San Mateo 16:1-28
16 Nüma ga Parichéugü rü Chaduchéugü rü Ngechuchuxü̃ ínayadaugü. Rü Ngechuchuna nacagüe nax nüxü̃ nüxü̃ nadauxẽẽxü̃ca̱x ga wüxi ga cua̱xruxü̃ ga Tupanaarü poramaxã naxüxü̃, yerü nüxü̃ naxügüchaü̃mare.
2 Natürü nüma ga Ngechuchu rü nanangãxü̃, rü ñanagürü nüxü̃: —Pema rü yáuanecü rü ñaperügügü: “Name tá nixĩ i moxü̃arü ngunexü̃, erü nadáutüweane”, ñaperügügü.
3 Rü ngẽxguma pa̱xmama nadáutüweanegu rü nacaixanegu, rü: “Tá nachixeane i ñaa ngunexü̃”, ñaperügügü. Rü pema nüxü̃ pecua̱x nax penangugüxü̃ i ñuxgu tá nameanexü̃ rü ñuxgu tá nachixeanexü̃. ¿Rü ñuxãcü i tama nüxü̃ pecuáxü̃ nax ta̱xacüchiga yixĩxü̃ i ngẽma cua̱xruü̃gü i ñu̱xma chauxü̃tawa nüxü̃ pedauxü̃? —ñanagürü.
4 Rü ñanagürü ta ga Ngechuchu: —Ñaa duü̃xü̃gü i chixecümagüxü̃ rü tama yaxõgüxü̃ rü naxca̱x ínacagü i wüxi i cua̱xruxü̃ i Tupanaarü poramaxã üxü̃. Natürü yema cua̱xruxü̃ ga Tupanaarü orearü uruxü̃ ga Yonáwa üxü̃xicatama nixĩ i tá nüxü̃ chawéxü̃. Rü taxuxü̃táma i to i cua̱xruxü̃ tá nüxü̃ chadauxẽxẽ i ñaa duü̃xü̃gü —ñanagürü ga Ngechuchu. Rü ñu̱xũchi nüxna yéma nixũ rü inaxũãchi.
Parichéugüarü rü Chaduchéugüarü paũarü puxẽẽruü̃chiga
5 Rü yexguma naxtaxaarü tocutüwa naxĩxgu ga norü ngúexü̃gü, rü nüxü̃ inarüngü̃mae nax norü paũ íyangegüxü̃.
6 Rü yexguma ga Ngechuchu rü ñanagürü nüxü̃: —¡Dücax, pexuãẽgü naxca̱x i Parichéugüarü rü Chaduchéugüarü paũarü pu̱xẽẽruxü̃! —ñanagürü.
7 Rü yema norü ngúexü̃gü rü inanaxügüe nax nügümaxã ñagüxü̃: —Ngẽma ñanagürü tüxü̃, erü tama paũ ítingegü —ñanagürügü.
8 Natürü ga Ngechuchu rü nüxü̃ nacua̱xama nax yemaacü nügümaxã yadexagüxü̃ ga norü ngúexü̃gü. Rü yemaca̱x ñanagürü nüxü̃: —“¿Tü̱xcüü̃, tüxü̃́ nataxu i paũ”, ñaperügügü? Pema rü tama aixcüma peyaxõgü.
9 ¿Tama ẽ̱xna nüxü̃ pecua̱xgüéga rü nüxna pecua̱xãchie ga yema wüxime̱e̱xpü̱x ga paũ ga yema 5,000 ga yatügüca̱x ichabücuxü̃? ¿Rü ñuxre ga pexchi penaxüãcuxü̃ namaxã ga yema naxchipe̱xegü ga íyaxügüxü̃?
10 ¿Rü tama ẽ̱xna nüxna pecua̱xãchie ga yema 7 ga paũ ga yema 4,000 ga yatügüca̱x ichabücuxü̃? ¿Rü ñuxre ga pexchi penaxüãcuxü̃ namaxã ga yema naxchipe̱xegü ga íyaxügüxü̃?
