San Mateo 13:1-58
13 Rü yematama ngunexü̃gu ga Ngechuchu rü ínaxũxũ nawa ga gumá ĩ ga nagu napexü̃ne. Rü naxtaxaanacüwa nayarüto.
2 Rü muxü̃ma ga duü̃xü̃gü rü yéma naxca̱x nangutaque̱xegü. Rü yemaca̱x düxwa wüxi ga nguegu nixüe ga Ngechuchu, rü gumá nguewa narüto. Rü guxü̃ma ga duü̃xü̃gü rü yexma naxnücüte̱xegu nachigü.
3 Rü yexguma ga Ngechuchu rü muxü̃ma ga ore ga cua̱xruü̃wa nanangúexẽxẽ ga duü̃xü̃gü. Rü norü ngu̱xẽẽtaewa rü ñanagürü: —Wüxi ga yatü ga toecü rü triguchiremaxã nanagüane.
4 Rü yexguma triguchiremaxã natoegu rü namaxã nagüaneãgu, rü ñuxre ga gumá triguchire rü namacüwagu nayi. Rü ínangugü ga werigü, rü nanawecu.
5 Rü náigü ga triguchire rü nutatanügu nayi ga ngextá ínachixcaxü̃wa ga waixü̃mü. Rü paxa narüxügü ga gumá triguchire, yerü ga waixü̃mü rü tama nayaxcü.
6 Natürü yexguma nangunagügu ga üa̱xcü, rü narüñẽxgü ga yema trigu Rü nayue yerü tama poraãcü nixãma̱xã.
7 Guma náigü ga triguchire rü chuxchuxü̃necügu nayi. Rü yexguma nayaegu ga chuxchuxü̃gü, rü yema triguxü̃ inawocu.
8 Natürü náigü ga triguchire rü mexü̃ ga waixü̃mügu nayi. Rü yexguma nayaegu rü muxü̃ma ga trigu nawa ínanguxuchi. Rü nümaxü̃neya̱xawa rü 100 pü̱xü ínanguxuchi ga norü o, rü náiya̱xawa rü 60, rü náiya̱xawa rü 30.
9 Rü yíxema ãchi̱xẽgüxe, ¡rü nüxü̃ taxĩnüe i ñaa ore! —ñanagürü.
Tü̱xcüü̃ cua̱xruü̃gügu nixu ga ore
10 Rü yexguma ga norü ngúexü̃gü rü Ngechuchuca̱x naxĩ, rü nüxna nacagüe, rü ñanagürügü: —Pa Corix, ¿Tü̱xcüü̃ i cua̱xruü̃gügu cuyaxuãcü cunangúexẽẽxü̃ i ñaa duü̃xü̃gü? —ñanagürügü.
11 Rü Ngechuchu nanangãxü̃, rü ñanagürü nüxü̃: —Tupana rü pexü̃xicatama nüxü̃ nacua̱xẽxẽ i ngẽma ẽxü̃guxü̃ nax ñuxãcü ãẽ̱xgacü yixĩxü̃ i daxũguxü̃ i naanewa. Natürü ngẽma togü i duü̃xü̃gü rü tama nüxü̃ nüxü̃ nacua̱xẽxẽ i ngẽmachiga.
12 Rü yíxema aixcüma naga ĩnüxe i chorü ore, rü tá yexera i cua̱x tüxü̃́ nangẽxma. Rü ngẽmaãcü tá nata i tümaarü cua̱x. Natürü yíxema tama naga ĩnüxe i ñaa ore rü tá tüxna nanayaxu i ngẽma íxraxü̃ i cua̱x i tüxü̃́ ngẽxmachiréxü̃.
13 Rü ngẽmaca̱x nixĩ i ore i cua̱xruü̃maxã chanangúexẽẽxü̃ i ngẽma duü̃xü̃gü. Erü nümagü rü woo nüxü̃ nadaugügu, rü ñoma tama nüxü̃ nadaugüxü̃rüxü̃ nixĩgü. Rü woo nüxü̃ naxĩnüegu, rü ñoma tama nüxü̃ naxĩnüexü̃rüxü̃ nixĩgü. Rü tama nüxü̃ nacua̱xgüéga.
