San Mateo 18:1-35
18 Rü yexguma ga norü ngúexü̃gü rü Ngechuchuca̱x naxĩ rü nüxna nacagüe, rü ñanagürügü: —¿Pa Corix, texé tá tixĩ ya guxü̃arü yexera ixĩxẽ i ngẽma Tupana ãẽ̱xgacü ixĩxü̃wa? —ñanagürügü.
2 Rü yexguma ga Ngechuchu rü wüxi ga buxü̃ca̱x naca, rü norü ngúexü̃güarü ngãxü̃tanügu nanachixẽxẽ.
3 Rü ñu̱xũchi ñanagürü nüxü̃: —Dücax, aixcüma pemaxã nüxü̃ chixu, rü ngẽxguma tama nüxü̃ perüxoegu i ngẽma nax togüarü yexera pegü pixĩgüxẽẽchaü̃xü̃ rü ñu̱xũchi tama ñaa buxü̃rüxü̃ pegü íperüxíragu, rü taxucürüwa pichocu ya Tupana ãẽ̱xgacü ixĩxü̃wa.
4 Rü aixcüma yíxema tama tügü icua̱xüxü̃xẽ rü ñaa buxü̃rüxü̃ ixĩxẽ, rü yíxema tá tixĩ ya guxü̃arü yexera ixĩxẽ ya Tupana ãẽ̱xgacü ixĩxü̃wa.
5 Rü texé ya chauégagu mea nayaxúxe i wüxi i buxü̃ i ñaarüxü̃ ixĩxü̃ rü choxü̃ nixĩ i tayaxuxü̃.
Naxãũcüma nixĩ nax pecadugu inguxü̃
6 Rü texé ya pecadugu nanguxeẽ́xẽ i wüxi i ñaa buxü̃gü i choxü̃́ yaxõgüxü̃ rü tümaca̱x rü narümemae chi nixĩ nax noxtacüma wüxi ya nuta tümanaãwa nayangacuchixü̃, rü ñu̱xũchi naxtaxa ya mátamanewa tüxü̃ yatáexü̃ nax ngẽxma tayuxü̃ca̱x.
7 Wüxi i taxü̃ i ngechaü̃ nixĩ nax ñoma i naanewa nangẽxmaxü̃ i muxü̃ma i chixexü̃gü i duü̃xü̃güxü̃ chixexẽẽxü̃. Rü guxü̃gutáma nangẽxma i ngẽma chixexü̃gü, natürü wüxi i ngechaü̃xü̃chi nixĩ naxca̱x i ngẽma yatü i toguegüxü̃ pecadugu yixẽẽxü̃.
8 Rü ngẽmaca̱x i ngẽxguma chi cuxme̱x rüe̱xna cucutü pecadugu cuxü̃ nguxẽẽgu, rü name nixĩ i noxtacüma ícunadae rü yáxü̃gu cuyaña. Erü narümemae nixĩ i cuboxme̱xãcüma rüe̱xna cubocutüãcüma nax cunayaxuxü̃ i curü maxü̃ i taguma guxü̃ nax tama guxü̃ne ya cuxme̱xmaxã rüe̱xna guxü̃ne ya cucutümaxã üxü ya taguma ixoxü̃newa quita̱xcuchixü̃ca̱x.
9 Rü ngẽxguma chi cuxetü pecadugu cuxü̃ nguxẽẽgu, rü name nixĩ i ícunacaxüchi, rü yáxü̃gu cunaña. Erü narümemae nixĩ i wüxixetümaxã nax cunayaxuxü̃ i curü maxü̃ i taguma guxü̃ nax tama guxü̃ne ya cuxetümaxã yima üxü ya taguma ixoxü̃newa quita̱xcuchixü̃ca̱x.
Ore ga carnéru ga iyarütaxuxü̃gu ixuxü̃
10 Rü tama name i nüxü̃ pexoo̱x i wüxi i buxü̃ i ñaarüxü̃ choxü̃́ yaxõxü̃. Erü ngẽma norü dauruü̃gü i orearü ngeruü̃gü i daxũcüã̱x rü guxü̃guma Chaunatü ya daxũgucüpe̱xewa nangẽxmagü nax ngéma ngẽma buxü̃güétüwa nachogüxü̃ca̱x.
11 Rü Tupana Nane ya duü̃xü̃xü̃ ixĩcü rü núma naxũ nax naétüwa nachogüxü̃ca̱x i ngẽma iyarütauxexü̃.
12 ¿Rü ñuxũ ñapegüxü̃ i pemax ega wüxi ya yatü rü nüxü̃́ nangẽxmagu i 100 i carnérugü rü wüxi nüxü̃́ iyarütáuxgu? ¿Taux ẽ̱xna i nachitaxü̃gu namugüãxü̃ i ngẽma 99, rü ñu̱xũchi naxca̱x yadauxü̃ i ngẽma nüxü̃́ iyarütaxuxü̃?
