Nehemías 13:1-31
13 Rü yema ga ngunexü̃gügu rü duü̃xü̃güpe̱xewa nüxü̃ nadaumatü ga yema mugüpane ga Moiché ümatüxü̃. Rü yema mugüpanewa nüxü̃ inayangau ga ore ga ñaxü̃: —Ngẽma Amóü̃tanüxü̃ rü Moátanüxü̃ rü tama name nax Tupanaarü duü̃xü̃gütanüwa nangẽxmagüxü̃ —ñaxü̃.
2 Yerü nümagü ga Amóü̃tanüxü̃ rü Moátanüxü̃ rü tama mea Iraétanüxü̃xü̃ nayauxgü, rü tama õna rü axexü̃ nüxna naxãgü ga yexguma Equítuanewa ínachoxü̃gu. Rü naétü rü Baraáü̃axü̃́ nanaxütanügü nax chixexü̃ Iraétanüxü̃maxã naxueguxü̃ca̱x. Natürü ga Tupana rü Balaáü̃ãẽwa nananguxẽxẽ nax mexü̃ Iraétanüxü̃maxã naxueguxü̃ca̱x rü tama i chixexü̃.
3 Rü yexguma yema mugüpanewa ümatüxü̃xü̃ naxĩnüegu, rü yema Iraétanüxü̃ rü yexgumatama nügütanüwa ínanamuxü̃gü ga yema to ga nachixü̃anecüã̱xgü ixĩgüxü̃.
4 Rü naxü̃pa nax yema ngupetüxü̃, rü chacherdóte ga Eriachí nixĩ ga namaxã icuácü ga Tupanapata ga taxü̃nearü yemaxü̃güpataü̃gü. Natürü nüma ga Eriachí rü Tobíatanüxü̃ nixĩ.
5 Rü Tobíaxü̃ nagu napexẽxẽ ga yema ucapu ga taxü̃ ga noxri nagu nanuxü̃ ga ãmaregü, rü pumarate̱xegü, rü nawechigü, rü trigugü, rü bínugü, rü chíxü̃gü ga Lebítanüxü̃na, rü wiyaetanüxü̃na, rü ĩã̱xarü dauruü̃güna üxü̃. Rü naétü yexma nanu ga yema duü̃xü̃gü ixãgüxü̃ ga õnagü ga chacherdótegüca̱x ixĩxü̃.
6 Rü yexguma yema ngupetügu rü choma rü chataxuma ga Yerucharéü̃wa. Yerü norü 32 ga taunecü Babiróniaanearü ãẽ̱xgacü nixĩ ga Artayére, rü wenaxarü naxü̃tawa íchayadau. Rü yexguma ñuxre ga ngunexü̃ yéma chayexmagu rü nüxna chaca nax wenaxarü Yerucharéü̃wa chaxũxü̃ca̱x.
7 Rü Yerucharéü̃ca̱x chataegu. Rü yexguma nixĩ ga nüxü̃ chacuáxü̃ ga yema chixexü̃ ga Eriachí ixüxü̃ nax Tobíaxü̃ mexü̃wa nayexmaxẽẽxü̃ rü nüxna naxããxü̃ ga wüxi ga ucapu ga Tupanapata ya taxü̃nearü ngẽmaxü̃güpataxü̃wa.
8 Rü yema rü poraãcü choxü̃ nanuxẽxẽ. Rü yemaca̱x yema ucapuwa íchanawoxü̃ ga naxma̱xwe̱xegü rü togüama ga yemaxü̃gü ga Tobía yexma nucuxü̃.
9 Rü yemawena rü chanamu nax Tupanape̱xewa namaxcugüãxü̃ca̱x ga yema ucapu, rü ñu̱xũchi wenaxarü yexma nachicagu nanuãxü̃ca̱x ga Tupanapata ga taxü̃nearü nawechigü ga üünexü̃, rü yema ãmaregü ga trigute̱xegü rü pumarate̱xegü.
10 Rü nüxü̃ chacuáchiga ta nax tama Lebítanüxü̃na naxãgüãxü̃ ga nawemügü ga naxca̱x ixĩgüxü̃. Rü yemaca̱x ga Lebítanüxü̃ rü wiyaetanüxü̃ ga ngutaque̱xemaxã icua̱xgüxü̃ rü düxwa naxĩgü, rü naaneca̱x nawoegu.
11 Rü yemaca̱x chayangagü ga ãẽ̱xgacügü yerü guma Tupanapata ga taxü̃ne rü yéma nata̱xmare. Rü yemawena rü chanangutaque̱xexẽxẽ ga yema chacherdótegü rü Lebítanüxü̃, rü wenaxarü norü puracügu chayamuchigü nax naxügüã̱xü̃ca̱x.
