Nehemías 9:1-38
9 9:1-2 Rü gumatama tauemacüarü 24 ga ngunexü̃gu rü nüma ga Iraétanüxü̃ rü nangutaque̱xegü nax aureãcüma nayumüxẽgüxü̃ca̱x. Rü nüxna nixĩgachi ga yema duü̃xü̃gü ga tama Iraétanüxü̃ ixĩgüxü̃. Rü témüxü̃ ga naxchirugu nicu̱xgü rü waixü̃müte̱xe nügüeru nagünagügü. Rü yexma nachigüãcüma Tupanamaxã nüxü̃ nixugüe ga noxrütama chixexü̃gü rü nüxna nacua̱xãchie ga norü o̱xigüarü chixexü̃gü rü ta.
2 Nüü̃ nadau 9:1
3 Rü nachicagutama nachigüãcüma tomaepü̱x ga ora ningegü ga nüxü̃ nax naxĩnüexü̃ ga Cori ya Tupanaarü mugü. Rü naétü to ga tomaepü̱x ga ora ningegü ga Tupanamaxã nüxü̃ nax yaxugüexü̃ ga norü chixexü̃gü rü Tupanaxü̃ nax yacua̱xüü̃güxü̃.
4 Rü yemawena ga yema Lebítanüxü̃ ga Yochué, rü Binuí, rü Caxmié, rü Chebanía, rü Binuí, rü Cherebía, rü Baní rü Quenáni rü yema chinagüchicagu naxĩgü rü yéma tagaãcü Cori ya Tupanamaxã nidexagü.
5 Rü ñu̱xũchi yema Lebítanüxü̃ ga Yochué, rü Caxmié, rü Baní, rü Achaxnía, rü Cherebía, rü Odía, rü Chebanía rü Petaía rü duü̃xü̃güxü̃ ñanagürügü: —¡Ẽcü, ipechigü rü ñu̱xma rü guxü̃guma nüxü̃ picua̱xüü̃gü ya Cori ya Tupana! Rü naéga rü naxüüne rü guxü̃étüwa nangẽxma. Rü ngẽmaca̱x name nixĩ i nüxü̃ ticua̱xüü̃gü —ñanagürügü.
6 Rü ñu̱xũchi ga nüma ga Édra rü nayumüxẽ rü ñanagürü: —Pa Tupanax, cuma nixĩ i Cori quixĩxü̃ rü nataxuma i to. Rü cuma nixĩ ga cunaxüxü̃ ga daxũguxü̃ i naane, rü ngẽma daxũguxü̃ i naaneétüwa ngẽxmaxü̃ rü guxü̃ma i ẽxtagü. Rü cuma nixĩ ga cunaxüxü̃ ga ñoma i naane, rü taxtügü, rü guxü̃ma i ta̱xacü i nawa ngẽxmaxü̃. Rü cuma nixĩ i maxü̃ nüxna cuxãxü̃ i guxü̃ma i ngẽma maxẽxü̃. Rü ngẽmaca̱x nixĩ i cuxü̃ yacua̱xüü̃güxü̃ ya ẽxtagü ya dauxü̃wa ngẽxmagüxü̃.
7 Pa Corix, cuma nixĩ ya Tupana ga Abráü̃xü̃ cuxunetaxü̃. Rü cuma nixĩ ga Úr ga Cadéugüarü ĩanewa ícunagaxüchixü̃, rü ñu̱xũchi Abraáü̃gu cunaxüégaxü̃.
8 Rü cuma nüxü̃ cucua̱x nax wüxi ga yatü ga aixcüma cuxü̃́ yaxõxü̃ nax yixĩxü̃. Rü wüxi ga uneta namaxã cuxü nax nataagüna tá cunaxãxü̃ ga yema naane ga nawa nayexmagüxü̃ ga Canaáü̃tanüxü̃, rü Itítanüxü̃, rü Amoréutanüxü̃, rü Ferechéutanüxü̃, rü Yebuchéutanüxü̃, rü Guerguechéutanüxü̃. Rü cuyanguxẽxẽ ga yema curü uneta, erü cuma rü guxü̃guma cuyanguxẽxẽ i ngẽma nüxü̃ quixuxü̃.
9 Cuma rü tüxü̃ cudau ga ñuxãcü ngúxü̃ nax tingegüxü̃ ga torü o̱xigü ga Equítuanewa. Rü tüxü̃ cuxĩnü ga nax taxauxexü̃ ga Már ga Dauchíüxü̃cutüwa.
10 Rü cuma rü Faraóü̃pe̱xewa rü guxü̃ma ga norü ngü̃xẽẽruü̃güpe̱xewa, rü guxü̃ma ga yema nachixü̃anecüã̱xgü ga duü̃xü̃güpe̱xewa, rü cuyaxüchigüama ga taxü̃ ga mexü̃gü ga curü üünemaxã cuxüxü̃. Yerü nüxü̃ cudau ga ñuxãcü totanüxü̃maxã chixri inacua̱xgüxü̃, rü ngẽmaca̱x cutachiga i ñu̱xmax.
