San Mateo 4:1-25
4 Rü yemawena rü Tupanaãxẽ ya Üünecü rü wüxi ga chianexü̃ ga ngextá taxúema íxãpataxü̃wa Ngechuchuxü̃ naga nax yéma Chataná nüxü̃ üxü̃ca̱x.
2 Rü 40 ga ngunexü̃ rü 40 ga chütaxü̃ taguma nachibü. Rü yemawena rü nataiya.
3 Rü yexguma ga ngo̱xo ga Chataná rü Ngechuchuxü̃tawa nangu, nax nüxü̃ naxüxü̃ca̱x. Rü ñanagürü nüxü̃: —Ega aixcüma Tupana Nane quixĩxgu, ¡rü daa nutagüxü̃ namu nax paũxü̃ nanguxü̃xü̃ca̱x! —ñanagürü ga Chataná.
4 Natürü Ngechuchu nanangãxü̃, rü ñanagürü: —Tupanaarü ore i ümatüxü̃ rü ñanagürü:“Taũtáma paũxica nanamaxẽxẽxẽ i duü̃xü̃gü,natürü guxü̃ma i ore ya Tupana nüxü̃ ixuxü̃ nixĩ i duü̃xü̃güxü̃ maxẽxẽẽxü̃”,
—ñanagürü.
5 Rü yexguma ga ngo̱xo ga Chataná rü guma ĩane ga üünene ga Yerucharéü̃wa nanaga. Rü gumá Tupanapata ga taxü̃nepe̱xegu nanamunagü.
6 Rü ñanagürü nüxü̃: —Ega aixcüma Tupana Nane quixĩxgu, ¡rü nua cugü rütáe! Erü Tupanaarü ore i ümatüxü̃wa rü ñanagürü:“Tupana tá nanamu i norü orearü ngeruü̃gü i daxũcüã̱x nax cuxna nadaugüxü̃ca̱x.Rü naxme̱xmaxã tá cuxü̃ niyauxgü nax tama nutagu cunguxü̃ca̱x”,
—ñanagürü.
7 Rü Ngechuchu nanangãxü̃ rü ñanagürü: —Tupanaarü ore i ümatüxü̃ rü ñanagürü ta:“¡Tama name nax nüxü̃ cuxüxü̃ ya Cori ya curü Tupana!”
—ñanagürü.
8 Rü yexguma ga nüma ga ngo̱xo ga Chataná rü wüxi ga ma̱xpǘne ga máchanexü̃chinewa nanaga. Rü yéma Ngechuchuxü̃ nanawe̱x ga guxü̃nema ga ñoma ga naanecüã̱x ga nachixü̃anegü nax ñuxãcü yamexẽchixü̃.
9 Rü Chataná rü ñanagürü nüxü̃: —Choma chi cuxna chanaxã i guxü̃ma i ngẽma cuxü̃ chawéxü̃ i ngẽxguma chi chope̱xegu cucaxã́pü̱xügu rü choxü̃ quicua̱xüxü̃xgu —ñanagürü.
10 Rü nüma ga Ngechuchu rü ñanagürü nüxü̃: —¡Choxna ixũgachi, Pa Chatanáx! Erü Tupanaarü ore i ümatüxü̃ rü ñanagürü:“¡Nüxü̃ icua̱xüxü̃ ya Cori ya curü Tupana, rü yimágaxicatama naxĩnü!”
—ñanagürü.
11 Rü yexguma ga ngo̱xo ga Chataná rü Ngechuchuna nixũgachi. Rü Ngechuchuxü̃tawa nangugü ga ñuxre ga daxũcüã̱x ga Tupanaarü orearü ngeruü̃gü. Rü Ngechuchuna nadaugü rü nüxü̃ narüngü̃xẽẽgü.
Ngechuchu inanaxügü ga ore nax yaxuxü̃ ga Gariréaanewa
12 Rü yexguma Ngechuchu nüxü̃ ĩnügu nax napoxcuxü̃ ga Cuáü̃ ga báiü̃xẽẽruxü̃, rü Gariréaanewa naxũ.
13 Natürü tama ĩane ga Nacharétugu narüxã̱ũ̱x. Rü ĩane ga Capernáü̃wa naxũ nax yexma yaxãchiü̃xü̃ca̱x. Rü guma ĩane rü naxtaxa ga Gariréacutüwa nayexma ga Chaburóü̃anewa rü Netaríanewa.
