San Mateo 10:1-42
10 Rü yexguma ga Ngechuchu, rü yema 12 ga norü ngúexü̃güca̱x naca. Rü nüxna naxãga rü nanaporaexẽxẽ nax ínawoxü̃ãxü̃ca̱x ga ngo̱xogü rü nameexẽẽãxü̃ca̱x ga duü̃xü̃gü ga ida̱xaweexü̃ ga woo nañuxraü̃xü̃ ga da̱xawe nüxü̃́ yexmagüxü̃.
2 Rü ñaa nixĩ ga naégagü ga yema 12 ga Ngechuchuarü ngúexü̃gü ga imugüxü̃. Rü yema nüxíra naxca̱x naca̱xaxü̃ nixĩ ga Chimóü̃ ga Pedrugu ãégaxü̃. Rü to nixĩ ga Pedruenexẽ ga André. Rü to nixĩ ga Chantiágu, rü to nixĩ ga Chantiáguenexẽ ga Cuáü̃. Rü yema taxre rü Chebedéu nanegü nixĩgü.
3 Rü togü nixĩ ga Ferípe, rü Barturumé, rü Tumáchi, rü Matéu ga Rómaarü ãẽ̱xgacüca̱x diẽruarü yauxwa puracüchirécü. Rü togü nixĩ ga Chantiágu ga Arupéu nane, rü Tadéu.
4 Rü to nixĩ ga Chimóü̃ ga Poraãẽxü̃. Rü to nixĩ ga Yúda ga Icharióte ga bexma Ngechuchuxü̃ íxuaxü̃xü̃.
Ngechuchu rü norü ngúexü̃güxü̃ nimugü nax nüxü̃ yanaxugüexü̃ca̱x ga Tupanaarü ore
5 Rü Ngechuchu nayamugü ga yema 12 ga norü ngúexü̃gü. Rü nüxna naxãga, rü ñanagürü: “¡Taxũtáma natanüwa pexĩ i ngẽma duü̃xü̃gü i tama Yudíugü ixĩgüxü̃! ¡Rü taxũtáma Chamáriacüã̱x i duü̃xü̃güarü ĩanegüwa pexĩ!
6 Natürü natanüwa pexĩ i ngẽma Iraétanüxü̃gü i ñoma carnérugürüxü̃ iyarütauxexü̃.
7 ¡Rü ngéma natanüwa nüxü̃ peyarüxu nax marü yangaicaxü̃ nax norü ãẽ̱xgacü yixĩxü̃ ya Tupana ya daxũwa ãẽ̱xgacü ixĩcü!
8 ¡Rü penameexẽxẽ i ngẽma ida̱xaweexü̃! ¡Rü wena penamaxẽxẽẽ̱x i ngẽma marü yuexü̃! ¡Rü penameexẽxẽ i ngẽma chaxünemaxã ida̱xaweexü̃! Rü ngẽma ngo̱xoã̱xgüxü̃ ¡rü nawa ípenawoxü̃! Rü tama name i penaxãtanü ega texéxü̃ perümexẽẽgu, erü ngẽma pora i pexü̃́ ngẽxmaxü̃ rü pexü̃́ nangetanümare.
9 10:9-10 ¡Rü taxũtáma ípingearü diẽruã̱xgü, rü bai i perü choca i perü ngẽmaxü̃güchixü̃! ¡Rü bai i to i pexchiru, rü bai i to i perü chapatu, rü bai ya perü naixmena̱xã ípinge! Erü wüxi i puracütanüxü̃ rü name nax nachibüxẽẽxü̃.
10 Nüü̃ nadau 10:9
11 Rü ngẽxguma wüxi ya ĩanewa rüe̱xna wüxi ya ĩanexacüwa pengugügu i pemax, ¡rü naxca̱x peda̱u̱x i wüxi i duü̃xü̃ i mecümaxü̃! ¡Rü ngẽmaxü̃tagu perücho ñu̱xmatáta ipexĩãchi i ngẽma ĩanewa!
