San Mateo 19:1-30
19 Rü yemaxü̃ yaxuxguwena ga Ngechuchu rü Gariréaarü naanewa inaxũãchi rü Yudéaanewa naxũ ga natü ga Yudáü̃arü tocutüwa.
2 Rü muxü̃ma ga duü̃xü̃gü nawe narüxĩ, rü nüma ga Ngechuchu rü yéma nanameexẽxẽ ga yema ida̱xaweexü̃.
3 Rü ñuxre ga Parichéugü rü Ngechuchuca̱x naxĩ nax pecadugu nanguxẽẽgüãxü̃ca̱x. Rü nüxna nacagüe rü ñanagürügü: —¿Cuxca̱x namexü̃ i wüxi i yatü nax ínatáxma̱xmarexü̃ ega naxma̱x rü ngexü̃rüüxü̃ i guxchaxü̃ taxü̱xgu? —ñanagürügü.
4 Rü Ngechuchu nanangãxü̃ rü ñanagürü: —¿Taguma ẽ̱xna nawa pengúe i ngẽma Tupanaarü ore i ümatüxü̃ i nüxü̃ ixuxü̃ rü yexguma noxri Tupana naxü̱xgu ga duü̃xü̃gü, rü yatüxü̃ rü ngecüxü̃ nax naxüxü̃?
5 Rü yemaca̱x ga Tupana rü ñanagürü:“Nüma ya yatü rü tá nanatüna rü naéna nixũgachi nax naxma̱xmaxã inaxã́ũxü̃ca̱x.Rü ngẽmaãcü i ngẽma taxre rü ñoma wüxitama i duü̃xü̃rüxü̃ tá nixĩgü”.
6 Rü ngẽmaãcü tama taxre nixĩ, rü wüxitama nixĩ. Rü ngẽmaca̱x tama name nax texé nügüna tayaxĩgachitanüxẽxẽ i ngẽma taxre ya Tupana nügüna mugüxü̃ —ñanagürü.
7 Rü yexguma Ngechuchuna nacagüe rü ñanagürügü: —¿Tü̱xcüü̃ nixĩ ga Moiché ga duü̃xü̃gümaxã nüxü̃ yaxuxü̃ rü ngẽxguma texé tümama̱xü̃ ítáxchaü̃gu rü name nixĩ i wüxi i popera i ta̱xgüpane ngĩxna taxã, rü ñu̱xũchi ngĩxü̃ ítata̱x? ñaxü̃ —ñanagürügü.
8 Rü Ngechuchu nanangãxü̃, rü ñanagürü nüxü̃: —Pema rü duü̃xü̃gü i tama ixĩnüechaü̃xü̃ pixĩgü. Rü yemaca̱x ga Moiché rü pexü̃́ nanatauxchaxẽxẽ nax pexma̱xü̃ ípetáxü̃. Natürü noxriarü ügügu rü tama yemaacü nixĩ.
9 Rü choma pemaxã nüxü̃ chixu rü tama name nax texé tümama̱xü̃ ítáxü̃ ega ngĩma rü tama nai ya yatümaxã namaxü̃xü̃gagu yixĩxgu. Rü yimá yatü rü ngẽxguma nai i ngexü̃maxã naxãxma̱xgu, rü pecadu naxü. Rü texé ya ngĩmaxã ãmaxe i ngẽma nge i ngĩte ngĩxü̃ íta̱xcü, rü pecadu taxü —ñanagürü ga Ngechuchu.
10 Rü ñu̱xũchi ga norü ngúexü̃gü rü ñanagürügü nüxü̃: —Ega ngẽmaãcü yixĩxgu rü name i noxtacüma tama naxãxma̱x ya yatü rü tama ixãte i nge —ñanagürügü.
11 Rü Ngechuchu norü ngúexü̃güxü̃ nangãxü̃ rü ñanagürü: —Taxucürüwa guxü̃ma i duü̃xü̃gü nüxü̃ nacua̱x i ta̱xacüchiga nax yixĩxü̃ i ngẽma ngu̱xẽẽtae. Natürü yíxema Tupana tüxü̃ nüxü̃ cua̱xexẽ́xẽxicatama tixĩ ya nüxü̃ cua̱xgüxe.
