San Lucas 2:1-52
2 Rü yexguma Augútu ãẽ̱xgacü ixĩxgu ga Rómawa, rü nanaxunagü nax yaxugüãxü̃ ga guxü̃ma ga duü̃xü̃gü ga norü naanewa yexmagüxü̃.
2 Rü yexguma Quirínu ãẽ̱xgacü ixĩxgu ga Chíriaarü naanewa rü nanaxü ga yema nüxíraxü̃xü̃ ga duü̃xü̃güarü ugü.
3 Rü guxü̃ma ga duü̃xü̃gü rü norü ĩane ga nagu nabuxü̃newa nixĩchigü nax yéma yaxugüãxü̃ca̱x.
4 2:4-5 Rü yemaca̱x ga Yúche rü Gariréaanewa yexmane ga ĩane ga Nacharétuwa inaxũãchi, rü Yudéaanewa yexmane ga ĩane ga Beréü̃wa naxũ. Rü gumá nixĩ ga ĩane ga nũxcümaü̃cü ga ãẽ̱xgacü ga Dabí nagu buxü̃ne. Rü nüma ga Yúche rü Dabítanüxü̃ nixĩ rü yemaca̱x Beréü̃wa naxũ nax yaxugüxü̃ca̱x wüxigu ngĩmaxã ga María ga ngĩmaxã naxãxma̱xchaü̃cü. Natürü ga María rü itacharaü̃ nax naxãxacüxü̃.
5 Nüü̃ nadau 2:4
6 Rü yexguma Beréü̃wa nayexmagüyane, ngĩxna nangu ga ngĩrü ngunexü̃ nax naxíraxacüxü̃ ga María.
7 Rü yexma nabu ga nüxíraü̃cü ga ngĩne. Rü naxchápenüxü̃maxã inanuque. Rü wüxi ga wocaarü chibüchicagu inacanagüxẽxẽ, yerü guma ĩanearü pegüpataü̃ rü naxããcu.
Tupanaarü orearü ngeruü̃gü ga daxũcüã̱x rü carnérugüarü dauruü̃ca̱x nango̱x
8 Rü Beréü̃arü ngaicamana nayexmagü ga ñuxre ga carnérugüarü dauruü̃gü ga chütacü nachitaxü̃wa norü carnérugüna ídaugüxü̃.
9 Rü ngürüãchi yema carnérugüarü dauruü̃güca̱x nango̱x ga wüxi ga daxũcüã̱x ga Cori ya Tupanaarü orearü ngeruxü̃. Rü Tupanaarü üünemaxã guxü̃wama nangóone. Rü yema carnérugüarü dauruü̃gü rü poraãcü namuü̃e.
10 Natürü yema orearü ngeruxü̃ ga daxũcüã̱x, rü ñanagürü nüxü̃: —¡Taxṹ i pemuü̃exü̃! Erü pexca̱x nua chanange i wüxi i ore i taãẽxẽẽruxü̃ i guxü̃ i duü̃xü̃güca̱x ixĩxü̃.
11 Erü ñu̱xma rü Dabíarü ĩane ya Beréü̃gu nabu ya wüxi ya maxẽxẽẽruxü̃. Rü nüma rü Cori ya Cristu nixĩ.
12 Rü ñaa tá nixĩ i perü cua̱xruxü̃. Rü tá nüxü̃ ipeyangau ya wüxi ya bucü ya naxchápenüxü̃maxã nuquecü ya wocaarü chibüchicagu cacü —ñanagürü.
13 Rü ngürüãchi yema daxũcüã̱x ga orearü ngeruü̃xü̃tawa nango̱x ga muxü̃ma ga togü ga daxũcüã̱x ga orearü ngeruü̃gü. Rü Tupanaxü̃ nicua̱xüü̃gü, rü ñanagürügü:
14 —¡Tupanaxü̃ picua̱xüxü̃gü i pemax i daxũguxü̃ i naanewa pengẽxmagüxü̃!¡Rü pegümaxã iperüngüxmüe i pemax i ñoma i naanecüã̱x ya Tupana pemaxã taãxẽgüxe!
—ñanagürügü.