14 Rü aixcüma ngẽma duü̃xü̃güchiga nixĩ ga yema Tupanaarü ore ga nũxcüma nüxü̃ yaxuxü̃ ga orearü uruxü̃ ga Ichaía ga ñaxü̃:“Rü ngẽma duü̃xü̃gü rü aixcüma tá nüxü̃ naxĩnüe, natürü taxũtáma nüxü̃ nacua̱xgü nax ta̱xacüchiga yixĩxü̃ i ngẽma nüxü̃ naxĩnüexü̃.Rü aixcüma tá nüxü̃ nadaugü, natürü taxũtáma nüxü̃ nacua̱xgü nax ta̱xacüchiga yixĩxü̃ i ngẽma nüxü̃ nadaugüxü̃.
15 Erü ngẽma duü̃xü̃gü rü tama nüxü̃ nacua̱xgüchaü̃ i chorü ore, rü ñoma napetamachi̱xegüxü̃rüxü̃ nixĩgü rü naxcha̱xwa napexetügü nax tama nüxü̃ nadaugüxü̃ca̱x i ngẽma mexü̃ i naxca̱x chaxüxü̃.Rü tama nüxü̃ naxĩnüechaü̃ i chorü ore, rü tama nüxü̃ nacua̱xgüchaü̃ nax choma chanaxwa̱xexü̃ãcüma namaxẽxü̃, rü tama cha̱u̱xca̱x nadaugüchaü̃ nax choma naxca̱x chayataanexẽẽgüxü̃ca̱x”,
—ñanagürü.
16 Rü ñanagürü ta ga Ngechuchu: —Natürü pemax, Pa Chorü Ngúexü̃güx, rü petaãẽgü erü pexetügümaxãtama nüxü̃ pedaugü i ngẽma chaxüxü̃ rü pexmachi̱xẽmaxãtama nüxü̃ pexĩnüe i chorü ore.
17 Rü aixcüma pemaxã nüxü̃ chixu rü muxũchixü̃ ga Tupanaarü orearü uruü̃gü rü muxũchixü̃ ga duü̃xü̃gü ga imecümaxü̃, rü nüxü̃ nadaugüchaü̃ i ngẽma ñu̱xma chauxü̃tawa nüxü̃ pedaugüxü̃. Natürü tama nüxü̃ nadaugü. Rü nüxü̃ naxĩnüechaü̃ i ngẽma ore i ñu̱xma chauxü̃tawa nüxü̃ pexĩnüexü̃. Natürü tama nüxü̃ naxĩnüe —ñanagürü.
Ngechuchu rü mea nanango̱xẽxẽ ga yema ore ga toecüchigagu yaxuxü̃
18 Rü ñanagürü ta ga Ngechuchu: —¡Dücax, iperüxĩnüe nax ñuxũ ñaxü̃chiga yixĩxü̃ i ngẽma ore i cua̱xruxü̃ i toecüchiga!
19 Rü gumá triguchire ga namagu yixü̃nerüxü̃ tixĩgü ya yíxema nüxü̃ ĩnüexe i ore i mexü̃ nax ñuxãcü ãẽ̱xgacü yixĩxü̃ ya Tupana, natürü tama nüxü̃ cua̱xgüxe i ñuxũ ñaxü̃chiga nax yixĩxü̃ i ngẽma ore. Rü tümaxü̃tawa nangu i Chataná, rü tüxü̃ nüxü̃ inarüngümaxẽxẽ i ngẽma ore i tümaãẽwa ngẽxmaxü̃.
20 Rü gumá triguchire ga nutatanügu yixü̃nerüxü̃ nixĩ i ngẽma duü̃xü̃gü i nüxü̃ ĩnüexü̃ i ngẽma ore i mexü̃ rü taãẽãcüma nayauxgüxü̃.
21 Natürü ngẽma nax tama aixcüma nagu naxĩnüexü̃ i ngẽma ore, rü paxaãchitama nayaxõgü, rü yixcüra ngẽxguma ngẽma oregagu guxchaxü̃gü nüxü̃ üpetügu rüe̱xna duü̃xü̃gü naxchi aiegu, rü ínanata̱xgü i ngẽma ore.
