San Mateo 25:1-46
25 Rü ñanagürü ga Ngechuchu: —Pemaxã tá nüxü̃ chixu i wüxi i ore nax nawa nüxü̃ pecuáxü̃ca̱x i ñuxãcü tá duü̃xü̃güarü ãẽ̱xgacü nax yixĩxü̃ ya Tupana i ngẽxguma ínanguxgu. Rü iyexma ga 10 ga pacü ga ngĩrü daparinamaxã ngĩgüarü petawa ĩcü nax yaxümücügüãxü̃ca̱x ga gumá yatü ga ingĩxchaü̃cü.
2 Rü 5 ga yema pacü rü tama íxuãxẽgü. Rü yema nai ga 5 ga pacü rü meama íxuãxẽgü.
3 Rü yema tama uãxẽgücü, rü yexguma ngĩrü daparina íyangegügu rü tama to ga ngĩrü queruyinu ta iyangegü.
4 Natürü ga yema uãxẽgücü rü to ga ngĩrü queruyinu ta iyangegü.
5 Natürü ga gumá yatü ga ingĩxchaü̃cü rü tama paxa ínangu. Rü düxwa ga yema pacügü rü ipee yerü iyaxtae.
6 Rü yexguma ngãxü̃cüüwa nanguxgu, rü yema pacügü nüxü̃ ixĩnüe ga wüxi ga naga ga ñaxü̃: “Domama nixĩ ya yimá yatü ya ingĩxchaü̃cü. ¡Rü íperüdagü, rü ípeyadaugü!” ñaxü̃.
7 Rü guxcüma ga yema pacügü rü íirüdagü, rü iyamexẽẽgü ga ngĩrü daparinagü.
8 Rü yexguma ga yema 5 ga pacügü ga tama uãxẽgücü rü ngĩgürügügü ngĩxü̃ ga yema pacügü ga uãxẽgücü: “¡Íxraxü̃ i perü queruyinu toxna pexã, erü torü omügü rü nixogü!” ngĩgürügügü.
9 Natürü ga yema pacügü ga uãxẽgücü rü ngĩxü̃ ingãxü̃gü, rü ngĩgürügügü: “Taxucürüwa pexna tanaxã, erü ngẽxguma chi pexna tanaxãxgu rü taxũchima ningu i toxca̱x rü pexca̱x. Rü ngẽmaca̱x narümemae nixĩ i ngextá namaxã ínataxegüxü̃wa pegüxü̃́ nawa pexĩ”, ngĩgürügügü.
10 Natürü yexguma ga yema 5 ga pacügü ga tama uãxẽgücü ngĩrü queruyinuwa naxĩyane, rü ínangu ga gumá yatü ga ingĩxchaü̃cü. Rü ga yema pacügü ga uãxẽgücü rü iyachocu nawa ga gumá ĩ ga nawa iyangĩxü̃ne. Rü ñu̱xũchi nanawãxta ga ĩã̱x.
11 Rü yemawena íingugü ga yema pacügü ga tama uãxẽgücü, rü ngĩgürügügü: “¡Pa Corix, Pa Corix, toxca̱x yawãxna i ĩã̱x!” ngĩgürügügü.
12 Natürü nüma ga cori, rü ngĩxü̃ nangãxü̃, rü ñanagürü: “Pemaxã nüxü̃ chixu rü aixcüma tama pexü̃ chacua̱x nax texégü pixĩgüxü̃” —ñanagürü.
13 Rü ñu̱xũchi ñanagürü ga Ngechuchu: —¡Pexũãẽgü! Erü tama nüxü̃ pecua̱x i ta̱xacürü ngunexü̃ rü ta̱xacürü ora tá ínangu ya Tupana Nane ya duü̃xü̃xü̃ ixĩcü —ñanagürü.
Ore ga diẽrugu ixuxü̃
14 Rü ñanagürü ta ga Ngechuchu: —Ngẽma Tupana nax duü̃xü̃güarü ãẽ̱xgacü yixĩxü̃, rü nanangẽxgumaraxü̃ ga wüxi ga yatü ga ixũãchichaü̃cü ga to ga nachixü̃anewa nax naxũxü̃ca̱x. Rü nüma ga gumá yatü rü norü duü̃xü̃güca̱x naca, rü nüxna inaxã ga diẽru nax nüxü̃́ ngĩxna nadaugüxü̃ca̱x.
