Rut 3:1-18
3 Rü wüxi ga ngunexü̃gu ga Noemí rü Ruxü̃ ngĩgürügü: —Pa Chauxacüx, choma rü tá cuxü̃́ naxca̱x chadau ya wüxi ya cute ya taãxẽ tá cuxna ãcü.
2 Rü dücax, rü yimá tatanüxü̃ ya Boó ya naxü̃tawa cupuracücü, rü ñoma i chütaxü̃gu rü tá naanewa naxũ nax ngéma chebáda íyabuxuchita̱xexü̃ca̱x.
3 Rü ñu̱xma rü chanaxwa̱xe i cunaxü i ngẽma tá cumaxã nüxü̃ chixuxü̃. ¡Rü naxaiya rü cugü napumaraxü̃ne rü nagu icu̱x i ngẽma cuxchiru i rümemaexü̃, rü ngéma naanewa naxũ! ¡Natürü taxũtáma cugü nüxü̃ cucua̱xẽxẽ nax texé quixĩxü̃ naxü̃pa nax yanguxü̃ nax nachibüxü̃ rü naxaxexü̃ i nüma i Boó!
4 ¡Rü mea nangugü nax ngexta yixĩxü̃ i naca̱xaxü̃ nax napexü̃ca̱x! ¡Rü ngẽma ínacaxü̃wa naxũ rü ínangegücutü rü ngẽxma naca nacutüguama! Rü nümatátama nixĩ cumaxã nüxü̃ yaxuxü̃ nax ta̱xacü tá cuxüxü̃ —ngĩgürügü.
5 Rü ngĩma ga Rux rü Noemíxü̃ ingãxü̃ rü ngĩgürügü: —Marü tá chanaxü i guxü̃ma i ngẽma chomaxã nüxü̃ quixuxü̃ —ngĩgürügü.
6 Rü ngĩma ga Rux rü naanewa ixũ, rü inaxü ga guxü̃ma ga yema ngĩ̱xẽ ngĩmaxã nüxü̃ ixuxü̃.
7 Rü yexguma marü chibüwa yanguxgu ga Boó, rü inachi rü nataãxẽ rü ñu̱xũchi yexma ãũxchitaxü̃ ga chebádaxü̃tagu nayaca nax yexma napexü̃ca̱x. Rü yixcamaxü̃ra rü ngĩma ga Rux rü bexma naxca̱x iyaxũ rü íinangegücutü rü yexma ica.
8 Rü nüma ga Boó rü ngürüãchi ngãxü̃cüxü pewa naba̱i̱xãchi. Rü yexguma nangüeguxgu rü ngĩmaxã nayarüña. Rü nüxü̃ nicua̱xãchi ga wüxi ga nge nacutüwaama yexmaxü̃.
9 Rü ngĩxna naca rü ñanagürü: —¿Texé quixĩ i cumax? —ñanagürü. Rü ngĩma rü inangãxü̃ rü ngĩgürügü: —Choma nixĩ i Rux, rü cuma nixĩ i chautanüxü̃xüchi quixĩxü̃. Rü ngẽmaca̱x cugu nangu nax cuxma̱xü̃ choxü̃ quixĩxẽẽxü̃ ngẽma Tupanaarü mugü nüxü̃ ixuxü̃rüxü̃ —ngĩgürügü.
10 Rü yexguma ga nüma ga Boó rü ñanagürü: —¡Cori ya Tupana cuxü̃ rüngü̃xẽxẽ! Rü ñu̱xmawaxix nixĩ i mea cunango̱xẽẽxü̃ nax aixcüma nüxü̃ cungechaü̃xü̃ ga gumá cute ga marü yucü, erü choxü̃ cuyaxu cutexü̃ i choma i cutetanüxü̃ nax chixĩxü̃. Rü tama naxca̱x cudau ya wüxi ya cute ya choxü̃ rüngextü̱xümaecü ya diẽruã́cü, rü woo tama diẽruã́cü.
