San Mateo 27:1-66
27 Rü yexguma yangunegu rü guxü̃ma ga chacherdótegüarü ãẽ̱xgacügü rü Yudíugüarü ãẽ̱xgacügü, rü nügümaxã nanamexẽẽgü nax ñuxãcü Ngechuchuxü̃ yama̱xgüxü̃.
2 Rü nayana̱i̱xgüchacüügü rü yemaacü ãẽ̱xgacü ga Pirátuxü̃tawa nanagagü. Pirátu nixĩ ga Rómacüã̱x ga ãẽ̱xgacü ga Yudéaanemaxã icuácü.
Nayu ga Yúda
3 Rü nüma ga Yúda ga Ngechuchuxü̃ íyaxuaxü̃xü̃ rü yexguma nüxü̃ nada̱u̱xgu nax Ngechuchumaxã yu naxuegugüxü̃ rü poraãcü nüxü̃́ nangu̱x ga yema chixexü̃ ga nümatama naxüxü̃. Rü yéma naxũ naxü̃tawa ga yema chacherdótegüarü ãẽ̱xgacügü rü yema Yudíugüarü ãẽ̱xgacügü. Rü ngĩxü̃ nayatáeguxẽxẽ ga yema 30 tachinü ga diẽru ga nüxna ngĩxü̃ naxãgücü.
4 Rü ñanagürü nüxü̃: —Choma rü marü chixexü̃ chaxü, erü naechita íchayaxuaxü̃ i wüxi i yatü i taxuxü̃ma i chixexü̃ üxü̃, rü ñu̱xma rü tá ngẽmagagu nayu —ñanagürü. Natürü nümagü ga ãẽ̱xgacügü rü nanangãxü̃gü, rü ñanagürügü: —Toma rü tama nüxü̃ tacuáxchaü̃ i ngẽma. Cugagutama nixĩ, rü cuma i nüxü̃ cucuáxü̃ nax ñuxãcü cugümaxã cunamexẽxẽxü̃ i ngẽma —ñanagürügü.
5 Rü yexguma ga Yúda rü yexma Tupanapata ga taxü̃nechiãgu ngĩxü̃ nawotanü ga yema diẽru. Rü ñu̱xũchi ínixũ rü nügü nayawẽxnaxã.
6 Rü nüma ga chacherdótegüarü ãẽ̱xgacügü rü ngĩxü̃ nade ga yema diẽru. Rü ñanagürügü: —Taxucürüwa Tupanapataarü diẽruchixü̃gu ngĩxü̃ tanu i ñaa diẽru, erü ngẽmamaxã tanaxütanü i ngẽma yatü i tá yuxü̃ —ñanagürügü.
7 Rü ñu̱xũchi nügümaxã nanamexẽẽgü nax yema diẽrumaxã naxca̱x nataxegüxü̃ca̱x ga wüxi ga naane ga Üwechiruü̃arü Naanegu ãégaxü̃ nax yemagu nata̱xgüãxü̃ca̱x ga yema duü̃xü̃gü ga togü ga nachixü̃anecüã̱x ixĩgüxü̃.
8 Rü ngẽmaca̱x ñu̱xmarüta Nagüchitaxü̃ga naxãéga i ngẽma naane.
9 Rü yemaacü ningu ga Tupanaarü ore ga orearü uruxü̃ ga Yeremía nũxcümaxü̃chima nüxü̃ ixuxü̃ ga ñaxü̃:“Nümagü ngĩxü̃ nade ga yema 30 tachinü ga diẽru ga Cristutanü ga Iraétanüxü̃ ngĩxü̃ ixãgücü.
10 Rü yema diẽrumaxã naxca̱x nataxegü ga wüxi ga naane ga ‘Üwechiruü̃arü Naanegu’, ãégaxü̃,yema Cori ya Tupana chomaxã nüxü̃ ixuxü̃rüxü̃”,
ñaxü̃.