15 Rü wüxi ga yema norü duü̃xü̃na ngĩxü̃ naxã ga 5,000 tachinü ga diẽru. Rü yema tona ngĩxü̃ naxã ga 2,000 tachinü ga diẽru. Rü yema tona ngĩxü̃ naxã ga 1,000 tachinü ga diẽru. Rü nanangugü ga wüxichigüarü cua̱x rü yemaacü wüxichigüna ngĩxü̃ inaxã ga yema diẽru. Rü ñu̱xũchi inaxũãchi ga yema cori nax to ga nachixü̃anewa naxũxü̃ca̱x.
16 Rü yema norü duü̃xü̃ ga 5,000 tachinü ga diẽru ngĩxü̃ yaxuxü̃, rü ngĩmaxã napuracü, rü nai ga 5,000 tachinü ngĩmaxã nayaxu.
17 Rü yexgumarüxü̃ ta ga yema norü duü̃xü̃ ga 2,000 tachinü ga diẽru ngĩxü̃ yaxuxü̃, rü ngĩmaxã napuracü, rü nai ga 2,000 tachinü ngĩmaxã nayaxu.
18 Natürü ga yema norü duü̃xü̃ ga 1,000 tachinü ga diẽru ngĩxü̃ yaxuxü̃, rü ngĩmaxã ínixũ. Rü ngĩxü̃ nixaixmaü̃, rü yexma ngĩxü̃ nata̱x ga yema norü coriarü diẽru.
19 Rü nũxcüma nataegu ga yema duü̃xü̃güarü cori. Rü yexguma ínanguxgu rü inanaxügü ga norü duü̃xü̃gümaxã nax namexẽẽãxü̃ ga norü diẽruchiga.
20 Rü yéma naxũ ga yema norü duü̃xü̃ ga 5,000 tachinü ga diẽru ngĩxü̃ yaxuxü̃. Rü yema diẽruétü ngĩxü̃ inaxã ga nai ga 5,000 tachinü ga diẽru. Rü ñanagürü: “Pa Corix, cuma rü choxna cunaxã ga 5,000 tachinü ga diẽru. Marü ngĩmaxã chapuracü rü ngĩmaxã cuxü̃́ ngĩxü̃ chayaxu i ñaa nai i 5,000 tachinü”, ñanagürü.
21 Rü norü cori rü ñanagürü nüxü̃: “Pa Chorü Duü̃xü̃x, wüxi i mexẽchixü̃ quixĩ, rü meama cupuracü. Rü mea nüxna cudau ga yema noxre ga diẽru ga cuxna ngĩxü̃ chaxãcü, rü meama ngĩmaxã cupuracü. Rü ngẽmaca̱x i ñu̱xma rü tá rümumaecüna cuxü̃ chadauxẽxẽ. ¡Rü ixücu i chopatawa rü ngĩxã tataãẽgü!” ñanagürü.
22 Rü yemawena ínangu ga yema to ga norü duü̃xü̃ ga 2,000 tachinü ga diẽru ngĩxü̃ yaxuxü̃. Rü ñanagürü: “Pa Corix, ñaa iyixĩ ga yema 2,000 tachinü ga diẽru ga choxna ngĩxü̃ cuxãcü. Marü ngĩmaxã chapuracü rü ngĩmaxã cuxü̃́ ngĩxü̃ chayaxu i nai i 2,000 tachinü. Rü ñaa iyixĩ”, ñanagürü.
23 Rü norü cori rü ñanagürü nüxü̃: “Pa Chorü Duü̃xü̃x, wüxi i mexẽchixü̃ quixĩ, rü meama cupuracü. Rü mea nüxna cudau ga yema noxre ga diẽru ga cuxna ngĩxü̃ chaxãcü, rü meama ngĩmaxã cupuracü. Rü ngẽmaca̱x i ñu̱xmax rü tá rümumaecüna cuxü̃ chadauxẽxẽ. ¡Rü ixücu i chopatawa rü ngĩxã tataãxẽgü!” ñanagürü.
24 Natürü yexguma norü corixü̃tawa nanguxgu ga yema norü duü̃xü̃ ga 1,000 tachinü ga diẽru ngĩxü̃ yaxuxü̃, rü norü corixü̃ ñanagürü: “Pa Corix, choma nüxü̃ chacua̱x rü wüxi i yatü i aüxü̃ quixĩ. Rü cunayaxu i nanetüarü o i ngextá tama ícutoexü̃wa, rü cunabuxarü oõ̱x i nanetü i tama icutoxü̃.