13 Rü ngẽxguma nüxü̃ iyangauxgu, rü namaxã nataãẽxü̃chi i ngẽma carnéru. Rü woo guxü̃guma namaxã nataãxẽ i ngẽma 99 i tama iyarütauxexü̃, natürü yexeraãcü naxca̱x nataãxẽ i ngẽma wüxi i iyarütaxuxü̃, erü marü nüxü̃ inayangau.
14 Rü ngẽxgumarüxü̃ ta ya Penatü ya daxũgucü rü tama nanaxwa̱xe nax iyanataxuxü̃ i wüxi i ñaa buxü̃gü.
Name i nüxü̃́ nüxü̃ tarüngüma i ngẽma guxchaxü̃ i taenexẽ taxca̱x üxü̃
15 Rü ngẽxguma cuenexẽ chixexü̃ cuxca̱x ínguxẽẽgu, rü name nixĩ i nüxicatama namaxã quidexa. ¡Rü naxucu̱xẽ, rü nüxna nüxü̃ nacua̱xãchixẽxẽ i ngẽma chixexü̃ i cuxca̱x ínanguxẽẽxü̃! Rü ngẽxguma cuga naxĩnügu, rü cuma rü marü wenaxarü mexü̃ca̱x cunatáeguxẽxẽ i ngẽma cuenexẽ.
16 Natürü ngẽxguma tama cuga naxĩnügu i ngẽma cuenexẽ, rü name nixĩ i naxca̱x cuca i wüxi rüe̱xna taxre i to i duü̃xü̃gü nax ngẽmamaxã wüxigu namaxã pidexagüxü̃ca̱x rü penaxucu̱xẽgüxü̃ca̱x i ngẽma cuenexẽ.
17 Rü ngẽxguma tama nüxü̃́ inaxĩnügu i ngẽma to i taxre i duü̃xü̃gü, rü name nixĩ i guxü̃ i yaxõgüxü̃maxã nüxü̃ quixu nax ngẽma cuenexẽmaxã yadexagüxü̃ca̱x. Rü ngẽxguma tama nüxü̃́ inaxĩnügu i ngẽma yaxõgüxü̃arü ucu̱xẽ, rü name nixĩ i wüxi i duü̃xü̃ i tama yaxõxü̃gu rüe̱xna wüxi i duü̃xü̃ i Rómaarü ãẽ̱xgacüca̱x diẽru ngĩxü̃ yaxuxü̃gu namaxã curüxĩnü.
18 Rü aixcüma pemaxã nüxü̃ chixu rü yíxema núma ñoma i naanewa tama pexü̃́ irüxĩnüxe i perü ucu̱xẽ rü taxũtáma Tupana ãẽ̱xgacü ixĩxü̃wa tixücu. Natürü yíxema mea pexü̃́ irüxĩnüxe i perü ucu̱xẽ rü aixcüma ngéma tá tangu.
19 Rü pemaxã nüxü̃ chixu rü ngẽxguma taxre i pema i núma ñoma i naanewa rü wüxigu ta̱xacüca̱x ípecaxgu i Chaunatü ya daxũgucüxü̃tawa, rü nüma ya Chaunatü rü tá pexna nanaxã.
20 Erü ngextá taxre rüe̱xna tomaepü̱x i duü̃xü̃gü chauégagu íngutaque̱xexü̃wa, rü choma rü ta norü ngãxü̃tanüwa changexma —ñanagürü.
21 Rü yexguma ga Pedru rü Ngechuchuca̱x nixũ, rü nüxna naca, rü ñanagürü: —¿Pa Corix, ngẽxguma chauenexẽ chixexü̃ cha̱u̱xca̱x ínguxẽẽgu, rü ñuxree̱xpü̱xcüna i namexü̃ nax nüxü̃́ nüxü̃ charüngümaxü̃ naxca̱x i ngẽma chixexü̃ i cha̱u̱xca̱x ínanguxẽẽxü̃? ¿Rü marü namexü̃ ega 7 e̱xpü̱xcüna yixĩxgu nax nüxü̃́ nüxü̃ charüngümaxü̃? —ñanagürü.
22 Rü Ngechuchu nanangãxü̃ rü ñanagürü: —Tama name i 7 e̱xpü̱xcünaxicatama nüxü̃́ nüxü̃ curüngü̃ma i ngẽma chixexü̃ i cuxca̱x ínanguxẽẽxü̃. Rü name nixĩ nax 70 e̱xpü̱xcüna i 7 wa nanguxü̃ nax nüxü̃́ nüxü̃ curüngü̃maxü̃ —ñanagürü.
Ãẽ̱xgacüarü duü̃xü̃ ga tama namücüarü ngetanüxü̃ irüngümaxẽ
23 Rü Ngechuchu rü ñanagürü: —Rü ngẽma Tupana ãẽ̱xgacü ixĩxü̃wa rü nanangẽxgumaraxü̃ i wüxi ga nachixü̃anearü ãẽ̱xgacü ga norü duü̃xü̃gü ga nüxü̃́ nangetanügüxü̃maxã namexẽẽchaü̃xü̃ ga norü ngetanü.
