Salmos 105:1-45
105 ¡Moxẽ nüxna pexãgü ya Cori ya Tupana! ¡Rü guxü̃wama nüxü̃ pixuchiga! ¡Rü guxü̃ma i duü̃xü̃gümaxã nüxü̃ pixu i ngẽma mexü̃gü i pexca̱x naxüxü̃!
2 ¡Rü perü wiyaegümaxã nüxü̃ picua̱xüü̃gü! ¡Rü pegümaxã nüxü̃ pixu i ngẽma taxü̃ i mexü̃gü i naxüxü̃!
3 ¡Rü pegü namaxã picua̱xüü̃gü ya yimá üünecü! Rü pema nax naxca̱x pedaugüxü̃ ¡rü petaãẽgü!
4 ¡Rü naxca̱x pexĩ ya Corix ya Tupana, rü norü poraca̱x pedaugü! ¡Rü guxü̃guma norü ngü̃xẽẽca̱x pedaugü!
5 105:5-6 ¡Rü nüxna pecua̱xãchie ga yema mexü̃gü ga taxü̃gü ga norü poramaxã naxüxü̃ rü ngẽma norü mugü ga pemaxã nüxü̃ yaxuxü̃ i pema nax Tupanaarü duü̃ ya Abraáü̃taagü pixĩgüxü̃ rü Acóbutaagü ya Tupana pexü̃ unetagüxe pixĩgüxü̃!
6 Nüü̃ nadau 105:5
7 Rü nüma nixĩ i Cori ya tórü Tupana yixĩxü̃. Rü nüma nixĩ i ñoma i naanemaxã inacuáxü̃.
8 105:8-10 Rü woo chi 1,000 i natücumü i tataagü ngupetügu, rü nüma ya Tupana rü tagutáma nüxü̃ inayarüngüma i norü uneta ga noxri Abraáü̃maxã nüxü̃ yaxuxü̃, rü nawena nane ga Ichaámaxã nüxü̃ yaxuxü̃, rü yemawena Acóbumaxã rü ta nüxü̃ yaxuxü̃ nax guxü̃gutáma nüxü̃ nangü̃xẽẽxü̃ i nataagü i Iraétanüxü̃.
9 Nüü̃ nadau 105:8
10 Nüü̃ nadau 105:8
11 Rü yemaca̱x Acóbumaxã nüxü̃ nixu rü ñanagürü: —Choma rü tá cuxna chanaxã i guxü̃ma i ñaa Canaáü̃ane nax guxü̃gutáma cuxrü rü cutaagüarü yixĩxü̃ca̱x —ñanagürü.
12 105:12-15 Rü nümagü ga tórü o̱xigü rü woo noxretama nixĩgü ga noxri rü tóxnamanacüã̱x nixĩgü, rü woo ñuxre ga nachixü̃anegüwa nichopetüetanü, rü ñuxre ga ãẽ̱xgacügüme̱xẽwa íninguxü̃etanü nax ñaa naanewa nangugüxü̃ca̱x, natürü nüma ga Tupana rü tama nanaxwa̱xe nax texé chixri namaxã icuáxü̃. Rü yemaca̱x yema ãẽ̱xgacügü ga naxme̱xwa nayexmagüxü̃maxã nüxü̃ nixu rü ñanagürü nüxü̃: —Tama chanaxwa̱xe i ngẽma choma nüxü̃ chaxunetaxü̃ i duü̃xü̃gü rü chixri namaxã ipecua̱x. Rü ngẽma chorü orearü uruü̃gü rü tama chanaxwa̱xe i ngúxü̃ nüxü̃ pingexẽẽgü —ñanagürü.
13 Nüü̃ nadau 105:12
14 Nüü̃ nadau 105:12
15 Nüü̃ nadau 105:12
16 Rü nüma ga Tupana rü yema naanewa nanangebüanexẽxẽ rü yemaca̱x ínangu ga taxü̃ ga taiya.
17 Natürü Tupana rü naxü̃pa Equítuanewa nanamu ga Yúche. Rü guma nixĩ ga naenexẽgü namaxã taxecü nax togüme̱xẽwa nayexmaxü̃ca̱x ga Equítuanewa.
18 Rü poxcupataü̃gu nanapoxcu. Rü fieruwa nayachotanaxãgü rü cadénamaxã nayachotaparagü, rü yemaacü nanapi̱xcutü.
19 Rü yemaacü Tupana Yúchexü̃ naxü rü ñu̱xmata yangu ga yema ore ga Yúche nüxü̃ ixuxü̃.
20 Rü yemawena ga Equítuanecüã̱xarü ãẽ̱xgacü ga muxü̃ma ga duü̃xü̃gümaxã icuácü rü nanamu nax Yúchexü̃ poxcupataü̃wa ínanguxuchigüxẽẽxü̃ca̱x.
21 Rü nüma ga ãẽ̱xgacü rü nüxü̃ naxuneta nax norü ngü̃xẽẽruxü̃ yixĩxü̃ca̱x. Rü naxme̱xgu nanaxǘ ga guxü̃ma ga napata rü guxü̃ma ga norü yemaxü̃gü nax nüma namaxã inacuáxü̃ca̱x.
22 Rü nüma ga ãẽ̱xgacü rü guxü̃ma ga norü ngü̃xẽẽruü̃güétüwa rü norü ucu̱xẽruü̃güétüwa nanaxǘxẽxẽ ga Yúche nax nüma namaxã inacuáxü̃ca̱x rü nangúexẽẽãxü̃ca̱x nax cua̱x nüxü̃́ yexmagüxü̃ca̱x.