25 Rü yemaca̱x chamuü̃. Rü waixü̃mügu ngĩxü̃ chixaixmaü̃ rü ngĩxü̃ ichata̱x. Natürü ñaa iyixĩ i ngẽma curü diẽru”, ñanagürü.
26 Rü yexguma ga norü cori rü nanangãxü̃ rü ñanagürü: “Pa Chorü Duü̃xü̃x, wüxi i chixexü̃ rü oxü̃ i chorü duü̃xü̃ quixĩ. Rü cuma meama nüxü̃ cucua̱x rü ngextá tama íchatoexü̃wa rü chanayaxu i nanetüarü o, rü chanabuxarü oõ̱x i nanetü i tama ichatoxü̃.
27 Rü yemaca̱x narümemae chi nixĩ ga bancugu choxü̃́ ngĩmaxã nax cunguxü̃xü̃ ga chorü diẽru nax ngéma choxü̃́ ngĩxü̃ yamuxẽẽgüxü̃ca̱x, rü ngẽmaãcü mucü ngĩxü̃ nax chayaxuxü̃ca̱x i ngẽxguma íchanguxgu”, ñanagürü.
28 Rü yexguma ga yema cori rü nanamu ga yema togü ga norü duü̃xü̃gü ga yéma yexmagüxü̃, rü ñanagürü nüxü̃: “¡Nüxna ngĩxü̃ peyau̱x i ngẽma diẽru, rü ngẽma yatü i 10,000 i diẽru nüxü̃́ ngẽxmaxü̃na ngĩxü̃ pexã!
29 Erü yíxema tüxü̃́ nangẽxmacü rü yexera tá tüxna ngĩxü̃ taxã, rü ngẽmaãcü tá tüxü̃́ imuxũchi. Natürü yíxema tüxü̃́ natau̱xcü rü woo ngẽma noxre i tüxü̃́ ngẽxmacü rü tá tüxna ngĩxü̃ tayaxu.
30 ¡Rü yéama düxétüwa poraãcü ínaxẽanexü̃wa peyatá i ñaa chorü duü̃xü̃ i taxuwama mexü̃! Rü ngéma tá narüdoxü rü tá nixü̃́xchapüta” —ñanagürü.
Naanearü gu̱xgu rü Cristupe̱xegu tá nangutaque̱xegü i guxü̃ i nachixü̃anecüã̱x i duü̃xü̃gü nax yadexechiãxü̃ca̱x i ngẽma mexü̃gü rü nax napoxcueãxü̃ca̱x i ngẽma chixexü̃gü
31 Rü ñanagürü ga Ngechuchu: —Ngẽxguma wenaxarü núma naxũxgu ya Tupana Nane ya duü̃xü̃xü̃ ixĩcü, rü norü tochica i mexẽchixü̃wa tá narüto. Rü norü orearü ngeruü̃gü i daxũcüã̱x rü tá nanaxümücügü.
32 Rü guxü̃ i nachixü̃anecüã̱x i duü̃xü̃gü rü tá nape̱xegu nangutaque̱xegü. Rü nüma rü tá nayadexechi, ñoma wüxi i carnéruarü dauruxü̃ i norü carnérugü rü chíbugü nüxrüguma mugüxü̃rüxü̃.
33 Rü ngẽma carnérugü ixĩgüxü̃ rü norü tügünecüwawa tá nanangexmagüxẽxẽ. Rü ngẽma cabragü ixĩgüxü̃ rü norü to̱xwecüwawa tá nanangexmagüxẽxẽ.
34 Rü ngẽxguma i nüma ya Ãẽ̱xgacü rü tá ñanarügü nüxü̃ i ngẽma norü tügünecüwawa ngẽxmagüxü̃: “¡Nua pexĩ i pemax ya Chaunatü mexü̃ pemaxã uegugüxe! ¡Rü nüma ãẽ̱xgacü íyixĩxü̃wa pichocu rü penayaxu i pechica ga noxritama naane naxü̱xgu pexca̱x namexẽẽxü̃!
35 Rü ngẽmaãcü tá pemaxã namecüma yerü yexguma chataiyaxgu rü pema rü choxü̃ pechibüxẽxẽ. Rü yexguma chita̱xawagu rü choxü̃ pexaxexẽxẽ. Rü yexguma tama nüxü̃ pecua̱xgu nax texé chixĩxü̃ rü mea choxü̃ peyauxgü ga pepatawa.