11 Rü yemaca̱x torü o̱xigüpe̱xewa rü taxregu cuyayauxyexü̃chixü ga már nax paxü̃wa yachoxü̃xü̃ca̱x. Natürü yema norü uanügü rü yexma mártamagu cunayixẽxẽ, ñoma wüxi ya nuta i natü i matamaxü̃wa itáecürüxü̃.
12 Rü ñu̱xũchi wüxi ga caixanexü̃maxã nüxü̃ nüxü̃ cucua̱xẽxẽ nax nüxü̃ nacua̱xgüxü̃ca̱x ga nama ga nagu naxĩxü̃ ga ngunecü. Rü chütacü rü dauxü̃wa wüxi ga üxüema naxca̱x cungo̱xẽxẽ nax yemamaxã cuyabáixmaxü̃xü̃ca̱x nax nüxü̃ nacua̱xgüxü̃ca̱x ga nama ga nagu naxĩxü̃.
13 Yemawena rü ma̱xpǘne ga Chinaígu ícurüxĩ, rü yéma daxũguxü̃ ga naanewa namaxã quidexa, rü yéma cunana ga mugü ga aixcüma mexü̃, rü ngu̱xẽẽtaegü ga aixcüma ixĩxü̃ rü ucu̱xẽgü ga mexü̃.
14 Rü ñu̱xũchi namaxã nüxü̃ quixu nax naxauregüãxü̃ca̱x ga ngü̃xchigaarü ngunexü̃. Rü curü duü̃ ga Moichéwa namaxã nüxü̃ quixu ga mugü rü ngu̱xẽẽtaegü rü ucu̱xẽgü ga aixcüma mexü̃.
15 Rü ñu̱xũchi dauxü̃guxü̃ ga naanewa naxca̱x cunayixẽxẽ ga paũ ga maná nax yema nangõ̱xgüxü̃ca̱x. Rü nutawa naxca̱x cunagoxü̃chíüxẽxẽ ga dexá nax yemawa naxaxegüxü̃ca̱x. Rü ñu̱xũchi namaxã nüxü̃ quixu nax nagu nachocuxü̃ca̱x ga yema naane ga namaxã cuxueguxü̃.
16 Natürü ga nümagü ga tórü o̱xigü rü nügü nicua̱xüü̃gümare rü taxúega naxĩnüechaü̃ rü tama naga naxĩnüechaü̃ ga yema curü mugü.
17 Rü tama cuga naxĩnüechaü̃, rü bai ga nüxna nax nacua̱xãchiexü̃ ga yema taxü̃ ga mexü̃gü ga nape̱xewa cuxüxü̃. Rü poraãcü ínayataitüarü maxü̃neã̱xgü rü cumaxã nanue, rü yemaca̱x nagu narüxĩnüe nax norü ãẽ̱xgacüxü̃ naxunetagüxü̃ nax yemamaxã Equítuaneca̱x nawoeguxü̃ca̱x rü wenaxarü Equítutanüxü̃me̱xẽwa nayexmagüxü̃ca̱x. Natürü i cuma rü Tupana ya ngechaü̃wa̱xecü quixĩ, rü mecümacü quixĩ, rü ngüxmüwa̱xecü quixĩ rü yáxna ĩnücü quixĩ, rü tama paxa cunu rü yemaca̱x nixĩ ga tama yéma cunawogümarexü̃.
18 Rü woo taxü̃ ga chixexü̃ naxügü ga yexguma úiruwa wüxi ga wocaxacüchicüna̱xã naxügügu, rü nüxü̃ yaxugüegu nax yema yixĩxü̃ ga Equítuanewa ínanguxü̃xẽẽxü̃, natürü ga cumax, Pa Tupanax, rü tama nüxna quixũgachi.
19 Rü cuma rü poraãcü nüxü̃ cungechaü̃ rü yemaca̱x tama chianexü̃wa cunawogü. Rü yemaca̱x ga yema caixanexü̃ rü tama nüxna nixũgachi ga ngunecü nax yemawa nüxü̃ nacua̱xgüxü̃ca̱x nax ngextá ta naxĩxü̃ ga namawa. Rü woo ga chütacü rü tama nüxna nixũgachi ga yema üxüema ga dauxü̃wa naxca̱x cungo̱xẽẽxü̃ nax yema nüxü̃ ibáixmaxü̃güxü̃ca̱x nax nüxü̃ nacua̱xgüxü̃ca̱x ga nama ga nagu naxĩxü̃.
