Salmos 104:1-35
104 Rü guxü̃ma i chorü ĩnümaxã tá nüxü̃ chicua̱xüxü̃ ya Cori ya Tupana. Erü cumax, Pa Cori Pa Chorü Tupanax, rü guxü̃étüwa cungexma rü cuxüüne rü cunangóonexẽxẽ.
2 Rü cuma rü curü ngóonexü̃arü ngãxü̃wa cungexma. Rü cuma rü cuyangeechi ga daxũguxü̃ ga naane ñoma wüxi i tüeruxü̃ ingeechixü̃rüxü̃.
3 Rü dexáétüwa cungexma rü ngẽxma dauxü̃gu cuxãchiü̃. Rü ngẽma caixanexü̃ rü cuwexü̃xü̃ cuyaxĩxẽxẽ. Rü yimá buanecü nixĩ ya nagu quixũcü.
4 Rü yimá buanecü nixĩ i yangegücü i cuga. Rü ngẽma üxüema nixĩ i naxüxü̃ i curü ngúchaü̃.
5 Rü cuma rü wüxitama ga namaxü̃gu cunaxǘ ga ñoma ga naane nax tama ngéma yaxũgachixü̃ca̱x.
6 Rü noxriarü ügügu rü yema már ga mátamaxü̃ rü waixü̃müétügu nixü rü woo ga guma ma̱xpǘnegü rü naétügu nixü.
7 Natürü ga cuma rü cunamu ga yema dexá ga már ixĩxü̃ nax wüxiwa naxũxü̃ca̱x. Rü yexguma nüxü̃ naxĩnügu ga cuga ga ñoma duruanexü̃rüxü̃ ixĩxü̃ rü paxa wüxiwa naxũxü̃chíxü.
8 Rü nangóe ga guma ma̱xpǘnegü rü ngatexü̃gü yerü ga yema dexá rü wüxiwa naxũxü̃chíxü. Rü yemaacü ga yema dexá rü yema nachica ga namaxã nüxü̃ cuxunetaxü̃wa naxũ.
9 Rü yema namaxã cuxunetaxü̃gu narüxüãchi ga yema dexá nax tama wenaxarü waixü̃müétügu yaxüxü̃ca̱x.
10 Rü ngẽma bairawegüarü dexá rü natügü i ma̱xpǘneanewa ne dagüxü̃wa cunamugü.
11 Rü ngẽma dexáwa naxaxegü i guxü̃ma i naeü̃gü. Rü ngẽmawa naxaxegü i ngẽma búrugü i naixnecücüã̱x.
12 Rü natücutügügu nixüachiaü̃ i ngẽma werigü. Rü ngéma naxae natanüwa ya yima naigü.
13 Rü cuma rü yea dauxü̃wa ícungexmaxü̃wa cunamu ya pucü nax ma̱xpǘneétügügu napuxü̃ca̱x. Rü yimá pucümaxã cuyawaimüanexẽxẽ i ñoma i naane.
14 Rü ngẽmaãcü cunaxügüxẽxẽ ya maxẽ naxca̱x i naxü̃nagü. Rü ngẽxgumarüxü̃ ta cunaxügüxẽxẽ i nanetügü i ñu̱xma duü̃xü̃gü namaxã toegüxü̃ nax ngẽmaãcü nüxü̃́ nangẽxmaxü̃ca̱x i nabü i ngṍxü̃.
15 Rü ngẽmaãcü duü̃xü̃güna cunaxã i norü poraxẽẽruxü̃ i paũ rü norü taãẽxẽẽruxü̃ i bínu rü norü mexẽẽruxü̃ i chíxü̃.
16 Rü ngẽma naigü rü ngẽma dexáwa naxaxegü. Rü woo ya yima ocayiwagü ya taxü̃ne ya Cori ya Tupana Líbanuanegu togüne rü ngẽma dexáwa naxaxegü.
17 Rü yima ocayiwagu nixüxchiãü̃ i ngẽma werigü i íxraxü̃. Rü yima pínutanüwa namaxẽ i cówagü.
18 Rü ma̱xpǘneanewa nangẽxmagü i ngẽma naeü̃gü i naixnecücüã̱x. Rü ngẽma ma̱xpǘnearü ãxmaxü̃wa namaxẽ i ngẽma chigugü rü ngagü.