Pirátupe̱xewa nayexma ga Ngechuchu
11 Rü ãẽ̱xgacü ga Pirátuxü̃tawa Ngechuchuxü̃ nagagü. Rü nüma ga Pirátu rü Ngechuchuna naca, rü ñanagürü: —¿Cuma quixĩxü̃ i Yudíugüarü Ãẽ̱xgacü? —ñanagürü. Rü Ngechuchu nanangãxü̃, rü ñanagürü: —Ngẽma nüxü̃ quixuxü̃ chixĩ i chomax —ñanagürü.
12 Rü Ngechuchuxü̃ ínaxuaxü̃gü ga chacherdótegüarü ãẽ̱xgacügü rü Yudíugüarü ãẽ̱xgacügü. Natürü ga Ngechuchu rü taxuxü̃maama nanangãxü̃.
13 Rü yexguma ga Pirátu rü ñanagürü: —¿Tama ẽ̱xna nüxü̃ cuxĩnü i ngẽma ore i namaxã cuxü̃ ínaxuaxü̃güxü̃? —ñanagürü.
14 Natürü ga Ngechuchu rü taxuxü̃maama nanangãxü̃. Rü yemaca̱x poraãcü naba̱i̱xãchiãxẽ ga ãẽ̱xgacü ga Pirátu.
Pirátu rü Ngechuchumaxã nanaxuegu nax nayuxü̃ca̱x
15 Rü guxü̃guma ga yema Üpetüchigaarü petagu, rü Pirátu ínananguxuchixẽẽxü̃ ga wüxi ga poxcuxü̃ ga duü̃xü̃gü naxca̱x ícagüxü̃, yerü yema nixĩ ga nacüma.
16 Rü yéma nayexma ga wüxi ga poxcuxü̃ ga tachigaxü̃ ga Barabágu ãégaxü̃.
17 Rü yexguma yéma nangutaque̱xegügu ga duü̃xü̃gü, rü Pirátu nüxna naca, rü ñanagürü: —¿Rü ngexü̃rüüxü̃ i penaxwa̱xexü̃ nax íchananguxuchixẽxẽxü̃? ¿Penaxwa̱xexü̃ nax Barabáxü̃ íchananguxuchixẽxẽxü̃ rüe̱xna Ngechuchu ya Cristumaxã naxugüxü̃xü̃ íchananguxuchixẽxẽxü̃? —ñanagürü.
18 Rü yema ñanagürü ga Pirátu yerü nüxü̃ nacua̱x ga yema Yudíugüarü ãẽ̱xgacügü rü norü auxãchimaxãmare Ngechuchuxü̃ yéma nagagüxü̃.
19 Rü yexguma norü tochicawa nato̱xgu ga Pirátu, rü naxma̱x yéma imuga, rü ngĩgürügü: —Tama name i cunapoxcu i ngẽma yatü i taxuxü̃ma i chixexü̃ üxü̃. Yerü nagagu ĩnex chütacü rü poraãcü chachixenegü —ngĩgürügü.
20 Natürü yema chacherdótegüarü ãẽ̱xgacügü rü Yudíugüarü ãẽ̱xgacügü, rü duü̃xü̃güxü̃ naxucu̱xẽgü nax naxca̱x ínacagüxü̃ca̱x nax Barabáxü̃ ínanguxuchixẽẽxü̃ rü Ngechuchuxü̃ nayuxẽẽxü̃.
21 Rü ãẽ̱xgacü ga Pirátu rü wenaxarü duü̃xü̃güna naca, rü ñanagürü: —¿Ngexü̃rüüxü̃ i ngẽma taxrewa i pema penaxwa̱xexü̃ nax íchananguxuchixẽẽxü̃? —ñanagürü. Rü nümagü ga duü̃xü̃gü nanangãxü̃gü, rü ñanagürügü: —Tanaxwa̱xe i Barabáxü̃ ícunguxuchixẽxẽ —ñanagürügü.
