Nehemías 11:1-36
11 Rü yema Iraétanüxü̃arü ãẽ̱xgacügü rü ĩane ga Yerucharéü̃gutama naxãpatagü. Rü yema togü ga Iraétanüxü̃ rü sortéu naxca̱x naxügü nax nüxü̃ nacua̱xgüxü̃ca̱x rü texégü tá tixĩ ya ĩane ya üünene ya Yerucharéü̃gu ãpatagüxe. Rü ngẽma 10 i nügütanüxü̃wachigü rü wüxitücumü tá nixĩ ya yima ĩane ya üünene ya Yerucharéü̃gu ãpatagüxü̃ rü ngẽma togü i 9 tücumü rü naigü ya ĩanewa tá naxĩ nax ngẽxma yaxãpatagüxü̃ca̱x.
2 Rü yemawena ga yema Iraétanüxü̃ rü mexü̃ tümamaxã naxuegugü ga guxema duü̃xẽgü ga tümaarü ngúchaü̃tama tügü ixuxe nax ĩane ya Yerucharéü̃gu taxãpatagüxü̃.
3 Rü Yudáanewa yexmagüne ga ĩanegüwa nangugü ga yema Iraétanüxü̃, rü chacherdótegü, rü Lebítanüxü̃, rü duü̃xü̃gü ga Tupanapata ga taxü̃nearü puracütanüxü̃ rü ñu̱xũchi nataagü ga Charomóü̃arü puracütanüxü̃. Rü wüxichigü ga nümagü rü norü ĩaneca̱x rü norü naaneca̱x nawoegu. Rü ñaa nixĩ ga norü ãẽ̱xgacügü ga yema Iraétanüxü̃ ga Babiróniawa ne ĩxü̃ rü ĩane ga Yerucharéü̃gu yaxãpatagüxü̃.
4 Rü ñuxre ga yema Yudátanüxü̃ rü Bẽyamíü̃tanüxü̃ rü Yerucharéü̃gu naxãpatagü. Rü ñaagü nixĩ ga yema Yudátanüxü̃ ga ĩane ga Yerucharéü̃gu ãpatagüxü̃: Rü wüxi nixĩ ga Ataía ga Uchía nane. Rü Uchía nanatü nixĩ ga Chacaría, rü Chacaría nanatü nixĩ ga Amaría, rü Amaría nanatü nixĩ ga Chepatía, rü Chepatía nanatü nixĩ ga Mararéx, rü Mararéx rü Fáre nataxa nixĩ.
5 Rü to nixĩ ga Maachía ga Barúx nane. Rü Barúx nanatü nixĩ ga Coroché, rü Coroché nanatü nixĩ ga Achaía, rü Achaía nanatü nixĩ ga Adaía, rü Adaía nanatü nixĩ ga Yoiaríx, rü Yoiaríx nanatü nixĩ ga Chacaría, rü Chacaría nanatü nixĩ ga Chiloní.
6 Rü guxü̃wama ga Fáre nataagü ga Yerucharéü̃gu ãpatagüxü̃ rü 468 nixĩ ga norü mu. Rü guxü̃ma ga yema rü yatügü ga daixü̃ icuáxü̃ nixĩgü.
7 Rü ñaagü nixĩ ga yema Bẽyamíü̃tanüxü̃ ga ĩane ga Yerucharéü̃gu ãpatagüxü̃: Rü wüxi nixĩ ga Charú ga Mechuráü̃ nane. Rü Mechuráü̃ nanatü nixĩ ga Yoéx, rü Yoéx nanatü nixĩ ga Pedaía, rü Pedaía nanatü nixĩ ga Coraía, rü Coraía nanatü nixĩ ga Maachía, rü Maachía nanatü nixĩ Itié, rü Itié nanatü nixĩ ga Ichaía.
8 Rü ñu̱xũchi nayexmagü ga Charúenexẽgü ga Gabaí rü Charái. Rü guxü̃wama ga norü mu ga yema Bẽyamíü̃tanüxü̃ rü 928 nixĩ.
9 Rü yema Bẽyamíü̃tanüxü̃arü ãẽ̱xgacü nixĩ ga Yoé. Rü Yoé nanatü nixĩ ga Chicrí. Rü Yoéarü ñatüwaama ücü ga ãẽ̱xgacü ga duü̃xü̃gümaxã icuácü nixĩ ga Yudá. Rü Yudá nanatü nixĩ ga Chenúa.
