Nehemías 5:1-19
5 Rü yema ga ngunexü̃gügu ga duü̃xü̃gü rü ñu̱xũchi naxma̱xgü rü poraãcü yema togü ga natanüxü̃ ga Yudíugü ga diẽruã̱xgüxü̃chiga nidexagü.
2 Yerü nümaxü̃ ga yema duü̃xü̃gü rü nügü nixu nax namuxacüxǘchixü̃ rü trigu nanaxwa̱xegüxü̃ nax tama taiyamaxã tayuexü̃ca̱x ga naxacügü.
3 Rü yexgumarüxü̃ ta ga togü ga duü̃xü̃gü rü nidexagü naxca̱x nax nüxü̃́ nataxuxü̃ ga norü trigu rü yema nax nataxuxü̃gagu rü düxwa norü naanegüégagu rü norü úbanecügüégagu rü ñu̱xũchi napatagüégagu diẽruca̱x ínacagü nax natanüxü̃ diẽru nüxna ãgüxü̃ca̱x nax yemaacü tríguca̱x nataxegüxü̃ca̱x.
4 Rü nayexma ga duü̃xü̃gü ga nüxü̃ ixugüexü̃ nax taxucürüwa naxütanügüãxü̃ ga yema diẽru ga ãẽ̱xgacü ngĩgu unetacü nax guxü̃ma ga duü̃xü̃gü ngĩxü̃ ixãgüxü̃ca̱x. Rü yemaca̱x düxwa norü naanegüégagu rü norü úbanecügüégagu natanüxü̃na diẽruca̱x nacagüe nax yema diẽrumaxã naxütanügüãxü̃ca̱x ga yema diẽru ga ãẽ̱xgacü ngĩgu unetacü.
5 Rü ñanagürügü: —Toma rü natanüxü̃xüchi tixĩgü i ngẽma diẽruã̱xgüxü̃. Rü tonegü rü nanegümaxã nawüxigumare. Natürü i toma rü ngẽma diẽruã̱xgüxü̃na tanamugü i tonegü rü toxocügü nax toxna naxããxü̃ca̱x i diẽru nax tanaxütanüxü̃ca̱x i ngẽma diẽru ga ãẽ̱xgacü ngĩgu unetacü. Rü ngẽmaca̱x i ñuxre i tonegü rü toxocügü rü ngẽma diẽruã̱xgüxü̃arü puracütanüxü̃ nixĩgü rü tüma rü taxucürüwa wena toxca̱x tawoegu erü tangearü diẽruã̱xgü rü ngẽma torü naanegü rü torü úbanecügu rü togüme̱xẽwa nangẽxmagü —ñanagürügü.
6 Rü yexguma nüxü̃ chaxĩnügu ga yema duü̃xü̃gü naxca̱x idexagüxü̃, rü nagu charüxĩnü rü poraãcüxüchima chanu.
7 Rü yexguma marü meama nagu charüxĩnüguwena rü chayangagü ga yema ãẽ̱xgacügü rü yema duü̃xü̃gü ga idiẽruã̱xgüxü̃ naxca̱x ga yema chixexü̃ ga natanüxü̃maxã naxügüxü̃. Rü wüxi ga ngutaque̱xe namaxã chaxü ga yema duü̃xü̃gü nax nachiga chidexaxü̃ca̱x ga yema ngupetüxü̃.
8 Rü ñachagürü: —Toma rü pora taxü nax ítananguxü̃xẽẽxü̃ca̱x ga tatanüxü̃ ga Yudíugü ga yexguma yema nachixü̃anegü ga tama Cori ya Tupanaaxü̃́ yaxõgüxü̃tanügu namaxã nataxegügu. ¿Rü ñu̱xma i pema ẽ̱xna penaxwa̱xe nax wenaxarü namaxã petaxegüxü̃, nax toma wenaxarü ítananguxü̃xẽẽxü̃ca̱x? —ñachagürü. Rü nümagü ga yema ãẽ̱xgacügü rü nangeã̱xgümare, yerü tama nüxü̃ nacua̱xgü nax ta̱xacümaxã choxü̃ nangaxü̃güxü̃.
9 Rü yexguma ga choma rü wena namaxã chidexa rü ñacharügü: —Rü ngẽma ñu̱xma ípexüexü̃ rü Cori ya Tupanape̱xewa rü tama wüxi i mexü̃ nixĩ. Rü name nixĩ i Cori ya Tupanaga pexĩnüe nax tama tagu yadauxcüraü̃güxü̃ca̱x i torü uanügü i tama Cori ya Tupanaaxü̃́ yaxõgüxü̃.
10 Rü chautanüxü̃ rü chorü ngü̃xẽẽruü̃gü rü choma rü ta diẽru rü trigu nüxna taxãgü nax yixcama toxü̃ naxütanügüãxü̃ca̱x i ngẽma toxna naxca̱x nacagüxü̃. Rü ngẽmaca̱x i ñu̱xma rü ngĩxã nüxü̃́ nüxü̃ tarüngüma i ngẽma norü ngetanügü.
11 Rü ngẽmaca̱x pexna naxca̱x chaca nax ñu̱xmatama nüxü̃́ penawoeguxẽẽxü̃ i norü naanegü rü norü úbanecügu rü norü oribunecügü rü napatagü. Rü chanaxwa̱xe nax nüxü̃́ nüxü̃ perüngümaexü̃ i ngẽma pexü̃́ nangetanügüxü̃ i diẽru rü trigu rü bínu rü chíxü̃ —ñachagürü.
