Nehemías 4:1-23
4 Rü yexguma nüma ga Chambaráx nüxü̃ ĩnüchigagu ga nax namexẽẽgüãxü̃ ga guma ĩanearü poxeguxü̃, rü nanu rü norü numaxã toxü̃ nacugü.
2 Rü ñanagürü nape̱xewa ga namücügü ga Chamáriacüã̱x ga churaragüarü ãẽ̱xgacügü: —¿Ta̱xacügu narüxĩnüe i ngẽma Yudíugü i taiyamaxã yuechaü̃xü̃? ¿Rü nüma nagu naxĩnüegu rü chi wena nüxü̃ tanaxüxẽxẽ nax naxü̃na norü Tupanaca̱x nada̱i̱xü̃ rü ínaguxü̃? ¿Ẽ̱xna nagu naxĩnüegu rü wüxi i ngunexü̃gu tátama nüxü̃́ nagu̱x i ngẽma puracü i naxügüxü̃? ¿Ẽ̱xna ngẽma naxtapü̱x i ngẽxma ãũxchitaxü̃ i marü ixaexü̃wa tátama nadeaxü̃ ya ngexwaca̱xü̃cü ya nutagü? —ñanagürü.
3 Rü naxü̃tawa nayexma ga Tobía ga Amóü̃tanüxü̃. Rü nüma rü ñanagürü ta: —¡Dücax i ngẽma naxtapü̱x i naxügüxü̃! Rü wüxi i cugüruxü̃ nixĩ. Erü woo wüxi i ngowa daxũ nawa ĩxgu rü tá nayawa̱xtapü̱xẽxẽ —ñanagürü.
Neemíaarü yumüxẽ
4 Rü yexguma ga chomax, rü chayumüxẽ rü Tupanamaxã chidexa rü ñachagürü: —Pa Torü Tupanax, ¡nüxü̃ naxĩnü nax ñuxãcü toxü̃ nacugüexü̃! ¡Ẽcü naxca̱xtama natáeguxẽxẽ i ngẽma namaxã toxü̃ nacugüexü̃, nax ngẽmaãcü norü uanüme̱xẽgu nayixü̃ca̱x rü to i nachixü̃anewa nagagüãxü̃ca̱x!
5 ¡Rü taxṹ i nüxü̃́ nüxü̃ curüngü̃maxü̃ i ngẽma norü chixexü̃gü rü taxṹ i nüxü̃ curüngü̃maxü̃ i ngẽma norü pecadugü! Erü nümagü rü ngẽma ĩanearü poxeguxü̃tápü̱x ixügüxü̃maxã ta̱xacü nixugüe —yemaacü chayumüxẽ.
Norü uanügü nanaxãxũnegü
6 Rü nawa tapuracüeama ga yema ĩanetapü̱x ga marü ngãxü̃gu ixũxü̃ ga nax naxüxü̃. Rü nüma ga duü̃xü̃gü rü norü ngúchaü̃maxã napuracüe.
7 Natürü yexguma torü uanügü ga Chambaráx rü Tobía rü yema Arábiaanecüã̱x, rü Amóü̃tanüxü̃, rü Adúxcüã̱x nüxü̃ ĩnüegu nax mea iyaxũxü̃ ga yema puracü ga Yerucharéü̃arü poxeguxü̃tápü̱xwa rü yema íyangoxnagüxü̃wa rü marü nax nañaxtagüãxü̃, rü nümagü ga yema uanügü rü poraãcü nanue.
8 Rü guxü̃ma ga nüma rü wüxigu nügümaxã nagu narüxĩnüe nax Yerucharéü̃ca̱x íyaxüãchixü̃ nax nagu napogüexü̃ca̱x ga naxtapü̱x.
9 Rü yexguma ga toma rü tayumüxẽgü, rü Tupanana taca nax toxü̃ nangü̃xẽẽxü̃ca̱x. Rü ñu̱xũchi dauxü̃taeruxü̃ itamugü nax chütacü rü ngunecü nadauxü̃taegüxü̃ca̱x nax yemaacü togü ítapoxü̃xü̃ca̱x.
10 Rü nümaxü̃ ga yema Yudáanecüã̱xgü ga yema puracümaxã icua̱xgüxü̃ rü nidexagü rü ñanagürügü: —Ngẽma puracütanüxü̃ i nuta ínanugügüxü̃ rü marü nipae erü namuxũchima ya nuta ya ãũxchitacü, rü ngẽmaãcü tagutáma tüxü̃́ name i ngẽma naxtapü̱x —ñanagürügü.
11 Rü yema torü uanügü rü nagu narüxĩnüe nax taxũchima nüxü̃ tacua̱xgüxü̃ rü nüxü̃ tadauxü̃ ga yexguma chi bexma totanügu nachocuxgu nax toxü̃ nada̱i̱xü̃ca̱x, rü yemaacü nax íyachaxãchigüxẽẽãxü̃ca̱x ga yema puracü.
12 Natürü yema totanüxü̃ ga torü uanügüarü ngaicamagu pegüxü̃ rü muẽ̱xpü̱xcüna tomaxã nüxü̃ nayarüxugüe nax yema torü uanügü rü guxü̃cüwawa toxca̱x nax íyaxü̃ãchichaü̃xü̃.
