San Mateo 24:1-51
24 Rü yexguma Tupanapata ga taxü̃newa ínaxũũxgu ga Ngechuchu, rü norü ngúexü̃gü naxca̱x naxĩ nax nüxü̃ nawegüãxü̃ca̱x ga gumá Tupanapata ya taxü̃nearü ĩpatagü.
2 Natürü Ngechuchu rü ñanagürü: —¿Nüxü̃ pedauxü̃ ya guxü̃nema ya yima ĩpatagü? Natürü pemaxã nüxü̃ chixu rü aixcüma guxü̃nema ya daa ĩpatagü rü tá nagu napogüe. Rü naxtapü̱xarü nutagü rü taxucütama nügüétü naxüxüra, rü bai ya wüxi —ñanagürü.
Cua̱xruü̃gü i tá nüxü̃ idauxü̃ naxü̃pa nax nagúxü̃ i naane
3 Rü ñu̱xũchi Oribunecüarü Ma̱xpǘnewa naxĩ. Rü yexguma guma ma̱xpǘnewa nato̱xgu ga Ngechuchu rü norü ngúexü̃gü naxü̃tawa naxĩ nax nüxicatama nüxna nacagüexü̃ca̱x. Rü ñanagürügü: —Tanaxwa̱xe i tomaxã nüxü̃ quixu nax ñuxgu tá nangupetüxü̃ i ngẽma nüxü̃ quixuxü̃. ¿Rü ta̱xacü tá nixĩ i norü cua̱xruxü̃ i nawa nüxü̃ tacuáxü̃ nax wena núma cuxũxü̃ rü nagúxü̃ i naane? —ñanagürügü.
4 Rü yexguma ga Ngechuchu rü ñanagürü nüxü̃: —¡Pexũãẽgü nax taxúema pexü̃ womüxẽẽxü̃ca̱x!
5 Erü muxũchixü̃ tá chauégagu ínangugü, rü ñanagürügü tá: “Choma nixĩ i Cristu”, ñanagürügü tá. Rü muxü̃ma i duü̃xü̃güxü̃ tá nawomüxẽẽgü.
6 Rü tá nüxü̃ pexĩnüechiga nax nügü nada̱i̱xü̃ i ñuxre i nachixü̃anegü rü nügü nax nadaixchaü̃xü̃ i togü i nachixü̃anegü. ¡Natürü taxũtáma ngẽmaca̱x peba̱i̱xãchiãẽgü! Erü woetama ngẽmaãcü tátama nangupetü i noxrix. Natürü taxũtáma naanearü gu̱x nixĩ i ngẽma.
7 Erü wüxi i nachixü̃ane rü to i nachixü̃anemaxã tá nügü nadai. Rü wüxi i ãẽ̱xgacü rü to i ãẽ̱xgacümaxã tá nanu, rü norü churaragü rü ngẽma to i ãẽ̱xgacüarü churaragümaxã tá nügü nadai. Rü tá taiya nangu̱x, rü tá nataxüchi i da̱xaweanegü, rü muxü̃ma i nachicagüwa rü tá naxĩã̱xãchiane.
8 Rü guxü̃ma i ngẽma pemaxã nüxü̃ chixuxü̃, rü ngẽma nixĩ i norü ügümare i ngẽma ngúxü̃ i tá ínguxü̃.
9 Rü ngẽxguma i perü uanügü rü tá pexü̃ ínayauxü̃ nax pexü̃ yacua̱i̱xgüxü̃ca̱x rü pexü̃ nada̱i̱xü̃ca̱x. Rü guxü̃ma i duü̃xü̃gü rü tá chaugagu pexchi naxaie.
10 Rü ngẽxguma rü muxũchixü̃ i chorü duü̃xü̃gü rü tá nüxü̃ narüxoe nax choxü̃́ yaxõgüãxü̃, rü nügütanüwa rü tá nügüchi naxaie. Rü nügüechita tá ãẽ̱xgacüxü̃tawa nügü ínayaxuaxü̃gü.
11 Rü muxũchixü̃ i orearü uruü̃güneta tá ínangugü. Rü tá nüxü̃ nixugügü nax Tupana yixĩxü̃ ya núma namugücü nax nüxü̃ yaxugüxü̃ca̱x i ore. Rü ngẽmaãcü tá muxũchixü̃ i duü̃xü̃güxü̃ nawomüxẽẽgü.
