San Lucas 3:1-38
3 Rü yexguma Tibériu 15 ga taunecü Rómaarü ãẽ̱xgacü yixĩxgu, rü Pónchiu Pirátu rü Yudéaanearü ãẽ̱xgacü nixĩ, rü Eróde rü Gariréaanearü ãẽ̱xgacü nixĩ, rü naenexẽ ga Ferípe rü Itúreaane rü Traconíteanearü ãẽ̱xgacü nixĩ, rü Lichánia rü Abiríniaanearü ãẽ̱xgacü nixĩ.
2 Rü yexguma ga Aná rü Caipá rü chacherdótegüarü ãẽ̱xgacügü nixĩgü. Rü yexguma nixĩ ga Chacaría nane ga Cuáü̃maxã yadexaxü̃ ga Tupana ga chianexü̃ ga taxúema íxãpataxü̃wa.
3 Rü guxü̃ma ga yema naanegü ga Yudáü̃cutüarü ngaicamana yexmagüxü̃gu nixũgüchigü ga Cuáü̃. Rü duü̃xü̃gümaxã nüxü̃ nixuchigü nax nüxü̃ naxoexü̃ca̱x ga nacümagü ga chixexü̃ rü ínabaiü̃xü̃ca̱x nax yemaacü Tupana nüxü̃́ nüxü̃ rüngü̃maxü̃ca̱x ga norü pecadugü.
4 Rü yemaacü gumá nũxcümaü̃cü ga Tupanaarü orearü uruxü̃ ga Ichaía naxümatüxü̃ãcü ningu. Yerü ñanagürü:“Ngẽma chianexü̃ i ngextá taxúema íxãpataxü̃wa rü tá nangẽxma i wüxi i naga i ngéma tagaãcü ñaxü̃:‘¡Corica̱x penamexẽxẽ i nama! ¡Naxcax peyanawe̱xãchixẽxẽ i nama!’
5 Rü guxü̃ma i ngẽma ngatexü̃gü rü tá nanagütagü,rü guxü̃ma ya yima ma̱xpǘnegü rü ngüchitaerugü rü tá nayadoxochigüxẽxẽ.Rü ngẽma nama i wü̃xü̃ rü tá nayanawẽ̱xãchixẽxẽ,rü ngẽma ínaxãxmaagüxü̃wa rü tá nanagütagü.
6 Rü guxü̃ma i duü̃xü̃gü rü tá nüxü̃ nadaugü ya yimá maxẽxẽxẽruxü̃ ya Tupana núma namucü”,
ñanagürü ga Ichaía ümatüxü̃ ga ore.
7 Rü yexguma Cuáü̃xü̃tawa naxĩxgu ga duü̃xü̃gü nax ínabaiü̃xẽẽãxü̃ca̱x, rü nüma ga Cuáü̃ rü ñanagürüama nüxü̃: —Pa Ãxtapearü Duü̃xü̃güx ¿Texé pemaxã nüxü̃ tixu nax na̱xcha̱xwa tá pibuxmüxü̃ i ngẽma poxcu i marü ingaicaxü̃?
8 ¡Rü mea pemaxẽ nax ngẽmaãcü guxü̃ma i duü̃xü̃gü nüxü̃ daugüxü̃ca̱x nax aixcüma marü nüxü̃ perüxoexü̃ i pecüma i chixexü̃! Rü tama name i ñaperügügü: “Taxũtáma Tupana toxü̃ napoxcue, erü Abraáü̃tanüxü̃ tixĩgü”, ñaperügügü. Erü tama ngẽmaca̱x nixĩ ya Tupana i duü̃xü̃güxü̃ namaxẽẽxü̃. Rü pemaxã nüxü̃ chixu rü ngẽxguma Tupana naxwa̱xegu rü tama nüxü̃́ naguxcha nax daa nutawa Abraáü̃tanüxü̃ nanguxü̃xẽẽxü̃.
9 Tupanaarü yuema rü marü íimemare nax yadaxü̃ãxü̃ca̱x i ngẽma nanetügü i tama mexü̃. Rü guxü̃ma i nanetügü i chixearü oṍxü̃ rü tá nadaxü̃, rü ñu̱xũchi üxüwa tá ínagu —ñanagürü ga Cuáü̃.
10 Rü yexguma ga duü̃xü̃gü rü Cuáü̃na nacagü, rü ñanagürügü: —¿Ta̱xacü ẽ̱xna nixĩ i mexü̃ nax tanaxüxü̃? —ñanagürügü.
11 Rü Cuáü̃ rü nanangãxü̃ rü ñanagürü: —Yíxema taxrechiruxe rü name nixĩ ya yíxema tüxü̃́ nataxúxena tanaxã i wüxi. Rü yíxema õnaã́xẽ rü name nixĩ i yíxema tüxü̃́ nataxúxemaxã tangau i tümaarü õna —ñanagürü.
