Nehemías 8:1-18
8 Rü gumá norü 7 ga tauemacügu* rü guxü̃ma ga yema duü̃xü̃gü ga marü norü ĩanewa iyexmachigüxü̃ rü Yerucharéü̃wa nayangutaque̱xegü nax nüxü̃ naxĩnüexü̃ca̱x ga Tupanaarü ore. Rü yema ĩanearü ngutaque̱xechica ga Ĩã̱x ga Dexágu ãégaxü̃arü to̱xma̱xtawa yexmaxü̃gu nangutaque̱xegü. Rü ñu̱xũchi ga nüma ga duü̃xü̃gü rü chacherdóte ga Édraxü̃ ñanagürügü: —¡Ẽcü nua nange i ngẽma Cori ya Tupanaarü mugüpane ga Moiché ümatüxü̃ naxca̱x ga tórü o̱xigü ga Iraétanüxü̃! —ñanagürügü.
2 Rü nüma ga chacherdóte ga Édra rü yéma nanange ga yema Tupanaarü mugüpane nape̱xewa ga yema duü̃xü̃gü ga yexma ngutaque̱xegüxü̃ ga yatüxü̃ rü ngexü̃ rü ngextü̱xücügü rü pacügü.
3 Rü ẽxü̃wa inanaxügü rü ñu̱xmata tocuchiwa nangu nax duü̃xü̃güca̱x nüxü̃ nadaumatüxü̃ ga Tupanaarü mugü nawa ga yema ĩanearü ngutaque̱xechica ga ĩã̱x ga Dexágu ãégaxü̃arü to̱xma̱xtawa yexmaxü̃. Rü guxü̃ma ga duü̃xü̃gü rü meama inarüxĩnüe ga yema Tupanaarü mugü.
4 Rü nüma ga chacherdóte ga Édra rü nachinagü nagu ga wüxi ga chinagüruxü̃ ga mürapewanaxca̱x ga woetama yemaruxü̃ yexma üxü̃. Rü norü tügünecüwaguama nachigü ga Matatía, rü Chéma, rü Anía, rü Uría, rü Irichía rü Maachía. Rü norü to̱xwecüwaguama nachigü ga Pedaía, rü Michaé, rü Maquía, rü Achúü̃, rü Achadána, rü Chacaría rü Mechuráü̃.
5 Rü yexguma ga Édra rü nayawãxna ga yema popera ga mugüpane guxü̃ma ga duü̃xü̃güpe̱xewa. Rü guxü̃ma ga duü̃xü̃gü rü nüxü̃ nadaugü yerü dauxü̃gu namaxã nachinagü. Rü yexguma yawãxnaagu ga yema popera ga mugüpane rü guxü̃ma ga duü̃xü̃gü ga yexmagüxü̃ rü inachigü.
6 Rü yexguma ga nüma ga Édra rü Cori ya Tupana ya Guxãétüwa ngẽxmacüxü̃ nicua̱xüxü̃. Rü guxü̃ma ga duü̃xü̃gü rü dauxna naxugüchacüxüãcüma nanangãxü̃gü rü ñanagürügü: —Ngẽmaãcü yixĩ, rü ngẽmaãcü yixĩ —ñanagürügü. Rü yemawena rü waixü̃müanegu nanangücuchitanü, rü yemaacü Cori ya Tupanaxü̃ nicua̱xüü̃gü.
7 Rü Lebítanüxü̃ ga Yochué, rü Baní, rü Cherebía, rü Yamíü̃, rü Acúx, rü Chaxtái, rü Odía, rü Maachía, rü Queritá, rü Acharía, rü Yochabá, rü Anáü̃ rü Peraía nixĩ ga duü̃xü̃gümaxã meama nango̱xẽẽgüxü̃ nax ta̱xacüchiga yixĩxü̃ ga yema mugü. Rü yexguma ga nüma ga duü̃xü̃gü rü tama nixĩgachitanü nawa ga yema nachica ga nagu nachigüxü̃.
8 Rü nümagü rü tagaãcü duü̃xü̃güca̱x nüxü̃ nadaumatügü ga yema Tupanaarü mugüpane. Rü ñu̱xũchi meama duü̃xü̃gümaxã nanango̱xẽxẽ ga yema ore nax nüxü̃ nacua̱xgüxü̃ca̱x nax ta̱xacüchiga yixĩxü̃.
9 Rü guxü̃ma ga duü̃xü̃gü rü yexguma nüxü̃ naxĩnüegu ga yema Tupanaarü mugü rü naxauxe. Natürü ga choma ga ãẽ̱xgacü ga Neemía, rü nümatama ga chacherdóte ga Édra, rü yema tomücügü ga Lebítanüxü̃ rü tanataãẽxẽxẽ ga yema duü̃xü̃gü, rü ñatagürügü nüxü̃: —¡Taxṹ i pengechaxü̃güxü̃ rü pexauxexü̃! Erü ñoma i ngunexü̃ rü woetama tórü Cori ya Tupanaca̱x ítanaxǘxüchi —ñatagürügü.
