Nahúm 1:1-15
1 Ñaa nixĩ ga yema ore ga Naúü̃ ga Ercúcüã̱x Tupanaxü̃tawa nayaxuxü̃ ga yexguma nango̱xetügu. Rü yema ore rü ĩane ga Nínibearü poxcuchiga nixĩ.
2 Rü nüma ya Cori ya Tupana rü poraãcü nüxü̃́ tachu̱xu ya yíxema nüxü̃ ngechaü̃güxe rü tüxü̃ napoxcue ya yíxema tama naga ĩnüxe. Rü ngẽma norü uanügümaxã rü nanu.
3 Rü nüma ya Cori ya Tupana rü woo nax naporaxü̃ natürü yáxna duü̃xü̃gümaxã naxĩnü. Natürü yíxema chixexü̃ ǘxe rü tama nüxü̃ narüngüma nax tüxü̃ napoxcuxü̃. Rü nüma rü yimá poracü ya buanecügu nixũ. Rü ngẽma caixanexü̃gü rü nacutügüarü caixanexü̃ nixĩgü.
4 Rü ngẽxguma ngẽma márxü̃ namuxgu nax yachexü̃ca̱x rü nipachitama i már. Rü nayachegüxẽxẽ i guxü̃ma i natügü. Rü Bacháü̃anewa rü ma̱xpǘne i Carméruwa rü nipagüane rü narüñẽẽxgü i nanetügü. Rü Líbanuanewa ngẽxmagüxü̃ i putüragü rü ta narüñexgü.
5 Rü yima ma̱xpǘnegü rü na̱xcha̱xwa nidu̱xrugü rü nape̱xewa inagü. Rü guxü̃ma i ñoma i naane rü guxü̃ma i duü̃xü̃gü i nawa maxẽxü̃ rü nape̱xewa niyoyogü norü muü̃maxã.
6 ¿Rü texé tá yáxna namaxã taxĩnü ega tümamaxã nanuxgu ya Tupana? ¿Rü texé tá namaxã tapora i ngẽma norü nu? Erü ngẽma norü nu rü ñoma üxüemaarü naiemaxü̃rüxü̃ nixĩ. Rü nape̱xewa rü narüngǘxtegü ya yimá nutagü ya taxüchicü.
7 Rü nüma ya Cori ya Tupana rü namecüma. Rü ngẽxguma guxchaxü̃ ínguxgu rü nüma nixĩ i tüxna nadauxü̃. Rü nüma rü tüxü̃ ínapoxü̃ ya yíxema nüxü̃́ yaxõgüxe.
8 Natürü yíxema tama naga ĩnüexe rü tá tüxü̃ nadai ñoma dexá tümaétü iñaxü̃chiüxü̃rüxü̃. Rü yíxema norü uanügü rü ẽanexü̃wa tá tangexmagü.
9 ¿Rü ta̱xacürü chixexü̃ nixĩ i Cori ya Tupanape̱xewa nagu perüxĩnüexü̃? Rü nüma rü noxtacüma tá inayanaxoxẽxẽ i ngẽma nagu perüxĩnüexü̃. Rü ngẽxma tá nayacua̱x nax namaxã perüxuanügüxü̃.
10 Rü pema i bínumaxã ngaxexe rü ñoma tuxu i wüxigu inutaque̱xexü̃rüxü̃ pixĩgü, rü ñoma maxẽ i pagüxü̃rüxü̃ tá pixae.
11 Pa Nínibex, cuwa nixĩ ga nangóxü̃ i ngẽma ãẽ̱xgacü i chixexü̃gu rüxĩnüxü̃ nape̱xewa ya Cori ya Tupana. Rü nüma i ngẽma ãẽ̱xgacü rü wüxi i ucu̱xẽruxü̃ i chixexü̃ nixĩ.
12 Rü ngẽmaca̱x ya Cori ya Tupana rü norü duü̃xü̃güxü̃ ñanagürü: —Rü woo naporae rü namu i ngẽma Achíriaanecüã̱xgü, natürü tá chanadai rü tá inarüxo. Rü choma Pa Yudáanecüã̱xgüx, rü poraãcü ngúxü̃ pexü̃ chingexẽxẽ. Natürü marü taxũtáma wena ngẽmaãcü pemaxã chixĩ.
13 Rü cuxü̃ tá íchanguxuchixẽxẽ nawa i ngẽma guxchaxü̃ i taxü̃ i nawa cungexmaxü̃. Rü tá nagu chacagü i ngẽma guxchaxü̃ i ñoma cadénarüxü̃ cuxü̃ ináixü̃ —ñanagürü.
14 Rü Cori ya Tupana rü Nínibearü ãẽ̱xgacüxü̃ ñanagürü: —Cuma rü taxũtáma cuxü̃́ nangema i cutaagü i nüxí cuchicüxü ãẽ̱xgacü ixĩgüxü̃. Rü yima curü tupaucawa ngẽxmagüxü̃ i curü tupananetachicüna̱xãgü rü tá nagu chipogügü. Rü ngẽxma tátama cuxü̃ chata̱x, erü cuma rü wüxi i duü̃xü̃ i chixexü̃arü üruxü̃ quixĩ —ñanagürü.
Naxunagü nax Nínibe rü tá nagu yanachixexü̃
15 Dücax, Pa Yudáanecüã̱xgü, marü máxpü̱xanexü̃wa ne naxũ ya yima orearü uruxü̃ i mexü̃ i orexü̃ nua yarüxucü. ¡Penaxüchiga i perü petagü rü peyanguxẽxẽ i ngẽma unetagü i Tupanamaxã pexüxü̃! Rü tagutáma wena pexca̱x ínayaxüãchi i ngẽma chixexü̃arü üruü̃gü, erü marü inarüxo.
