San Lucas 7:1-50
7 Rü yexguma nüxü̃ nachauxgu ga duü̃xü̃gümaxã nax yadexaxü̃ ga Ngechuchu, rü Capernáü̃wa naxũ.
2 Rü yéma nayexma ga wüxi ga churaragüarü capitáü̃ ga Rómacüã̱x. Rü gumá capitáü̃ rü nüxü̃́ nayexma ga wüxi ga norü duü̃xü̃ ga poraãcü nüxü̃ nangechaü̃xü̃. Rü yema norü duü̃xü̃ rü nida̱xawe, rü naturaxüchi.
3 Rü yexguma Ngechuchuxü̃ naxĩnüchigagu ga gumá capitáü̃, rü Ngechuchuxü̃tawa nanamugü ga ñuxre ga Yudíugüarü ãẽ̱xgacügü. Rü ñanagürü nüxü̃: —¡Ngéma Ngechuchuxü̃tawa pexĩ nax nüxü̃ peca̱a̱xü̃güxü̃ca̱x nax núma chopatawa naxũxü̃ca̱x nax chorü duü̃xü̃ca̱x yanataanexẽẽãxü̃ca̱x! —ñanagürü.
4 Rü Ngechuchuxü̃tawa naxĩ, rü poraãcü nüxü̃ naca̱a̱xü̃gü, rü ñanagürügü: —Name nixĩ i nüxü̃ curüngü̃xẽxẽ ya torü capitáü̃.
5 Erü nüma ya torü capitáü̃ rü guxü̃ i Yudíugüxü̃ nangechaü̃. Rü nümatama nanaxütanü nax naxügüã̱xü̃ca̱x ga tórü ngutaque̱xepataxü̃ —ñanagürügü.
6 Rü yexguma ga Ngechuchu rü nawe narüxũ. Natürü yexguma marü capitáü̃pataxü̃ yangaicagu, rü nüma ga capitáü̃ rü Ngechuchuca̱x yéma nanamu ga ñuxre ga namücügü nax namaxã nüxü̃ yanaxugüxü̃ca̱x ga norü ore ga ñaxü̃: —Pa Corix, tama cuxü̃ chachixewechaü̃ nax chopatawa cunguxü̃ erü choma rü taxuwama chame nax chopatagu cuxücuxü̃.
7 Rü ngẽmaca̱x nixĩ i tama chomatama cuxca̱x chayaca̱xaxü̃. Rü chanaxwa̱xe i curü orewaxicatama nüxü̃ quixu nax naxca̱x yataanexü̃ i chorü duü̃xü̃.
8 Erü choma rü ta chorü ãẽ̱xgacüme̱xẽwa changexma, rü cho̱xme̱xwa nangẽxmagü ta i ñuxre i churaragü. Rü ngẽxguma chanamuxgu i wüxi nax ngextá naxũxü̃ca̱x, rü ngéma naxũ. Rü ngẽxguma chaugüxü̃tawa naxca̱x changemagu i to, rü chauxü̃tawa nangu. Rü ngẽxguma chorü duü̃xü̃xü̃ chamuxgu nax ta̱xacü naxüxü̃ca̱x, rü choxü̃́ nanaxü —ñanagürü.
9 Rü nüma ga Ngechuchu rü yexguma nüxü̃ naxĩnügu ga yema capitáü̃arü ore rü naba̱i̱xãchiãxẽ. Rü yema duü̃xü̃gü ga nawe rüxĩxü̃xü̃ nadawenü, rü ñanagürü: —Aixcüma pemaxã nüxü̃ chixu rü taxuxü̃ma i Iraétanüxü̃gütanüwa nüxü̃ ichayangau i wüxi i duü̃xü̃ i ngẽma yatürüxü̃ aixcüma yaxõxü̃ —ñanagürü.
10 Rü yexguma nawoegugu ga yema capitáü̃mücügü ga Ngechuchuxü̃tawa namugüxü̃, rü nüxü̃ inayangaugü ga marü naxca̱x nax yataanexü̃ ga yema capitáü̃arü duü̃xü̃.
