Rut 4:1-22
4 Rü nüma ga Boó rü guma ĩanearü ücuchicawa nayarüto yerü yéma nixĩ ga guxü̃ma ga duü̃xü̃gü nachopetüxü̃ rü namexẽẽãxü̃ ga norü guxchaxü̃gü. Rü yexguma yéma natoyane rü yéma naxüpetü ga gumá natanücü ga Boó Ruxmaxã nüxü̃ yaxucü. Rü nüma ga Boó rü naxca̱x naca rü ñanagürü nüxü̃: —Dücax, ¡nua chauxü̃tawa naxũ rü írüto, rü paxaãchi tá tidexagü! —ñanagürü. Rü nüma ga yema natanücü rü yéma naxũ, rü naxü̃tawa nayarüto.
2 Rü nüma ga Boó rü naxca̱x naca ga 10 ga ãẽ̱xgacügü ga guma ĩanecüã̱x ixĩgüxü̃, rü yemagü rü ta ínanatogüxẽxẽ nax nümagü rü ta ĩnütanüxü̃ yixĩgüxü̃ca̱x.
3 Rü nüma ga Boó rü gumá natanücüxü̃ ñanagürü: —Ngẽma Noemí ga Moáanewa taegucü rü namaxã itaxechaü̃ i ngĩrü naane ga gumá tatanücü ga Erimérexarü ixĩxü̃.
4 Rü cumaxã nüxü̃ chixu nax nüxü̃ cucuáxü̃ca̱x i ngẽmachiga. Rü ngẽxguma cuxü̃́ nangúchaü̃gu nax naxca̱x cutaxexü̃ rü name nixĩ i ñu̱xmatama naxca̱x cutaxe nape̱xewa i ñaa ãẽ̱xgacügü i ĩnüetanüxü̃ruxü̃ ixĩgüxü̃. Erü cuma nixĩ i chorü yexera natanücü quixĩxü̃ ya Erimeré, rü ngẽmaca̱x cuxna naxǘ nax naxca̱x cutaxexü̃ i ngẽma naane. Natürü ngẽxguma cuma tama naxca̱x cutaxegu, rü ¡chomaxã nüxü̃ ixu! Erü choma nixĩ i cuweama chaxüxü̃ nax choxna naxüxü̃ i ngẽma naane —ñanagürü. Rü yexguma nüma ga gumá natanücü rü nanangãxü̃ rü ñanagürü: —Ngẽmáacüx, naxca̱x chataxe tá —ñanagürü.
5 Rü yexguma ga Boó rü ñanagürü: —Rü ngẽxguma Noemíxü̃tawa naxca̱x cutaxegu i ngẽma naane rü cuxna naxǘ ta nax Ruxmaxã cuxãmaxü̃, nax ngẽmaãcü naxãxacüxü̃ca̱x, rü yimá ngĩne rü tauxeta i ngĩtechicüxü nüxna naxüxü̃ca̱x i ngẽma naane —ñanagürü.
6 Rü yemaxü̃ naxĩnügu ga gumá natanücü rü nanangãxü̃ rü ñanagürü: —Ega ngẽmaãcü yixĩxgu, rü taxuacüma naxca̱x chataxe, erü chi ngẽxguma naxca̱x chataxegu rü ngẽma choxna üxü̃ i naane rü chi ta ngĩnena naxüe. Rü aixcüma cumaxã nüxü̃ chixu rü ¡cuma naxca̱x nataxe! —ñanagürü.
7 Rü woetama nũxcüma nixĩ ga Iraétanüxü̃ rü yexguma ta̱xacü ga nüxna üxü̃ natanüxü̃na naxãxgu, rü ínacua̱xichi ga wüxicutü ga norü chapatu rü yema to ga natanüxü̃na nanaxã. Rü yemawa nixĩ ga duü̃xü̃güxü̃ nüxü̃ nacua̱xẽẽxü̃ ga aixcüma nügüna nax naxãgüãxü̃.
8 Rü yemaca̱x ga nüma ga Boótanücü rü ínacua̱xichi ga wüxicutü ga norü chapatu rü Boóna nanaxã rü ñanagürü nüxü̃: —¡Cuma naxca̱x nataxe i ngẽma naane! —ñanagürü.
9 Rü yexguma nüma ga Boó rü ñanagürü nüxü̃ ga yema ãẽ̱xgacügü ga ĩnüetanüxü̃ruxü̃ ixĩgüxü̃, rü yema togü ga yéma irüdaunüxü̃: —Guxãma i pemax i ñu̱xma nua rüdaunüxe, rü pema nixĩ i nüxü̃ pexĩnüexü̃ nax choma ngĩxü̃ naxca̱x chataxexü̃ i Noemí i ngẽma naane ga Erimérexarü, rü Querióü̃arü, rü Maróü̃arü ixĩxü̃.
