Abdías 1:1-21
1 Nango̱xetü ga Adía, rü Cori ya Tupana nüxü̃ nüxü̃ nacua̱xẽxẽ nax ta̱xacü tá nüxü̃ ngupetüxü̃ ga Edóü̃ane. Rü nüma ga Adía rü duü̃xü̃gümaxã nüxü̃ nixu rü ñanagürü: —Marü nüxü̃ taxĩnüe ga Cori ya Tupanaarü ore yerü guxü̃ ga nachixü̃anewa nanamu ga norü orearü uruxü̃ nax namaxã nüxü̃ yaxugüxü̃ca̱x: “¡Ngĩxã itaxĩãchi nax Edóü̃anecüã̱xmaxã yigü ida̱i̱xü̃ca̱x!” —ñanagürü.
2 Rü nüma ya Tupana rü Edóü̃anecüã̱xgüxü̃ ñanagürü: —Tá pexü̃ chaxãneexẽxẽ nape̱xewa i ngẽma togü i nachixü̃anegü rü taxuwatáma pexü̃ chamexẽxẽ.
3 Rü pemax, Pa Edóü̃anecüã̱xgüx, rü pegütama pewomüxẽxẽ, erü perü poramaxã pegü picua̱xüxü̃. Pema rü ínanutaanexü̃wa pengẽxmagü i ma̱xpǘneanewa. Rü ngẽmaca̱x nagu perüxĩnüe rü taxúetama pexü̃ tarüporamae.
4 Natürü woo ñoma ĩyürüxü̃ daxũwaxü̃chi pengẽxmagügu rü ma̱xpǘnetape̱xegu pexãchiü̃gu ñoma ĩyürüxü̃, rü ngéma tá pexü̃ charüyi̱xẽxẽ —ñanagürü ga Cori ya Tupana.
5 Rü nüma ya Cori ya Tupana rü ñanagürü: —Ngẽxguma ngẽma ngĩ́ta̱xagüxü̃ rü chütacü curü ngẽmaxü̃ca̱x nangĩ̱xgügu, rü taxũchima guxü̃ma i curü ngẽmaxü̃güca̱x nangĩ̱xgü. Rü ngẽxguma cuanewa nangugügu i úbaarü oarü buxruü̃gü nax nabugüãxü̃ca̱x i curü úbaarü o rü tá ñuxretama i curü úbaarü oxya̱xa cuanewa nayaxüxẽẽgü. Natürü ngẽma curü uanügü rü ngẽxguma cuxca̱x íyaxüãchigu rü taxúexü̃táma ngéma nayaxüxẽxẽ.
6 ¡Dücax, nüxü̃ nadau i ñu̱xma nax guxü̃ma i curü ngẽmaxü̃güca̱x cuxü̃́ nangĩ̱xgüxü̃, Pa Edóü̃anecüã̱xgüx i Echaútanüxü̃x! Rü cuxü̃́ naxca̱x nangĩ̱xgü i guxü̃ma i curü ngẽmaxü̃gü.
7 Rü guxü̃ma ga yema nachixü̃anegü ga cuxü̃ ípoxü̃güchiréxü̃, rü ñu̱xma rü curü naanewa cuxü̃ ínata̱xüchigü. Rü woo ngẽma cumücügüxüchi ixĩgüxü̃ rü cumaxã narüxuanügü. Rü ngẽma cumücügü i nagu cuyaxõxü̃ rü guxchaxü̃ cuxca̱x ínanguxẽxẽ. ¡Pa Edóü̃x, cuma rü tama cua̱x cuxü̃́ nangẽxma! —ñanagürü ga Tupana.
8 Rü nüma ya Cori ya Tupana rü ñanagürü ta: —Rü ngẽma ngunexü̃ i nagu tá chanapoxcuxü̃ i Edóü̃anecüã̱xgü rü choma rü tá chanadai i norü duü̃xü̃gü i nüxü̃ icua̱xüchixü̃. Rü nüxna tá chanayaxu i norü cua̱x i ngẽma duü̃xü̃gü i Echaúarü ma̱xpǘanewa ngẽxmagüxü̃.
9 Rü ĩane ya Temáü̃arü churaragü rü norü muü̃maxã tá nidu̱xrue. Rü Echaúarü máxpü̱xanexü̃wa rü guxü̃táma nayue rü taxũtáma maxü̃xü̃ i duü̃xü̃gü ínayaxü.
Nagagutama chixexü̃gu nayi ga Edóü̃tanüxü̃
10 Rü pemax, Pa Edóü̃anecüã̱xgüx, chixri namaxã pechopetü ga petanüxü̃ ga Acóbutanüxü̃ rü penadai. Rü ngẽmaca̱x tá pexü̃ chaxãneexẽxẽ rü tá pexü̃ chadaixüchi.
11 Rü yexguma yema Iraétanüxü̃arü uanügüarü churaragü Yerucharéü̃arü poxeguxü̃arü ĩã̱xgu pogüegu, rü nachocuxgu nax nadeaxü̃ca̱x ga norü yemaxü̃gü, rü pemax, Pa Edóü̃cüã̱xgüx, rü yéma nüxü̃ perüdaunümare. Rü yexguma norü uanügü nügümaxã yatoyegu ga yema Iraétanüxü̃arü yemaxü̃gü ga nadexü̃ rü pema rü ta yema uanügütanüwa peyexmagü.