22 Rü yexguma ga ãẽ̱xgacü ga Pirátu rü yema duü̃xü̃güna naca, rü ñanagürü: —¿Ta̱xacü tá chaxüxü̃ namaxã i ngẽma Ngechuchu i Cristugu ãégaxü̃? —ñanagürü. Rü guxü̃ma ga duü̃xü̃gü rü nanangãxü̃gü, rü ñanagürügü: —¡Curuchawa yapota! —ñanagürügü.
23 Rü yexguma ga Pirátu rü ñanagürü nüxü̃: —¿Natürü ta̱xacürü chixexü̃ naxü? —ñanagürü. Natürü ga nümagü ga duü̃xü̃gü rü wenaxarü tagaãcü ñanagürügü: —¡Curuchawa yapota! —ñanagürügü.
24 Rü yexguma Pirátu nüxü̃ da̱u̱xgu ga marü taxucürüwama Ngechuchuxü̃ nax ínanguxuchixẽẽxü̃, yerü ga duü̃xü̃gü rü marü nanaxĩ̱xãchiãẽgüchaü̃, rü yemaca̱x wüxi ga norü duü̃xü̃xü̃ namu ga dexá naxü̃tawa nax tanangexü̃ca̱x. Rü nügü naya̱u̱xme̱x ga Pirátu nape̱xewa ga guxü̃ma ga yema duü̃xü̃gü. Rü ñanagürü: —Tama chaugagu tá nixĩ i nax nayuxü̃ i ñaa yatü i taxuxü̃ma i chixexü̃ üxü̃. Rü pegagu tátama nixĩ —ñanagürü.
25 Rü guxü̃ma ga yema duü̃xü̃gü nanangãxü̃gü, rü ñanagürügü: —Togagu rü toxocügügagu tá nixĩ i nayuxü̃ —ñanagürügü.
26 Rü yexguma ga Pirátu rü Barabáxü̃ ínanguxuchixẽxẽ. Rü ñu̱xũchi norü churaragüxü̃ namu nax Ngechuchuxü̃ nacua̱i̱xgüxü̃ca̱x, rü yemawena curuchawa nax yanapotagüãxü̃ca̱x.
27 Rü ñu̱xũchi ga yema churaragü rü Pirátupataarü aixepewa Ngechuchuxü̃ nagagü. Rü yexma Ngechuchuxü̃tagu nanangutaque̱xexẽxẽ ga guxü̃ma ga churaragü.
28 Rü ñu̱xũchi Ngechuchuxü̃ ínacuxuchigü, rü wüxi ga máxü̃ ga naxchiru ga daucharaxü̃gu nayacu̱xẽẽgü.
29 Rü naeruwa nayanga̱xcuchigü ga wüxi ga nga̱xcueruxü̃ ga chuchuxü̃wa naxügüxü̃. Rü wüxi ga naixmena̱xãxãcüxü̃ nüxü̃ nayayauxãchixẽxẽ ga norü tügüneme̱xẽwa. Rü ñu̱xũchi nape̱xegu nacaxã́pü̱xügü, rü nüxü̃ nacugüe, rü ñanagürügü: —¡Namaxü̱̃x ya Yudíugüarü Ãẽ̱xgacü! —ñanagürügü.
30 Rü nanacua̱i̱xgüe. Rü nüxna nanayauxgü ga guma naixmena̱xãxãcü, rü naeruwa namaxã nanacua̱i̱xcagü.
31 Rü yexguma nüxü̃ nacugüeguwena rü ínanacu̱xuchigü ga yema naxchiru ga daucharaxü̃. Rü wenaxarü naxchirugutama nayacu̱xẽẽgü. Rü ñu̱xũchi nayagagü nax curuchawa yanapotagüãxü̃ca̱x.
Ngechuchuxü̃ curuchawa nipotagü
32 Rü yexguma yéma inaxĩãchigu, rü nüxü̃ nadaugü ga wüxi ga yatü ga Chirénecüã̱x ga Chimóü̃gu ãégacü. Rü gumá yatüxü̃ ngĩxü̃ ningexẽẽgü ga yema curucha.
