Rut 1:1-22
1 1:1-2 Rü yexguma Iraéanecüã̱xgümaxã inacua̱xgügu ga yema ãẽ̱xgacügü ga guxchaxü̃güarü mexẽẽruü̃gü ga Tupana nüxü̃ unetaxü̃, rü ínangu ga taxü̃ ga taiya ga guxü̃ma ga yema naanewa. Rü yexgumaü̃cüxü rü Yudáanewa nayexma ga wüxi ga yatü ga Erimeréxgu ãégacü ga Beréü̃arü ĩanegu ãchiü̃cü. Rü nüma ga Erimeréx rü naxma̱x ga Noemímaxã rü nanegü ga Maróü̃ rü Querióü̃maxã Beréü̃wa inaxĩãchi nax Moáanewa naxĩxü̃ca̱x. Rü nümagü rü Efrátacüã̱x nixĩgü yerü Efráta nixĩ ga to ga naéga ga Beréü̃. Rü Moáanewa nangugü rü yexma nayaxãchiü̃gü.
2 Nüü̃ nadau 1:1
3 Natürü nüma ga Erimeréx ga Noemí ngĩte rü yexma Moáanegu nayayu. Rü ngĩma ga nama̱x ga Noemí rü ngĩxicatama yéma iyaxǘ namaxã ga taxre ga ngĩne.
4 1:4-5 Rü yixcüamaxü̃rachigü rü nümagü ga yema taxre ga ngextü̱xücü rü Moáanecüã̱x ga ngexü̃gümaxã nixãxma̱x. Rü wüxi rü Órfa nixĩ ga ngĩéga, rü yema nai rü Rux nixĩ ga ngĩéga. Natürü yexguma 10 ga taunecü ngupetü̱xguwena, rü nayue ta ga Maróü̃ rü Querióü̃. Rü ngĩma ga Noemí rü ngĩxica yéma ita̱x, yerü marü nataxuma ga gumá ngĩnegü rü ngĩte.
5 Nüü̃ nadau 1:4
Beréü̃wa ixĩ ga Noemí rü Rux
6 Rü wüxi ga ngunexü̃gu ga Noemí ga yexguma Moáanewa nayexmayane, rü nüxü̃ ixĩnü ga guma ngĩrü ĩane ga Beréü̃wa rü marü nax nataxuxü̃ma ga taiya, yerü Tupana rü namaxã nixãũãchi.
7 Rü yemaca̱x nagu irüxĩnü ga Yudáarü naaneca̱x nax nataeguxü̃. Rü ngĩma rü ngĩnea̱xgümaxã nawa íchoxü̃ ga yema nachica ga nagu naxãchiü̃chiréxü̃ ga Moáanewa nax ngĩchiü̃ane ga Yudáanewa naxũxü̃ca̱x.
8 1:8-9 Natürü ga namawa rü ngĩnea̱xgüxü̃ ngĩgürügü: —¡Ẽcü pewoegu rü peéxü̃tawa pexĩ! ¡Rü Cori ya Tupana guxü̃guma mea pexü̃ ngechaü̃ yema choxü̃ rü chaunegüxü̃ mea pengechaxü̃xü̃rüxü̃, rü pexü̃́ natauxchaxẽẽã nax wena mea pixãtegüxü̃, rü ngẽmaãcü petaãẽgüxü̃ca̱x! —ngĩgürügü. Rü ñu̱xmachi ga Noemí rü wüxi ga chúxumaxã ngĩnea̱xgüxü̃ irümoxẽ. Natürü ga ngĩma ga ngĩnea̱xgü rü ixauxeama.
9 Nüü̃ nadau 1:8
10 Rü ngĩgürügügü: —Tama. Rü toma rü tá cuchixü̃anewa cuwe tarüxĩama —ngĩgürügügü.
11 Rü ngĩma ga Noemí rü ngĩgürügüchigüama: —¡Pewoegu, Pa Chauxacügüx! ¿Ta̱xacüwa chi chowe perüxĩxü̃? Choma rü marü tagutáma wena chaxãxacü nax wena chaunemaxã pixãtexü̃ca̱x.
