Salmos 10:1-18
Yumüxẽ i nawa Tupanaarü ngü̃xẽxẽca̱x íca̱xaxü̃
10 Pa Cori Pa Tupanax ¿Tü̱xcüü̃ choxna cuyáxü̃gu? ¿Rü tü̱xcüü̃ iquicu̱x ega guxchaxü̃wa changexmagu?
2 Erü ngẽma chixexü̃gu maxü̃xü̃ rü nügü írütaxü̃ rü norü numaxã tüxü̃ nachixewe ya yíxema taxucürüwa tügü ípoxü̃xẽ. Natürü nüma i ngẽma chixexü̃gu maxü̃xü̃ tátama nagu nangu ya yima yüta ya toguxeca̱x naxüxü̃ne.
3 Rü ngẽma chixexü̃ i duü̃xü̃ rü norü ngẽmaxü̃gümaxã nügü nicua̱xüxü̃. Rü ngẽma duü̃xü̃ i nügüna nanuxũchixü̃ i diẽru, rü Cori ya Tupanaxü̃ naxo.
4 Rü ngẽma yatü i chixexü̃ rü nügü nicua̱xüxü̃ rü ñanagürü: —Nataxuma ya Tupana. Rü taxúetama choxna taca nachiga i ngẽma chaxüxü̃ —ñanagürü. Rü ngẽmaguxicatama narüxĩnü.
5 10:5-6 Rü ngẽma naxüxü̃wa rü guxü̃guma mea nüxü̃́ ínanguxuchi. Rü nüma rü nüxü̃ naxo i curü mugü, Pa Tupanax. Rü nagu naxĩnügu rü tagutáma cunapoxcu. Rü norü uanügüxü̃ nacugü, rü nagu narüxĩnü nax taxúetama nüxü̃ rüporamaexü̃ rü tagutáma guxchaxü̃ nüxü̃́ ngẽxmaxü̃.
6 Nüü̃ nadau 10:5
7 Rü naã̱xwa ínaxũxũ i chixexü̃ i dexa, rü doraxü̃ nixu, rü naguxchigawa̱xe. Rü ngẽxguma yadexaxgu rü mexü̃ i oregu nayacu̱x i ngẽma chixexü̃ i nagu naxĩnüxü̃, rü ngẽmaãcü tüxü̃ nawomüxẽxẽ ya duẽxẽgü.
8 Rü chütacü rü ĩanexacügü i ẽanexü̃gu tüxü̃ ínicu̱xéxü̃ rü ngẽxma tüxü̃ nima̱x ya yíxema tümaechita ngéma üpetüxe. Rü guxü̃guma bexma tüxü̃ ínidawenüchigüxü̃ ya yíxema turaxe i taxucürüwama tügü ípoxü̃xẽ.
9 Rü ñoma leóü̃ i naxmaxü̃wa naeü̃ca̱x idawenüxü̃rüxü̃ nügü nixĩxẽxẽ i ngẽma yatü i chixexü̃. Rü ngéma iyacúxü̃wa tüxü̃ nananguxẽxẽ ya yíxema turaxe nax ngẽmaãcü tüxü̃ yayaxuxü̃ca̱x. Rü ngẽxguma tüxü̃ yayaxu̱xgu rü marü taxucürüwama nüxna tiña.
10 Rü ñoma leóü̃ i yauxexü̃chaü̃xü̃rüxü̃ nixĩ nax tüxü̃ yayaxuxü̃ca̱x ya yíxema turaxe. Rü norü poramaxã tüxü̃ narüyexera rü ngẽmaãcü naxme̱xgu tangu.
11 Rü ngẽma yatü i chixexü̃ rü nagu narüxĩnü nax nüma ya Tupana rü marü nüxü̃ yanangümaxü̃ rü nügü yadüxchiwexü̃ nax tama nüxü̃ nadauxü̃ca̱x i ngẽma chixexü̃ i naxüxü̃ i ngẽma duü̃xü̃.
12 ¡Inachi Pa Cori Pa Tupanax, rü napoxcu i ngẽma chixexü̃ üxü̃! ¡Rü taxṹ i tüxü̃ curüngü̃maxü̃ ya yíxema naxĩ̱xãchiãẽgüxe!
13 ¿Rü tü̱xcüü̃, Pa Tupanax, cuxü̃ nacugü i ngẽma chixexü̃ i duü̃xü̃ i nagu rüxĩnüxü̃ rü tagutáma nüxna cuca nachiga i ngẽma chixexü̃ i naxüxü̃?
14 Pa Corix, cumatama marü nüxü̃ cudau i ngẽma taxü̃ i chixexü̃ i naxügüxü̃, rü name i cunapoxcu naxca̱x i ngẽma ngúxü̃ nax duü̃xẽgüxü̃ yangexẽẽgüxü̃. Rü yíxema turaexe rü curü ngü̃xẽẽca̱x nixĩ i tadaugüxü̃, erü cuma nixĩ i tümaarü poxü̃ruxü̃ quixĩxü̃. Rü cuma nixĩ i tüxü̃ curüngü̃xẽẽxü̃ ya yíxema taxcutagü.
15 ¡Rü iyanaxoxẽxẽ i norü pora i ngẽma chixexü̃gü! ¡Rü nüxna naca nachiga i norü chixexü̃gü, rü bai tá i wüxi i nüxü̃ cuxüpetümarexü̃!
16 Rü nüma ya Cori ya Tupana nixĩ i ãẽ̱xgacü yixĩxü̃ i guxü̃guma. Rü ngẽma duü̃xü̃gü i tama Tupanaxü̃ cua̱xgüxü̃, rü Tupanaarü naanewa tá ínawoxü̃.
17 Pa Corix, cuma rü nüxü̃ cuxĩnü i tümaarü yumüxẽ ya yíxema tama tügü icua̱xüxü̃güxe. Rü cuma rü tüxü̃ cutaãẽgüxẽxẽ rü tüxü̃ curüngü̃xẽxẽ.
18 ¡Rü ẽcü tümaétüwa nachogü ya yíxema taxcutagü rü yíxema togüme̱xẽwa ngẽxmagüxe rü chixri tümamaxã inacua̱xgüxe! Rü ngẽma yatü i waixü̃müwa cuxüxü̃, rü tama tanaxwa̱xe nax wena muü̃ ínanguxẽẽxü̃.