12 Rü yema ngunexü̃ ga guxchaxü̃ nüxü̃ ngupetüxü̃gu ga peenexẽgü ga Acóbutanüxü̃, rü pemax, Pa Echaútanüxü̃, rü taxũchima name ga namaxã petaãẽgüama ga yema nüxü̃ ngupetüxü̃. Rü yema ngunexü̃ ga guxchaxü̃wa nagu nayexmagüxü̃gu ga Yudáanecüã̱xgü, rü taxũchima name ga pemax petaãẽgüama namaxã ga yema nüxü̃ ngupetüxü̃. Rü yexguma ngúxü̃wa nayexmagügu rü pema rü taxũchima name ga nüxü̃ pecugüeama.
13 Rü pema rü taxũchima name ga nagu pechocu ga chorü ĩane ga Yerucharéü̃ ga yexguma guxchaxü̃wa nayexmayane. Rü taxũchima name ga petaãẽgüama namaxã ga yema guxchaxü̃gü ga nüxü̃ ngupetüxü̃. Rü taxũchima name ga naxca̱x pengĩ́e ga norü yemaxü̃gü ga yexguma guxchaxü̃wa nayexmayane.
14 Rü yema ngunexü̃ ga nagu ngúxü̃ íyangegüxü̃gu rü pema rü taxũchima name ga yema namagü ga nügüwa ídapetüxü̃wa tüxü̃ penanguxẽxẽ nax tüxü̃ pedaixü̃ca̱x ga guxema ibuxmüxẽ. Rü yema ngunexü̃ ga nagu ngúxü̃ tingegüxü̃ ga guxema tümaarü uanügücha̱xwa ĩgüxe rü pema rü taxũchima name ga tüxü̃ ípeyauxü̃ nax nüxna tüxü̃ pemugüxü̃ca̱x ga tümaarü uanügü.
15 Rü yema chixexü̃ ga petanüxü̃ ga Iraétanüxü̃ca̱x pexüxü̃ rü ngẽmatátama pemaxã nangupetü. Erü ngẽma nixĩ i perü natanü naxca̱x ga yema chixexü̃ ga pexüxü̃. Rü marü ningaica i ngẽma ngunexü̃ i nagu Cori ya Tupana tá napoxcuexü̃ i guxü̃ma i nachixü̃anegü —ñanagürü.
16 Rü ñanagürü ta: —Pema, Pa Iraétanüxü̃x, rü chorü ma̱xpǘne ga chopata nawa yexmanewa rü poraãcü ngúxü̃ pingegü. Rü ngẽxgumarüxü̃ tá ta i ngẽma to i nachixü̃anegü rü ngúxü̃ ningegü rü ngẽmaãcü tá inayarüxogü. Rü ñoma taguma ñoma i naanewa nax nangóexü̃rüxü̃ tá nixĩgü.
17 Natürü Chióü̃arü ma̱xpǘne ya chopata nawa yexmane rü wüxi i nachica i üünexü̃ nixĩ. Rü ngéma tá naxĩ i duü̃xü̃gü nax ngẽma ãũcümaxü̃wa yabuxmüxü̃ca̱x. Rü ngẽma Acóbutanüxü̃ rü wena táxarü nanayauxgü i norü naanegü.
18 Rü ngẽma Acóbutaagü rü Yúchetaagü rü ñoma üxü rü üxüemarüxü̃ tá nixĩgü. Rü ngẽma Echaútaagü rü ñoma maxẽ ya pacürüxü̃ tá nixĩgü, rü tá ínanagu. Rü taxũtáma i Echaútaxa namaxü̃. Rü choma ya Cori ya Tupana rü marü ngẽmaãcü namaxã chanaxuegu —ñanagürü.
Iraétanüxü̃ rü wena tá nachixü̃aneca̱x nawoegu
19 Rü ngẽma Iraétanüxü̃ i Négueanewa ngẽxmagüxü̃ rü tá Echaútanüxü̃arü máxpü̱xanexü̃gu nachocu. Rü ngẽma Iraétanüxü̃ i doxonexü̃wa ngẽxmagüxü̃ rü tá Firitéugüarü naanegu nachocu. Rü nagu tá ta nachocu i ngẽma Efraíü̃tanüxü̃arü naane rü Chamáriaarü naane. Rü ngẽma Bẽyamíü̃tanüxü̃ rü nügüaxü̃́ tá nanayauxgü i Garaáxane.
20 Rü ngẽma muxũchixü̃ i Iraétanüxü̃ ga to ga nachixü̃anewa gagüxü̃ rü tá nanayauxgü i Cananéugüarü naane rü ñu̱xmatáta ĩane ya Charétawa nangu. Rü ngẽma duü̃xü̃gü ga Yerucharéü̃wa ínagaxü̃güxü̃ rü ĩane ga Cheparáwa nagagüxü̃ rü noxrügü tá nixĩ ya yima ĩanegü ya Négueanewa ngẽxmagüne.
21 Rü ngẽma Iraétanüxü̃ ga norü uanügüxü̃ rüporamaegüxü̃ rü tá naxca̱x nawoegu ya yima ma̱xpǘne ya Chióü̃ nax ngéma namaxã inacua̱xgüxü̃ca̱x i ngẽma máxpü̱xanexü̃ i Echaútanüxü̃arü ixĩxü̃. Rü nüma ya Cori ya Tupana tá nixĩ i guxü̃arü ãẽ̱xgacü yixĩxü̃.