33 Rü nawa nangugü ga wüxi ga nachica ga Górgutagu ãégaxü̃. Rü ngẽma naéga rü “Duü̃xẽeruchina̱xã”, ñaxü̃chiga nixĩ.
34 Rü nüxna nanaxãgü ga bínu ga tuxchanamaxã ãéxü̃cü nax yaxaxãxü̃ca̱x. Rü Ngechuchu nüxü̃ naxaxneta, natürü tama nayaxaxü.
35 Rü yexguma marü curuchawa yapotagüãguwena, rü yema churaragü rü nanade ga Ngechuchuchiru. Rü ñu̱xũchi wüxi ga diẽru ngĩxü̃ nañanagügü nax yemawa nüxü̃ nacua̱xgüxü̃ca̱x nax ngexü̃rüüxü̃ ga Ngechuchuchiru tá nayauxgüxü̃ ga wüxichigü.
36 Rü ñu̱xũchi yéma narütogü ga churaragü nax Ngechuchuna yéma nadaugüxü̃ca̱x.
37 Rü norü curuchatape̱xewa nayapocuchigü ga wüxi ga mürapewa ga ãégatachinüxü̃ ga nüxü̃ ixuxü̃ ga ta̱xacüca̱x Ngechuchuxü̃ curuchawa yapotagüxü̃. Rü yema mürapewagu ümatüxü̃ rü ñanagürü: “Daa nixĩ ya Ngechuchu ya Yudíugüarü Ãẽ̱xgacü”, ñanagürü.
38 Rü yexgumarüxü̃ ta curuchawa nayapotagü ga taxre ga ngĩ́xta̱xagüxü̃. Rü wüxi rü Ngechuchuarü tügünecüwawa naxü, rü to ga norü to̱xwecüwawa.
39 27:39-40 Rü yema duü̃xü̃gü ga yéma chopetüxü̃, rü Ngechuchumaxã naguxchigagü, rü nanexãerugüãcüma ñanagürügü: —Dücax, cuma rü nagu cupogüchaü̃ ya Tupanapata ya taxü̃ne, rü tomaepü̱x i ngunexü̃gu wenaxarü ícunadaxẽẽchaü̃. ¡Cugütama namaxẽxẽ i ñu̱xmax! Rü ngẽxguma chi aixcüma Tupana Nane quixĩxgu, rü ¡írüxĩ i curuchawa! —ñanagürügü.
40 Nüü̃ nadau 27:39
41 Rü yexgumarüxü̃ ta Ngechuchuxü̃ nacugüe ga chacherdótegüarü ãẽ̱xgacügü, rü ngúexẽẽruü̃gü ga mugüwa ngu̱xẽẽtaegüxü̃, rü Parichéugü, rü Yudíugüarü ãẽ̱xgacügü. Rü ñanagürügü:
42 —Nüma rü togüxü̃ namaxẽxẽxẽ natürü i ñu̱xma rü tama nüxü̃ nacua̱x nax nügütama namaxẽxẽxü̃. Rü ngẽxguma chi aixcüma Iraétanüxü̃arü Ãẽ̱xgacü yixĩxgu, ¡rü ñu̱xma rü ínaxĩ̱x i curuchawa nax nüxü̃́ yaxõgüxü̃ca̱x!
43 Rü nüma ya Ngechuchu nagu naxĩnügu rü Tupana tá nüxü̃ narüngü̃xẽxẽ. Ẽcü, ñu̱xma rü Tupana nüxü̃ rüngü̃xẽxẽ ega aixcüma nüxü̃ nangü̃xẽẽchaü̃gu. ¿Tama ẽ̱xna nümatama tamaxã nüxü̃ yaxuxü̃ nax Tupana Nane yixĩxü̃? —ñanagürügü.