12 Rü nangẽxma i naguxü̃raü̃xü̃ i guxchaxü̃ nax tama naxãmaxü̃ca̱x ya yatü. Erü nümaxü̃ i yatü rü woetama taxucürüwa naxãxma̱x erü norü bucüma nangepü̱xüchare. Rü nümaxü̃ i yatü rü taxucürüwa naxãxma̱x erü nayauxpü̱xücharee. Rü togü tama naxãxma̱x erü Tupanaarü ngúchaü̃xicatama naxügüchaü̃. Rü texé ya ngẽmaãcü máxchaü̃xẽ rü marü name i ngẽmaãcü tamaxü̃ —ñanagürü ga Ngechuchu.
Ngechuchu rü buxü̃gümaxã mexü̃ naxuegu
13 Rü duü̃xü̃gü rü Ngechuchuxü̃tawa nanagagü ga ñuxre ga buxü̃gü nax Ngechuchu naétügu numéxü̃ca̱x rü naxca̱x nayumüxẽxü̃ca̱x. Natürü Ngechuchuarü ngúexü̃gü rü inanaxügüe nax yangagüãxü̃ ga yema duü̃xü̃gü ga Ngechuchuxü̃tawa buxü̃güxü̃ gagüxü̃.
14 Natürü ga Ngechuchu rü norü ngúexü̃güxü̃ ñanagürü: —¡Taxṹ i nüxna penachu̱xuxü̃! Erü Tupana ãẽ̱xgacü ixĩxü̃wa rü tümaca̱x nixĩ ya yíxema ñaa buxü̃gürüxü̃ ixĩgüxe —ñanagürü.
15 Rü ñu̱xũchi ga Ngechuchu rü yema buxü̃güétü nanuxme̱x. Rü yemawena inaxũãchi ga yéma.
Wüxi ga ngextü̱xücü ga diẽruã̱xü̃chicü Ngechuchuna naca
16 Rü wüxi ga ngextü̱xücü rü Ngechuchuxü̃tawa nangu, rü nüxna naca, rü ñanagürü: —Pa Ngúexẽẽruxü̃ ya Mecüx, ¿ta̱xacürü mexü̃ tá chaxüxü̃ nax chanayaxuxü̃ca̱x i maxü̃ i taguma gúxü̃? —ñanagürü.
17 Rü Ngechuchu nanangãxü̃ rü ñanagürü nüxü̃: —¿Tü̱xcüü̃ “Mecü”, ñacurügü choxü̃? Erü Tupanaxicatama nixĩ ya mecü ixĩcü, rü nataxuma i to. Natürü ngẽxguma cunayauxchaü̃gu i maxü̃ i taguma gúxü̃, rü ¡naga naxĩnü i Tupanaarü mugü! —ñanagürü.
18 Rü yexguma ga gumá ngextü̱xücü rü ñanagürü: —¿Ngexü̃rüüxü̃ i Tupanaarü mugü tá nixĩ i naga chaxĩnüxü̃? —ñanagürü. Rü Ngechuchu nanangãxü̃ rü ñanagürü nüxü̃: —¡Taxũtáma cumáeta, rü taxũtáma nai i ngemaxã cumaxü̃, rü taxũtáma cungĩ́ta̱a̱x, rü taxũtáma doraxü̃ quixu i togüchiga!
19 ¡Rü tümaga naxĩnü ya cunatü rü cué, rü nüxü̃ nangechaü̃ i cumücügü ngẽma nax cugü cungechaü̃xü̃rüxü̃! —ñanagürü.
20 Rü yexguma ga gumá ngextü̱xücü rü ñanagürü: —Guxü̃ma i ngẽma mugü i nüxü̃ quixuxü̃ rü woetama chorü bucüma mea chayanguxẽxẽ. ¿Rü ta̱xacürü to tá chaxü nax choxü̃́ nangẽxmaxü̃ca̱x i maxü̃ i taguma gúxü̃? —ñanagürü.
21 Rü Ngechuchu nanangãxü̃ rü ñanagürü nüxü̃: —Ega aixcüma Tupanape̱xewa mecü quixĩxchaü̃gu, rü name nixĩ i namaxã cutaxe i guxü̃ma i curü ngẽmaxü̃gü rü togü i ngearü diẽruã̱xgüxü̃na cunaxã i ngẽma curü natanü. Rü ngẽxguma tá cuxü̃́ nangẽxma i cuchica i daxũguxü̃ i naanewa. Rü ñu̱xũchi marü name i chowe curüxũ —ñanagürü.