22 Rü gumá triguchire ga tuxunecügu yixü̃nerüxü̃ nixĩ i ngẽma duü̃xü̃gü i Tupanaarü orexü̃ ĩnüexü̃ rü yaxõgüxü̃. Natürü ñoma i naanearü ngẽmaxü̃güca̱x nadaugü, rü ngẽmaguama narüxĩnüe, rü ngẽmaca̱x düxwa nüxü̃ inarüngümae i ngẽma ore. Rü guxü̃ma i ngẽma rü Tupanaarü orexü̃ nüxü̃ narüxoxẽxẽ nax tama aixcüma mea Tupanawe naxĩxü̃ca̱x i ngẽma duü̃xü̃gü.
23 Natürü gumá triguchire ga mexü̃ ga waixü̃mügu yixü̃nerüxü̃ nixĩ i ngẽma duü̃xü̃gü i nüxü̃ ĩnüexü̃ i Tupanaarü ore, rü nüxü̃ cua̱xgüxü̃ i ta̱xacüchiga nax yixĩxü̃, rü naga ĩnüexü̃ rü mea naxca̱x maxẽxü̃. Rü tümaxe rü gumá trigu ga 100 pü̱xü nawa ínguxuchinerüxü̃ tixĩ. Rü tümaxe rü gumá 60 pü̱xü nawa ínguxuchinerüxü̃ tixĩ. Rü tümaxe rü gumá 30 pü̱xü nawa ínguxuchinerüxü̃ tixĩ —ñanagürü ga Ngechuchu.
Ore ga natüane ga trigutanüwa rüxügüxü̃chiga
24 Rü Ngechuchu rü to ga ore ga cua̱xruxü̃xü̃ duü̃xü̃gümaxã nixu, rü ñanagürü: —Nüma ya Tupana rü ñoma wüxi ga yatü ga mexü̃ne ga triguchire naanegu tocürüxü̃ nixĩ.
25 Natürü yexguma napeyane ga gumá yatü rü wüxi ga norü uanü ga naxchi aixü̃ rü yéma naanewa naxũ. Rü naechita yexma trigunecügu nayatogü ga chixexü̃ ga natüane. Rü ñu̱xũchi ínixũ.
26 Rü yexguma naxügügu ga trigu rü nayaegu rü yexwacax yaxo̱xgu, rü yema natüane rü ta yéma natanüwa nayae rü nango̱x.
27 Rü yexguma ga gumá yatüarü puracütanüxü̃, rü namaxã nüxü̃ nayarüxugü, rü ñanagürügü: “Pa Corix, cuma rü cuanegu rü triguxica ngẽxma cuto. ¿Natürü ñuxãcü i ñu̱xma rü chixexü̃ i natüane rü ta ngéma naxügüxü̃?” ñanagürügü.
28 Rü yexguma ga yema naanearü yora, rü ñanagürü nüxü̃: “Wüxi i chorü uanü i chauxchi aixü̃ nixĩ i ngéma ngexü̃ wagüxü̃”, ñanagürü. Rü yexguma ga norü duü̃xü̃gü rü nüxna nacagü, rü ñanagürügü: “Pa Corix, ¿cunaxwa̱xexü̃ nax tanabéxü̃ i ngẽma chixexü̃ i natüane?” ñanagürügü.
29 Natürü nüma ga norü cori rü ñanagürü nüxü̃ ga yema norü puracütanüxügü: “¡Nüetama nangẽxmagü! Erü ngẽxguma chi penabe̱xgu, rü ngürüãchi trigumaxã chi penangauxẽxẽ nax penabéxü̃.
30 Rü narümemae nixĩ i nüetama ngéma nayae ñu̱xmatáta tríguarü buxgüwa nangu. Rü ngẽxguma rü ngéma tá chanamugü i chorü puracütanüxü̃, rü tá nanabe̱xíra i ngẽma chixexü̃ i natüane. Rü tá ínanagoxü̃cüta, rü ñu̱xũchi tá ínanagu. Rü ngẽmawena tá nayabuxgü i trigu, rü chorü trigupatagu tá choxü̃́ namaxã nanguxü̃gü” —ñanagürü.