12 ¡Rü ngẽxguma yima ĩpatagu pechocuxgu, rü mea nüxü̃ perümoxẽgü i ngẽma duü̃xü̃gü! Rü: ‘¡Tupana pexü̃ rüngü̃xẽxẽ!’ ñaperügügü nüxü̃.
13 Rü ngẽxguma ngẽma duü̃xü̃gü mea pexü̃ nayaxugu rü Tupana tá nüxü̃ narüngü̃xẽxẽ. Natürü ngẽxguma tama mea pexü̃ nayaxugu rü pexrütama tá nixĩ i ngẽma Tupanaarü ngü̃xẽxẽ.
14 Rü ngẽxguma wüxi ya ĩwa rüe̱xna wüxi ya ĩanewa tama mea pexü̃ nayauxgügu rü tama nüxü̃ naxĩnüechaü̃gu i perü ore, ¡rü ípechoxü̃ nawa ya yima ĩpata rüe̱xna yima ĩane! Rü ngẽxguma ípechoxü̃gu, ¡rü ngẽxma penapagü i perü üxaxü̃cutü!
15 Rü aixcüma pemaxã nüxü̃ chixu rü ngẽma ngunexü̃ i nagu Tupana nüxü̃ ícagüxü̃ i duü̃xü̃gü, rü Gomóracüã̱x rü Chodómacüã̱x i duü̃xü̃güarü yexera Tupana tá nanapoxcue i ngẽma duü̃xü̃gü i tama mea pexü̃ yauxgüxü̃.
Ãũcümaxü̃maxã tá pewé ningẽxü̃tanü i duü̃xü̃gü
16 Dücax, choma rü ñoma carnérugü i airugü i düraexü̃tanüwa imugüxü̃rüxü̃ pexü̃ chamugü. ¡Rü ngẽmaca̱x penaxwa̱xe i ãxtapegürüxü̃ pexuãẽgü, natürü muxtucugürüxü̃ taxuxü̃ma i chixexü̃ pexügü!
17 ¡Rü pegüna pedaugü! Erü duü̃xü̃gü rü tá pexü̃ ínayauxü̃, rü ãẽ̱xgacügüxü̃tawa tá pexü̃ nagagü nax pexü̃ napoxcuexü̃ca̱x. Rü ngutaque̱xepataü̃gügu tá pexü̃ nicua̱i̱xgü.
18 Rü chaugagu tá ãẽ̱xgacügüpe̱xewa pexü̃ nagagü. Rü ngẽmaãcü tá pexãchica nax chauchiga pidexagüxü̃ nape̱xewa i ngẽma ãẽ̱xgacügü rü nape̱xewa i ngẽma tama Yudíugü ixĩgüxü̃.
19 Natürü ngẽxguma ãẽ̱xgacügüpe̱xewa pexü̃ nagagügu nax pexü̃ napoxcuexü̃ca̱x, ¡rü taxuca̱xtama pexoegaãẽgü nax ta̱xacümaxã tá penangãxü̃xü̃ rüe̱xna ta̱xacüxü̃ tá namaxã pixuxü̃! Erü ngẽxguma nawa nanguxgu nax pidexagüxü̃, rü Tupana tá pexü̃ nangu̱xẽxẽ nax ta̱xacüxü̃ tá namaxã pixuxü̃.
20 Rü taxũtáma pema nixĩ i pidexagüxü̃, natürü Tupanaãxẽ ya Üünecü tá nixĩ i pewa idexaxü̃.
21 Rü nügüenexẽgüwa rü tá nügü ínaxuaxü̃gü nax ãẽ̱xgacügü yama̱xgüxü̃ca̱x. Rü ngẽxgumarüxü̃ ta i nanatügü rü tá naxacügüxü̃ ínaxuaxü̃gü, rü naxacügü rü tá nanatügüxü̃ ínaxuaxü̃gü nax ãẽ̱xgacügü tüxü̃ da̱i̱xü̃ca̱x.
