Nehemías 6:1-19
6 Rü yema torü uanügü ga Chambaráx rü Tobía rü yema Arábiaanecüã̱x ga Yechéü̃ rü yema togü ga torü uanügü rü nüxü̃ nacuáxchigagü nax wena chanamexẽẽxü̃ ga yema ĩanearü poxeguxü̃tápü̱x. Rü yema íyangoxnaxü̃wa rü guxü̃ma charüchauxta rü taxuxü̃ma chaxüpetü. Rü norü ĩã̱xgüxicatama nixĩ ga choxü̃́ taxuxü̃ nax chananucuxü̃.
2 Rü yemaca̱x ga yema chorü uanügü ga Chambaráx rü Yechéü̃ rü chauxü̃tawa namugagü nax chomaxã nangutaque̱xegüxü̃ca̱x nawa ga wüxi ga ĩane ga Onóarü doxonexü̃wa yexmane. Natürü yema nagu naxĩnüexü̃ nixĩ nax yemaacü choxü̃ yama̱xgüchaxü̃xü̃.
3 Rü yexguma ga choma rü yéma chanamugü ga duü̃xü̃gü nax namaxã nüxü̃ yanaxugüxü̃ca̱x nax choma rü taxucürüwa yéma chaxũxü̃ yerü nataxüchi ga chorü puracü, rü changechica yerü chi yéma chaxũxgu rü yema puracü ga íchaxüxü̃ rü chi ínayachaxãchi.
4 Rü ãgümücüe̱xpü̱xcüna nixĩ ga cha̱u̱xca̱x yéma namugagüxü̃, natürü ga choma rü noxriãcütama chanangãxü̃.
5 Rü yexguma ga nüma ga Chambaráx rü norü 5 e̱xpü̱xcüna wüxi ga norü duü̃xü̃maxã cha̱u̱xca̱x yéma namuga, rü yematama ore ga noxri cha̱u̱xca̱x yéma namaxã namugaxü̃tama nixĩ ga nagu naxümatüxü̃ ga yema popera ga yéma chauxü̃tawa nangexü̃.
6 Rü yema popera rü ñaxü̃ nagu naxümatü: —Nua rü duü̃xü̃gütanüwa rü Yechéü̃xü̃tawa nüxü̃ taxĩnüe nax cuma rü ngẽma Yudíugümaxã nagu perüxĩnüexü̃ nax tama ãẽ̱xgacüga pexĩnüexü̃, rü ngẽmaca̱x yixĩxü̃ nax ípenamexẽẽxü̃ i ngẽma naxtapü̱x ya yima ĩane. Rü ngẽxgumarüxü̃ ta nüxü̃ chaxĩnüchiga nax cuma tá yixĩxü̃ i norü ãẽ̱xgacü quixĩxü̃.
7 Rü cuma rü marü nüxü̃ cuxuneta i orearü uruü̃gü nax ngẽma naxunagügüxü̃ca̱x nax cumax nax ãẽ̱xgacü quixĩxü̃ i Yerucharéü̃wa, rü nüxü̃ yaxugüxü̃ca̱x nax marü nayimaxü̃ ya ãẽ̱xgacü i Yudáanewa. Rü ngẽma ore rü ngürüãchi tá nüxü̃ naxĩnü ya ãẽ̱xgacü ya Artayére, rü ngẽmaca̱x name i nua cuxũ rü ¡ngĩxã yigümaxã tidexagü! —ñanagürü ga yema popera.
8 Rü yexguma ga chomax rü chanangãxü̃ rü ñachagürü: —Tama aixcüma nixĩ ga yema nüxü̃ cuxĩnüchigaxü̃ yerü yema rü cumatama nagu curüxĩnümarexü̃ nixĩ —ñachagürü.
9 Rü yemaacü toxü̃ naxãxũnegü, yerü toxü̃ namuü̃exẽẽchaü̃ nax nüxü̃ tarüchauexü̃ca̱x nax tapuracüexü̃. Natürü ga choma rü yexeraãcü chanaxüama ga yema puracü.