20 Rü ñu̱xũchi naxca̱x yéma cunamu ga Cuãxẽ ya Üünecü nax yaxucu̱xẽgüãxü̃ca̱x. Rü taguma nüxü̃́ nataxu ga yema paũ ga maná ga naxca̱x yéma cumugüxü̃, rü ñu̱xũchi taguma nüxü̃́ nataxu ga yema dexá ga nüxna cuxãxü̃ nax yemaacü tama yata̱xawaexü̃ca̱x.
21 Rü 40 ga taunecü õna nüxna cuxã ga yema chianexü̃wa. Rü taguma ta̱xacü nüxü̃́ nataxu, rü bai ga nax yangauxchiruxü̃ rü bai ga nax nachaecutüxü̃.
22 Rü nachixü̃anegü rü ĩanegü nüxna cuxã. Rü wüxitücumüchigü nüxü̃ cuyanu ga norü naane. Rü yemaca̱x nügüxü̃́ nanayauxgü ga ãẽ̱xgacü ga Chióü̃arü naane ga Ebóü̃, rü ãẽ̱xgacü ga Óxarü naane ga Bacháü̃.
23 Rü ñu̱xũchi namaxã cunaxuegu nax yamuxacüxü̃ca̱x ñoma ẽxtagü ya daxũwa ngẽxmagücürüxü̃. Rü nawa cunagagü ga torü o̱xigü nax napugüãxü̃ca̱x ga yema naane ga noxri norü o̱xigümaxã cuxueguxü̃ nax norü yixĩgüxü̃ca̱x.
24 Rü nüma ga torü o̱xigü rü nagu nachocu ga yema Canaáü̃ane rü nanapugü. Rü nape̱xegu cunamaachitanüxẽxẽ ga yema duü̃xü̃gü ga yema naanegu ãchiü̃güxü̃. Rü yema norü ãẽ̱xgacügü rü wüxigu namaxã ga yema duü̃xü̃gü ga yema naanewa maxẽxü̃ rü torü o̱xigüme̱xẽwa cunayexmagüxẽxẽ nax nüma nanaxwa̱xegüxü̃ namaxã naxügüxü̃ca̱x.
25 Rü yexgumarüxü̃ ta nanapuxü̃ ga guma ĩanegü ga ípoxegugüne rü yema mexü̃ ga naanegü rü ĩpatagü ga yemaxü̃gü ga imexü̃maxã ixããcugüne rü puchugü, rü úbanecügü, rü oribunecügü rü muxü̃ma ga togü ga ori̱xgünecügü. Rü meama nachibüe rü nangaxpütüwegü rü ningüe rü yemaacü nataãẽgü yerü poraãcü namaxã cumecüma.
26 Natürü naétüwa ga guxü̃ma ga yema naxca̱x cuxüxü̃ rü tama cuga naxĩnüechaü̃, rü cumaxã nanueama, rü tama naga naxĩnüe ga curü mugü. Rü nanadai ga yema curü orearü ngeruü̃gü ga naxucu̱xẽgüxü̃ nax cuxca̱x nawoeguxü̃ca̱x. Rü yemaacü poraãcü chixexü̃ cupe̱xewa naxügü.
27 Rü yemaca̱x ga cuma rü norü uanügüme̱xẽgu cunayixẽxẽ. Rü nümagü rü ngúxü̃ nüxü̃ ningexẽẽgü. Rü yemawena ga yexguma marü tama namaxã naporaegu ga yema ngúxü̃ nax yangegüxü̃, rü ngü̃xẽẽca̱x cuxna nacagü. Rü cuma nax poraãcü nüxü̃ cungechaxü̃xü̃ rü yemaca̱x nüxü̃ cuxĩnü ga daxũguxü̃ ga naanewa. Rü yemaca̱x natanüwa nüxü̃ cuxuneta ga yatügü nax norü uanügüme̱xẽwa ínanguxü̃xẽẽãxü̃ca̱x.
28 Natürü yexguma marü ínanguxü̃xgu rü wenaxarü chixexü̃ cupe̱xewa naxügü. Rü yemaca̱x wena norü uanügüme̱xẽwa cunayexmagüxẽxẽ. Rü nümagü rü ngúxü̃ nüxü̃ ningexẽẽgü. Rü yemawena rü ngü̃xẽẽca̱x cuxna nacagü. Rü cuma nax poraãcü nüxü̃ cungechaxü̃xü̃ rü yemaca̱x nüxü̃ cuxĩnü ga daxũguxü̃ ga naanewa. Rü muẽ̱xpü̱xcüna ícunanguxü̃xẽxẽ.