24 Rü yexguma inaxügüãgu ga mea nüxü̃ nax yadaugüxü̃ ga yema nüxü̃́ nangetanügüxü̃pane, rü naxü̃tawa nanagagü ga wüxi ga norü duü̃xü̃ ga taxüchicü ga diẽru nüxü̃́ ngĩxü̃ ngetanüxü̃.
25 Natürü yema norü duü̃xü̃ rü nangearü diẽruã̱x, rü taxuacüma norü ãẽ̱xgacüaxü̃́ nanaxütanü. Rü yemaca̱x ga yema ãẽ̱xgacü rü norü churaragüxü̃ namu nax mugüruxü̃ namaxã nataxegüxü̃ca̱x ga yema yatü, wüxigu tümamaxã ga naxma̱x rü naxacügü rü norü yemaxü̃gü, nax yemaacü naxütanüãxü̃ca̱x ga norü ngetanü.
26 Rü yexguma ga yema norü duü̃xü̃ rü norü ãẽ̱xgacüpe̱xegu nacaxã́pü̱xü, rü nüxü̃ naca̱a̱xü̃, rü ñanagürü: “Pa Corix ¡choxü̃ nangechaü̃! Rü marü tá chapuracü, rü tá cuxü̃́ chanaxütanü i guxü̃ma”, ñanagürü.
27 Rü yema norü ãẽ̱xgacüaxü̃́ nangechaü̃tümüxü̃, rü yemaca̱x namaxã nüxü̃ nixu ga marü tama nüxü̃́ nax naxütanüãxü̃ca̱x ga yema norü ngetanü. Rü ñu̱xũchi ínananguxuchixẽxẽ.
28 Natürü yexgumatama yéma ãẽ̱xgacüxü̃tawa ínaxũũxgu ga yema yatü, rü nüxü̃ inayangau ga wüxi ga namücü ga írarüwatama nüxü̃́ nangetanüxü̃. Rü yema yatü rü nüxna natüxüe, rü nananu̱xnaxã, rü ñanagürü nüxü̃: “¡Choxü̃́ ngĩxü̃ naxütanü i ngẽma diẽru i choxü̃́ ngĩxü̃ cungetanücü!” ñanagürü.
29 Rü yexguma ga yema namücü rü yema yatüpe̱xegu nacaxã́pü̱xü, rü nüxü̃ naca̱a̱xü̃, rü ñanagürü: “Pa Chomücüx, ¡yáxna chomaxã naxĩnü! Rü marü tá cuxü̃́ chanaxütanü i guxü̃ma i ngẽma cuxü̃́ changetanüxü̃”, ñanagürü.
30 Natürü ga nüma ga yema yatü rü tama nüxü̃ nacuáxchaü̃ ga yema ore. Rü poxcupataü̃gu tüxü̃ napoxcuama ñu̱xmata nüxü̃́ tanaxütanü ga yema nüxü̃́ tangetanüxü̃.
31 Rü yexguma yema togü ga ãẽ̱xgacüarü duü̃xü̃gü nüxü̃ daugügu ga yema naxüxü̃ ga yema yatü, rü poraãcü naãxẽwa nangu̱x. Rü norü corixü̃tawa naxĩ rü nüxü̃ nayarüxugüe ga guxü̃ma ga yema ngupetüxü̃.
32 Rü yexguma ga ãẽ̱xgacü rü nanamu nax naxü̃tawa nagagüãxü̃ca̱x ga yema yatü. Rü ñanagürü nüxü̃: “Wüxi i chixexü̃ i duü̃xü̃ quixĩ. Choma rü cuxü̃́ nüxü̃ changechaü̃ ga yema choxü̃́ cungetanüxü̃, erü choxü̃ cuca̱a̱xü̃ nax tama cuxü̃ chapoxcuxü̃ca̱x.
33 Rü cuma rü chita nüxü̃́ nüxü̃ cungechaü̃ i ngẽma cumücü i cuxü̃́ nangetanüxü̃, yexgumarüxü̃ ga choma rü cuxü̃́ nüxü̃ nax changechaü̃xü̃rüxü̃ ga yema choxü̃́ cungetanüxü̃”, ñanagürü nüxü̃.
34 Rü poraãcü nanu ga yema ãẽ̱xgacü. Rü nanamu nax napoxcugüãxü̃ca̱x ga yema yatü ñu̱xmata guxü̃ nüxü̃́ naxütanü ga yema nüxü̃́ nangetanüxü̃ —ñanagürü ga Ngechuchu.
35 Rü ñu̱xũchi ñanagürü ta: —Rü ngẽxgumarüxü̃ tá pemaxã nanaxü ya Chaunatü ya daxũgucü i ngẽxguma tama wüxichigü aixcüma peenexẽgüaxü̃́ nüxü̃ perüngümaegu i ngẽma chixexü̃ i pexca̱x ínanguẽẽxü̃ —ñanagürü.