10 Rü yema chacherdótegü ga Yerucharéü̃gu ãpatagüxü̃ rü ñaa nixĩgü: Rü wüxi nixĩ ga Yedaía. Rü Yedaía nanatü nixĩ ga Yoiaríx. Rü to nixĩ ga Yaquíü̃.
11 Rü to nixĩ ga Cheraía. Rü Cheraía nanatü nixĩ ga Irichía, rü Irichía nanatü nixĩ ga Mechuráü̃, rü Mechuráü̃ nanatü nixĩ ga Chadóx, rü Chadóx nanatü nixĩ ga Meraióx, rü Meraióx nanatü nixĩ ga Aitúx. Rü nüma ga Cheraía nixĩ ga ãẽ̱xgacü ga Tupanapata ga taxü̃nemaxã inacuáxü̃.
12 Rü yema Cheraíamücügü ga wüxigu Tupanapata ga taxü̃newa namaxã napuracüexü̃ rü 822 nixĩ ga norü mu. Rü to ga chacherdóte nixĩ ga Adaía rü nanatü nixĩ ga Yeruáü̃, rü Yeruáü̃ nanatü nixĩ ga Peraría, rü Peraría nanatü nixĩ ga Amchí, rü Amchí nanatü nixĩ ga Chacaría, rü Chacaría nanatü nixĩ ga Pachú, rü Pachú nanatü nixĩ ga Maquía.
13 Rü yema Adaíatanüxü̃ rü guxü̃wama norü ãẽ̱xgacügümaxã rü 242 nixĩ ga norü mu. Rü to ga chacherdóte nixĩ ga Amachái. Rü Amachái nanatü nixĩ ga Acharé, rü Acharé nanatü nixĩ ga Achaía, rü Achaía nanatü nixĩ ga Mechiremóx, rü Mechiremóx nanatü nixĩ ga Imé.
14 Rü yema Amacháitanüxü̃ ga yatügü ga daixü̃ icuáxü̃ rü guxü̃wama 128 nixĩ ga norü mu. Rü yema namaxã icuáxü̃ nixĩ ga Chadié ga Guedoríü̃ nane.
15 Rü yema Lebítanüxü̃ ga ĩane ga Yerucharéü̃gu ãpatagüxü̃ rü wüxi nixĩ ga Chemaía. Rü Chemaía nanatü nixĩ ga Achú, rü Achúx nanatü nixĩ ga Aricáü̃, rü Aricáü̃ nanatü nixĩ ga Achabía, rü Achabía nanatü nixĩ ga Binuí.
16 Rü togü ga Lebítanüxü̃ ga Yerucharéü̃gu ãpatagüxü̃ rü Chaxtái rü Yochabá nixĩgü. Rü nümagü nixĩ ga namaxã inacua̱xgüxü̃ ga yema Lebítanüxü̃ ga Tupanapata ga taxü̃nearü düxétüwaama puracüexü̃.
17 Rü to ga Lebítanüxü̃ rü Matanía nixĩ. Rü Matanía nanatü nixĩ ga Micaía, rü Micaía nanatü nixĩ ga Chadí, rü Chadí nanatü nixĩ ga Achá. Rü Matanía nixĩ ga namaxã icuáxü̃ ga yema wiyaetanüxü̃ ga Tupanaxü̃ icua̱xüü̃güxü̃ rü moxẽ ixãgüxü̃ ga yexguma yumüxẽarü orawa nanguxgu. Rü norü ngü̃xẽẽruxü̃ nixĩ ga Babuquía. Rü nüma nixĩ ga naenexẽ ga yacüxü̃ nabumaexü̃. Rü to ga Mataníaarü ngü̃xẽẽruxü̃ nixĩ ga Adá ga Chamúa nane. Rü Chamúa nanatü nixĩ ga Gará, rü Gará nanatü nixĩ ga Yedutúü̃.