44 Rü woo ga yema ngĩ́ta̱xagüxü̃ ga naxrüxü̃ curuchawa ipotagüxü̃, rü namaxã naguxchigagü.
Nayu ga Ngechuchu
45 Rü tocuchigu inaxügü rü ñu̱xmata tomaepü̱xarü orawa nangu nax naxẽanexü̃ ga guxü̃ ga naanewa.
46 Rü yema tomaepü̱xarü oragu rü Ngechuchu rü tagaãcü aita naxü, rü ñanagürü: —Erí, Erí, ¿damá chabátani? —ñanagürü. Rü ngẽma rü ñaxü̃chiga nixĩ: “Pa Chorü Tupanax, Pa Chorü Tupanax, ¿tü̱xcüü̃ choxna quixũgachixü̃?” ñaxü̃chiga nixĩ.
47 Rü nümaxü̃ ga duü̃xü̃gü ga yéma yexmagüxü̃ rü nüxü̃ naxĩnüe, rü ñanagürügü: —Ñaa yatü rü nũxcümaü̃cü ga Tupanaarü orearü uruxü̃ ga Eríaca̱x naca —ñanagürügü.
48 Rü yexgumatama rü wüxi ga yema duü̃xü̃gü ga yéma yexmagüxü̃ rü inañaãchi rü Ngechuchuxü̃tawa nanange ga wüxi ga tüaxmü ga bínu ga marü ngúchia̱xüchicümaxã yawaixẽẽxü̃. Rü wüxi ga dexnewa nayana̱i̱x. Rü ñu̱xũchi Ngechuchua̱xgu nanawe̱x nax nüxü̃ natuxuxü̃ca̱x.
49 Natürü ga yema togü ga duü̃xü̃gü ga yéma yexmagüxü̃ rü ñanagürügü: —Yixrüma. Rü ngĩxã itarüdaunü rü aixcüma tá Ería nua ũ nax nüxü̃ yanangü̃xẽẽxü̃ca̱x —ñanagürügü.
50 Rü wenaxarü tagaãcü aita naxü ga Ngechuchu, rü nayu.
51 Rü yema oragu ga Tupanapata ga taxü̃nearü tüyemachiãxü̃ rü taxregu narügáute. Rü daxũwa inanaxügü ga nax nagáutexü̃ rü ñu̱xmata ñaxtüwa nangu. Rü naxĩã̱xãchiane, rü narüngǘxtegü ga nutagü ga itacü.
52 Rü yuetamaü̃gü rü ningẽnagü. Rü wena namaxẽ ga muxü̃ma ga duü̃xü̃gü ga yuechiréxü̃ ga Tupanaaxü̃́ yaxõgüxü̃.
53 Rü naxmaü̃wa ínachoxü̃ ga yema duü̃xü̃gü ga wena maxẽxü̃. Rü yexguma Ngechuchu wena maxü̃guwena, rü Yerucharéü̃wa naxĩ. Rü muxü̃ma ga duü̃xü̃gü nüxü̃ nadaugü.
54 Rü yema churaragüarü ãẽ̱xgacü rü norü churaragü ga Ngechuchuna ídaugüxü̃, rü yexguma nüxü̃ nadaugügu nax naxĩã̱xãchianexü̃ rü guxü̃ma ga yema ngupetüxü̃ rü poraãcü namuü̃e, rü ñanagürügü: —Aixcüma nixĩ ya daa yatü ya Tupana Nane nax yixĩxü̃ —ñanagürügü.
55 Rü iyexmagü ga mucüma ga ngecügü ga yéma yáxü̃wa nüxü̃ rüdaunücü. Rü yexguma Gariréaanewa ne naxũxgu ga Ngechuchu rü yema ngecügü iyixĩ ga Ngechuchuwe rüxĩcü rü ümücügücü rü nüxü̃ rüngü̃xẽẽgücü.
56 Rü yema ngecügütanüwa iyexma ga María ga Madarénacüã̱x, rü María ga Chantiágu rü Yúche naé, rü Chebedéu nama̱x ga Chantiágu rü Cuáü̃ naé.