12 Rü guxü̃ma ga yema Yudátanüxü̃ rü Tupanapataarü ngẽmaxü̃güpataxü̃wa nanana ga yema trigute̱xe, rü bínu, rü chíxü̃ ga Lebítanüxü̃na üxü̃.
13 Rü yemawena nüxü̃ chaxuneta ga chacherdóte ga Cheremía rü ümatüruxü̃ ga Chadóx rü wüxi ga Lebítanüxü̃ ga Pedaíagu ãégaxü̃ nax guma Tupanapataarü ngẽmaxü̃güpataxü̃maxã inacua̱xgüxü̃ca̱x. Rü yexgumarüxü̃ ta nüxü̃ chaxuneta ga Anáü̃ ga Chacúx nane ga Matanía nataxa nax norü ngü̃xẽẽruü̃gü yixĩxü̃ca̱x. Yerü nümagü rü mexü̃ ga duü̃xü̃gü nixĩgü rü nüxü̃́ chayaxõ nax mea tá natanüxü̃xü̃ yanuaxü̃ ga yema nüxna üxü̃.
14 ¡Pa Chorü Tupanax, nüxna nacua̱xãchi i guxü̃ma i ngẽma chaxüxü̃! Rü tama name i nüxü̃ curüngü̃ma i guxü̃ma i ngẽma mexü̃ i cupata ya taxü̃neca̱x rü curü cua̱xüxü̃ca̱x chaxüxü̃.
15 Rü yema ngunexü̃gügu rü Yudáanewa nüxü̃ chadau ga duü̃xü̃gü ga ngü̃xchigaarü ngunexü̃gu úba pu̱xgüxü̃ nax bínu naxügüxü̃, rü tríguarü o nugügüxü̃ rü búrumaxã bínu rü úbaya̱xa, rü igugü, rü guxü̃raü̃xü̃ i naxweta nugügüxü̃. Rü yexgumarüxü̃ ta nüxü̃ chadau nax ngü̃xchigaarü ngunexü̃gu Yerucharéü̃wa nanaaxü̃ ga naxweta. Rü yemaca̱x chayangagü, yerü ngü̃xchigaarü ngunexü̃gu norü yemaxü̃gümaxã nataxegü.
16 Rü naétü nümaxü̃ ga duü̃xü̃gü ga ĩane ga Tírucüã̱x ga Yerucharéü̃gu ãpatagüxü̃ rü choxnigü rü ñu̱xũchi naguxü̃raü̃xü̃ ga norü yemaxü̃gü Yerucharéü̃wa nanana rü ngü̃xchigaarü ngunexü̃gu Yudátanüxü̃xü̃ namaxã nataxegü.
17 Rü yemaca̱x chayangagü ga yema Yudátanüxü̃arü ãẽ̱xgacügü, rü ñachagürü: —Chixexü̃ nixĩ i pexüxü̃, erü tama penaxaure i ngü̃chigaarü ngunexü̃.
18 Rü ngẽmatama i ñu̱xma pexügüxü̃ nixĩ ga naxügüxü̃ ga perü o̱xigü. Rü yemaca̱x nixĩ ga Tupana ga taxca̱x rü tórü ĩaneca̱x ínanguxẽẽãxü̃ ga muxü̃ma ga guxchaxü̃gü. ¿Ẽ̱xna i pema rü penaxwa̱xegü nax yexeraãcü Iraétanüxü̃maxã penanuexẽẽxü̃ ya Tupana nagagu nax tama penaxaurexü̃ i ngü̃xchigaarü ngunexü̃? —ñachagürü.
19 Rü yexguma chanaxunagü nax yexguma üa̱xcü yarüxücuxgu rü ngü̃chigaarü ngunexü̃ ixügügu nax nawãxtagüãxü̃ca̱x ga Yerucharéü̃arü ĩã̱xgü rü tama nax yawãxnagüaxü̃ rü ñu̱xmata nangupetü ga yema ngunexü̃. Rü ĩã̱xgu chanamugü ga ñuxre ga chorü ngü̃xẽẽruü̃gü nax ngü̃xchigaarü ngunexü̃gu taxuxü̃ma ga yemaxü̃gü ichocuxü̃ca̱x.
20 Rü yema norü yemaxü̃gümaxã taxegüxü̃ rü yemaxü̃güca̱x taxegüxü̃ rü ñuxree̱xpü̱xcüna Yerucharéü̃arü düxétügu napegü.
21 Natürü ga choma rü namaxã chidexa rü chayangagü naxca̱x nax ĩanearü poxeguxü̃tapü̱xarü düxétüguama napegüxü̃. Rü nüxü̃ ñacharügü: —Ngẽxguma wena tá ngẽma pexü̱xgu rü tá pexü̃ ítayauxü̃ rü tá pexü̃ tapoxcue —ñachagürü. Rü yexgumacürüwa rü marü taguma ngü̃xchigaarü ngunexü̃gu yéma naxĩ.