12 Rü nümagü ga yema duü̃xü̃gü ga idiẽruã̱xgüxü̃ rü choxü̃ nangãxü̃gü rü ñanagürügü: —Nüxü̃́ tá tanawoeguxẽxẽ i guxü̃ma i norü naanegü rü norü úbanecügu rü norü oribunecügü rü napatagü, rü taxuxü̃táma i ta̱xacüca̱x tá nüxna taca. Rü tá tayanguxẽxẽ i guxü̃ma i ngẽma tomaxã nüxü̃ quixuxü̃ —ñanagürügü. Rü yexguma ga choma rü naxca̱x changema ga chacherdótegü rü yemagüpe̱xewa nüxü̃ nüxü̃ chixuxẽxẽ nax aixcüma tá yanguxẽxẽgüãxü̃ ga yema chomaxã inaxunetagüxü̃.
13 Rü yexguma ga choma rü chaugü chapaãchiru rü ñacharügü: —Rü ñu̱xma nax chauxchiru chapaãxü̃rüxü̃ãcü tá nixĩ ya Cori ya Tupana i tümapatawa, rü tümaanewa rü tümaarü úbanecüwa tá tüxü̃ ínata̱xüchixü̃ ya yíxema tama ñaa mu inguxexẽ́xẽ ya duü̃xẽ. Rü ngẽmaãcü tá tüxna nanayaxu i guxü̃ma i tümaarü ngẽmaxü̃gü i ñu̱xma tüxü̃́ ngẽxmaxü̃ —ñacharügü. Rü guxü̃ma ga yema muxũchixü̃ ga duü̃xü̃gü rü tagaãcü ñanagürügü: —Ngẽmaãcü yixĩ —ñanagürügü. Rü yemawena ga yema duü̃xü̃gü rü Cori ya Tupanaxü̃ nicua̱xüü̃gü, rü aixcümama nayanguxẽẽgü ga yema norü uneta ga nüxü̃ yaxugüxü̃.
Neemía rü tama nügüguxica narüxĩnü
14 Rü yexguma norü 20 ga taunecüwa nanguxgu nax ãẽ̱xgacü yixĩxü̃ ga Artayére rü choxü̃ naxuneta nax Yudáanearü ãẽ̱xgacü chixĩxü̃. Rü 12 ga taunecü Yudáanearü ãẽ̱xgacü chixĩ ñu̱xmata norü 32 ga taunecüwa nanguxgu nax ãẽ̱xgacü yixĩxü̃ ga Artayére. Rü gumá 12 ga taunecü ga nagu Yudáanewa ãẽ̱xgacü nax chixĩxü̃, rü choma rü ñu̱xũchi chorü ngü̃xẽẽruü̃gü rü bai ga ñuxgu tanayaxuxü̃ ga yema diẽru ga toxna üxü̃ nax ãẽ̱xgacügü tixĩgüxü̃.
15 Natürü yema nüxíraxü̃xü̃ ga ãẽ̱xgacügü, rü poraãcü duü̃xü̃güaxü̃́ nanaguxchaxẽẽgü, yerü duü̃xẽgüna 40 tachinü ga diẽruca̱x ínacagü nax guxema diẽrumaxã norü õnaca̱x rü bínuca̱x nataxegüxü̃ca̱x. Rü yexgumarüxü̃ ta ga yema norü ngü̃xẽẽruü̃gü rü duü̃xü̃güaxü̃́ nanaguxchaxẽẽgü. Natürü i choma rü tama ngẽma chaxü erü Cori ya Tupanaxü̃ chamuü̃.
16 Rü choma rü chayanguxẽxẽ ga yema puracü nax chanamexẽẽxü̃ ga ĩanearü poxeguxü̃tápü̱x. Rü taxuxü̃ma ga naane chaugüxü̃́ chayaxu. Rü yema chorü ngü̃xẽẽruü̃gü rü ta napuracüe nawa ga yema puracü ga chaxüxü̃.
17 Rü yexguma chachibügu rü chorü mechawa wüxigu namaxã chachibü ga 150 ga duü̃xü̃gü. Rü yema duü̃xü̃gütanüwa rü nayexmagü ga Yudáanecüã̱xgü, rü chorü ngü̃xẽẽruü̃gü ga ãẽ̱xgacügü, rü ñu̱xũchi namu ga duü̃xü̃gü ga chauxü̃tagu naxĩanexü̃ ga toxna ngaixcamagüxü̃ ga nachixü̃anegüwa ne ĩxü̃.
18 Rü wüxichigü ga ngunexü̃ca̱x rü nanaxügü ga wüxi ga woca ga yatüxü̃, rü 6 ga carnérugü ga ingüexü̃ rü ñu̱xũchi ñuxre ga otágü. Rü yexguma wüxichigü ga 10 ga ngunexü̃wa nanguxgu rü tacü ga bínu nayexma ga chauxü̃tawa. Rü woo ga nax chomatama ichanaxüxü̃ ga yema õna ga changṍxü̃, rü taguma yema ãẽ̱xgacüarü diẽru ga choxna üxü̃ chayaxu, yerü yema diẽru ga nüxíraxü̃xü̃ ga ãẽ̱xgacügü yaxuxü̃ rü duü̃xü̃güaxü̃́ naguxcha nax naxütanügüãxü̃ca̱x.
19 ¡Pa Chorü Cori ya Tupanax, nüxna nacua̱xãchi i ngẽma guxü̃ma i mexü̃ i ñaa duü̃xü̃güca̱x chaxüxü̃ rü choxna naxã i curü ngü̃xẽxẽ!