19 Rü yimá tauemacü rü cunango̱xẽxẽ nax yimawa nangugüxü̃ca̱x i ngunexü̃gü. Rü yimá üa̱xcü rü nüxü̃ nacua̱x i norü ora i nagu yanaxücuxü̃.
20 Rü cuma rü cunaxẽanexẽxẽ i ngẽxguma nachütagu. Rü ngẽxguma i ngẽma naeü̃gü rü naixnecüwa ínachoxü̃.
21 Rü ngẽma leóü̃gü rü nawemüca̱x ngéma naxae. Rü ngẽmaãcü Tupanana nacagüe nax norü õna nüxna naxãxü̃ca̱x.
22 Natürü i ngẽxguma yangunegu rü üa̱xcü ibáxigu rü naxmaxü̃wa naxĩ rü ngéma nayapee.
23 Rü ngẽxguma i nüma i duü̃xü̃gü rü norü puracüwa naxĩ. Rü napuracüe ñu̱xmata nachüta.
24 Rü namuxũchi i ngẽma cuxüxü̃, Pa Corix. Rü guxü̃ma i ngẽma cuxüxü̃ rü namexẽchi erü cumatama curü cua̱xmaxã cunaxü. Rü guxü̃ma i ngẽma cuxüxü̃ rü namaxã nanapá i ñoma i naane.
25 ¡Rü dücax i ngẽma már! Rü natacutüxüchi, rü nama̱xüchi rü nawa namaxẽ i naguxü̃raü̃xü̃ i choxnigü rü naeü̃gü i taxü̃ rü ixíraxü̃.
26 Rü ngẽmagu narüxĩĩxü̃ ya wapurugü ya taxüchine. Rü ngẽmawa nangẽxma i ngẽma Leviatáü̃ i taxüchixü̃ i cumatama cuxüxü̃ nax curü ĩnüca̱xwa̱xeruxü̃ yixĩxü̃ca̱x.
27 Rü guxü̃ma i ngẽma cuxüxü̃ rü cuxü̃ ínanangu̱xẽẽgü nax cuma cunachibüexẽẽxü̃ca̱x i ngẽxguma nataiyaegu.
28 Rü cuma rü nüxna cunaxã rü nümagü rü nanayauxgü. Rü mea cunaxüwemü rü nümagü rü mea nachibüe.
29 Natürü ngẽxguma ícunawogügu rü nümagü rü nanaxĩ̱xãchiãẽgü. Rü ngẽxguma nüxna cunayaxu̱xgu ya buanecü rü nayue rü wenaxarü waixü̃müxü̃ nixĩgü.
30 Natürü ngẽxguma nüxna cuxãxgu i maxü̃ rü nimu rü ngẽmaãcü cuyangexwaca̱xü̃chigüxẽxẽ i guxü̃ma i ngẽma ñoma i naanewa maxẽxü̃.
31 Rü ngẽma Cori ya Tupanaarü üüne rü taguma inayacua̱x. Rü nüma rü poraãcü nataãxẽ namaxã i ngẽma nüma naxüxü̃.
32 Rü ñoma i naane rü nidu̱xru i ngẽxguma nüma nüxü̃ nadawenügu. Rü ngẽxguma yima ma̱xpǘnegüxü̃ yangógügu rü nicaixquegü.
33 Rü choma rü ñu̱xma nax chamaxü̃xü̃ rü tá chorü Cori ya Tupanaca̱x chawiyae.
34 Rü chierüx Cori namaxã taãẽgu i ngẽma nagu charüxĩnüxü̃. Erü naxü̃taguxica nixĩ i nüxü̃ ichayangauxü̃ i chorü taãxẽ.
35 ¡Rü noxtacüma iyanaxo i ngẽma duü̃xü̃gü i chixexü̃gu maxẽxü̃ i ñoma i naanewa! Rü name nixĩ i nataxuma i ngẽma duü̃xü̃gü i chixexü̃ ügüxü̃. Rü guxü̃ma i chauãẽmaxã rü tá nüxü̃ chicua̱xüxü̃ ya Cori ya Tupana. Rü name i Cori ya Tupanaxü̃ ticua̱xüü̃gü.