22 Rü yemawena rü chanamu ga Lebítanüxü̃ nax Tupanaca̱x nügü yamexẽẽgüxü̃ca̱x rü nüxna nax nadaugüxü̃ca̱x ga ĩanearü ĩã̱xgü nax tama nachocuxü̃ca̱x ga yema taxetanüxü̃, rü duü̃xü̃gü naxauregüãxü̃ca̱x ga ngü̃xchigaarü ngunexü̃. ¡Pa Chorü Tupana, choxna nacua̱xãchi naxca̱x i ngẽma chaxüxü̃, rü cuxü̃́ chaxauxãchitümüxü̃! Erü cuma rü cumecümaxü̃chi.
23 13:23-24 Rü yema ga ngunexü̃gügu rü nüxü̃ chadau nax ñuxre ga Yudátanüxü̃ rü ngexü̃gü ga Adúxtanüxü̃maxã rü Amóü̃tanüxü̃maxã rü Moátanüxü̃maxã yaxãxma̱xgüxü̃. Rü ngãxü̃ ga naxacügü rü Adúxtanüxü̃gawa nidexagü rü togüama ga nachixü̃anegügawa nidexagü, rü tama Yudátanüxü̃gaxü̃ nicua̱x.
24 Nüü̃ nadau 13:23
25 Rü chayangagü rü guxchaxü̃ namaxã chaxuegu. Rü nümaxü̃ ga yema duü̃xü̃gü rü nüxna chanacuaixca rü nayaegu chatugü. Rü Tupanape̱xewa nüxü̃ nüxü̃ chixuxẽxẽ nax taxũtáma naxacügü rü nanegü to i nachixü̃anecüã̱xgümaxã naxãtexü̃ rü yaxãmaxü̃, rü taxũtáma nayauxgüãxü̃ i to i nachixü̃anecüã̱xgü i ngexü̃gü nax nanema̱xü̃ rüe̱xna naxma̱xü̃tama yixĩgüxü̃ca̱x. Rü ñacharügü nüxü̃:
26 —¿Tama ẽ̱xna yematama pecadu nixĩ ga nagu nanguxü̃ ga Iraétanüxü̃arü ãẽ̱xgacü ga Charomóü̃? Rü woo guxü̃ma ga yema togü ga nachixü̃anegütanüwa rü nataxuma ga ãẽ̱xgacü ga naxrüxü̃ poraxü̃ rü woo Tupana poraãcü nüxü̃ nangechaü̃ rü guxü̃ma ga Iraétanüxü̃arü ãẽ̱xgacüxü̃ nayangucuchixẽxẽ, natürü yema ngexü̃gü ga togü ga nachixü̃anecüã̱xgü rü Charomóü̃xü̃ pecadugu nangu̱xẽẽgü.
27 Rü ngẽmaca̱x i pema rü taxũtáma nagu perüxĩnüe nax ngẽmaãcü poraãcü tórü Tupanamaxã pecadu pexüxü̃ rü to i nachixü̃anecüã̱xgü i ngexü̃gümaxã pexãxma̱xgüxü̃ —ñachagürü.
28 Rü chacherdótegüarü ãẽ̱xgacü ga Eriachí nane ga Yoiadá rü ngĩmaxã naxãma ga Chambaráx ga Oróü̃tanüxü̃ naxacü. Rü Yoiadáxü̃ íchata̱xüchi ga Yerucharéü̃wa rü yáxü̃wama chanamu. Rü yemawena rü Tupanamaxã chidexa, rü ñacharügü nüxü̃:
29 —¡Pa Chorü Tupanax, napoxcue i ngẽma chacherdótegü, rü ñu̱xũchi ngẽma norü ngü̃xẽẽruü̃gü i Lebítanüxü̃ i tama yanguxẽxẽgüxü̃ i ngẽma uneta ga cumaxã naxügüxü̃! —ñachagürü.
30 Rü yemaacü chayamugachitanü ga yema to ga nachixü̃anecüã̱xgü ga duü̃xü̃gü natanüwa ga Iraétanüxü̃. Rü yemawena mea ichayanu ga chacherdótegü rü norü ngü̃xẽẽruü̃gü ga Lebítanüxü̃ nax yemaacü wüxichigü mea norü puracü naxügüxü̃ca̱x.
31 Rü yema üxüarü yauxruü̃gü rü mea ichayanu, nax yemaacü nüxü̃ nacua̱xgüxü̃ca̱x nax ñuxgu tá nawa yanguchigüxü̃ i üxüarü yaxu. Rü mea ichananu nax ñuxgu tá duü̃xü̃gü inaxãgüxü̃ i nüxíraxü̃xü̃ i nanetüarü o. Rü yemawena rü Tupanaxü̃ ñachagürü: —¡Choxna nacua̱xãchi, Pa Corix, rü choxü̃ rüngü̃xẽxẽ! —ñachagürü.