12 Rü poraãcü tá nangẽxma i chixexü̃, rü ngẽmagagu rü muxũchixü̃tama i duü̃xü̃gü rü taxũtáma nügü nangechaü̃gü.
13 Natürü yíxema naétüwa mea Tupanaaxü̃́ yaxõõmáxẽ rü yíxema tá tixĩ ya aixcüma nayaxúxe i maxü̃ i taguma gúxü̃.
14 Rü ngẽma Tupanaarü ore i mexü̃ rü guxü̃ i naanewa tá nüxü̃ nixugügü nax guxü̃ i duü̃xü̃gü nüxü̃ nacua̱xgüxü̃ca̱x. Rü ngẽmawena tá nixĩ i nagúxü̃ i naane.
15 Rü nũxcümaü̃cü ga Tupanaarü orearü uruxü̃ ga Danié nachiga nanaxümatü i ngẽma chixexü̃ i Tupanape̱xewa poraãcü ãũãchixü̃ i tá ínguxü̃. Rü ngẽxguma nüxü̃ peda̱u̱xgu nax Tupanapata ya taxü̃ne ya üünenewa nangóxü̃ i ngẽma chixexü̃ i Tupanape̱xewa chixexü̃chixü̃, rü yíxema nawa ngúxe rü name nixĩ i nüxü̃ tacua̱x nax ta̱xacüchiga yixĩxü̃.
16 Rü ngẽxguma ngẽma ngo̱xgu, rü ngẽma Yudéaanewa ngẽxmagüxü̃ i duü̃xü̃gü rü nanaxwa̱xe nax ma̱xpǘneanewa nabuxmüxü̃.
17 Rü ngẽma ngunexü̃gu ega texé tümapataétüwa ngẽxmagu, rü tama name i tümapatagu tayangaxi nax tümaarü ngẽmaxü̃ tayayaxuxü̃ca̱x.
18 Rü texé ya tümaanewa ngẽxmaxe rü tama name i tümapataca̱x tataegu nax tümachirugü tayayaxuxü̃ca̱x.
19 Rü ngẽma ngunexü̃gügu rü wüxi i ngechaü̃ tá nixĩ i tümaca̱x ya yíxema ngexegü ya itacharaü̃güxe rü yíxema imaixacügüxe.
20 ¡Rü Tupanana naxca̱x peca i perü yumüxẽwa nax tama gáuane ixüyane rüe̱xna ngü̃xchigaarü ngunexü̃guyane pexca̱x ínanguxü̃ i ngẽma chixexü̃!
21 Erü ngẽma ngunexü̃gügu rü poraãcü tá nangẽxma i ngúxü̃ ga noxri naane ixügügumama taguma yexmaxü̃, rü ngẽmawena rü tagutáma wena nangẽxma.
22 Rü ngẽxguma Tupana tama nanoxrexẽẽgu i ngẽma ngunexü̃gü, rü taxúetama tamaxü̃. Natürü Tupana tá nananoxrexẽxẽ i ngẽma ngunexü̃gü tümaca̱x ya yíxema nüma tüxü̃ nadexe.
23 Rü ngẽxguma texé pexü̃ ñagügu: “Dücax, daa nixĩ ya Cristu”, ñagügu, rüe̱xna: “Gua nixĩ ya Cristu”, ñagügu, ¡rü tama name i nüxü̃́ peyaxõgü!
24 Erü Cristunetagü rü Tupanaarü orearü uruü̃netagü tá ínangugü. Rü tá nanaxügü i muxü̃ma i cua̱xruü̃gü i taxü̃gü. Rü ngẽxguma nüxü̃́ natauxchagu, rü ngẽmamaxã tá tüxü̃ nawomüxẽẽgü rü woo ya yíxema duü̃xẽgü ya Tupana tüxü̃ dexe.
25 Dücax, naxü̃pa nax nangupetüxü̃ i guxü̃ma i ngẽma ngúxü̃, rü choma rü marü pemaxã nüxü̃ chixu i ngẽma.
26 Rü ngẽmaca̱x i ngẽxguma duü̃xü̃gü ñagügu pexü̃: “Dücax, yea taxúema íxãpataxü̃wa nangẽxma ya Cristu”, ñagügu, rü tama name i ngéma pexĩ. Rü ngẽxguma ñagügu pexü̃: “Dücax, nua ucapuwa nangẽxma ya Cristu”, ñagügu, rü tama name i nüxü̃́ peyaxõgü.
