Nehemías 1:1-11
1 Rü ñaa nixĩ i chauchiga i choma i Neemía ya Acaría nane nax chixĩxü̃. Rü yexguma 20 ga taunecü ãẽ̱xgacü yixĩxgu ga Artayére rü meama Quiréuarü tauemacügu,* rü choma ga Neemía rü ĩane ga Chúchawa chayexma.
2 Rü chauxü̃tawa nangu ga chauenexẽ ga Ananí namaxã ga ñuxre ga yatügü ga Yudáanewa ne ĩxü̃. Rü yexguma chayoxnie ga nüxna nax chacaxaxü̃ nachiga nax ñuxãcü ínangupetüxü̃ ga Yerucharéü̃wa, rü ñachagürü: —¿Ñuxãcü nüxü̃ ínangupetüxü̃ i ngéma? Rü yema Yudíutanüxü̃ ga Yudáanegu rüchoxü̃ ¿rü mea nüxü̃ nangupetüxü̃ rü ẽ̱xna tama? —ñachagürü.
3 Rü nümagü rü choxü̃ nangãxü̃gü rü ñanagürügü: —Ngéma rü tama aixcüma mea inixũ. Rü ngẽma duü̃xü̃gü i Yudáanegu rüchoxü̃ rü poraãcü ngúxü̃ ningegü rü chixexü̃ nüxü̃ naxüpetü. Rü ngẽma naxtapü̱x ya yima tórü ĩane ya Yerucharéü̃ rü nanaxa̱i̱xrügumaraxü̃tama ga nagu nax napogüexü̃ rü tauta wena Yechúa nanaxügü. Rü yema naxtapü̱xarü ĩã̱xgü ga ínaguxü̃ rü tauta wena nanaxüchicüxügü —ñanagürügü.
4 Rü yexguma yemaxü̃ chaxĩnügu rü poraãcü choxü̃́ nangu̱x rü chaxaxu. Rü ñuxre ga ngunexü̃ rü chaxaure rü Cori ya Tupanamaxã chidexa.
5 Rü ñachagürü nüxü̃: —Pa Cori Pa Tupana ya Daxũcüã̱x, cuma rü Tupana ya Guxãétüwa Ngẽxmacü quixĩ, rü cuxãũcüma. Rü ngẽxguma texémaxã cuxunetagu rü aixcüma cuyanguxẽxẽ i ngẽma curü uneta i namaxã nüxü̃ quixuxü̃ i ngẽma duü̃xü̃gü i cuxü̃ ngechaü̃güxü̃ rü yanguxẽẽgüxü̃ i curü mugü.
6 Rü ngẽmaca̱x i ñu̱xma rü cuxü̃ chaca̱a̱xü̃ nax choxü̃́ nüxü̃ cuxĩnüxü̃ i ñaa chorü yumüxẽ i chütacü rü ngunecü cumaxã nüxü̃ chixuxü̃ naxca̱x i ngẽma curü duü̃xü̃gü i Iraétanüxü̃. Rü nüxü̃ chacua̱x nax cupe̱xewa chixexü̃ taxüxü̃ i toma i Iraétanüxü̃, rü woo i choma rü chautanüxü̃ rü cupe̱xewa chixexü̃ taxügü.
7 Rü cupe̱xewa poraãcü chixexü̃ taxügü, erü tama tayanguxẽxẽ i ngẽma curü mugü rü curü ucu̱xẽgü ga curü duü̃ ga Moichéwa tomaxã nüxü̃ quixuxü̃.
8 1:8-9 ¡Rü nüxna nacua̱xãchi i curü ore i Moichémaxã nüxü̃ quixuxü̃! Erü cuma rü nüxü̃ quixu rü ngẽxguma toma chixexü̃ cupe̱xewa taxü̱xgu rü tá togü i nachixü̃anegügu toxü̃ cuwoonemare, natürü ngẽxguma chi wena cuxca̱x tawoeguxgu rü aixcüma nagu tamaxẽgu i curü mugü, rü woo ñoma i naane íyacuáxü̃gu tawoonegu, rü cuma rü chi tochixü̃aneca̱x toxü̃ cuyagagü, rü ngẽma nachica i üünexü̃ i cumatama nüxü̃ cuxunetaxü̃ nax nawa cungexmaxü̃wa wenaxarü toxü̃ cugagüxü̃ca̱x.
9 Nüü̃ nadau 1:8
10 Toma rü curü duü̃xü̃gü i curü puracütanüxü̃ tixĩgü, rü cuma rü curü poramaxã torü uanügüme̱xẽwa toxü̃ ícunguxü̃xẽxẽ.
11 Pa Corix, cuxü̃ chachixewe nax choxü̃́ nüxü̃ cuxĩnüxü̃ca̱x i ñaa chorü yumüxẽ i cumaxã nüxü̃ chixuxü̃ i chomax nax curü duü̃xü̃ chixĩxü̃. Erü ngẽma chorü ngúchaü̃ i nagu charüxĩnüxü̃ nixĩ nax cuxü̃ chicua̱xüüxü̃. Rü ngẽxgumarüxü̃ ta cuxna naxca̱x chaca nax choxü̃ curüngü̃xẽẽxü̃ nax chomaxã namecümaxü̃ca̱x ya ãẽ̱xgacü —ñachagürü. Rü yexgumaü̃cüxü rü choma rü ãẽ̱xgacü ga Artayérearü bínuarü baeruxü̃ chixĩ.
Notas
^ 1:1 Diciémbre.