Ore ga motachachiregu ixuxü̃
31 Rü Ngechuchu rü to ga ore ga cua̱xruxü̃ duü̃xü̃gümaxã nixu, rü ñanagürü: —Tupanaarü ore rü ñoma wüxi ya motachachire ya wüxi ya yatü naanegu toxü̃nerüxü̃ nixĩ.
32 Rü woo naxíraxüchichire̱x ya yima naxchire, natürü ngẽxguma naxüxgu rü naya̱xgu, rü wüxi i nanetü i taetaxü̃ nixĩ. Rü ngẽmaca̱x i werigü rü natanüwa naxĩ, rü ngẽxma nayarüxüxchiãü̃gü —ñanagürü.
Ore ga paũarü pu̱xẽẽruü̃gu ixuxü̃
33 Rü Ngechuchu rü to ga ore ga cua̱xruxü̃ duü̃xü̃gümaxã nixu, rü ñanagürü: —Guxü̃wama nangu nax ãẽ̱xgacü yixĩxü̃ ya Tupana. Rü ñoma íxraxü̃ i paũarü pu̱xẽẽruxü̃ i wüxi i nge taxü̃ i paũchara namaxã ipu̱xẽẽxü̃rüxü̃ nixĩ nax guxü̃wama nanguxü̃ —ñanagürü ga Ngechuchu.
Cua̱xruü̃gu ixuxü̃ ga oremaxã nangu̱xẽẽtae ga Ngechuchu
34 Rü guxü̃ma ga yema ore ga Ngechuchu duü̃xü̃gümaxã nüxü̃ ixuxü̃, rü cua̱xruü̃gu yaxuãcüma namaxã nüxü̃ nixu. Rü yemaacüxicatama nixĩ ga namaxã nüxü̃ yaxuxü̃.
35 Rü yemaacü nayanguxẽxẽ ga Tupanaarü ore ga norü orearü uruxü̃ ga Ichaía ümatüxü̃ ga ñaxü̃:“Choma rü cua̱xruü̃gu ixuxü̃ i oremaxã tá duü̃xü̃gümaxã chidexa.Rü tá namaxã chanangõ̱xẽxẽ i ngẽma cua̱x ga noxri naane ixügügumama ẽxü̃guxü̃”,
ñaxü̃.
Ngechuchu nanango̱xẽxẽ nachiga ga yema chixexü̃ ga natüane ga trigutanüwa rüxügüxü̃
36 Rü Ngechuchu ínayamugü ga duü̃xü̃gü, rü gumá ĩ ga nagu napexü̃negu naxücu. Rü norü ngúexü̃gü rü yéma naxca̱x naxĩ, rü ñanagürügü nüxü̃: —Pa Corix, ¡tomaxã nango̱xẽxẽ nax ta̱xacüchiga yixĩxü̃ i ngẽma chixexü̃ i natüanegu ixuxü̃ i ore! —ñanagürügü.
37 Rü yexguma ga Ngechuchu rü ñanagürü nüxü̃: —Rü yima mexü̃ i trigumaxã toecü, rü nüma nixĩ ya Tupana Nane ya duü̃xü̃xü̃ ixĩcü.
38 Rü ngẽma naane i nagu natoexü̃, rü ñoma i naane nixĩ. Rü ngẽma mexü̃ne ya triguchire rü ngẽma nixĩ i duü̃xü̃gü i Tupanaarü ixĩgüxü̃. Rü ngẽma chixexü̃ i natüane, rü ngẽma nixĩ i duü̃xü̃gü i Chatanáarü ixĩgüxü̃.
39 Rü ngẽma norü uanü i chixexü̃ i natüanemaxã toexü̃, rü ngẽma nixĩ i Chataná. Rü ngẽma ngunexü̃ i nagu nabuxuxü̃ i trigu rü naanearü guxchiga nixĩ. Rü ngẽma puracütanüxü̃ i tríguarü buxwa puracüexü̃, rü Tupanaarü orearü ngeruü̃gü i daxũcüã̱x nixĩgü.