27 Erü ñoma wüxi i ba̱i̱xbeanexü̃ i éstewaama rü ñu̱xmata oéstewaama nguxü̃rüxü̃ tá nixĩ i ngẽxguma wenaxarü núma naxũxgu ya Tupana Nane ya duü̃xü̃xü̃ ixĩcü.
28 Rü duü̃xü̃gü rü tá cha̱u̱xca̱x nangutaque̱xegü ñoma ẽxchagü nawemüca̱x ngutaque̱xexü̃rüxü̃.
Ñuxãcü tá nixĩ i ngẽxguma nataeguxgu ya Tupana Nane ya duü̃xü̃xü̃ ixĩcü
29 Rü nawena i ngẽma ngúxü̃gü rü tá nixo ya üa̱xcü, rü taxũtáma inabaxi ya tauemacü. Rü woramacurigü rü ẽxtagü rü tá narüyi. Rü guxü̃ma i daxũwa ngẽxmagüxü̃ rü tá naxĩã̱xãchitanü rü tá nu ne nanaxĩmare.
30 Rü ñu̱xũchi duü̃xü̃gü tá nüxü̃ nadaugü nax daxũwa ne nachü̱xüxü̃ ya Tupana Nane ya duü̃xü̃xü̃ ixĩcü. Rü guxü̃ i nachixü̃anecüã̱x i duü̃xü̃gü rü tá naxauxe. Rü tá nüxü̃ nadaugü ya Tupana Nane ya duü̃xü̃xü̃ ixĩcü i ngẽxguma taxü̃ i norü poramaxã rü ngóonexü̃maxã caixanexü̃gügu ínachü̱xüxüegu.
31 Rü nüma rü tá nanamu i norü orearü ngeruü̃gü i daxũcüã̱x nax yacuegüãxü̃ca̱x ya norü cornétagü nax ngẽmaãcü naxĩtaque̱xexẽẽãxü̃ca̱x i guxü̃ma i ngẽma duü̃xü̃gü i nadexü̃ i guxü̃wama ngẽxmagüxü̃ ñu̱xmata naane iyacuáxü̃wa ngẽxmagüxü̃.
32 ¡Iperüxĩnüe i ñaa ore i cua̱xruxü̃ i ori̱x i igunecüchiga, rü naxca̱x pengúe! Rü ngẽxguma ngexwaca̱xü̃xü̃ i nachacüügü iyarüyixgu rü naxüátügu, rü ngẽmawa nüxü̃ pecua̱x nax paxa tá taunecü yixĩxü̃.
33 Rü ngẽmaãcü tá nixĩ i ngẽxguma nagúxchaü̃gu i naane. Erü ngẽxguma nüxü̃ peda̱u̱xgu nax nangupetüxü̃ i guxü̃ma i ngẽma pemaxã nüxü̃ chixuxü̃, rü ngẽmawa tá nüxü̃ pecua̱x nax marü yangaicaxüchixü̃ nax ínanguxü̃ ya Tupana Nane ya duü̃xü̃xü̃ ixĩcü.
34 Rü aixcüma pemaxã nüxü̃ chixu rü guxü̃ma i ngẽma nüxü̃ chixuxü̃ rü tá nangupetü naxü̃pa nax nayuexü̃ i duü̃xü̃gü i ñu̱xma maxẽxü̃.
35 Rü ñoma i naane rü ngẽma daxũwa nüxü̃ idauxü̃ rü tá nagu̱x. Natürü chorü ore rü tagutáma inayarüxo rü aixcüma tá ningu.
36 Natürü ngẽma ngunexü̃ rü ora i nagu tá nangupetüxü̃ i ngẽma pemaxã nüxü̃ chixuxü̃, rü Chaunatü ya Tupanaxicatama nüxü̃ nacua̱x nax ñuxgu tá nangupetüxü̃ i ngẽma, rü taxúema ya togue nüxü̃ tacua̱x. Rü woo i norü orearü ngeruü̃gü i daxũcüã̱x rü tama nüxü̃ nacua̱xgü, rü woo ya Tupana Nane rü tama nüxü̃ nacua̱x nax ñuxgu tá nangupetüxü̃ i ngẽma.
37 Rü yexgumarüxü̃ ga duü̃xü̃güxü̃ ngupetüxü̃ ga yexguma Noé maxü̃gu, rü ngẽxgumarüxü̃ tá ta nüxü̃ nangupetü i ngẽxguma ínanguxgu ya Tupana Nane nax duü̃xü̃xü̃ ixĩcü.