11 ¿Rü ñuxãcü nixĩ i tama nüxü̃ pecuáxü̃ i tama paũchiga nax chidexaxü̃ i ngẽxguma ñachagu: “¡Pexũãẽgü naxca̱x i Parichéugüarü rü Chaduchéugüarü paũarü pu̱xẽẽruxü̃!” ñachagu? —ñanagürü ga Ngechuchu.
12 Rü yexguma ga norü ngúexü̃gü rü nüxü̃ nacua̱xgü nax tama paũarü puxẽẽruü̃chiga nax yadexaxü̃ ga Ngechuchu, natürü Parichéugüarü rü Chaduchéugüarü ngu̱xẽẽtaechiga yixĩxü̃ ga yadexaxü̃.
Pedru nanango̱xẽxẽ nax Cristu yixĩxü̃ ga Ngechuchu
13 Rü yexguma Checharéa ga Pirípuanewa nanguxgu ga Ngechuchu, rü norü ngúexü̃güna naca, rü ñanagürü: —¿Ñuxũ ñaxü̃ i duü̃xü̃gü i nachiga nax texé yixĩxü̃ ya Tupana Nane ya duü̃xü̃xü̃ ixĩcü? —ñanagürü.
14 Rü nüma ga norü ngúexü̃gü rü nanangãxü̃ rü ñanagürügü: —Nangexma i duü̃xü̃gü rü: “Cuáü̃ ya báiü̃xẽẽruxü̃ quixĩ”, ñagüxü̃. Rü togü rü: “Ería quixĩ”, ñagüxü̃. Rü togü rü: “Yeremía quixĩ”, ñagüxü̃. Rü togü rü: “Wüxi ga nũxcümaü̃cü ga Tupanaarü orearü uruxü̃ quixĩ”, ñagüxü̃ —ñanagürügü.
15 Rü yexguma ga Ngechuchu rü nüxna naca rü ñanagürü: —¿Rü pema rü ñuxũ ñapegüxü̃ choxü̃ nax texé chixĩxü̃? —ñanagürü.
16 Rü Chimóü̃ ga Pedru nanangãxü̃, rü ñanagürü nüxü̃: —Cuma nixĩ i Cristu ya Tupana ya Maxü̃cü Nane quixĩxü̃ —ñanagürü.
17 Rü Ngechuchu nanangãxü̃ rü ñanagürü nüxü̃: —Cuma rü aixcüma cutaãxẽ, Pa Chimóü̃, Pa Yoná Nanex, erü taxuxü̃ma i duü̃xü̃ nixĩ i cuxü̃ nüxü̃ cua̱xẽẽxü̃ i ngẽma, natürü Chaunatü ya daxũgucü nixĩ ya cuxü̃ nüxü̃ cua̱xẽẽcü nax Nane chixĩxü̃.
18 Rü choma cumaxã nüxü̃ chixu rü cuma rü Pedru quixĩ. Rü ngẽma cuéga rü “nuta”, ñaxü̃chiga nixĩ. Rü cuma tá nixĩ i chorü duü̃xü̃gümaxã icucuáxü̃. Rü ngẽma yuarü pora rü taxũtáma nüxü̃ narüyexera i ngẽma chorü duü̃xü̃gü.
19 Rü choma rü tá cuxna chanaxã i pora nax chorü duü̃xü̃gümaxã icucuáxü̃ca̱x ya Tupana ãẽ̱xgacü ixĩxü̃wa. Rü yíxema tama cuxü̃́ irüxĩnüxe i ñoma i naanewa rü taxũtáma Tupana ãẽ̱xgacü ixĩxü̃wa tichocu. Natürü yíxema cuxü̃́ irüxĩnüxe i ñoma i naanewa rü Tupana ãẽ̱xgacü ixĩxü̃wa tá tangugü —ñanagürü.