22 Rü chaugagu tá guxü̃ i duü̃xü̃gü pexchi naxaie. Natürü yíxema aixcüma yaxṍxe rü tama choxü̃ ítáxe, rü yíxema tá tixĩ ya nayaxúxe i maxü̃ i taguma gúxü̃.
23 Rü ngẽxguma wüxi ya ĩanewa duü̃xü̃gü pexü̃ da̱i̱xchaü̃gu, rü name nixĩ i pibuxmü ya yima ĩanewa, rü nai ya ĩanewa pexĩ. Rü aixcüma pemaxã nüxü̃ chixu rü Tupana Nane ya duü̃xü̃xü̃ ixĩcü rü tá nataegu naxü̃pa nax guxü̃ne ya Iraéanearü ĩanegüwa pengugüxü̃.
24 Rü taxuxü̃ma i wüxi i ngúexü̃ rü norü ngúexẽẽruü̃xü̃ narüyexera. Rü taxuxü̃ma i wüxi i coriarü duü̃xü̃ rü norü corixü̃ narüyexera.
25 Rü ngẽma norü ngúexẽẽruü̃xü̃ üpetüxü̃rüxü̃ tátama nüxü̃ naxüpetü i ngẽma norü ngúexü̃. Rü ngẽma norü corixü̃ üpetüxü̃rüxü̃ tátama nüxü̃ naxüpetü i ngẽma norü duü̃xü̃. Rü ngẽxguma duü̃xü̃gü rü ngo̱xo i Beechebú choxü̃ wogügu, ¿rü ñuxãcü tá pexü̃ naxu i pemax?
Name nixĩ nax Tupanaxü̃ pemuü̃exü̃
26 Rü ngẽmaca̱x ¡taxṹ i nüxü̃ pemuü̃exü̃ i duü̃xü̃gü! Erü guxü̃ma i ta̱xacü i cúãcü üxü̃ rü tá nango̱xoma. Rü guxü̃ma i ñu̱xma ẽxü̃guxü̃, rü yixcüra rü duü̃xü̃gü tá nüxü̃ nacua̱xgüama.
27 Rü guxü̃ma i ngẽma bexma pemaxã nüxü̃ chixuxü̃, ¡rü mea duü̃xü̃güca̱x penango̱xẽxẽ! Rü guxü̃ma i ngẽma pemaxãxicatama nüxü̃ chixuxü̃, ¡rü tagaãcü guxü̃ i duü̃xü̃gümaxã nüxü̃ pixu!
28 ¡Rü taxṹ i nüxü̃ pemuü̃exü̃ i ngẽma duü̃xü̃gü i taxü̃nexü̃ imáxü̃! Erü taxucürüwa nayama̱x i taãxẽ. Natürü name nixĩ i nüxü̃ pemuü̃e ya yimá Tupana. Erü nüma nüxü̃́ nangẽxma i pora nax napoxcuãxü̃ca̱x i pexene rü peãxẽ rü ta nagu ya yimá üxü ya taguma ixoxü̃ne.
29 ¿Tama ẽ̱xna wüxitachinü i diẽrugu namaxã itaxexü̃ i taxre i werixacügü? Natürü bai i wüxi i ngẽma werixacü rü ñaxtüanegu nangu ega tama nanaxwa̱xegu ya Penatü ya Tupana.
30 Rü woo i peyae rü Tupana nayaxugü i wüxichigü, rü nüxü̃ nacua̱x nax ñuxre ngẽxmaxü̃.
31 Rü ngẽmaca̱x ¡taxṹ i pemuü̃exü̃! Erü pema rü muxü̃ma i weriacügüarü yexeraxüchi peme i Tupanape̱xewa.
Yíxema duü̃xü̃güpe̱xewa tügü ixuxe nax Ngechuchu ya Cristuarü duü̃xü̃gü tixĩxü̃
32 Rü guxãma ya texé ya duü̃xü̃güpe̱xewa tügü ixuxe nax chorü duü̃xü̃ tixĩxü̃, rü choma rü tá ta Chaunatü ya daxũgucüpe̱xewa tüxü̃ chixu nax chorü duü̃xü̃ tixĩxü̃ i tümax.