Ngechuchu ínanadaxẽxẽ ga wüxi ga yutecü ngĩne
11 Rü yemawena ga Ngechuchu rü wüxi ga ĩane ga Naíü̃gu ãéganewa naxũ. Rü nawe narüxĩ ga norü ngúexü̃gü, rü muxü̃ma ga togü ga duü̃xü̃gü.
12 Rü yexguma guma ĩanearü ngaicamana nanguxgu, rü tüxü̃ nadau ga wüxi ga yueta ga ta̱xgüwa tüxü̃ nangegüxe. Rü guxema yuetaarü mama rü tayute rü gumá yucü rü guxicatama nixĩ ga tümane ixĩcü. Rü muxü̃ma ga duü̃xü̃gü ga gumá ĩanecüã̱x rü tüxü̃ ínixümücügü.
13 Rü yexguma Cori ga Ngechuchu gumá yucüarü mamaxü̃ da̱u̱xgu, rü nüxü̃́ ingechaü̃tümüxü̃. Rü ñanagürü ngĩxü̃: —¡Taxṹ i cuxaxuxü̃! —ñanagürü.
14 Rü yexguma ga Ngechuchu rü yuetaca̱x nixũ, rü nüxü̃ ningõgü ga tümachiü̃. Rü yema tüxü̃ ingetaü̃güxü̃ rü tümamaxã inayachiãchitanü. Rü ñanagürü ga Ngechuchu tüxü̃ ga guxema yueta: —Pa Ngextü̱xücüx, ¡írüda! —ñanagürü.
15 Rü yexguma ga gumá yuchire̱xcü rü ínarüto, rü inanaxügü nax yadexaxü̃. Rü Ngechuchu rü naéxü̃tawa nanamu.
16 Rü yexguma yemaxü̃ nadaugügu ga duü̃xü̃gü, rü guxü̃ma namuü̃e. Rü inanaxügüe ga Tupanaxü̃ nax yacua̱xüü̃güxü̃. Rü ñanagürügü: —Wüxi i Tupanaarü orearü uruxü̃ i poraxü̃ tatanüwa nango̱x —ñanagürügü. Rü ñanagürügü ta: —Tupana nua naxũ nax norü duü̃xü̃güxü̃ yanangü̃xẽẽxü̃ca̱x —ñanagürügü.
17 Rü guxü̃ma ga Yudéaanewa rü norü ngaicamana, rü duü̃xü̃gü nüxü̃ nacuáchigagü ga yema Ngechuchu üxü̃.
Cuáü̃ ga baiü̃ẽxẽruxü̃ rü Ngechuchuxü̃tawa nanamugü ga taxre ga norü duü̃xü̃gü
18 Rü Cuáü̃ ga baiü̃ẽẽruxü̃ rü nüxü̃ nacuáchiga ga guxü̃ma ga yema Ngechuchu üxü̃, yerü norü ngúexü̃gü ga Cuáü̃ rü namaxã nüxü̃ nixugü. Rü yemaca̱x ga Cuáü̃ rü taxre ga norü ngúexü̃güca̱x nangema.
19 Rü Ngechuchuxü̃tawa nanamugü. Rü Cuáü̃ rü ñanagürü nüxü̃: —¡Ngéma pexĩ rü Ngechuchuna peca rü ñapegügü nüxü̃: “¿Cuma yixĩxü̃ i Cristu i cuxü̃ ítanangu̱xẽẽxü̃, rü ẽ̱xna to tá yixĩxü̃ i Cristu?” —ñapegügü nüxü̃!
20 Rü yema yatügü ga Cuáü̃ Ngechuchuxü̃tawa mugüxü̃, rü Ngechuchuca̱x naxĩ. Rü ñanagürügü nüxü̃: —Cuáü̃ ya báiü̃xẽẽruxü̃ núma cuxü̃tawa toxü̃ namugü nax cuxna tayacagüxü̃ca̱x rü ¿aixcüma cuma quixĩxü̃ i Cristu ya núma nguxchaü̃cü, rü ẽ̱xna to tá yixĩxü̃ i Cristu? —ñanagürügü.
21 Rü yexgumatama Ngechuchuxü̃tawa nangugügu ga Cuáü̃arü ngúexü̃gü, rü Ngechuchu nanameexẽxẽ ga muxü̃ma ga duü̃xü̃gü ga naguxü̃raü̃xü̃ ga da̱xawemaxã ida̱xaweexü̃ rü yema ingo̱xoã́xü̃. Rü nayadauuchigüxẽxẽ ga muxü̃ma ga ingexetüxü̃.