38 Rü yexguma, naxü̃pa ga gumá mucü ga taxüchicü ga guxü̃wama inanguanexẽẽcü, rü ga duü̃xü̃gü rü nachibüe, rü naxaxegü, rü nixãma̱xgü rü nixütexacügü ñu̱xmata nawa nangu ga yema ngunexü̃ ga Noé nagu naweü̃gu ixüexü̃.
39 Rü yexguma duü̃xü̃gü tama nagu irüxĩnüegu ga yema tá nüxü̃ ngupetüxü̃, rü ínangu ga gumá mucü ga taxüchicü ga yema duü̃xü̃güxü̃ daicü. Rü ngẽxgumarüxü̃ tá ta nixĩ i ngẽxguma wenaxarü núma naxũxgu ya Tupana Nane ya duü̃xü̃xü̃ ixĩcü.
40 Rü ngẽma ngunexü̃gu rü taxre i yatügü rü wüxi i naanewa tá nügümaxã nangẽxmagü. Rü wüxi tá nixĩ ya Tupana igaxü̃ rü ngẽma to rü tá ngéma nata̱x.
41 Rü taxre i ngexü̃gü tá nügümaxã ínacaegü. Rü wüxi tá nixĩ ya Tupana igaxü̃ rü ngẽma to rü tá ngéma nata̱x.
42 ¡Pexũãxẽgü! Erü tama nüxü̃ pecua̱x i ta̱xacürü ora tá ínangu i perü Cori.
43 ¡Rü nagu perüxĩnüe! Rü ngẽxguma chi wüxi i ĩpataarü yora nüxü̃ cua̱xgu nax ta̱xacürü oragu tá ínanguxü̃ i ngĩ́ta̱xaxü̃ rü taxũchima nape. Erü nüxna chi nadau ya napata nax tama ngẽxma naxücuxü̃ca̱x i ngẽma ngĩ́ta̱xaxü̃ nax ta̱xacüca̱x ngéma yangĩ́xü̃ca̱x.
44 Rü ngẽmaca̱x name nixĩ i pexuãẽgü i pemax. Erü ngẽma ngunexü̃ i tama nagu íperüxĩnüexü̃gu tá nixĩ i ngürüãchi ínanguxü̃ ya Tupana Nane ya duü̃xü̃xü̃ ixĩcü.
Duü̃xü̃ ga mea norü coriga ĩnüxü̃ rü to ga tama mea norü coriga ĩnüxü̃chiga
45 ¿Rü texé tixĩxü̃ ya tümaarü coriarü duü̃xü̃ ya aixcüma yanguxẽẽ́xẽ rü tümaãẽxü̃ cuáxe? ¿Tama ẽ̱xna yíxema tixĩxü̃ ya tümaarü cori tüxna ãgaxe nax mea nüxna tadauxü̃ca̱x rü mea oragu tanachibüexẽxẽxü̃ca̱x i norü duü̃xü̃gü?
46 Rü tataãxẽ ya yíxema coriarü duü̃xẽ ega ngẽxguma ínanguxgu i tümaarü cori rü tüxü̃ iyanga̱u̱xe nax meama ítanaxüxü̃ i ngẽma puracü i nagu tüxü̃ namuxü̃.
47 Rü aixcüma pemaxã nüxü̃ chixu rü ngẽma tümaarü cori rü tá guxü̃ma i norü ngẽmaxü̃güarü dauruü̃xü̃ tá tüxü̃ nixĩxẽxẽ.
48 24:48-50 Natürü ngẽxguma chi ngẽma coriarü duü̃xü̃ rü wüxi i yatü i chixexü̃ yixĩxgu, rü chi nagu naxĩnügu nax taxũtáma paxa ínanguxü̃ i norü cori, rü chi inaxügüãgu nax chixri namuãxü̃ i namücügü i norü coriarü duü̃xü̃gü, rü chi ngãxẽxü̃tanügu naxãxgu nax namaxã nachibüxü̃ca̱x rü naxaxexü̃ca̱x, rü ngürüãchi ngẽma ngunexü̃ rü ngẽma ora i tama nagu ínangu̱xuxẽẽãgu rü tá ínangu i norü cori.
49 Nüü̃ nadau 24:48
50 Nüü̃ nadau 24:48
51 Rü poraãcü tá nanapoxcu i ngẽma norü duü̃xü̃, ngẽma nügü írümegünetaxü̃xü̃ nax napoxcuexü̃rüxü̃. Rü ngéma tá narüdoxü rü nixü̃́xchapüta —ñanagürü.