29 Rü cuyaxucu̱xẽgü nax wena yanguxẽẽgüãxü̃ca̱x ga curü mugü. Natürü ga nümagü rü tama inaxĩnüechaxü̃, rü tama nanayauxgüchaxü̃ ga yema curü mugü. Rü yemaacü nüxü̃ naxoe ga curü mugü i maxü̃ tüxna ãxü̃ ya yíxema naga ĩnüxe. Rü naechitamare namaxẽ rü ínayataiãchiarü maxü̃ã̱xgü rü yemaca̱x tama naga naxĩnüe i curü mugü.
30 Rü mucüma ga taunecü rü yáxna namaxã cuxĩnü ga yema torü o̱xigü. Rü Cuãxẽ ya Üünecüwa rü curü orearü uruü̃güwa cuyaxucu̱xẽgüchire̱x, natürü ga nümagü rü tama cuga naxĩnüechaü̃. Rü yemaca̱x nixĩ ga ñoma ga naanewa yexmagüxü̃ ga nachixü̃anegüme̱xẽwa cunayexmagüxẽẽxü̃.
31 Natürü yema nax cuxü̃́ nangechaü̃tümüxü̃güxü̃ca̱x rü tama noxtacüma cunadaixüchi rü tama nüxna quixũ. Erü cuma rü Tupana ya mecümaxü̃chicü rü ngechaü̃wa̱xecü quixĩ.
32 Rü ngẽmaca̱x, ¡Pa Torü Tupanax! cuma nax tacü, rü poracü, rü ãũcümacü nax quixĩxü̃ rü taguma nüxü̃ icuyarüngüma i ngẽma curü uneta rü curü ngechaü̃ toxca̱x. Rü ñu̱xma rü tama tanaxwa̱xe nax cunangupetüxẽẽmarexü̃ ga guxü̃ma ga yema ngúxü̃gü ga yangegüxü̃ ga torü ãẽ̱xgacügü, rü yema ĩanemaxã icua̱xgüxü̃, rü chacherdótegü, rü orearü uruü̃gü, rü torü o̱xigü, rü guxü̃ma ga curü duü̃xü̃gü. Yerü yexguma Achíriaanearü ãẽ̱xgacügüme̱xẽwa tayexmagügucurüwa ngúxü̃ tingegü ñu̱xmata ñaa i ngunexü̃wa nangu.
33 Natürü tama cugagu nixĩ ga yema guxchaxü̃gü ga toxü̃ ngupetüxü̃ yerü meama niwe̱x i guxü̃ma i ngẽma cuxüxü̃. Natürü toma nixĩ ga chixexü̃ taxügüxü̃.
34 Rü woo tochixü̃anearü ãẽ̱xgacügü rü togü ga yatügü ga tomaxã icua̱xgüxü̃, rü chacherdótegü, rü woo ga torü o̱xigü rü taguma nayanguxẽẽgü ga curü mugü rü taguma naga naxĩnüe ga curü ucu̱xẽgü ga namaxã nüxü̃ quixuxü̃.
35 Rü yema tochixü̃anearü ãẽ̱xgacügü ga tomaxã icua̱xgüxü̃ rü woo nüxna nax cunaxãxü̃ ga muxü̃ma ga norü yemaxü̃gü, rü woo naxme̱xwa cunayexmaxẽxẽ ga ñaa nachixü̃ane ga mea nanetü nawa yaexü̃, natürü taguma cuxü̃ nicua̱xüü̃gü, rü tama nüxü̃ narüxoechaü̃ ga nacüma ga chixexü̃gü.
36 Rü dücax, rü ñaa naane ga torü o̱xigüna cuxãxü̃ nax nangõ̱xgüãxü̃ca̱x ga nabü rü norü yemaxü̃gü ga nawa rüxügüxü̃, natürü i ñu̱xma rü ñaatama naanewa rü to i nachixü̃anecüarü mugüruxü̃ tixĩgü.
37 Rü guxãma i tomax, rü torü wocagü, rü tonetügü rü ñu̱xma rü torü chixexü̃gügagu torü uanügü i ãẽ̱xgacügüme̱xẽwa tangexmagü, rü nüma nanaxwa̱xexü̃ãcü tomaxã inacua̱x. Rü ngẽmaca̱x i ñu̱xma rü poraãcü tanaxĩ̱xãchiãẽtanü —ñanagürü ga Édra norü yumüxẽwa.
Iraétanüxü̃arü ãẽ̱xgacügü rü Tupanamaxã inaxunetagü nax norü mugüga tá naxĩnüexü̃ca̱x
38 Rü yemaca̱x ga guxãma ga toma rü Tupanamaxã nüxü̃ tixu nax aixcüma tá naga taxĩnüexü̃ ga norü mugü. Rü nape̱xewa poperagu tanaxümatü ga yema namaxã nüxü̃ tixuxü̃. Rü toma ga ãẽ̱xgacügü, rü Lebítanüxü̃, rü chacherdótegü rü toéga nagu taxümatügü nax aixcüma tá tayanguxẽẽxü̃ ga yema torü uneta.