22 Rü yemaca̱x Ngechuchu nanangãxü̃ rü ñanagürü: —¡Pewoegu rü Cuáü̃maxã nüxü̃ peyarüxu i ngẽma pematama nüxü̃ pedauxü̃ rü nüxü̃ pexĩnüexü̃! ¡Rü namaxã nüxü̃ pixu i ngẽma ingexetüxü̃ rü marü nidauuchigü, rü ngẽma ichixeparaxü̃ rü marü inachigü, rü ngẽma chaxüneã̱xgüxü̃ rü marü naxca̱x nitaanegü, rü ngẽma ngauchi̱xẽgüxü̃ rü marü ningo̱xnamachixẽgü, rü ngẽma yuexü̃ rü wenaxarü namaxẽ, rü ngẽma ingearü diẽruã̱xgüxü̃maxã marü nüxü̃ tixu i Tupanaarü ore i mexü̃!
23 Rü tataãxẽ ya yíxema choxü̃́ yaxṍxe rü tama choxü̃ ítáxe —ñanagürü ga Ngechuchu.
24 Rü yexguma nawoegu̱xgu ga yema duü̃xü̃gü ga Cuáü̃ yéma mugüxü̃, rü Ngechuchu inanaxügü ga gumá Cuáü̃chiga nax yadexaxü̃. Rü duü̃xü̃gümaxã nüxü̃ nixu, rü ñanagürü: —¿Ta̱xacü nixĩ ga pema ípeyadaugüxü̃ ga chianexü̃wa ga taxúema íxãpataxü̃wa? ¿Ẽ̱xna wüxi ga dexne ga buanecü yaxĩã̱xtanücüüxẽxẽcürüxü̃ nixĩ ga ípeyadaugüxü̃?
25 Rü yexguma tama gumá ípeyadaugügu, ¿rü ta̱xacü nixĩ ga ípeyadaugüxü̃? ¿Ẽ̱xna wüxi ga yatü ga nügü nga̱xãẽcü ípeyadaugü? Pema nüxü̃ pecua̱x i ngẽma nügü nga̱xãẽgüxü̃ rü nachixü̃anegüarü ãẽ̱xgacügüpatawa nangẽxmagü, rü taxuca̱xma chianexü̃wa nangẽxmagü.
26 ¿Ta̱xacü ẽ̱xna nixĩ ga ípeyadaugüxü̃? ¿Ẽ̱xna wüxi ga Tupanaarü orearü uruxü̃? Ngẽmáacü aixcüma yema nixĩ ga ípeyadaugüxü̃. Rü pemaxã nüxü̃ chixu rü Cuáü̃ ya báiü̃xẽẽruxü̃ rü wüxi i Tupanaarü orearü uruxü̃arü yexera nixĩ.
27 Rü Cuáü̃chiga nixĩ ga naxümatüxü̃ ga yema Tupanaarü ore ga ñaxü̃:“Cupe̱xegu chayamu i chorü orearü ngeruxü̃ nax cuxca̱x namexẽxẽãxü̃ca̱x i cumaxü̃”,
ñaxü̃.
28 Rü pemaxã nüxü̃ chixu rü guxü̃ i duü̃xü̃gütanüwa rü nataxuma i Tupanaarü orearü uruxü̃ i Cuáü̃ ya baiü̃ẽẽruü̃arü yexera. Natürü yíxema Tupana ãẽ̱xgacü ixĩxü̃wa guxü̃arü yexera taxuxü̃ma ixĩxẽ, rü Cuáü̃arü yexera tixĩ —ñanagürü.
29 Rü guxü̃ma ga duü̃xü̃gü rü woo yema yatügü ga Rómaarü ãẽ̱xgacüca̱x diẽru ngĩxü̃ ideetanüxü̃, rü yexguma nüxü̃ naxĩnüegu ga Cuáü̃arü ore rü ínabaiü̃, rü Tupanaxü̃ nicua̱xüü̃gü yerü nüxü̃ nicua̱xãchitanü nax aixcüma mecü yixĩxü̃ ya Tupana.