10 Rü ñanagürü ta ga Édra: —¡Ẽcü mea peyachibüe rü bínu ya maixcuracü peyaxagü! ¡Rü tümamaxã pengau ya texé ya tüxü̃́ nataxúxe i tümaarü õna nax wüxigu petaãẽgüxü̃ca̱x! Erü ñoma i ngunexü̃ rü woetama Cori ya Tupanaca̱x ítanaxǘxüchi. Rü ngẽmaca̱x tama name nax pengechaü̃güxü̃ erü ngẽma taãxẽ i tórü Cori ya Tupana tüxna ãxü̃ rü tórü poxü̃ruxü̃ nixĩ —ñanagürü.
11 Rü yexgumarüxü̃ ta ga nüma ga Lebítanüxü̃ rü duü̃xü̃gümaxã nüxü̃ nixugüe rü ñanagürügü: —¡Marütama nax pexauxexü̃! Erü ñoma i ngunexü̃ rü woetama Cori ya Tupanaca̱x ítanaxǘxüchi —ñanagürü.
12 Rü yexguma ga nüma ga guxü̃ma ga duü̃xü̃gü rü chibüwa rü axewa naxĩ rü namücügümaxã nangaugü ga norü õnagü. Rü yemaacü nanaxüchigagü ga yema ngunexü̃, yerü nüxü̃ nicua̱xãchitanü ga yema Édra nangúexẽẽxü̃.
Düxenügüarü petachiga naxüchigagü
13 Rü moxü̃ãcü pa̱xmama rü guxü̃ma ga ãẽ̱xgacügü ga natanüxü̃tücumümaxã icua̱xgüchigüxü̃, rü chacherdótegü, rü Lebítanüxü̃ rü norü ngúexẽẽruü̃gü, rü Édramaxã nangutaque̱xegü nax mea Cori ya Tupanaarü mugüpanewa nangúexü̃ca̱x.
14 Rü yema mugüpanewa namaxã inarüxĩ ga ümatüxü̃ nax Cori ya Tupana rü Moichéxü̃ namuxü̃, rü ngẽxguma ngẽma peta ya norü 7 ya tauemacügu naxüchigagüxü̃wa nanguxgu rü düxenügügumare tá napegüxü̃ i Iraétanüxü̃.
15 Rü yemaca̱x guxü̃nema ga ĩanegüwa rü Yerucharéü̃wa nüxü̃ narüxugüe nax duü̃xü̃gü rü máxpü̱xanexü̃gu norü oribuatüca̱x, rüe̱xna arayáü̃átügüca̱x, rüe̱xna palmeraxátügüca̱x, rüe̱xna tomare i nai i muchacüüxü̃tanüca̱x nadaugüxü̃ nax norü düxenügü nawa ne naxügüxü̃ nax yima düxenügügu napegüxü̃ca̱x ega ngẽxguma düxenügüarü petawa nanguxgu, yema mugüpanewa nüxü̃ yaxuxü̃rüxü̃.
16 Rü duü̃xü̃gü rü norü naiátüwa naxĩ rü namaxã ínangugü nax yemaacü wüxichigü ga duü̃xü̃ noxrütama düxenü ne naxüxü̃ca̱x. Rü nümaxü̃ ga duü̃xü̃gü rü napataétügu nanaxügü ga norü düxenü, rü togü rü napataa̱xtügu nanaxügü, rü togü rü Tupanapata ga taxü̃nea̱xtügu nanaxügü, rü togü rü ĩã̱x ga Dexágu ãégaxü̃pe̱xegu nanaxügü, rü togü ga duü̃xü̃gü rü ĩã̱x ga Efraíü̃gu ãégaxü̃pe̱xegu nanaxügü ga norü düxenügü.
17 Rü guxü̃ma ga yema Iraétanüxü̃ ga Babiróniaanewa ne gagüxü̃ rü norü naaneca̱x woeguxü̃ rü nanaxügü ga norü düxenü rü nagu napegü. Yerü yexguma Yochué ga Núü̃ nane namaxã naxüchigagucürüwa rü taguma nanaxüchigagü ga yema peta rü ñu̱xmata yema ngunexü̃ ga nagu Yerucharéü̃gu nangutaque̱xegüxü̃gu nixĩ ga wena naxüchigagüãxü̃. Rü yemaca̱x poraãcüxüchi nataãẽgü.
18 Rü 7 ga ngunexü̃ nanaxüchigagü ga yema düxenügüarü peta. Rü wüxichigü ga yema 7 ga ngunexü̃gu rü nüma ga Édra rü duü̃xü̃gümaxã nüxü̃ nadaumatü ga yema Tupanaarü mugü. Rü yexguma norü 8 ga ngunexü̃wa nanguxgu rü duü̃xü̃gümaxã nanaxü ga wüxi ga taxü̃ ga ngutaque̱xe nax Tupanaxü̃ yacua̱xüü̃güxü̃ca̱x, yema Tupanaarü mugüpane nüxü̃ ixuxü̃rüxü̃.
Notas
^ 8:1 Setiémbre.