11 ¡Rü taxṹ i cumuü̃xü̃, Pa Chauxacüx! Erü guxü̃ma i duü̃xü̃gü i daa chorü ĩanecüã̱x rü marü nüxü̃ nacua̱xgü rü cuma rü wüxi i nge i mecü nax quixĩxü̃. Rü ngẽmaca̱x i choma rü tá chanaxü i ngẽma choxna naxca̱x cucaxü̃.
12 Natürü nangẽxma i wüxi i guxchaxü̃. Rü aixcüma nixĩ i cutanüxü̃ chixĩxü̃ i chomax, natürü nangẽxma i to i chorü yexera cutanüxü̃xü̃chi ixĩxü̃.
13 ¡Ẽcü nuxã rüxã̱ũ̱x i ñoma i chütaxü̃gu! Rü moxü̃ pa̱xmama rü tá ngẽma to i cutanüxü̃maxã chidexa rü aixcüma cumaxã naxãxma̱xchaü̃. Rü ngẽxguma nanaxwa̱xegu nax cumaxã naxãmaxü̃ rü marü name nax ngẽmaãcü yixĩxü̃, erü nüma rü chorü yexera cutanüxü̃xü̃chi nixĩ. Natürü ngẽxguma tama nanaxwa̱xegu, rü Tupanaégagu cumaxã nüxü̃ chixu nax choma tá cumaxã chaxãmaxü̃. ¡Ẽcü nape rü nuxã ingunexü̃! —ñanagürü.
14 Rü ngĩma ga Rux rü yexma ipe, rü Boócutüguama ica rü yexma iyangunexü̃. Rü moxü̃ãcü taxũtáma yangóonexü̃chigu rü írüda yerü yema ñanagürü ngĩxü̃ ga Boó: —Tama chanaxwa̱xe nax texé nüxü̃ nacuáxü̃ i nua chauanewa nax cuxũxü̃ i chebáda íyabuxuchita̱xegüxü̃wa —ñanagürü.
15 Rü yexguma marü inaxũãchichaü̃gu ga Rux, rü nüma ga Boó rü ñanagürü ngĩxü̃: —¡Ẽcü ínacuxuchi i ngẽma curü deyuchiru rü mea nüxü̃ ingĩ! —ñanagürü. Rü ngĩma ga Rux rü mea nüxü̃ iyangĩ ga yema ngĩrü deyuchiru, rü nüma ga Boó rü yema ngĩrü deyuchirugu ngĩxü̃́ nanagü ga 40 quíru naguxü̃ ga chebáda. Rü ñu̱xũchi ngĩxü̃ narüngü̃xẽxẽ ga ngĩãtügu nax naxünagüpüü̃ãxü̃. Rü ngĩma rü yemamaxã ĩaneca̱x itaegu.
16 Rü yexguma ngĩ̱xẽxü̃tawa nanguxgu ga Rux, rü ngĩ̱xẽ ngĩxna taca rü ngĩgürügü: —¿Ñuxãcü cuxü̃ nangupetüxü̃, Pa Chauxacüx? —ngĩgürügü. Rü ngĩma ga Rux rü nüxü̃ iyaxu ga guxü̃ma ga ñuxãcü ngĩxü̃ nax nangü̃xẽẽxü̃ ga gumá Boó.
17 Rü ñu̱xũchi ngĩgürügü ta: —Rü choxna nanaxã i guxü̃ma i ñaa chebáda, rü ñu̱xũchi choxü̃ ñanagürü: “Tama name i ngeãcume̱xẽãcüma cu̱xẽca̱x cutaegu”, ñanagürü —ngĩgürügü.
18 Rü yexguma ga ngĩma ga Noemí rü ngĩgürügü: —Ñu̱xma Pa Chauxacüx, rü name nixĩ i mea ícunangu̱xẽxẽ nax ñuxãcü tá nangupetüxü̃ i ngẽma cumaxã nüxü̃ yaxuxü̃. Erü nüma ya Boó rü taxũtáma nanangexrü ega tama namexẽẽãgu i ngẽma cumaxã nüxü̃ yaxuxü̃. Rü nüma rü ñu̱xmatatama nixĩ i namexẽẽãxü̃ —ngĩgürügü.