12 Rü Cuáü̃xü̃tawa naxĩ ta ga ñuxre ga yatügü ga Rómaarü ãẽ̱xgacüca̱x diẽru ngĩxü̃ ideetanüxü̃. Rü nanaxwa̱xegü ga Cuáü̃ nax ínabaiü̃xẽẽxü̃. Rü Cuáü̃na nacagü, rü ñanagürügü: —Pa Ngúexẽxẽruxü̃, ¿Ta̱xacü nixĩ i mexü̃ nax tanaxüxü̃ i tomax? —ñanagürügü.
13 Rü Cuáü̃ rü ñanagürü nüxü̃: —Tama name i ãẽ̱xgacü pemaxã nüxü̃ ixuxü̃arü yexera penayauxgü i diẽru i duü̃xü̃güxü̃tawa —ñanagürü.
14 Rü ñuxre ga churaragü rü ta Cuáü̃na nacagüe, rü ñanagürügü: —¿Toma rü ta̱xacü nixĩ i mexü̃ nax tanaxüxü̃? —ñanagürügü. Rü nanangãxü̃ ga Cuáü̃ rü ñanagürü: —Tama name i texéxü̃ pexãxũneãcüma tümaarü ngẽmaxü̃gü pepuxü̃. Rü tama name i ta̱xacürü doraxü̃ tümachigaxü̃ pixu. Rü name nixĩ i ngẽma diẽru i ãẽ̱xgacü pexü̃́ ngĩmaxã naxütanücümaxã petaãẽgü rü tama yexeracüca̱x ípeca —ñanagürü.
15 Rü yexguma ga duü̃xü̃gü rü poraãcü ínanangu̱xẽẽgü nax paxa ínanguxü̃ ga Tupana Nane ga Cristu. Rü nagu narüxĩnüe rü bexmana Cuáü̃ rü Cristu nax yixĩxü̃.
16 Natürü ga Cuáü̃ rü guxãxü̃ ñanagürü: —Aixcüma i choma rü dexáwamare pexü̃ íchabaiü̃xẽxẽ, natürü tá ínangu i to i Tupanaarü orearü uruxü̃, rü nüma tá pexna nananguxẽxẽ i Tupanaãxẽ ya Üünecü wüxi i üxüemarüxü̃. Erü nüma rü choxü̃ narüyexera nax naporaxü̃. Rü choma rü nape̱xewa rü taxuwama chame rü bai i norü chapatucunüarü wẽgüwa chame.
17 Rü nüma rü ínamemare nax yadexechiãxü̃ca̱x i norü duü̃xü̃gü ñoma trigu naatüna idexechixü̃rüxü̃. Rü ngẽmaãcü tá nayadexechi i ngẽma noxrü ixĩgüxü̃ nax naxü̃tawa nangẽxmagüxü̃ca̱x, natürü ngẽma tama noxrü ixĩgüxü̃, rü tá ínanagu nawa ya yima üxü ya taguma ixoxü̃ne —ñanagürü.
18 Rü yema oremaxã rü muxü̃ma ga to ga ucu̱xẽgümaxã, rü Cuáü̃ duü̃xü̃gümaxã nüxü̃ nixu ga ore ga mexü̃ ga Ngechuchuchiga.
19 Rü Cuáü̃ rü ãẽ̱xgacü ga Eródexü̃ naxoregü, yerü ngĩmaxã naxãxma̱x ga Erodía ga naenexẽ ga Ferípe naxma̱x. Rü yexgumarüxü̃ ta nüxü̃ naxoregü naxca̱x ga yema togü ga chixexü̃ ga naxüxü̃.
20 Natürü ga Eróde rü tama Cuáü̃ga naxĩnü. Rü yexeraxü̃ ga chixexü̃ naxü, yerü poxcupataü̃wa Cuáü̃xü̃ namu.
Ngechuchuarü baiechiga
21 Rü yexguma taxũta napoxcugu ga Cuáü̃, rü guxü̃ ga duü̃xü̃güxü̃ ínabaiü̃xẽẽyane, rü yexguma ta nixĩ ga Ngechuchuxü̃ ínabaiexẽẽxü̃. Rü yexguma Ngechuchu íyumüxẽyane rü ningena ga daxũguxü̃ ga naane.
22 Rü Tupanaãxẽ ya Üünecü rü wüxi ga muxtucurüxü̃ inanago rü Ngechuchuna nangu. Rü daxũwa inanaxũ ga wüxi ga naga ga ñaxü̃: —Cuma nixĩ, Pa Chaunex, i cuxü̃ changechaü̃xü̃chixü̃ rü cumaxã chataãẽxü̃ —ñaxü̃.
