Nahúm 3:1-19
3 ¡Cugümaxã nangechaü̃, Pa Ĩane ya Máetane! Rü cuma rü doramaxã rü daimaxã cunapa. Rü ngẽma nax cuwa nangĩ́ta̱xagüxü̃ rü tama inayacua̱x.
2 Rü ñu̱xma rü marü cuwa nüxü̃ taxĩnüe nax cowarugüxü̃ nacua̱i̱xnetagüxü̃ rü naxãgatanüxü̃ i caruchicugü. Rü nüxü̃ taxĩnüe nax naxãgaxü̃ i cowarucutügü rü carugü i dairuü̃gü.
3 Rü ngẽma churaragü i cowarugu ĩxü̃ rü niyauratanücüxü i norü taragü rü norü wocaegü. Rü nüxü̃ tadaugü i muxü̃ma i duü̃xü̃gü i napíexü̃. Rü ngẽma duü̃xü̃gü i yuexü̃ rü nügüétüwa narünuxcue rü namaxã nidamare. Rü ngẽmaca̱x i ngẽma ibuxmüxü̃ rü ngẽma yuexü̃gu narüpucutügü.
4 Rü ngẽma tá cuxü̃ naxüpetü nagagu nax poraãcü cunawomüxẽẽxü̃ i ngẽma togü i nachixü̃anegü. Rü cumax, Pa Nínevex, rü ñoma ngexü̃ i mechametüxü̃ i ngĩxü̃nemaxã taxexü̃rüxü̃ chixexü̃ cuxü. Rü cuwa namu i curü yuüxü̃ rü namu i chixexü̃arü üxü̃ cua̱xgüxü̃. Rü ngẽma chixexü̃gümaxã cunawomüxẽxẽ i ngẽma togü i nachixü̃anegü.
5 Rü Cori ya Tupana ya Guxãxétüwa Ngẽxmacü rü ĩane ya Nínibemaxã nanaxuegu rü ñanagürü: —Daxe chixĩ i choma rü cuxca̱x nua chaxũ. Rü cuchiwegu tá cuxü̃ changenagüpa̱x nax nangóxü̃ca̱x i curü chixexü̃ rü ngẽma togü i nachixü̃anegü nüxü̃ dauxü̃ca̱x i ngẽma ãne i chixexü̃ i cuwa ngẽxmaxü̃.
6 Rü tá cuxü̃ chaxãũãchixẽxẽ nax cuxãneexü̃ca̱x rü ngẽmaãcü guxü̃ i duü̃xü̃gü cuxü̃ cugüexü̃ca̱x.
7 Rü guxü̃ma i ngẽma cuxü̃ daugüxü̃ rü tá cuxcha̱xwa nibuxmü rü ñanagürügü tá: “Nínibe rü marü nachixe. ¿Rü texé tá namaxã tixauxãchi? ¿Rü ngexta tá nüxü̃ iyangauxü̃ i wüxi i duü̃xü̃ i tá nataãẽxẽxẽxü̃?” ñanagürügü tá.
8 ¿Ẽ̱xna cuma nüxü̃ cucua̱xgu rü nüxü̃ curümemaexü̃ ya yima ĩane ya Téba ya taxtü i Níruarü ngãxü̃wa ngẽxmane i wüxi i capaxũwa? Rü ngẽma dexá rü norü poxeguxü̃ruxü̃ nixĩ nax tama nüxna nangugüxü̃ca̱x i norü uanügü.
9 Rü yema Etiopíaane rü Equítuane nixĩ ga yema Tébaarü poxü̃ruü̃gü ixĩgüxü̃. Rü yema Fúxane rü Líbiaane rü Tébaarü ngü̃xẽẽruü̃gü nixĩgü.
10 Natürü ga yema Tébacüã̱xgü rü to ga nachixü̃anecüã̱xgü nayagagü. Rü yema norü buxü̃gü rü namaarü poãchigu tüxü̃ nichi̱xgü. Rü yema yatügü ga guma ĩanewa tachigagüxü̃, rü norü uanügü rü sortéuãcüma nügü nayanu. Rü guma ĩanearü ãẽ̱xgacügü rü cadénamaxã ínayachotagü.