13 Rü yemaca̱x ga choma rü chanamu ga duü̃xü̃gü nax nügütanüxü̃chigüãcü nügü iyanuxü̃ca̱x ga yema naxtapü̱xpechitagu ga ínanuxchanexü̃wa rü ínaxãxmaxetüchigüxü̃wa, rü taramaxã, rü wocaemaxã, rü würamaxã ixãxnexü̃ nax yemamaxã nügü ínapoxü̃güxü̃ca̱x.
14 Rü yexguma nüxü̃ chicua̱xãchigu ga nax namuü̃exü̃ ga duü̃xü̃gü, rü nüxna chaxu ga guxü̃ma ga ãẽ̱xgacügü rü duü̃xü̃gü nax chomaxã nangutaque̱xegüxü̃ca̱x, rü ñachagürü nüxü̃: —¡Taxṹ i pemuü̃exü̃! ¡Rü nüxna pecua̱xãchie rü nüma ya Tupana rü poraxüchicü rü üünecü nax yixĩxü̃! Rü ngẽmaca̱x name nixĩ nax ípemexü̃ nax perü uanümaxã pegü pedaixü̃ rü ípenapoxü̃xü̃ i pemücügü, rü petanüxü̃ rü pepatacüã̱xgü —ñachagürü nüxü̃.
15 Rü yexguma torü uanügü nüxü̃ cuáxchigagügu ga toma rü marü nüxü̃ nax tacuáxü̃ ga yema nagu naxĩnüexü̃, rü Tupana rü marü toxü̃ ínapoxü̃xü̃, rü yemaca̱x ga nümagü rü toxna nixĩgachitanü. Rü toma rü naxca̱x tawoegu ga nawa nax tapuracüexü̃ ga yema ĩanearü poxeguxü̃tápü̱x.
16 4:16-17 Natürü yexgumaü̃cüxü rü ngãxü̃tücumü ga duü̃xü̃gü napuracüe rü yema totücumü rü nadauxü̃taegü ga meama ixãxnexü̃ wocaemaxã rü würamaxã. Rü nananga̱xcu ga norü poxü̃ruü̃gü ga escúdugü, rü nacu̱xcu ga naremüarü poxü̃ruxü̃. Rü yema norü ãẽ̱xgacügü ga Yudáanecüã̱xgü rü natanügu naxãgü rü ínamemare nax nüxna nadaugüxü̃ ga yema duü̃xü̃gü ga ĩanetapü̱xwa puracüexü̃. Rü yema togü ga puracütanüxü̃ ga nutaarü nugüruü̃gü rü napuracüeama, natürü ãxneãcüma nananugüama ga nutagü.
17 Nüü̃ nadau 4:16
18 Rü guxü̃ma ga yema puracütanüxü̃ rü nügücüwawa nanatuxẽxẽ ga norü tara. Rü yema cornétaarü cueruxü̃ rü chauxü̃tawatama nayexma nax yemaacü nüxü̃́ natauxchaxü̃ca̱x nax paxãma yacaxü̃ãxü̃ca̱x ga uanügü.
19 Rü choma rü namaxã nüxü̃ chixu ga yema puracümaxã icua̱xgüxü̃ rü yema ngü̃xẽẽruü̃gü rü guxü̃ma ga yema duü̃xü̃gü rü ñacharügü: —Ñaa puracü rü nataxüchi, rü taxü̃ma tüxü̃́ nataxu nax nagúxü̃ca̱x, rü yixema rü ñaa poxeguxü̃tápü̱xgü yigü tinu rü yigüna tiyáxü̃.
20 Rü ngẽmaca̱x ega ngẽxguma tá tórü uanügü nua ĩxgu rü nüxü̃ pexĩnüegu i cornétaga ¡rü paxa toxü̃tawa pebuxmü! Rü tórü Tupana tá nixĩ i nada̱i̱xü̃ i ngẽma tórü uanügü —ñachagürü.
21 Rü yemaacü ga yema ngãxü̃tücumü ga duü̃xü̃gü rü yexguma noxritama üa̱xcü ibáxichigu nanaxügüe nax nawa napuracüexü̃ ga yema ĩanearü poxeguxü̃tápü̱x rü ñu̱xmata wena yanaxücu ga üa̱xcü. Rü yema togü ga duü̃xü̃gü rü nadauxü̃taegü rü taguma ínanange̱xgü ga naxnegü.
22 Rü yexgumarüxü̃ ta ga yema duü̃xü̃gü ga ĩane ga Yerucharéü̃arü düxétügu ãpatagüxü̃ rü namaxã nüxü̃ chixu nax ngunecüxicatama napuracüexü̃, rü chütacü rü ĩanearü aixepegu napegüxü̃ nax yemaacü dauxü̃taeruü̃güxü̃ nangü̃xẽẽgüxü̃ca̱x.
23 Rü yemaca̱x ga choma rü yema chautanüxü̃ rü yema chorü ngü̃xẽẽruü̃gü, rü woo ga yema chorü dauruü̃gü rü tama ítacu̱xü̃ ga toxchiru ga yexguma tapeegu. Rü wüxíechigü ga toma rü ãxneãcütama tapee.