30 Natürü yema Parichéugü rü yema ngúexẽẽruü̃gü ga Moichéarü mugüwa ngu̱xẽẽtaegüxü̃ rü tama nanaxwa̱xegü nax Cuáü̃ ínabaiü̃xẽẽxü̃. Rü yemaacü nüxü̃ naxoe ga yema mexü̃ ga Tupana naxca̱x nagu rüxĩnüxü̃.
31 Rü nüma ga Cori ya Ngechuchu rü ñanagürü: —¿Ta̱xacügu tá chanangu i ñomaü̃cüü maxẽxü̃ i duü̃xü̃gü? ¿Rü ta̱xacürüxü̃ nixĩgü?
32 Rü ñaa duü̃xü̃gü rü taxuxü̃maama nataãẽgü ngẽxgumarüxü̃ i ngẽma buxü̃gü i plazawa rütogüxü̃, rü íxĩnüca̱xwa̱xegüxü̃, rü tagaãcü namücügüxü̃ ñagüxü̃: “Marü wowerumaxã pexca̱x tapaxetagü natürü tama ípixü̃ãchitanüxü̃. Rü marü ngechaü̃xü̃ i wiyaegu pexca̱x tawiyaegü natürü tama pexauxe”, ñagüxü̃. Rü ngẽma buxü̃gürüxü̃ taxuxü̃maama nataãẽgü i ñomaü̃cüü i duü̃xü̃gü.
33 Yerü ga Cuáü̃ ga baiü̃ẽxẽruxü̃ rü núma naxũ, rü tama paũ nangõ̱x rü tama bínu nayaxaxü. Rü yexguma ga pema rü: “Nango̱xoã̱x”, ñaperügügü nüxü̃.
34 Rü ñu̱xũchi núma naxũ ya Tupana Nane nax duü̃xü̃xü̃ ixĩcü, rü õna nangõ̱x rü bínu nayaxaxü. Rü ngẽxguma i pema rü ñaperügügü nüxü̃: “Nataanüxü̃chi rü nangãxwa̱xe, rü pecaduã̱xgüxü̃ i duü̃xü̃gümaxã naxãmücü, rü yatügü i Rómaarü ãẽ̱xgacüca̱x diẽru ngĩxü̃ ideetanüxü̃maxã naxãmücü”, ñaperügügü nüxü̃.
35 Natürü Tupanaarü cua̱x rü meama nango̱x tümawa ya yíxema aixcüma nawe rüxĩxe —ñanagürü ga Ngechuchu.
Ngechuchu rü Parichéu ga Chimóü̃patawa nayexma
36 Rü wüxi ga Parichéu rü Ngechuchuna naxu nax napatawa nachibüxü̃ca̱x. Rü yéma naxũ ga Ngechuchu rü yema Parichéuarü mechawa nayarüto.
37 Rü wüxi ga ngecü ga chixexü̃gu maxü̃cü ga gumá ĩanecüã̱x, rü yexguma nüxü̃ nacuáchigagu nax Parichéupatawa tá nax nachibüxü̃ ga Ngechuchu, rü yéma ixũ. Rü yéma inange ga wüxi ga pumara ga yixixü̃ ga wüxi ga butiya ga nutanaxca̱xmaxã ãxchiü̃xü̃.
38 Rü naxauxãcüma Ngechuchucutüxü̃tawa iyarütoxõchi. Rü ngĩxgüxü̃xetümaxã iyawaicutüxẽxẽ. Rü ngĩyaemaxã ínapicutü, rü inachúxcutü. Rü ñu̱xũchi yema pumaramaxã inachacutü.
39 Rü yexguma yemaxü̃ nada̱u̱xgu ga yema Parichéu ga Ngechuchuna uxü̃, rü naãxẽwa nagu narüxĩnü rü nügümaxãtama ñanagürü: —Ngẽxguma chi ñaa Ngechuchu rü aixcüma wüxi i Tupanaarü orearü uruxü̃ yixĩxgu, rü chi nüxü̃ nacua̱x nax ta̱xacü yixĩxü̃ i ñaa ngexü̃ i nüxü̃ ingõgüxü̃ rü chi nüxü̃ nacua̱x nax wüxi i ngexü̃ i chixexü̃gu maxü̃xü̃ yixĩxü̃ —ñanagürü ga naãxẽwa.