15 Rü nawena nax daxũwa naxĩxü̃ ga yema orearü ngeruü̃gü, rü yema carnérugüarü dauruü̃gü rü nügümaxã ñanagürügü: —¡Ngĩxã Beréü̃wa ítayadau i ngẽma ngupetüxü̃ i Cori ya Tupana tüxü̃ nüxü̃ cua̱xẽxẽxü̃! —ñanagürügü.
16 Rü paxa inaxĩãchi rü Beréü̃wa naxĩ. Rü yexma nüxü̃ inayangaugü ga Yúche rü María rü gumá bucü ga wocaarü chibüchicagu cacü.
17 Rü nawena nax gumá bucüxü̃ nadaugüxü̃, rü duü̃xü̃gümaxã nüxü̃ nixugüe ga yema ore ga Tupanaarü orearü ngeruü̃gü ga daxũcüã̱x namaxã nüxü̃ ixugüxü̃ ga gumá bucüchiga.
18 Rü guxü̃ma ga duü̃xü̃gü ga nüxü̃ ĩnüexü̃ ga yema carnérugüarü dauruü̃güarü ore rü namaxã naba̱i̱xãchiãẽgü.
19 Natürü ga María rü inayaxu ga guxü̃ma ga yema ngupetüxü̃ rü ngĩãẽgu namaxã inguxü̃ rü nagu irüxĩnüecha.
20 Rü nawoegu ga yema carnérugüarü dauruü̃gü. Rü taãẽãcüma Tupanaxü̃ nicua̱xüü̃gü naxca̱x ga guxü̃ma ga yema nüxü̃ naxĩnüexü̃ rü nüxü̃ nadaugüxü̃, yerü guxü̃ma ga yema orearü ngeruü̃gü ga daxũcüã̱x namaxã nüxü̃ ixuxü̃ãcüma nüxü̃ nadaugü.
Bucü ga Ngechuchu rü Tupanapata ga taxü̃newa nanagagü
21 Rü yexguma 8 ga ngunexü̃ nüxü̃́ yexmagu ga bucü, rü ínanawíecha̱xmüü̃pe̱xechiraü̃gü. Rü Ngechuchugu nanaxüégagü. Rü yematama nixĩ ga naéga ga daxũcüã̱x ga Tupanaarü orearü ngeruxü̃ Maríamaxã nüxü̃ ixuxü̃ ga yexguma tauta namaxã naxãxacügu.
22 Rü yexguma marü yanguxgu ga yema ngunexü̃ nax Tupanapatawa Tupanape̱xewa nügü yamexẽẽgüxü̃ rü yéma naxĩ nax yemaacü Tupanape̱xewa yanguxẽẽgüãxü̃ca̱x ga yema Moichéarü mugü nüxü̃ ixuxü̃rüxü̃. Rü Yerucharéü̃wa ga Tupanapatawa nanagagü ga gumá bucü nax Tupanana namugüãxü̃ca̱x.
23 Rü yemaacü nanaxügü yerü Tupanaarü mugüwa naxümatü, rü ñanagürü:“Ngẽxguma wüxi i nge rü nayatügu i nüxíraxü̃xü̃ i ngĩxacü, rü name i Cori ya Tupanana inamu”,
ñanagürü.
24 Rü yéma naxĩ rü yéma nanagagü ga taxre ga muxtucugü ga yexwaca̱x yaexü̃, nax Tupanaca̱x nadaiaxü̃ca̱x ga chacherdótegü ga Tupanapatawa, yerü yema ñanagürü ga Tupanaarü mugüwa.
25 2:25-26 Rü yexgumaü̃cüxü Yerucharéü̃gu naxãchiü̃ ga wüxi ga yatü ga Chimeóü̃gu ãégacü. Rü wüxi ga yatü ga mecümacü nixĩ ga nümax, rü aixcüma Tupanaxü̃ ngechaü̃cü nixĩ. Rü nüma rü ínanangu̱xẽxẽ nax ínanguxü̃ ya Iraétanüxü̃arü nguxü̃xẽẽruxü̃. Rü Tupanaãxẽ ya Üünecü rü Chimeóü̃wa nayexma, rü nüxü̃ nüxü̃ nacua̱xẽxẽ nax taxũtáma nayuxü̃ ega tama nüxü̃ nadauxíragu ya Cristu ya Cori ya Tupana nüxü̃ unetacü.