Ngechuchu rü naxmaü̃gu nayaxǘcuchigü
57 Rü yexguma marü nachütachaü̃gu, rü yéma nangu ga wüxi ga yatü ga Arimatéacüã̱x ga taarü diẽruã́cü ga Yúchegu ãégacü. Rü nüma rü ta Ngechuchuarü ngúetanüxü̃ nügü nixĩxẽxẽ.
58 Rü nüma ga Yúche rü Pirátuxü̃tawa naxũ rü nüxna naxca̱x nayaca ga Ngechuchuxü̃ne. Rü Pirátu nanamu nax nüxna naxãgüãxü̃ca̱x ga Ngechuchuxü̃ne.
59 Rü Yúche nanayaxu ga Ngechuchuxü̃ne ga curuchawa. Rü wüxi ga naxchápenüxü̃ ga ngemataxü̃maxã nananuque.
60 Rü yema naxmaxü̃ ga yexwaca̱xüxü̃ ga Yúche nügüca̱xtama yacaxmaxẽẽxü̃ ga nuta ga taxüchicügu, rü yemagu nayaxǘcuchi ga Ngechuchuxü̃ne. Rü ñu̱xũchi nanangũxtaü̃ namaxã ga wüxi ga nuta ga taxüchicü. Rü yemawena rü ínixũ.
61 Natürü María ga Madarénacüã̱x rü nai ga María rü yéma Ngechuchumaü̃arü to̱xma̱xtawa irütogü.
Purichíagü nüxna nadaugü ga yema naxmaxü̃ ga Ngechuchuxü̃ nagu yaxǘcuchigüxü̃
62 Natürü moxü̃ãcü ga ngü̃xchigaarü ngunexü̃gu rü yema chacherdótegüarü ãẽ̱xgacügü rü Parichéugü rü Pirátuxü̃tawa naxĩ.
63 Rü ñanagürügü nüxü̃: —Pa Corix, nüxna tacua̱xãchie ga yema yatü ga Ngechuchu ga idorata̱xáxü̃ rü yexguma namaxü̃gu rü ñanagürü tomaxã: “Ngẽxguma chayu̱xgu rü tomaepü̱x i ngunexü̃guwena rü wena táxarü ícharüda”, ñanagürü tomaxã.
64 Rü ngẽmaca̱x tanaxwa̱xe i churaragü ngéma cumugü nax nüxna yadaugüxü̃ca̱x i ngẽma naxmaxü̃ ñu̱xmatáta tomaepü̱x i ngunexü̃wa nangu nax tama chütacü ngéma naxĩxü̃ca̱x i norü ngúexü̃gü nax yayauxgüãxü̃ca̱x i naxü̃ne rü ñu̱xũchi duü̃xü̃gümaxã nüxü̃ nax yaxugüxü̃ca̱x nax marü wena namaxü̃xü̃. Erü ngẽxguma chi ngẽmaãcü yixĩxgu, rü noxriarü yexera tá nixĩ nax duü̃xü̃güxü̃ nawomüxẽẽxü̃ —ñanagürügü.
65 Rü Pirátu ñanagürü nüxü̃: —Ngẽãgü nixĩ i churaragü i pexca̱x. ¡Ẽcü ngéma namaxã pexĩ nax meama pema penaxwa̱xexü̃ãcüma nüxna pedaugüxü̃ca̱x i naxmaxü̃! —ñanagürü.
66 Rü yema churaragümaxã yéma naxĩ, rü meama nayataixẽẽgü ga gumá nuta ga Ngechuchumaxü̃ namaxã rünguxtaü̃cü. Rü nanaxüarü cua̱xruü̃ã̱xgü nax taxúema naechita ínaxügachigüxü̃ca̱x ga gumá nuta. Rü ñu̱xũchi yexma nanamugü ga churaragü nax nüxna nadaugüxü̃ca̱x.