40 Rü ngẽma chixexü̃ i natüane nax nabéxü̃ rü ñu̱xũchi nax ínaguxü̃, rü ngẽxgumarüxü̃ tá ta nixĩ i naanearü gu̱xgu.
41 Rü nüma ya Tupana Nane ya duü̃xü̃xü̃ ixĩcü, rü tá nanamu i norü orearü ngeruü̃gü i daxũcüã̱x nax norü duü̃xü̃tanüwa ínawoxü̃ãxü̃ca̱x i ngẽma duü̃xü̃gü i toguã̱xü̃ chixexü̃gu yixẽẽxü̃ rü ngẽma chixexü̃ ügüxü̃.
42 Rü tá üxüxétüwa nayawocu. Rü ngéma tá naxauxe rü tá nixü̃́xchapütagü.
43 Natürü guxü̃ma i ngẽma duü̃xü̃gü i Tupanaga ĩnüexü̃, rü tá üa̱xcürüxü̃ inabaixgü i ngextá Tanatü ya Tupana ãẽ̱xgacü ixĩxü̃wa. Rü yíxema ãchi̱xẽgüxe, ¡rü nüxü̃ taxĩnüe i ngẽma ore! —ñanagürü.
Ore ga taxü̃ ga diẽru ga icúxü̃gu ixuxü̃
44 Rü Ngechuchu rü to ga ore ga cua̱xruxü̃ duü̃xü̃gümaxã nixu, rü ñanagürü: —Tupana ãẽ̱xgacü íyixĩxü̃wa rü namexẽchi. Rü ñoma wüxi i úiru i wüxi i naanegu icúxü̃rüxü̃ nixĩ. Rü wüxi ya yatü rü ngẽxguma nüxü̃ iyangauxgu i ngẽma úiru, rü paxa wena ngẽma naanegu nayacu̱x. Rü norü taãẽmaxã napatawa naxũ rü namaxã nataxe i guxü̃ma i norü ngẽmaxü̃gü nax naxca̱x nataxexü̃ca̱x i ngẽma naane nax noxrü yixĩxü̃ca̱x i ngẽma úiru —ñanagürü.
Ore ga nutaxacü ga nga̱xãẽruxü̃ ga tatanücügu ixuxü̃
45 Rü ñanagürü ta ga Ngechuchu: —Tupana ãẽ̱xgacü íyixĩxü̃wa rü namexẽchi. Rü duü̃xü̃gü rü poraãcü naxca̱x nadaugü ñoma wüxi i taxetanüxü̃ i nutaxacügü ya ngã̱xãẽruü̃ca̱x dauxü̃rüxü̃.
46 Rü ngẽma taxetanüxü̃ rü ngẽxguma düxwa nüxü̃ iyangauxgu ya wüxi ya nuta ya nga̱xãẽruxü̃ ya guxü̃arü yexera mexẽchicü, rü napatawa naxũ rü namaxã nataxe i guxü̃ma i norü ngẽmaxü̃gü nax naxca̱x nataxexü̃ca̱x ya yimá nuta ya mexẽchicü, nax noxrü yixĩxü̃ca̱x.
Ore ga püchagu ixuxü̃
47 Rü Tupana ãẽ̱xgacü íyixĩxü̃wa rü wüxi i pücha i nataxawa namaxã ipüchaexü̃rüxü̃ nixĩ nax naguxü̃raü̃xü̃ i choxni namaxã iyaxuxü̃.
48 Rü ngẽxguma naxããcuxgu i ngẽma pücha, rü ngẽma püchaetanüxü̃ rü naxnecüpechinügu ínanatúãchigü. Rü ngéma narütogü rü nayadexechi i ngẽma mexü̃ i choxni, rü pexchigu nananucu. Rü ngẽma tama ingṍxü̃ i choxni rü ínanawogü.