26 Nüü̃ nadau 2:25
27 Rü yema ngunexü̃gu rü Tupanapatawa Chimeóü̃xü̃ naxũxẽxẽ ga Tupanaãxẽ ya Üünecü. Rü yéma nayexma ga Chimeóü̃ ga yexguma Yúche rü María Tupanapata ga taxü̃newa nagagügu ga gumá bucü ga Ngechuchu nax Tupanana namugüãxü̃ca̱x nax yemaacü yanguxẽẽgüãxü̃ca̱x ga Moichéarü mu.
28 Rü nüma ga Chimeóü̃ rü Ngechuchuxü̃ naganagü rü ñanagürü:
29 “Pa Corix, ñu̱xma rü marü name nax taãxẽãcü choxü̃ quigaxü̃,erü marü cuyanguxẽxẽ ga yema chomaxã icuxunetaxü̃.
30 2:30-31 Rü chauxetümaxã nüxü̃ chadau ya daa maxẽxẽẽruxü̃ ya guxü̃ i duü̃xü̃güca̱x núma cunamucü.
31 Nüü̃ nadau 2:30
32 Rü nüma tá nixĩ i norü ngóonexẽẽruxü̃ i ngẽma duü̃xü̃gü i tama Iraétanüxü̃ ixĩgüxü̃.Rü daa bucü rü curü duü̃xü̃gü i Iraétanüxü̃arü poraxẽẽruxü̃ tá nixĩ”,
ñanagürü.
33 Rü Yúche rü María rü naba̱i̱xãchiãẽgü namaxã ga Chimeóü̃arü ore ga gumá bucüchiga nüxü̃ yaxuxü̃.
34 Rü yexguma ga Chimeóü̃ rü Tupanana naca nax nüxü̃ nangü̃xẽẽxü̃ca̱x ga Yúche rü María rü gumá bucü. Rü ñanagürü ngĩxü̃ ga María ga Ngechuchu naé: “Dücax, daa bucü rü tá nanamaxẽxẽxẽ i muxü̃ma i Iraétanüxü̃, natürü ngẽma nüxü̃ oexü̃ rü tá inayarütauxe. Rü nüma rü wüxi i cua̱xruxü̃ tá nixĩ, rü muxü̃ma i duü̃xü̃gü rü tá nüxü̃ naxoe.
35 Rü nüma tá nanango̱xẽxẽãma i ngẽma naãxẽwa nagu naxĩnüexü̃ i muxü̃ma i duü̃xü̃gü. Natürü ngẽma nüxü̃ tá ngupetüxü̃gagu rü ngúxü̃ tá quinge, Pa Maríax, ñoma wüxi i tara i curü maxü̃newa yarüwáxü̃rüxü̃”, ñanagürü.
36 Rü yéma ta iyexma ga wüxi ga ngecü ga Tupanaarü orearü uruxü̃. Rü Ána nixĩ ga ngĩéga. Rü Penuéxacü iyixĩ, rü Achétücumüwa ixü. Rü marü yaxguã̱xü̃chi iyixĩ. Rü yexguma napaxüchigutama ixãte. Natürü 7 ga taunecüguxicatama ngĩtexü̃tawa iyexma, yerü nayu ga ngĩte.
37 Rü yemaacü wüxi ga yutecü ga yaxguã̱xü̃chi iyixĩ, rü 84 nixĩ ga ngĩrü taunecü. Rü taguma Tupanapata ga taxü̃newa íixũxũ. Rü guxü̃guma ngunecü rü chütacü rü naxaureãcüma iyumüxẽecha. Rü yemaacü Tupanaxü̃ iyacua̱xüxü̃.
38 Rü yexguma Chimeóü̃ idexayane, rü yéma ingu ga Ána, rü Tupanana moxẽ ixã. Rü iinaxügü ga bucü ga Ngechuchuchiga nax yadexaxü̃ nape̱xewa ga guxü̃ma ga yema duü̃xü̃gü ga ínangu̱xuxẽẽgüxü̃ nax norü uanüme̱xẽwa ínanguxuchixü̃ ga Yerucharéü̃.