36 Rü yexguma changexchirugu rü choxü̃ pexüxchiru. Rü yexguma chida̱xawegu rü choxü̃ perüngü̃xẽxẽ. Rü yexguma poxcupataü̃wa chayexmagu rü choxü̃ ípeyadau”, ñanarügü tá nüxü̃.
37 Rü ngẽxguma i ngẽma duü̃xü̃gü i chadexü̃ rü ñanagürügü tá nüxü̃: “Pa Corix, ¿ñuxgu ga cuxü̃ tadauxü̃ ga nax cutaiyaxü̃ rü cuxü̃ tachibüxẽxẽxü̃? ¿Rü ñuxgu ga cuxü̃ tadauxü̃ ga nax quita̱xawaxü̃ rü cuxü̃ taxaxẽxẽxü̃?
38 ¿Rü ñuxgu ga tochixü̃wa cunguxü̃ rü mea cuxü̃ tayauxgüxü̃ ga woo tama cuxü̃ tacua̱xgügu? ¿Rü ñuxgu ga cungexchiruxü̃ rü cuxü̃ taxüxchirugüxü̃?
39 ¿Rü ñuxgu ga cuxü̃ tadaugüxü̃ nax quida̱xawexü̃ rü ẽ̱xna poxcupataü̃wa cuyexmaxü̃ rü cuxü̃ ítayadaugüxü̃?” ñanagürügü tá.
40 Rü nüma i Ãẽ̱xgacü rü tá nanangãxü̃, rü ñanagürü tá: “Aixcüma pemaxã nüxü̃ chixu rü yexguma nüxü̃ perüngü̃xẽxẽgügu i ngẽma chorü duü̃xü̃ i yexeraãcü ngearü ngẽmaxü̃áxü̃, rü choxü̃ nixĩ ga perüngü̃xẽxẽgüxü̃”, ñanagürü tá nüxü̃.
41 Rü ñu̱xũchi i Ãẽ̱xgacü, rü ñanagürü tá nüxü̃ i ngẽma to̱xwewa ngẽxmagüxü̃: “¡Choxna pixĩgachi i pema i perü chixexü̃ca̱x poxcuexe! ¡Rü ngéma pexĩ nawa ya yimá üxü ya taguma ixoxü̃ne ya Tupana ímexẽẽ́ne naxca̱x i ngo̱xo i Chataná rü norü duü̃xü̃gü!
42 Yerü yexguma chataiyaxgu rü pema rü tama choxü̃ pechibüxẽxẽ. Rü yexguma chita̱xawagu rü tama choxü̃ pexaxẽxẽ.
43 Rü yexguma tama nüxü̃ pecua̱xgu nax texé chixĩxü̃ rü tama choxü̃ peyauxgü ga pepatawa. Rü yexguma changexchirugu rü tama choxü̃ pexüxchirugü. Rü yexguma chida̱xawegu rü poxcupataü̃wa chayexmagu rü tama choxü̃ ípeyadaugü”, ñanagürü tá nüxü̃.
44 Rü ngẽxguma i nümagü rü ñanagürügü tá: “Pa Corix, ¿Ñuxgu ga cuxü̃ tadaugüxü̃ ga nax cutaiyaxü̃, rü ẽ̱xna nax quita̱xawaxü̃, rü ẽ̱xna nax cungexchiruxü̃, rü ẽ̱xna quida̱xawexü̃, rü ẽ̱xna poxcupataü̃wa nax cuyexmaxü̃, rü tama cuxü̃ tarüngü̃xẽxẽgüxü̃?” ñanagürügü tá.
45 Rü nüma i Ãẽ̱xgacü rü tá nanangãxü̃, rü ñanarügü tá nüxü̃: “Aixcüma pemaxã nüxü̃ chixu rü yexguma tama nüxü̃ perüngü̃xẽxẽgügu ga wüxi ga duü̃xü̃ ga yexeraãcü ngearü ngẽmaxü̃áxü̃, rü choxü̃ nixĩ ga tama perüngü̃xẽẽxü̃”, ñanarügü tá nüxü̃.
46 Rü ngẽma duü̃xü̃gü rü tá poxcu i taguma gúxü̃wa naxĩ. Natürü ngẽma duü̃xü̃gü i aixcüma mea Tupanaca̱x maxẽxü̃ rü tá nanayauxgü i maxü̃ i taguma gúxü̃ —ñanagürü ga Ngechuchu.