10 Rü ngẽxgumarüxü̃ ta nüxü̃ pexĩnüe nax ngĩxü̃ chayaxuxü̃ i ngẽma yutecü i Moáanecüã̱x i Rux nax ngẽmaãcü naxãxacüxü̃ca̱x rü yimá ngĩne rü gumá tauxeta ngĩte ga Maróü̃chicüxü nüxna naxüxü̃ca̱x i ngẽma naane —ñanagürü.
11 Rü nüma ga yema ãẽ̱xgacügü rü guxü̃ma ga yema duü̃xü̃gü ga yéma irüdaunüxü̃ rü nanangãxü̃ga rü ñanagürügü: —Aixcüma toma nixĩ i nua itarüdaunüxü̃ rü itarüxĩnüexü̃. Rü nüma ya Tupana i ñu̱xma cuxna imucü i ñaa nge, rü tanaxwa̱xe i ngĩxü̃ narüngü̃xẽxẽ nax naxãxacüxü̃ca̱x ngĩxrüxü̃ ga Raqué rü Léa ga ngĩwa ne ixĩcü i guxãma i yixema i Iraétanüxü̃. Rü cumax, Pa Boóx ¡rü Tupana cuxü̃ rüngü̃xẽxẽ nax wüxi ya yatü ya duü̃xü̃güpe̱xewa mecü quixĩxü̃ i nua Beréü̃wa i Efrátawa!
12 ¡Rü Cori ya Tupana cuxna namugü i muxü̃ i cunegü ngĩwa i ñaa nge, rü yamu i cutanüxü̃ yexgumarüxü̃ ga nax yamuxü̃ ga nanegü ga gumá Fáre ga Yudá nane ixĩcü ga Tamárawáü̃cü! —ñanagürügü.
13 Rü yemaacü nixĩ ga Boó rü Ruxmaxã naxãmaxü̃. Rü Tupana rü ngĩxna nanamu ga wüxi ga ngĩne.
14 Rü yexguma ga yema ngexü̃gü ga guma ĩanecüã̱x rü Noemíxü̃ ngĩgürügügü: —Namecümaxüchi nixĩ ya Tupana erü marü cuxü̃́ nanangexmaxẽxẽ ya daa cutaxa. Rü chierüx natachigagu i Iraéanecüã̱xgütanüwa.
15 Rü nüma tá nixĩ i cuxü̃ nataãẽxẽẽxü̃ rü cuxna nadauxü̃ i ngẽxguma cuya̱xgu, erü ngẽma cuneã̱x i cuxü̃ nangechaü̃xü̃chicü ngĩne nixĩ. Rü ngĩma rü cuxü̃́ ime i norü yexera ya 7 ya cunegü ega chi ngẽxgumaepü̱x cuxü̃́ ngẽxmagu —ngĩgürügügü.
16 Rü ngĩma ga Noemí rü tüxü̃ iyaxu rü tüxü̃ iyaxẽxẽ ga guxema ngĩtaxa.
17 Rü yemaxü̃ nadaugügu ga yema togü ga ngexü̃gü ga ngĩrü ngaicamagu ãchiü̃güxü̃ rü ngĩgürügü: —Wüxi ya ngĩtaxa ngĩxü̃́ nabu i Noemí —ngĩgürügügü. Rü Obéxgu inaxüégagü. Rü gumá Obéx nixĩ ga Ichaxí nanatü rü ãẽ̱xgacü ga Dabíarü o̱xi ixĩcü.
Ãẽ̱xgacü ga Dabíarü o̱xigüchiga
18 4:18-22 Ñaa o̱xigü nixĩ ga Boóarü o̱xigü ixĩgüxü̃: Rü Fáre rü Eróü̃ nanatü tixĩ, rü Eróü̃ rü Ráü̃ nanatü tixĩ. Rü Ráü̃ rü Aminadá nanatü tixĩ, rü Aminadá rü Nachóü̃ nanatü tixĩ. Rü Nachóü̃ rü Chamóü̃ nanatü tixĩ, rü Chamóü̃ rü Boó nanatü tixĩ. Rü Boó rü Obéx nanatü tixĩ, rü gumá Obéx rü Ichaxí nanatü tixĩ, rü nüma ga Ichaxí rü Dabí nanatü tixĩ.
19 Nüü̃ nadau 4:18
20 Nüü̃ nadau 4:18
21 Nüü̃ nadau 4:18
22 Nüü̃ nadau 4:18