Ĩane ga Nacharétuca̱x nawoegu
39 Rü yexguma marü yanguxẽẽgüãgu ga guxü̃ma ga yema Tupanaarü mugü nüxü̃ ixuxü̃, rü Yúche rü María rü naxca̱x nawoegu ga norü ĩane ga Nacharétu ga Gariréaanewa yexmane.
40 Rü gumá bucü rü niyachigü, rü yexeraãcü niporachigü, rü yexeraãcü nüxü̃ nicuáchigü. Rü Tupana rü namaxã nataãxẽ rü nüxü̃ narüngü̃xẽxẽ.
Bucü ga Ngechuchu rü Tupanapata ga taxü̃newa naxo
41 Nanatü rü naé rü gucü ga taunecügu Yerucharéü̃wa taxĩĩxü̃ naxca̱x ga Üpetüchigaarü peta.
42 Rü yexguma Ngechuchu 12 ga taunecü nüxü̃́ yexmagu, rü wüxigu nanatümaxã rü naémaxã Yerucharéü̃wa naxĩ, yerü yema nixĩ ga nacüma naxca̱x ga Üpetüchigaarü peta.
43 Rü yexguma yagúechigagu ga Üpetüchigaarü peta, rü tümachiü̃ca̱x tawoegu ga nanatü rü naé. Natürü ga Ngechuchu rü tümaechita tüxna Yerucharéü̃gu narüxã̱ũ̱x.
44 Rü tüma nüxü̃ tacua̱xgügu rü yema muxü̃ ga duü̃xü̃gü ga tümaweama ne ixĩxü̃tanügu naxã ga Ngechuchu. Rü yemaacü marü itaxĩ ga wüxi ga ngunexü̃. Natürü yexguma naxca̱x tadaugügu tümatanüxü̃tanügu rü yéma tüxü̃ cua̱xgüxü̃tanügu rü tama nüxü̃ itayangaugü.
45 Rü yemaca̱x wenaxarü Yerucharéü̃ca̱x tawoegu nax yexma naxca̱x tayadaugüxü̃ca̱x.
46 Rü tomaepü̱x ga ngunexü̃guwena Ngechuchuxü̃ itayangaugü ga Tupanapata ga taxü̃negu. Rü yéma narüto natanüwa ga yema ngúexẽẽruü̃gü ga Tupanaarü mugüwa ngu̱xẽẽtaegüxü̃, rü inarüxĩnü ga norü ngu̱xẽẽtae, rü nüxna nicachigü.
47 Rü guxü̃ma ga yema duü̃xü̃gü ga Ngechuchuxü̃ ĩnüexü̃, rü namaxã naba̱i̱xãchiãẽgü ga norü cua̱x rü norü ngãxü̃ga.
48 Rü yexguma nanatü rü naé nüxü̃ daugügu rü taba̱i̱xãchiãẽgü. Rü naé rü ñatarügü nüxü̃: —Pa Chaunex, ¿tü̱xcüü̃ tomaxã ngexü̃ cuwagü? Cunatü rü choma rü poraãcü cuxca̱x taxoegaãẽãcüma cuxca̱x tadaugüecha —ñatarügü.
49 Rü yexguma ga Ngechuchu rü ñanagürü: —¿Tü̱xcüü̃ cha̱u̱xca̱x pedaugü? ¿Tama ẽ̱xna nüxü̃ pecua̱x nax woetama Chaunatüpatawa tá changexmaxü̃? —ñanagürü.
50 Natürü ga tümagü rü tama nüxü̃ tacua̱xgüéga ga yema tümamaxã nüxü̃ yaxuxü̃.
51 Rü yexguma ga Ngechuchu rü tümawe nataegu ga Nacharétuwa. Rü guxü̃guma mea tümaga naxĩnüecha. Rü naé ga María rü ngĩãẽwa nagu irüxĩnüecha ga guxü̃ma ga yema ngupetüxü̃.
52 Rü niyachigü ga Ngechuchu, rü yexeraãcü nüxü̃ nicuáchigü. Rü Tupana rü namaxã nataãxẽ, rü guxü̃ma ga duü̃xü̃gü rü ta namaxã nataãẽgü.