10 Rü yemawena rü Chemaíapatawa chaxũ. Rü nüma ga Chemaía rü Deraía nane nixĩ rü ñu̱xũchi Meetabé nataxa nixĩ. Rü nüma ga Chemaía rü napatagu nügü narüwãxtaxü̃. Natürü yexguma yéma changuxgu rü ñanagürü choxü̃: —Ngĩxã Tupanapata ya taxü̃nearü aixepewa tangutaque̱xegü rü tanawãtagü i ngẽma norü ĩã̱xgü. Erü ñaa chütaxü̃gu tá nixĩ i nua naxĩxü̃ nax cuxü̃ yama̱xgüxü̃ca̱x —ñanagürü choxü̃.
11 Natürü ga choma rü chanangãxü̃ rü ñachagürü nüxü̃: —Ngẽma yatügü i chauxrüxü̃ tama muü̃exü̃ rü tama nibuxmü rü bai nax Tupanapata ya taxü̃negu yanacu̱xgüxü̃ nax ngẽmaãcü taxuxü̃ma nüxü̃ ngupetüxü̃ca̱x. Choma rü taxũtáma ngẽxma chayarücu̱x —ñachagürü nüxü̃.
12 6:12-13 Yerü nüxü̃ chicua̱xãchi nax tama Tupana yixĩxü̃ ga yema Chemaíawa idexaxü̃ rü guxü̃ma ga yema nüxü̃ yaxuxü̃ ga chauchiga rü nüxü̃ nixu yerü ga Chambaráx rü ñu̱xũchi ga Tobía rü nüxü̃́ nanaxütanügü nax choxü̃ namuü̃xẽẽgüxü̃ca̱x nax yemaacü chixexü̃gu choxü̃ nangu̱xẽẽgüxü̃ca̱x rü choxü̃ nachixechigaxẽẽgüxü̃ca̱x rü taxuwachima choxü̃ namexẽẽgüxü̃ca̱x.
13 Nüü̃ nadau 6:12
14 Pa Chorü Tupanax, ¡taxṹ i cunangupetüxẽxẽmarexü̃ ga yema chixexü̃ ga naxügüxü̃ ga Chambaráx rü Tobía! ¡Rü ngẽxgumarüxü̃ ta taxṹ i cunangupetüxẽxẽmarexü̃ i ngĩrü chixexü̃ i ngẽma orearü uruü̃neta i Noadía, rü ñu̱xũchi ngẽma togü i orearü uruü̃güneta i choxü̃ muü̃xẽxẽgüchaü̃xü̃!
Nanagu̱xẽxẽgü nax namexẽxẽgüaxü̃́ ga ĩanearü poxeguxü̃tápü̱x
15 Rü meama Elúarü tauemacüarü 25 ga ngunexü̃gu* nixĩ ga nagúxü̃ ga guma ĩanearü poxeguxü̃tápü̱x. Rü yema puracü rü meama 52 ga ngunexü̃ nagu tinge.
16 Rü torü uanügü rü guxü̃ma ga yema togü ga nachixü̃anecüã̱x ga torü ngaicamana yexmagüxü̃ rü nüxü̃ nacuáchigagü ga marü nax yanguxü̃ ga guma ĩanearü poxeguxü̃tápü̱x. Rü yemaca̱x ga nümagü rü poraãcü namuü̃e rü nixãneãchitanü yerü nüxü̃ nicua̱xãchitanü ga yema puracü ga taxüxü̃ rü Tupanaarü ngü̃xẽẽmaxã nax yanguxü̃.
17 6:17-18 Rü yema ngunexü̃gügu rü ñuxre ga duü̃xü̃gü ga Yudáanewa tachigaxü̃ rü Tobíawaama naxügü, rü guxü̃guma norü poperagüwa nügümaxã nidexagü. Yerü nüma ga Tobía rü Ará nane ga Checaníaxã̱xte nixĩ. Rü ñu̱xũchi yema Tobía nane ga Yoanáü̃ rü Mechuráü̃acümaxã nixĩ ga naxãmaxü̃. Rü nüma ga Mechuráü̃ rü Berequía nane nixĩ.
18 Nüü̃ nadau 6:17
19 Rü chope̱xewa rü yema Yudíugüarü ãẽ̱xgacügü rü mea Tobíachiga nidexagü. Rü ñu̱xũchi namaxã nüxü̃ nixugü ga guxü̃ma ga yema choma nüxü̃ chixuxü̃. Rü nüma ga Tobía rü cha̱u̱xca̱x popera nimu nax yemaacü choxü̃ ínaba̱i̱xgüxü̃ca̱x.
Notas
^ 6:15 25 setiémbre.
