Nahúm 2:1-13
2 Pa Nínibecüã̱xgüx, ngẽma tá pexü̃ yadaixü̃ rü marü pexca̱x inaxĩãchi. ¡Rü perü daxũtaeruü̃chicawa penamugü i perü daxũtaeruü̃gü! ¡Rü perü namagüwa rü pedauxü̃taegü! ¡Rü pegüxünegu penaxǘ i perü tara! ¡Rü penanutaque̱xe i perü churaragü nax perü uanügümaxã pegü peda̱i̱xü̃ca̱x!
2 Erü nüma ya Cori ya Tupana rü wena tá ínanadagüxẽxẽ i ngẽma Acóbutanüxü̃ nax noxrirüxü̃ naporaexü̃ca̱x. Yerü yexguma nadeãcugüagu ga Iraéane rü Yudáane rü ñoma úbane ga ngechacüxüxü̃rüxü̃ãcü yéma nanata̱xgü.
3 Rü ngẽma perü uanügüarü poxü̃ruxü̃ rü nadáutachinü, rü nidáuxchiru i norü churaragü. Rü ínamemare nax pexca̱x íyaxüãchixü̃. Rü yima norü carugü rü ñoma üxüarü yauraemarüxü̃ nixĩgü. Rü ngẽma norü cowarugü rü nanaxĩ̱xãchiãẽtanü.
4 Rü perü uanügüarü carugü rü nuãcü perü ĩanearü namagügu ínaxüüxü̃. Rü norü numaxã plázagügu ínayaxüegu namaxã ya norü carugü. Rü yima norü carugü rü ñoma ã́xwe i ya̱u̱xraxü̃rüxü̃ nixĩgü. Rü ngẽxguma poraãcü naxüpetügu rü ba̱i̱xbeanexü̃rüxü̃ nixĩgü.
5 Rü nüma ya pechixü̃anearü ãẽ̱xgacü rü norü churaragüerugüca̱x naca. Rü norü churaragü rü ñu̱xãẽãcü ínaxüãchi. Rü nügümaxã narüxü nax naxtapü̱xna yadaugüxü̃ca̱x.
6 Rü ngẽma norü uanügüca̱x rü marü natauxcha nax nachocuxü̃ erü ngẽma naxtapü̱xarü ĩã̱x i natüwaama üxü̃ rü niwãxna, rü marü taxucürüwama ínayachaxãchixẽẽgü i ngẽma dexá. Rü ngẽmaca̱x ya yima ãẽ̱xgacüpata rü niwa̱x.
7 Rü ngẽma ãẽ̱xgacü naxma̱x rü to i nachixü̃anewa ngĩxü̃ nagagü namaxã i ngĩxü̃taxü̃gü. Rü ñoma muxtucurüxü̃ iyaxaxunetanü rü ngĩgü napaxremügüãcüma ixauxe.
8 Rü Nínibecüã̱xgü rü nibuxmü naxrüxü̃ i natüarü dexá i tama íyachaxãchixü̃ ega yawãxnagu i norü poyexü̃ruxü̃. Rü duü̃xü̃gü rü tagaãcü nüxna nacagüe rü ñanagürügü: —¡Ípeyachaxãchitanü! ¡Pegü peyawoegu! —ñanagürügü. Natürü taxuxü̃ma nügü nawoegu.
9 Rü norü uanügüarü churaragü rü tagaãcü ñanagürügü: —¡Penade i norü diẽrumü rü norü úirugü! Rü ngẽma nax namuxũchixü̃ i Nínibecüã̱xgüarü ngẽmaxü̃gü rü tama nagu̱xéga —ñanagürügü.
10 Rü Nínibe rü tá nagu napogüe rü nataxutama i duü̃xü̃gü. Rü nachicaxicatama ínayaxü. Rü norü duü̃xü̃gü rü poraãcü tá namuü̃e. Rü tá nidu̱xruxparagü. Rü tá ningearü poraã̱x, rü tá nayacho̱xõchichametügü.
11 Rü yima ĩane ya Nínibe rü ñoma leóü̃ maxü̃rüxü̃ nixĩ ga noxri. Rü guma ĩanewa nixĩ ga norü duü̃xü̃gü rü naxacügümaxã taãẽãcüma namaxẽxü̃ ñoma leóü̃gü rü naxacügümaxã naxmaxü̃wa namaxẽxü̃rüxü̃. Rü taxúema tanachixewe. ¿Natürü ta̱xacü yixĩxü̃ i ñu̱xma nüxü̃ ngupetüxü̃ ya yima ĩane, rü ta̱xacü yixĩxü̃ i nawa yaxǘgüxü̃?
12 ¿Rü ñu̱xma rü ngexü̃ yixĩxü̃ i ngẽma perü pora ga noxri namaxã perü uanügüxü̃ pedaixü̃, ñoma leóü̃ naeü̃xü̃ imáxü̃rüxü̃? Rü pema rü pegü peyanu ga norü yemaxü̃gü ga yema duü̃xü̃gü ga peda̱i̱xü̃ ñoma leóü̃ naxma̱xmaxã rü naxacügümaxã nügü yanuxü̃rüxü̃ i ngẽma naeü̃machi. Rü pema rü peyapaxẽxẽ ya pepatagü namaxã ga yema yemaxü̃gü ga perü uanügüna pepuxü̃xü̃ ñoma leóü̃ rü ngẽma naeü̃machi i nüxü̃́ íyaxüxü̃maxã naxma̱xü̃ yapaxẽẽxü̃rüxü̃.
13 Rü Cori ya Tupana ya Guxãxétüwa Ngẽxmacü rü ĩane ya Nínibemaxã nanaxuegu rü ñanagürü: —Daxe chixĩ i choma rü cuxca̱x nua chaxũ. Rü tá íchanagu i curü carugü i dairuxü̃, rü tanimacaxü̃ tá chayaxĩxẽẽgü. Rü tá chanadai i cuxacügü rü ngẽxma tá nixĩ i yanaxoxü̃ nax curü naanewa nangĩ́xta̱xagüxü̃. Rü taxũtáma texé nüxü̃ taxĩnü i curü ãẽ̱xgacüarü orearü ngeruü̃gü —ñanagürü.