11 Rü cumax, Pa Nínibex, rü curü uanügü rü tá curü duü̃xü̃güxü̃ nanaxĩ̱xãchiãẽxẽẽgü rü ñoma duü̃xü̃gü i ngãxẽxü̃rüxü̃ tá nixĩgü. Rü tá naxca̱x nadau nax ngexta yacu̱xgüxü̃ na̱xcha̱xwa i norü uanügü.
12 Rü guxü̃ma i curü ĩanearü poxeguxü̃ i curü poxü̃ruü̃gü ixĩgüxü̃ rü tá niwa̱xgü. Rü ñoma igunegü i poraãcü ogüxü̃rüxü̃ nixĩgü. Rü ngẽxguma nüxü̃ ingoxogügu i ngẽma igugü rü ngẽma norü o rü ngẽma nangõ̱xgüxü̃a̱xgu nayi. Rü ngẽxgumarüxü̃ tá nixĩ i curü duü̃xü̃gü.
13 Rü curü churaragü rü curü uanügüpe̱xewa rü ñoma ngexü̃gürüxü̃ nixĩgü. Rü cuchixü̃anewa ngẽxmagüne ya ĩanegüarü ĩã̱xgü rü curü uanügüca̱x rü nangeenügümare. Rü ngẽma norü wãxtaruü̃gü rü nixae.
Poxü̃ruü̃gü i natüca̱xmamare ixĩxü̃
14 ¡Rü dexá penutaque̱xe nax pexü̃́ nangẽxmaxü̃ca̱x i ngẽxguma perü uanügü pexü̃ íchomaeguãchigu! ¡Rü penamexẽxẽ i perü ĩanearü poxeguxü̃gü! ¡Rü mucü ya ladriyu ípexüxü̃ nax mea ípenapoxeguxü̃ca̱x rü nataixü̃ca̱x i perü ĩanearü poxeguxü̃!
15 Natürü woo ngẽma pexügügu rü ngẽma üxüema rü tá pexü̃ nigu. Rü tá taramaxã pexü̃ nadaixichi ñoma munügü nanetü ngṍxü̃rüxü̃. ¡Rü pegü pimuxẽxẽ nax munügürüxü̃ pemuxü̃ca̱x!
16 Rü perü taxetanüxü̃ rü ñu̱xma rü namuxũchi ngẽma ẽxtagü i daxũwa ngẽxmagüxü̃rüxü̃. Natürü ngẽma taxetanüxü̃ rü ñoma munügü i nanetü ngṍxü̃ rü ñu̱xũchi ibuxmüxü̃rüxü̃ tá nixĩ nax naxĩgüxü̃.
17 Rü ngẽma perü dauruü̃gü i pemaxã icua̱xgüxü̃ rü ngẽma munügürüxü̃ tá naxĩgü. Rü ngẽxgumarüxü̃ ta i perü churaragüerugü rü ngẽma muxü̃ i naixchinawerüxü̃ nixĩgü. Rü ngẽxguma gáuane ínguxgu rü ĩxtapü̱xgu nayarüwa̱xgü, rü ngẽxguma üa̱xcü ibáxichigu rü nixüüxü̃ rü taxúema nüxü̃ tacua̱x nax ngexta nabuxmüxü̃.
18 Pa Achíriaanearü Ãẽ̱xgacüx, curü ngü̃xẽẽruü̃gü rü napee. Rü ngẽma curü churaragümaxã icua̱xgüxü̃ rü ta rü napee. Rü curü churaragü rü ma̱xpǘneanegu nawoonemare rü taxúema wüxiwa tanagagü.
19 Pa Nínibex, ngẽma nax cunapíxü̃ rü nangearü üxü̃ã̱x. Rü ngẽma curü o̱xri rü nataxuma i norü üxü̃. Rü guxü̃ma i ngẽma togü i duü̃xü̃gü i nüxü̃ cuáxchigagüxü̃ nax chixexü̃ cuxü̃ ngupetüxü̃ rü norü taãẽmaxã tá napexme̱xgü. Erü nataxuma ga nachixü̃ane ga nawa iñaxü̃ ga yema chixexü̃ ga guxü̃guma cuxüxü̃ —ñanagürü ya Cori ya Tupana.
