Rü ñu̱xũchi Ngechuchuxü̃ natagu naxaunagüxẽẽgü.
36 Rü duü̃xü̃gü rü Ngechuchupe̱xewa norü gáuxü̃chirumaxã nayachamagü ga nama.
37 Rü yexguma inaxügüãgu nax ínaxĩgüxü̃ nawa ga yema nama ga Oribunecüarü Ma̱xpǘnewa yarüdaexü̃, rü guxü̃ma ga yema duü̃xü̃gü ga nawe rüxĩxü̃ rü inanaxügü ga taãẽãcüma aita nax naxüexü̃ rü tagaãcü Tupanaxü̃ nax yacua̱xüü̃güxü̃ naxca̱x ga guxü̃ma ga yema cua̱xruü̃gü ga taxü̃ ga nüxü̃ nadaugüxü̃ ga Tupanaarü poramaxã naxüxü̃ ga Ngechuchu.
38 Rü ñanagürügü: —¡Namecümaxüchi ya daa ãẽ̱xgacü ya Tupanaégagu núma ũcü! ¡Rü pema rü ta, Pa Dauxü̃cüã̱x, rü petaãxẽgü rü nüxü̃ picua̱xüü̃gü ya Tupana! —ñanagürügü.
39 Rü yéma duü̃xü̃gütanüwa nayexmagü ga ñuxre ga Parichéugü. Rü ñanagürügü Ngechuchuxü̃: —Pa Ngúexẽẽruxü̃x, ¡Yanachianegüxẽxẽ i ngẽma cuwe rüxĩxü̃ i duü̃xü̃gü! —ñanagürügü.
40 Natürü Ngechuchu nanangãxü̃ rü ñanagürü nüxü̃: —Pemaxã nüxü̃ chixu rü ngẽxguma chi iyanangea̱xgügu i ñaa duü̃xü̃gü, rü daa nutagü ya namacüwawa ngẽxmagücü rü chi nüxĩ́ aita naxüe —ñanagürü.
41 Rü yexguma Yerucharéü̃arü ngaicamana nanguxgu ga Ngechuchu, rü gumá ĩaneca̱x naxaxu.
42 Rü ñanagürü: —Pa Yerucharéü̃cüã̱xgü, chierüx ñoma i ngunexü̃gu nüxü̃ pecua̱xgu nax texé aixcüma taãxẽ pexna ãxü̃. Natürü ngẽma rü pexca̱x naxẽxü̃gu i ñu̱xma, rü taxuacüma nüxü̃ pecua̱x.
43 Rü tá guxchaxü̃gü pexü̃ naxüpetü. Rü perü uanügü rü perü ĩanearü guxü̃cüwawa tá nanagünagüane nax nawa nachopetüxü̃ca̱x i naxtapü̱x. Rü norü churaragü tá perü ĩanexü̃ ínachomaeguãchi, rü guxü̃cüwawa tá pexca̱x nichocu.
44 Rü tá nagu napogüe ya perü ĩane, rü tá pexü̃ nadai. Rü taxucütama ya nuta ngextá nügüxétü nanugüxüra i perü ĩanearü poxeguxü̃tápü̱x. Rü ngẽmaãcü tá pexü̃ naxüpetü, yerü tama nüxü̃ pecua̱xgüchaü̃ ga yexguma Tupana pexü̃ íyada̱u̱xgu —ñanagürü.
Ngechuchu rü Tupanapata ga taxü̃newa ínanawoxü̃ ga duü̃xü̃gü ga yéma taxegüxü̃
45 Rü yemawena ga Ngechuchu rü Tupanapata ga taxü̃nea̱xtügu naxücu. Rü yéma inanaxügü nax ínawoxü̃ãxü̃ ga yema duü̃xü̃gü ga Tupanapataa̱xtüwa taxegüxü̃.
46 Rü Ngechuchu rü ñanagürü nüxü̃: —Tupanaarü ore i ümatüxü̃wa rü ñanagürü:“Chopata rü yumüxẽpataxü̃ nixĩ”,
ñanagürü. Natürü pema rü ngĩ́ta̱xaxgüxü̃pataxü̃ peyaxĩxẽxẽ —ñanagürü.
47 Rü guxü̃ ga ngunexü̃gu rü Tupanapata ga taxü̃newa nayanguxẽẽtae ga Ngechuchu. Natürü yema chacherdótegüarü ãẽ̱xgacügü, rü ngúexẽẽruü̃gü ga Moichéarü mugüwa ngu̱xẽẽtaegüxü̃, rü Yerucharéü̃arü ãẽ̱xgacügü, rü naxca̱x nadaugü nax ñuxãcü tá yama̱xgüãxü̃.
48 Natürü taxucürüwa ta̱xacü namaxã naxügü, yerü guxü̃ma ga duü̃xü̃gü rü namaxã nataãẽgü, rü mea inarüxĩnüe ga norü ore.