33 Natürü texé ya duü̃xü̃güpe̱xewa tügü ixuxe nax tama chorü duü̃xü̃ tixĩxü̃, rü choma rü tá ta Chaunatü ya daxũgucüpe̱xewa tüxü̃ chixu nax tama chorü duü̃xü̃ tixĩxü̃ i tümax.
Ngechuchugagu nitoye i duü̃xü̃gü
34 ¡Rü taxṹ i nagu perüxĩnüexü̃ nax núma chaxũxü̃ nax wüxigu naxĩnüexü̃ca̱x i guxü̃ma i duü̃xü̃gü! Natürü pemaxã nüxü̃ chixu rü núma chaxũ nax chaugagu yatoyexü̃ca̱x i duü̃xü̃gü.
35 Rü nua chaxũ nax wüxi ya yatü rü tama nanatümaxã wüxigu naxĩnüxü̃ca̱x, rü wüxi i paxü̃ rü tama naémaxã wüxigu naxĩnüxü̃ca̱x, rü wüxi i naneã̱x rü tama ngĩ̱xẽmaxã wüxigu naxĩnüxü̃ca̱x.
36 Rü ngẽmaãcü wüxi ya ĩwa, rü nügütanüxü̃maxã tátama naxuanüã̱xgü.
37 Rü yíxema choxü̃ nax tangechaü̃xü̃arü yexera tümanatüxü̃ rüe̱xna tümaéxü̃ ngechaü̃xe, rü taxucürüwama chorü duü̃xü̃ tixĩ. Rü yíxema choxü̃ nax tangechaü̃xü̃arü yexera tümanexü̃ rüe̱xna tümaxacüxü̃ ngechaü̃xe, rü taxucürüwama chorü duü̃xü̃ tixĩ.
38 Rü yíxema tama yáxna namaxã ĩnüxe i ngẽma guxchaxü̃gü i chaugagu tümaca̱x ínguxü̃ rü tama chowe rüxũxe, rü taxucürüwama chorü duü̃xü̃ tixĩ.
39 Rü texé tama cha̱u̱xca̱x inaxãxe i tümaarü maxü̃ rü tá itanatauxẽxẽ. Natürü texé cha̱u̱xca̱x inaxãxe i tümaarü maxü̃ rü tá tanayaxu i maxü̃ i taguma gúxü̃.
Ãmarechiga
40 Rü texé ya mea pexü̃ yaxúxe rü choxü̃ nixĩ i tayaxuxü̃. Rü texé ya choxü̃ yaxúxe rü yimá núma choxü̃ mucü ya Chaunatüxü̃ nixĩ i tayaxuxü̃.
41 Rü texé ya wüxi i Tupanaarü orearü uruü̃xü̃ yaxúxe erü orearü uruxü̃ nixĩ, rü tá ngẽmatama ãmare i wüxi i orearü uruxü̃ yaxuxü̃raxü̃xü̃ tátama tayaxu. Rü texé ya wüxi i yatü i mecümaxü̃xü̃ yaxúxe erü namecüma, rü tá ngẽmatama ãmare i wüxi i yatü i mecümaxü̃ yaxuxü̃raxü̃xü̃ tayaxu.
42 Rü texé ya wüxi i pochíyuãcu i dexá i ga̱u̱xchiüxü̃ nüxna ãxe i wüxi i ñaa chorü duü̃xü̃gü, rü aixcümaxü̃chi tá tanayaxu i tümaarü ãmare, erü wüxi i chorü duü̃xü̃xü̃ tarüngü̃xẽxẽ”, ñanagürü ga Ngechuchu.
