Nehemías 2:1-20
2 Rü yexguma ga choma rü ãẽ̱xgacü ga Artayérepáxü̃arü üãcuruxü̃ chixĩ. Rü wüxi ga ngunexü̃ ga Nicháü̃arü tauemacügu* ga yexguma Artayére marü 20 ga taunecü ãẽ̱xgacü yixĩxgu, rü naxpáü̃ bínumaxã chaxüãcuyane rü nüma ga ãẽ̱xgacü rü choxü̃ nadawenü ga nax changechaü̃chametüxü̃. Rü yemaca̱x choxna naca rü ñanagürü:
2 —Cuxü̃ chadau nax cungechaü̃chametüxü̃. ¿Ta̱xacü cuxü̃ nangupetü? Tama cuwa nango̱x nax quida̱xawexü̃. ¿Rü ngẽmaca̱x ta̱xacü cuxü̃́ nangẽxma? ¿Ẽ̱xna wüxi i guxchaxü̃? —ñanagürü choxü̃. Rü yexguma ga choma rü poraãcü chamuü̃.
3 Rü ãẽ̱xgacüxü̃ changãxü̃ rü ñachagürü: —Pa Ãẽ̱xgacüx ¡Guxü̃guma namaxü̃! ¿Ñuxãcü chi i tama changechaü̃xü̃? Erü yima ĩane ya chaunatügü nagu ta̱xgüne rü nachicaxicatama nixĩ, rü naxtapü̱xarü ĩã̱xgü rü ínanagu —ñachagürü.
4 Rü nüma ga ãẽ̱xgacü rü choxna naca rü ñanagürü: —¿Ta̱xacüwa i cuxü̃ charüngü̃xẽxẽxü̃? —ñanagürü. Rü yexguma ga choma rü Tupaname̱xẽgu chaugü chaxǘ.
5 Rü ãẽ̱xgacüxü̃ changãxü̃ rü ñachagürü: —Ngẽxguma chi cuxca̱x namexgu, Pa Ãẽ̱xgacüx, rü choxü̃ curüngü̃xẽẽchaü̃gu, rü cuxna chaca, Pa Ãẽ̱xgacüx, nax Yudáanewa choxü̃ cumuxü̃ nawa ya yima ĩane ya chaunatügü nagu ta̱xgüne, nax ngẽmaãcü wena chanamexẽẽxü̃ca̱x —ñachagürü.
6 Rü ngĩma ga ãẽ̱xgacüma̱x rü nacüwawa irüto. Rü nüma ga ãẽ̱xgacü rü choxna naca rü ñanagürü: —¿Ñuxre i ngunexü̃ tá icuyarütaxuxü̃ nax ngéma cuxũxü̃? ¿Rü ñuxgu tá cutaeguxü̃? —ñanagürü. Rü choma rü namaxã nüxü̃ chixu ga ngunexü̃ ga nagu tá chataeguxü̃. Rü yexguma ga nüma rü yéma choxü̃ namu.
7 Rü yema to ga naxca̱x íchaca̱xaxü̃ nixĩ ga choxna naxããxü̃ ga wüxi ga popera naxca̱x ga yema ãẽ̱xgacügü ga taxtü ga Eufrátearü tocutüwa yexmagüxü̃ nax yemaacü norü naanewa mea choxü̃ namupetügüxü̃ca̱x ñu̱xmata Yudáanewa changu.
8 Rü to ga popera ga naxca̱x íchaca̱xaxü̃, rü Acháca̱x nixĩ. Rü nüma nixĩ ga ãẽ̱xgacüarü naixnecüarü dauruxü̃ yixĩxü̃. Rü yema poperawa rü ãẽ̱xgacü nüxna naxãga nax mürapewa choxna tanaxãxü̃ca̱x nax ngẽmamaxã chanamexẽẽxü̃ca̱x i norü ĩã̱xgü ya yima Tupanapata ya taxü̃nearü dauxü̃taechica rü ngẽma ĩanearü poxeguxü̃arü ĩã̱xgü, rü yima ĩpata ya nawa tá changexmane. Rü nüma ga ãẽ̱xgacü rü choxna nanaxã ga guxü̃ma ga yema naxca̱x íchaca̱xaxü̃, yerü Cori ya Tupana rü poraãcü choxü̃ narüngü̃xẽxẽ.
9 Rü yexguma taxtü ga Eufrátearü tocutüwa yexmagüxü̃ ga ãẽ̱xgacügüxü̃tawa changuxgu, rü nüxna chanana ga yema poperagü ga ãẽ̱xgacü ga Artayére yéma mugüxü̃. Rü choxü̃ ínixümücügü ga ñuxre ga churaragüarü ãẽ̱xgacügü namaxã ga norü churaragü ga cowarutagu ĩxü̃.
10 Natürü yexguma Chambaráx ga Oróü̃tanüxü̃arü ãẽ̱xgacü, rü Tobía ga Amóü̃tanüxü̃arü ãẽ̱xgacü nüxü̃ cua̱xgügu nax íchanguxü̃, rü poraãcü nanue yerü nüxü̃ nacua̱xgü nax chautanüxü̃ ga Iraétanüxü̃arü ngü̃xẽẽwa chaxũxü̃.