Ngechuchu ya Cristu natanüwa ngóxü̃ ga duü̃xü̃güchiga
23 Ngechuchu rü 30 ga taunecü nüxü̃́ nayexma ga yexguma inaxügüãgu nax duü̃xü̃gümaxã nüxü̃ yaxuxü̃ ga norü ore. Rü duü̃xü̃gü nagu narüxĩnüe nax Yúche nane yixĩxü̃ ga Ngechuchu.Rü Yúche rü Erí nane nixĩ.
24 Rü Erí rü Matáx nane nixĩ.Rü Matáx rü Lebí nane nixĩ.Rü Lebí rü Merequí nane nixĩ.Rü Merequí rü Yanái nane nixĩ.Rü Yanái rü Yúche nane nixĩ.
25 Rü Yúche rü Matatía nane nixĩ.Rü Matatía rü Amú nane nixĩ.Rü Amú rü Naúü̃ nane nixĩ.Rü Naúü̃ rü Echí nane nixĩ.Rü Echí rü Nagái nane nixĩ.
26 Rü Nagái rü Máax nane nixĩ.Rü Máax rü Matatía nane nixĩ.Rü Matatía rü Chemeí nane nixĩ.Rü Chemeí rü Yuchéx nane nixĩ.Rü Yuchéx rü Yoiadá nane nixĩ.
27 Rü Yoiadá rü Yoanáü̃ nane nixĩ.Rü Yoanáü̃ rü Rechá nane nixĩ.Rü Rechá rü Chorobabé nane nixĩ.Rü Chorobabé rü Charatié nane nixĩ.Rü Charatié rü Nerí nane nixĩ.
28 Rü Nerí rü Merequí nane nixĩ.Rü Merequí rü Adí nane nixĩ.Rü Adí rü Cocháü̃ nane nixĩ.Rü Cocháü̃ rü Elmadáü̃ nane nixĩ.Rü Elmadáü̃ rü Éx nane nixĩ.
29 Rü Éx rü Yechú nane nixĩ.Rü Yechú rü Eriéche nane nixĩ.Rü Eriéche rü Yoríü̃ nane nixĩ.Rü Yoríü̃ rü Matáx nane nixĩ.Rü Matáx rü Lebí nane nixĩ.
30 Rü Lebí rü Chimeóü̃ nane nixĩ.Rü Chimeóü̃ rü Yudá nane nixĩ.Rü Yudá rü Yúche nane nixĩ.Rü Yúche rü Yonáü̃ nane nixĩ.Rü Yonáü̃ rü Eriaquíü̃ nane nixĩ.
31 Rü Eriaquíü̃ rü Meréa nane nixĩ.Rü Meréa rü Mená nane nixĩ.Rü Mená rü Matáta nane nixĩ.Rü Matáta rü Natáü̃ nane nixĩ.Rü Natáü̃ rü Dabí nane nixĩ.
32 Rü Dabí rü Ichaxí nane nixĩ.Rü Ichaxí rü Obéx nane nixĩ.Rü Obéx rü Boó nane nixĩ.Rü Boó rü Chéra nane nixĩ.Rü Chéra rü Nachóü̃ nane nixĩ.
33 Rü Nachóü̃ rü Aminadá nane nixĩ.Rü Aminadá rü Amíü̃ nane nixĩ.Rü Amíü̃ rü Arní nane nixĩ.Rü Arní rü Eróü̃ nane nixĩ.Rü Eróü̃ rü Fáre nane nixĩ.Rü Fáre rü Yudá nane nixĩ.
34 Rü Yudá rü Acóbu nane nixĩ.Rü Acóbu rü Ichaá nane nixĩ.Rü Ichaá rü Abraáü̃ nane nixĩ.Rü Abraáü̃ rü Téra nane nixĩ.Rü Téra rü Nacóx nane nixĩ.
35 Rü Nacóx rü Cherúx nane nixĩ.Rü Cherúx rü Ragáu nane nixĩ.Rü Ragáu rü Pérex nane nixĩ.Rü Pérex rü Ébe nane nixĩ.Rü Ébe rü Chéra nane nixĩ.
36 Rü Chéra rü Caináü̃ nane nixĩ.Rü Caináü̃ rü Arpacháx nane nixĩ.Rü Arpacháx rü Chéü̃ nane nixĩ.Rü Chéü̃ rü Noé nane nixĩ.Noé rü Laméx nane nixĩ.
37 Rü Laméx rü Matucharéü̃ nane nixĩ.Rü Matucharéü̃ rü Enóx nane nixĩ.Rü Enóx rü Yérex nane nixĩ.Rü Yérex rü Mararéx nane nixĩ.Rü Mararéx rü Caináü̃ nane nixĩ.
38 Rü Caináü̃ rü Enóx nane nixĩ.Rü Enóx rü Chéx nane nixĩ.Rü Chéx rü Adáü̃ nane nixĩ.Rü Adáü̃ rü Tupana nane nixĩ.