20 Rü yexguma ga Ngechuchu rü norü ngúexü̃gümaxã nüxü̃ nixu, rü ñanagürü: —¡Taxúemaxã tá nüxü̃ pixu nax choma rü Cristu chixĩxü̃! —ñanagürü.
Ngechuchu nanaxunagü ga norü yu
21 Rü yemawena inanaxügü nax norü ngúexü̃gümaxã nüxü̃ yaxuxü̃ ga yema tá nüxü̃ üpetüxü̃. Rü ñanagürü: —Choma rü Yerucharéü̃wa tá chaxũ. Rü ngéma poraãcü ngúxü̃ tá choxü̃ ningexẽẽgü i Yudíugüarü ãẽ̱xgacügü rü chacherdótegüarü ãẽ̱xgacügü rü ngẽma ngúexẽẽruü̃gü i mugüwa ngu̱xẽẽtaegüxü̃, rü tá choxü̃ nima̱xgü. Natürü ngẽma tomaepü̱x i ngunexü̃gu rü wena táxarü ícharüda —ñanagürü.
22 Rü yexguma ga Pedru rü nüxica noxrüwama Ngechuchuxü̃ naga, rü inanaxügü ga nax naxucu̱xẽãxü̃, rü ñanagürü: —Pa Corix, tama name nax ngẽmaãcü quidexaxü̃. Rü taxũtáma ngẽma nüxü̃ quixuxü̃ cuxü̃ nangupetü i cumax —ñanagürü.
23 Natürü ga Ngechuchu rü Pedruca̱x nadauegu, rü ñanagürü nüxü̃: —¡Choxna ixũgachi, Pa Chatanáx, erü chixexü̃gu choxü̃ cungu̱xẽẽchaü̃! Rü tama Tupana nagu rüxĩnüxü̃gu curüxĩnü, rü yatügü nagu rüxĩnüxü̃gumare curüxĩnü i cumax —ñanagürü.
24 Rü yexguma ga Ngechuchu rü norü ngúexü̃güxü̃ ñanagürü: —Rü ngẽxguma texé chowe rüxũxchaü̃gu, ¡ẽcü nüxü̃ tarüxo i tümaarü ngúchaü̃, rü namaxã tapora i ngẽma guxchaxü̃gü i tümaca̱x ínguxü̃, rü ngẽmaétüwa chowe tarüxũ!
25 Erü yíxema tama cha̱u̱xca̱x inaxãxẽ i tümaarü maxü̃ rü tá itanatauxẽxẽ. Natürü texé ya cha̱u̱xca̱x inaxãxe i tümaarü maxü̃ rü tá tanayaxu i maxü̃ i taguma gúxü̃.
26 Rü ¿Ta̱xacüwa i nüxü̃́ namexü̃ ya wüxi ya yatü ega nayauxãgu i guxü̃ma i ñoma i naanewa ngẽxmaxü̃ natürü iyanatauxẽẽãgu i norü maxü̃? Erü taxucürüwama wüxi ya yatü rü norü diẽrumaxã naxca̱x nataxe i norü maxü̃.
27 Erü Tupana Nane ya duü̃xü̃xü̃ ixĩcü rü wena táxarü núma naxũ. Rü Chaunatü ya Tupanaarü poramaxã rü daxũcüã̱x i orearü ngeruü̃gümaxã tá ínangu. Rü ngẽxguma tá nixĩ i nüxü̃́ naxütanüãxü̃ i wüxichigü i duü̃xü̃ naxca̱x i ngẽma naxüxü̃.
28 Rü aixcüma pemaxã nüxü̃ chixu rü nangẽxma i ñuxre i duü̃xü̃gü i núma ngẽxmagüxü̃ rü taxũtáma nayu ñu̱xmatáta nüxü̃ nadaugü nax núma naxũxü̃ ya Tupana Nane ya duü̃xü̃xü̃ ixĩcü nax guxü̃arü ãẽ̱xgacü ya poracü yixĩxü̃ca̱x —ñanagürü ga Ngechuchu.