49 13:49-50 Rü ngẽxgumarüxü̃ tá nixĩ i ngẽxguma nagu̱xgu i naane. Erü Tupanaarü orearü ngeruü̃gü i daxũcüã̱x, rü núma tá naxĩ. Rü tá nayadexechi i ngẽma mexü̃ i duü̃xü̃gü nüxna i ngẽma ichixexü̃. Rü ngẽma ichixexü̃ rü tá üxüxétüwa nayawocu. Rü ngéma tá naxauxe, rü tá nixü̃́xchapütagü —ñanagürü ga Ngechuchu.
50 Nüü̃ nadau 13:49
Ngexwacaxü̃güxü̃ rü nũxcümaü̃güxü̃ i ngẽmaxü̃güchiga
51 Rü yexguma ga Ngechuchu rü norü ngúexü̃güna naca, rü ñanagürü: —¿Nüxü̃ pecuáxü̃ yixĩxü̃ nax ta̱xacüchiga yixĩxü̃ i ngẽma pemaxã nüxü̃ chixuxü̃? —ñanagürü. Rü nümagü nanangãxü̃gü rü ñanagürügü: —Ngẽmáacüx, Pa Corix, nüxü̃ tacua̱x —ñanagürügü.
52 Rü yexguma ga Ngechuchu rü ñanagürü nüxü̃: —Rü guxü̃ma i ngúexẽẽruxü̃ i Tupanaarü mugüwa ngu̱xẽẽtaexü̃ rü nanaxwa̱xe nax mea nüxü̃ nacuáxü̃ i ngẽma nũxcümaü̃xü̃ i Tupanaarü ore rü ñaa ngexwaca̱xü̃xü̃ i chorü ore, ngẽxgumarüxü̃ i wüxi i yatü i norü taxepatawa duü̃xü̃güca̱x inawéxü̃ i norü ngẽmaxü̃gü i ngexwacaxü̃güxü̃ rü norü ngẽmaxü̃gü i nũxcümaü̃güxü̃ —ñanagürü ga Ngechuchu.
Ngechuchu rü Nacharétuwa nayexma
53 Rü yexguma Ngechuchu nüxü̃ rüchauxgu ga yema ore ga cua̱xruü̃güxü̃ nax yaxuxü̃, rü inaxũãchi ga yéma.
54 Rü guma ĩane ga nawa nayaxü̃ne ga Nacharétuwa naxũ. Rü guma ĩanearü ngutaque̱xepataü̃gu naxücu rü yéma nanangúexẽxẽ ga duü̃xü̃gü. Rü yema duü̃xü̃gü rü naba̱i̱xãchiãẽgü namaxã ga norü ore. Rü ñanagürügü: —¿Ngextá nüxü̃ nacua̱x i ngẽma ngu̱xẽẽtae? ¿Rü ñuxãcü nüxü̃ nacua̱x nax naxüaxü̃ i ngẽma mexü̃gü i taxü̃gü i Tupanaarü poramaxã naxüxü̃?
55 ¿Taux ẽ̱xna i daa yixĩxü̃ ya corapina ya Yúche nane i María ngĩne, ya Chantiágu rü Yúche rü Chimóü̃ rü Yúda naenexẽ ixĩcü?
56 ¿Rü taux ẽ̱xna i naeya̱xgü rü nuxma tatanügu naxãchiü̃güxü̃? ¿Rü ngẽxguma i ngextá yixĩxü̃ i naya̱u̱xãxü̃ i ngẽma nüxü̃ nacuáxü̃? —ñanagürügü.
57 Rü yemaca̱x ga duü̃xü̃gü rü tama nüxü̃́ inarüxĩnüẽchaü̃. Natürü Ngechuchu rü ñanagürü nüxü̃: —Tóxnamana i duü̃xü̃gü rü namaxã nataãxẽ i Tupanaarü orearü uruxü̃. Natürü norü naanewa rü napatawa rü tama namaxã nataãẽgü —ñanagürü.
58 Rü yema duü̃xü̃gütanüwa rü tama nanaxü ga muxü̃ma ga mexü̃gü ga Tupanaarü poramaxã naxüxü̃, yerü yema duü̃xü̃gü rü tama nüxü̃́ nayaxõgüchaü̃.