18 Rü guxü̃wama rü yema Lebítanüxü̃ ga ĩane ga üünene ga Yerucharéü̃gu ãpatagüxü̃ rü 284 nixĩ ga norü mu.
19 Rü yema ĩanearü ĩã̱xgüarü dauruü̃gü ga Yerucharéü̃wa yexmagüxü̃ nixĩ ga Acúx rü Tamóü̃ rü naétü ga natanüxü̃ ga yema ĩã̱xarü dauruü̃gü. Rü guxü̃wama rü 172 nixĩ ga norü mu.
20 Rü yema togü ga Iraétanüxü̃, rü togü ga chacherdótegü rü Lebítanüxü̃ rü náigü ga Yudáanearü ĩanegügu nügü ninu. Rü wüxichigü rü noxrütama naane rü napata nüxü̃́ niyexmachigü.
21 Natürü yema Tupanapata ga taxü̃newa puracüexü̃ ga duü̃xü̃gü rü norü ãẽ̱xgacügü ga Chiá rü Guispá rü Yerucharéü̃arü üye ga Ófegu naxãpatagü.
22 Rü yema Lebítanüxü̃maxã icuáxü̃ ga Yerucharéü̃wa rü Uchí nixĩ. Rü Uchí nanatü nixĩ ga Baní, rü Baní nanatü nixĩ ga Achabía, rü Achabía nanatü nixĩ ga Matanía, rü Matanía nanatü nixĩ ga Micaía ga Achátaxa ixĩcü. Rü nümagü ga yema Lebítanüxü̃ nixĩ ga yema wiyaegümaxã inacua̱xgüxü̃ ga Tupanapata ga taxü̃newa.
23 Yerü nüma ga Pérchiaarü ãẽ̱xgacü rü inanaxü ga mugü nax ñuxãcü tá yema wiyaetanüxü̃ rü wiyaemaxã inacua̱xgüxü̃ ga wüxichigü ga ngunexü̃gu.
24 Rü Pérchiaarü ãẽ̱xgacü rü Petaíaxü̃ naxuneta nax nape̱xewa yema Iraétanüxü̃maxã icuáxü̃ca̱x nax namexẽẽãxü̃ca̱x ga norü guxchaxü̃gü. Rü Petaía nanatü rü Mechechabé nixĩ, rü Mechechabéarü o̱xi rü Chéra nixĩ, rü Chéra rü Yudá nane nixĩ.
Náigü ga ĩanegü ga Iraétanüxü̃ nagu ãpatagüne
25 Rü nümaxü̃ ga Yudátanüxü̃ rü daa ĩanegügu naxãchiü̃gü: Quiriáx-abágu, rü Dibóü̃gu, rü Yecacheégu,
26 rü Yochuégu, rü Moradágu, rü Bex-pérexgu,
27 rü Achá-chuágu, rü Bechébagu,
28 rü Chicáxgu, rü Mecónagu,
29 rü En-rimóü̃gu, rü Chorágu, rü Yamúxgu,
30 rü Chanóagu, rü Aduráü̃gu, rü Láquigu, rü Achecágu. Rü yema ĩanexacügü rü naanegü ga guma ĩanegüna ingaicamanegu naxãchiü̃gü ga yema Yudátanüxü̃. Rü yemaacü nügü ninu nagu ga yema naane ga Bechébawa íxügüxü̃ rü ñu̱xmata doxonexü̃ ga Inóü̃wa nangu.
31 Rü yema Bẽyamíü̃tanüxü̃ rü daa ĩanegügu naxãchiü̃gü: ĩanegü ga Guébagu, rü Mixmágu, rü Aíagu, rü Betégu rü norü ĩanexacügügu,
32 rü Anatógu, rü Nóxgu, rü Ananíagu,
33 rü Achóxgu, rü Ramágu, rü Guitaíü̃gu,
34 rü Adíxgu, rü Cheboíü̃gu, rü Nebaráxgu,
35 rü Loxgu, rü Onógu, rü yema doxonexü̃ ga Ngẽmaxü̃arü Üruü̃gügu ãégaxü̃gu naxãchiü̃gü ga yema Bẽyamíü̃tanüxü̃.
36 Rü nayexma ga nümaxü̃ ga Lebítanüxü̃ ga Yudátanüxü̃arü naanewa rü Bẽyamíü̃tanüxü̃arü naanewa nüxna tanaxãgüxü̃ ga norü naane nax yemagu naxãpatagüxü̃ca̱x.