Wena nanamexẽxẽ ga Yerucharéü̃tapü̱x
11 2:11-12 Rü düxwa Yerucharéü̃arü ĩanewa changu. Rü yexguma tomaepü̱x ga ngunexü̃ yéma chayexmagu, rü chütacü rü ícharüda. Rü choxü̃ nixümücügü ga ñuxre ga yatü nax ítayadaugüxü̃ca̱x ga guma ĩanearü poxeguxü̃. Natürü taxúemaama nüxü̃ chixu ga yema Tupana chauãẽwa ngu̱xẽẽxü̃ nax ta̱xacüca̱x Yerucharéü̃wa chaxũxü̃. Rü chaxicatama búruétügu chixũ.
12 Nüü̃ nadau 2:11
13 Rü yematama chütaxü̃gu rü Ngategu ãégaxü̃ ga ĩã̱xwa íchaxũxũ rü Dragóü̃arü Puchuwaama chaxũ ñu̱xmata Guxchirearü ĩã̱xwa changu. Rü meama chanangugü ga yema naxtapü̱x ga guma Yerucharéü̃arü poxeguxü̃ ga nagu napogüexü̃ rü norü ĩã̱xgü ga ínaguxü̃.
14 Rü ñu̱xũchi ichixũchigü ñu̱xmata Dexá i Chuchuxü̃gu ãégaxü̃ ga ĩã̱xwa changu ga ãẽ̱xgacüarü puchu íyexmaxü̃wa. Natürü ga chorü búru rü taxuacüma naétüwa naxüpetü ga yema naxtapü̱xarü puexü̃.
15 Rü yexguma rü taxũtáma ningune. Rü yema ngatexü̃wa dauxü̃ chaxĩ rü yéma chayangugü ga yema naxtapü̱x. Rü yemaacü nüxü̃ íchayaxüegu ga guma ĩanetapü̱x, rü wenaxarü Ngategu ãégaxü̃ ga ĩã̱xwa chixücu.
16 Rü guma ĩanearü ãẽ̱xgacügü rü tama nüxü̃ nacua̱x ga ngextá nax chaxũxü̃ rü ta̱xacüca̱x yéma chaxũxü̃. Yerü taxũta yema chacherdótegümaxã, rü ĩanearü ãẽ̱xgacügümaxã, rü puracütanüxü̃maxã, rü yema togü ga Yudíugümaxã nüxü̃ chixu nax ta̱xacüca̱x Yerucharéü̃wa changuxü̃.
17 Rü yemaca̱x chanangutaque̱xexẽxẽ ga yema duü̃xü̃gü rü ñachagürü nüxü̃: —Pema meama nüxü̃ pecua̱x nax wüxi i guxchaxü̃wa ingẽxmagüxü̃, rü daa ĩane ya Yerucharéü̃ rü nachixe, rü naxtapü̱xarü ĩã̱xgü rü ínagu. ¡Rü ngĩxã wüxigu tanamexẽxẽ ya daa ĩanearü poxeguxü̃ nax ngẽmaãcü marü tama wüxi i cugüruxü̃ ixĩgüxü̃ca̱x! —ñachagürü.
18 Rü yexguma namaxã nüxü̃ chixuxgu nax ñuxãcü Tupana poraãcü choxü̃ rüngü̃xẽẽxü̃ rü yema ore ga ãẽ̱xgacü ga Artayére chomaxã nüxü̃ ixuxü̃, rü nüma ga duü̃xü̃gü rü choxü̃ nangãxü̃gü rü ñanagürügü: —¡Ngĩxã itanaxügü nax namexẽxẽxü̃ ya daa ĩanearü poxeguxü̃! —ñanagürügü. Rü inanaxügüe ga nax napuracüexü̃.
19 Natürü yexguma Chambaráx ga Oróü̃tanüxü̃arü ãẽ̱xgacü, rü Tobía ga Amóü̃tanüxü̃arü ãẽ̱xgacü, rü Yechéü̃ ga Arábiaanecüã̱x ixĩxü̃ nüxü̃ cuáchigagu ga yema puracü rü toxü̃ nacugüe rü togu nidauxcüraxü̃gü. Rü toxna naca rü ñanagürügü toxü̃: —¿Ta̱xacü ípexüe? ¿Ẽ̱xna nagu perüxĩnüe nax tama ãẽ̱xgacüga pexĩnüexü̃? —ñanagürügü.
20 Natürü ga choma rü chanangãxü̃ga rü ñacharügü: —Nüma ya daxũcüã̱x ya Tupana rü tá toxü̃ narüngü̃xẽxẽ. Toma i norü duü̃xü̃gü rü itanaxügü nax tanamexẽẽxü̃ ya daa ĩanearü poxeguxü̃. Natürü i pemax rü nataxuma i ta̱xacü i pexna üxü̃ nawa i ñaa puracü —ñachagürü nüxü̃.
Notas
^ 2:1 Abril.