22 Natürü yexguma yemaxü̃ naxĩnügu ga gumá ngextü̱xücü rü poraãcü nangechaü̃, yerü namu ga norü yemaxü̃gü.
23 Rü yexguma ga Ngechuchu rü norü ngúexü̃güxü̃ ñanagürü: —Aixcüma pemaxã nüxü̃ chixu rü naguxchaxüchi nixĩ nax wüxi i duü̃xü̃ i diẽruã̱xü̃chixü̃ rü Tupana ãẽ̱xgacü ixĩxü̃wa nax nanguxü̃.
24 Rü aixcüma pemaxã nüxü̃ chixu rü naguxchaxüchi nax wüxi i caméyu rü wüxi ya ucumaxetüwa naxüpetüxü̃. Rü yexera nüxü̃́ naguxcha naxca̱x i wüxi i duü̃xü̃ i diẽruã̱xü̃chixü̃ nax yaxücuxü̃ i ngextá Tupana ãẽ̱xgacü ixĩxü̃wa —ñanagürü.
25 Rü yexguma yemaxü̃ naxĩnüegu ga norü ngúexü̃gü rü poraãcü naba̱i̱xãchiãẽgü. Rü nügüna nacagüe rü ñanagürügü: —¿Rü texé tá tixĩ ya nayaxúxe i maxü̃ i taguma gúxü̃? —ñanagürügü.
26 Rü Ngechuchu nüxü̃ nadawenü rü ñanagürü nüxü̃: —Duü̃xü̃gü rü taxuacüma nügü namaxẽxẽ, natürü Tupanaaxü̃́ rü guxü̃ma natauxcha —ñanagürü.
27 Rü yexguma ga Pedru rü ñanagürü nüxü̃: —Pa Corix, toma rü marü ítanawogü ga guxü̃ma ga torü yemaxü̃gü nax cuwe tarüxĩxü̃ca̱x. ¿Rü ta̱xacü tá nixĩ i torü natanü i ñu̱xmax? —ñanagürü.
28 Rü Ngechuchu nanangãxü̃ rü ñanagürü nüxü̃: —Aixcüma pemaxã nüxü̃ chixu rü ngẽma ngunexü̃ ya Tupana nagu nangexwaca̱xü̃xẽẽxü̃ i guxü̃ma, rü Tupana Nane ya duü̃xü̃xü̃ ixĩcü rü norü tochica i mexẽchixü̃wa tá narüto. Rü pema i 12 i chorü ngúexü̃gü nax chowe perüxĩxü̃, rü pema rü tá ta pexü̃́ nangẽxma i perü tochicaxü̃ i chauxü̃tawa. Rü ngéma tá perütogü nax namaxã ipecuáxü̃ca̱x i ngẽma 12 i Iraétücumügü.
29 Rü guxãma ya yíxema tümapata cha̱u̱xca̱x ítáxe, rüe̱xna tümaenexẽgüxü̃ rü tümaeya̱xgüxü̃ cha̱u̱xca̱x ítáxe, rüe̱xna tümanatüxü̃ rü tümaéxü̃ cha̱u̱xca̱x ítáxe, rüe̱xna tümama̱xü̃ rü tümaxacügüxü̃ rü tümaarü naane cha̱u̱xca̱x ítáxe, rü 100 e̱xpü̱xcüna i ngẽma noxri tüxü̃́ ngẽxmaxü̃arü yexera tá tayaxu. Rü naétü tá tanayaxu i maxü̃ i taguma gúxü̃.
30 Natürü muxü̃ma i nümaxü̃ i ñoma i naanewa duü̃xü̃gü wixpe̱xewa ügüxẽẽxü̃, rü daxũguxü̃ i naanewa rü Tupana tá wixweama nanaxügüxẽxẽ. Rü muxü̃ma i nümaxü̃ i ñoma i naanewa duü̃xü̃gü wixweama ügüxẽẽxü̃, rü daxũguxü̃ i naanewa rü Tupana tá wixpe̱xewa nanaxügüxẽxẽ.