40 Rü yexguma ga Ngechuchu rü Parichéuxü̃ ñanagürü: —Pa Chimóü̃, choxü̃́ nangẽxma i wüxi i ore i cumaxã nüxü̃ chixuxchaü̃xü̃ —ñanagürü. Rü nüma ga Parichéu rü Ngechuchuxü̃ nangãxü̃, rü ñanagürü: —¡Ẽcü, chomaxã nüxü̃ ixu, Pa Ngúexẽxẽruxü̃! —ñanagürü.
41 Rü ñanagürü ga Ngechuchu: —Taxre ga yatügü rü wüxi ga corixü̃tawa nanangetanü. Rü wüxi nanangetanü ga 500 tachinü ga diẽru rü to nanangetanü ga 50 tachinü.
42 Natürü yema taxre rü taxuacü nanaxütanü ga norü ngetanü. Rü yemaca̱x düxwa yema norü cori rü nüxü̃́ nüxü̃ narüngüma ga yema nüxü̃́ nax nangetanügüãxü̃. Rü ñu̱xmax, Pa Chimóü̃, rü ¡chomaxã nüxü̃ ixu! rü ¿ngexü̃rüüxü̃ ga yema taxre ga yatügü rü yexeraãcü norü corixü̃ nangechaü̃? —ñanagürü.
43 Rü Ngechuchuxü̃ nangãxü̃ ga Chimóü̃, rü ñanagürü: —Cha̱u̱xca̱x ga yema yexeraãcü nüxü̃́ nangetanüxü̃ nixĩ ga yexeraãcü norü corixü̃ ngechaü̃xü̃ —ñanagürü. Rü Ngechuchu rü ñanagürü nüxü̃: —Ngẽmáacü aixcüma nüma nixĩ —ñanagürü.
44 Rü yexguma ga Ngechuchu rü ngĩxü̃ nadawenü ga yema ngecü, rü ñanagürü Chimóü̃xü̃: —¿Ngĩxü̃ cudauxü̃ i ñaa ngecü? Rü cupatagu chaxücu i chomax, Pa Chimóü̃, natürü tama dexá choxna ta cuxã chorü yauxcutüruxü̃. Natürü ñaa ngecü rü ngĩxgüxü̃xetümaxã choxü̃ iyawaicutüxẽxẽ, rü ngĩyaemaxã choxü̃ íipicutü.
45 Cuma rü tama choxü̃ cuchúxu i noxri choxü̃ curümoxẽgu, natürü ngĩma i ñaa ngecü rü noxri núma changuxgumama rü choxü̃ iyachúxcutüchigü.
46 Cuma rü tama pumaramaxã choxü̃ cuchaeru, natürü ngĩma i ñaa ngecü rü chaucutügu inaba i pumara.
47 Rü ngẽmaca̱x woo namu i ngĩrü pecadugü, natürü Tupana ngĩxü̃́ nüxü̃ narüngüma i guxü̃ma, erü ngĩma rü aixcüma choxü̃ ingechaü̃. Rü ngẽxguma wüxi i íxraxü̃ i guxchaxü̃ texéaxü̃́ nüxü̃ rüngü̃magu rü naxíra i tümaarü ngechaü̃ —ñanagürü.
48 Rü yexguma ga Ngechuchu rü yema ngecüxü̃ ñanagürü: —Curü pecadugü rü marü cuxü̃́ nüxü̃ changechaü̃ —ñanagürü.
49 Rü yema togü ga yéma mechawa rütogüxü̃, rü inanaxügü ga nügümaxã nax yadexagüxü̃. Rü ñanagürügü: —¿Ta̱xacü nixĩ i ñaa yatü, rü ngẽmaca̱x duü̃xü̃güaxü̃́ pecaduxü̃ iyanangümaxü̃? —ñanagürügü.
50 Natürü ga Ngechuchu rü ñanagürü ngĩxü̃ ga yema ngecü: —Curü õgagu rü marü nüxna ícunguxuchi i curü pecadugü. ¡Rü taãẽãcüma nataegu! —ñanagürü.