12 1:12-13 ¡Ẽcü pechiü̃ca̱x pewoegu! Choma rü marü chaya rü ngẽmaca̱x taxũtáma wena chaxãte. Rü woo chi ñomachitama i chütaxü̃gu chaxãtegu rü chingĩxgu rü choxü̃́ nangẽxmagu ya chaunegü ¿rü pema rü chi ípenanguxẽxẽgüxü̃ ñu̱xmachita nayae nax namaxã pingĩgüxü̃ca̱x? Rü ngẽma nax ípenanguxuxẽẽxü̃gagu rü taguchima pixãtegü. Rü dücax, rü taxucürüwama nixĩ, Pa Chauxacügüx. Rü Cori ya Tupana rü ngúxü̃ choxü̃ ningexẽxẽ, natürü yexera chi changechaü̃, rü ngúxü̃ chinge ega chi pexü̃ chada̱u̱xgu nax ngúxü̃ pingegüxü̃ i pemax —ngĩgürügü.
13 Nüü̃ nadau 1:12
14 Rü ngĩma ga ngĩnea̱xgü rü wenaxarü ixauxe. Rü düxwa ga Órfa rü ngĩ̱xẽxü̃ irümoxẽ wüxi ga chúxumaxã, rü ngĩchiü̃ca̱x itaegu. Natürü ga Rux rü ngĩ̱xẽxü̃tagutama irüxã̱ũ̱x.
15 Rü yexguma ga Noemí rü Ruxü̃ ngĩgürügü: —Dücax i ngẽma nai i chauneã̱x rü ngĩchiü̃ca̱x rü ngĩrü tupanagüca̱x itaegu. ¡Ẽcü ngĩwe rüxũ! —ngĩgürügü.
16 Natürü ngĩma ga Rux rü ngĩxü̃ ingãxü̃ga rü ngĩgürügü: —¡Taxṹ i choxü̃ cuca̱a̱xü̃xü̃ nax cuxna chixũgachixü̃ca̱x, rü cuxna chataeguxü̃ca̱x! Erü ngextá ícuxũxü̃wa rü ngéma tá chaxũ, rü ngextá ícupexü̃wa rü ngẽxma tá chape. Curü ĩane rü chorü ĩane tá nixĩ, rü yimá curü Tupana, rü chorü Tupana tá nixĩ.
17 Rü ngexta icuyuxü̃gu rü ngẽxma tá chayu, rü ngẽxma tá chata̱x. Rü Cori ya Tupana choxü̃ poxcu ega tauta chayuyane cuxna chixũgachigu, erü yuxicatama nixĩ i yigüna tüxü̃ ixĩgachixẽẽxü̃ —ngĩgürügü.
18 Rü yexguma Noemí nüxü̃ cua̱xgu ga Rux rü aixcüma ngĩwe nax naxũxchaü̃xü̃, rü marü tama yemamaxã ngĩxü̃ ichixewe.
19 Rü yemaacü ga yema taxre rü ngĩgümaxã namagu ixĩ, rü ñu̱xmata Beréü̃wa nangugü. Rü yexguma Beréü̃gu nachocuxgu, rü guxü̃ma ga yema duü̃xü̃gü rü naba̱i̱xãchiãẽgü. Rü yema ĩanecüã̱x ga ngexü̃gü rü ngĩgürügügü: —¿Tama ẽ̱xna ñaa iyixĩ i Noemí? —ngĩgürügügü.
20 Natürü ga ngĩma rü inangãxü̃ rü ngĩgürügü: —¡Taxṹ i Noemí ñaperügü choxü̃! Rü name nixĩ i Mára ñapegürü choxü̃. Erü Tupana ya Guxãétüwa Ngẽxmacü rü taxü̃ i guxchaxü̃ choxna naxã.*
21 Ããcume̱xẽãcüma nua íchaxũxũ, rü ngeãcume̱xẽãcüma chataegu, erü ngẽmaãcü nanaxwa̱xe ya Cori ya Tupana. ¿Rü tü̱xcüü̃ Noemímaxã choxü̃ pixu, ega ngẽxguma Cori ya Tupana ya Guxü̃xü̃ma Cuácü choxü̃ poxcuxgu rü ngechaü̃ choxna ãxgu? —ngĩgürügü.
22 Rü yemaacü nixĩ ga Noemí ga Moáanewa nataeguxü̃ ngĩmaxã ga ngĩnea̱x ga Rux ga Moáanecüã̱x ixĩcü. Rü chebádaarü buxuwa nangu ga yexguma Beréü̃wa nangugügu.
Notas
^ 1:20 Ngẽma naéga i Noemí rü “taãẽcü” ñaxü̃chiga nixĩ, natürü ngẽma naéga i Mára rü “taguma taãẽcü” ñaxü̃chiga nixĩ.