14 Rü yema nangupetü nax yanguxü̃ca̱x ga ore ga nũxcümaü̃cü ga Tupanaarü orearü uruxü̃ ga Ichaía ümatüxü̃ ga ñaxü̃:
15 4:15-16 “Yema duü̃xü̃gü ga noxri ẽanexü̃wa yexmagüxü̃,rü nüxü̃ nadaugü ga wüxi ga omü ga poraãcü nangóonexẽẽxü̃.Rü Chaburóü̃arü naanewa rü Netaríarü naanewa,rü Yudáü̃arü tocutüwa rü ngẽma nama i márcutüwa nadaxü̃wa,rü Gariréaanewa i ngextá duü̃xü̃gü i tama Yudíugü ixĩgüxü̃ ixãchiü̃güxü̃wa rü duü̃xü̃gü ga noxri ẽanexü̃wa yexmagüxü̃ nüxü̃ nadaugü ga wüxi ga omü ga poraãcü nangóonexẽẽxü̃.Rü yema duü̃xü̃güxü̃ nabáxi ga yema omü”,
ñanagürü ga yema Ichaíaarü ore.
16 Nüü̃ nadau 4:15
17 Rü yexguma nixĩ ga inaxügüãxü̃ ga Ngechuchu nax nüxü̃ yaxuxü̃ ga ore ga ñaxü̃: —¡Nüxü̃ perüxoe i pecüma i chixexü̃! Erü Tupana ya daxũwa ãẽ̱xgacü ixĩcü rü marü ningaica nax perü ãẽ̱xgacü yixĩxü̃ca̱x —ñanagürü.
Ngechuchu rü naxca̱x naca ga ãgümücü ga püchaetanüxü̃
18 Rü yexguma naxtaxa ga Gariréaanacügu yaxũxgu ga Ngechuchu, rü yéma nüxü̃ nadau ga taxre ga yatü ga nügüenexẽgü ixĩgüxü̃. Rü wüxi rü Chimóü̃ ga Pedrugu ãégaxü̃ nixĩ. Rü to rü Andrégu ãégaxü̃ nixĩ. Rü nümagü rü ínapüchaegü, yerü woetama püchaetanüxü̃ nixĩgü.
19 Rü yexguma ga Ngechuchu rü ñanagürü nüxü̃: —¡Chowe perüxĩ! Rü choma rü tá pexü̃ chamu nax chauxü̃tawa penagagüxü̃ca̱x i duü̃xü̃gü —ñanagürü.
20 Rü yexgumatama ga yema taxre, rü yéma nanawogü ga norü püchagü. Rü Ngechuchuwe narüxĩ.
21 Rü yéamaxü̃ra naxũ ga Ngechuchu, rü yéma nüxü̃ nadau ga to ga taxre ga nügüenexẽgü ga Chantiágu rü Cuáü̃. Rü nümagü rü Chebedéu nanegü nixĩ. Rü nanatümaxã wüxi ga naweü̃wa nayexmagü. Rü yéma norü püchagü ínarüngáitagü. Rü Ngechuchu naxca̱x naca.
22 Rü yexgumatama yéma naweü̃maxã tüxü̃ nata̱xgü ga nanatü. Rü Ngechuchuwe narüxĩ.
Ngechuchu nanangúexẽxẽ ga muxü̃ma ga duü̃xü̃gü
23 Rü guxü̃ ga Gariréaanegu nixũgüchigü ga Ngechuchu. Rü wüxichigü ga ĩanewa, rü duü̃xü̃güarü ngutaque̱xepataü̃wa ningu̱xẽẽtaechigü. Rü duü̃xü̃gümaxã nüxü̃ nixuchigü ga ore ga mexü̃ nax ãẽ̱xgacü yixĩxü̃ ya Tupana. Rü yema duü̃xü̃gü ga ida̱xaweexü̃ rü nanameexẽxẽ nawa ga guxü̃ma ga norü da̱xawegü rü norü ngu̱xunegü.
24 Rü duü̃xü̃gü rü Ngechuchuchigaxü̃ nixugügü ga guxü̃ma ga Chíriaanewa. Rü naxü̃tawa nanagagü ga naguxü̃raü̃xü̃ ga da̱xaweanemaxã idaaweexü̃. Rü nayexma ga duü̃xü̃gü ga ngúanemaxã idaaweexü̃, rü duü̃xü̃gü ga poraãcü naxü̃newa nangúexü̃, rü duü̃xü̃gü ga ngo̱xo nawa yexmaxü̃, rü duü̃xü̃gü ga óxwaa̱xgüxü̃, rü duü̃xü̃gü ga nawãĩxãchigüxü̃. Rü Ngechuchu nanameexẽxẽ ga guxü̃ma ga yema.
25 Rü Ngechuchuwe narüxĩ ga muxü̃ma ga duü̃xü̃gü ga Gariréaanecüã̱x, rü Decaporíchiuanecüã̱x rü Yerucharéü̃cüã̱x, rü Yudéaanecüã̱x, rü Yudáü̃arü tocutücüã̱x.