23 Rü yemawena rü Equítuanewa nangu ga Acóbu ga Tupana Iraégu naxüégacü. Rü yexma Equítuanegu naxãchiü̃. Rü yemaacü Canaáü̃anewa nayexma, natürü guxü̃guma nagu narüxĩnü nax noxrütama naaneca̱x nawoeguxü̃ ga nataagü.
24 Rü Tupana rü nayamuxẽxẽ ga yema norü duü̃xü̃gü rü düxwa Equítuanecüã̱xgüarü yexera narüporamaegü.
25 Rü yemawena ga Tupana rü yema Equítuanecüã̱xgüna naxĩnü nax yema Tupanaarü duü̃xü̃güchi naxaiexü̃ca̱x. Rü yemaca̱x ga Equítuanecüã̱xgü nagu narüxĩnüe nax ñuxãcü naxüaxü̃ nax tama timuxü̃ca̱x ga guxema Tupanaarü duü̃xü̃gü.
26 Rü yemawena ga Tupana rü nanamu ga norü duü̃ ga Moiché rü naenexẽ ga Aróü̃ ga nümatama ga Tupana nüxü̃ unetacü.
27 Rü nümagü ga Moiché rü Aróü̃ rü Tupanaarü poramaxã ínananguxẽxẽgü ga cua̱xruü̃gü ga ãũcümaxü̃ ga Equítuanewa.
28 Rü nüma ga Tupana rü guxü̃wama ga Equítuanewa ínananguxẽxẽ ga ẽanexü̃. Natürü yema Equítuanecüã̱xgü rü tama naga naxĩnüe.
29 Rü nagüxü̃ nayangucuchixẽxẽ ga natügüarü dexá rü yemaca̱x nayue ga choxni.
30 Rü cururugü yema nachixü̃anewa ínangugüxẽxẽ. Rü woo ãẽ̱xgacüarü pechicaxü̃gu rü naxĩgü.
31 Rü Tupana rü nanamu ga muxũchixü̃ ga murenügü rü naxchigü. Rü guxü̃ma ga Equítuane rü namaxã nanapá.
32 Rü pucüchicüxü yema nachixü̃aneétügu nanayixẽxẽ ga gáuxü̃. Rü ãẽmacü inaxüxẽxẽ.
33 Rü yemaacü nanachixexẽxẽ ga norü úbanecügü rü norü igunecügü. Rü guxü̃wama nanabüü̃tanüxẽxẽ ga norü naigü ga Equítuanewa.
34 Rü Tupana naxca̱x naca ga muxũchixü̃ ga munügü. Rü taxucürüwa texé tayaxugü ga norü mu.
35 Rü nayawaatü ga nanetügü ga naanegüwa yexmagüxü̃ rü guxü̃ma ga yema nachixü̃anewa rüxügüxü̃.
36 Rü yemawena rü wüxichigü ga Equítuanecüã̱xpatawa rü nanadai ga nüxíraxü̃xü̃ ga nane.
37 Rü yemaacü ga Tupana rü Equítuanewa ínanagaxü̃ ga norü duü̃xü̃gü. Rü nayana ga taxü̃ ga úiru rü diẽrumügü. Rü taxuxü̃ma nida̱xawee ga norü duü̃xü̃gü rü taxuxü̃ma natura.
38 Rü nümagü ga Equítuanecüã̱xgü rü nataãẽgü ga yexguma nüxü̃ nadaugügu ga nax inaxĩãchixü̃, yerü poraãcü naxcha̱xwa namuü̃e.
39 Rü Tupana rü naétüwa nanayexmaxẽxẽ ga wüxi ga caixanexü̃ nax yema yadüxétüxü̃ca̱x naxcha̱xwa ya üa̱xcüema. Rü chütacü rü wüxi ga üxüemamaxã nanangóonetanüxẽxẽ.
40 Rü yexguma namachica̱x ínacagügu, rü nüma ga Tupana rü ngugagü naxca̱x ínayachoõchixẽxẽ. Rü paũ ga dauxü̃wa nanachibüexẽxẽ. Rü yemaacü meama nüxü̃́ ningugü.
41 Rü yexguma Tupana nuta nangǘxtexẽẽgu rü taxü̃ ga dexá yéma nayagoxü̃chixü. Rü yema dexá rü ñoma wüxi ga natürüxü̃ ínachianexü̃wa naya̱x.
42 Rü yemaacü aixcüma nayanguxẽxẽ ga yema norü uneta ga üünexü̃ ga nũxcüma norü duü̃ ga Abraáü̃maxã nüxü̃ yaxuxü̃.
43 Rü yemaacü nixĩ ga Tupana ga Equítuanewa ínagaxü̃ ga norü duü̃xü̃gü ga nüma nüxü̃ naxunetaxü̃. Rü yexguma ínagaxü̃ãgu rü poraãcü nataãẽgü.
44 Rü togü ga duü̃xü̃güarü naane nüxna naxã. Rü nabü ga togüarü puracüwa ne ũxü̃maxã nanachibüexẽxẽ.
45 Rü yemaacü Tupana nüxü̃ narüngü̃xẽxẽ ga yema duü̃xü̃gü yerü nanaxwa̱xe nax nagu namaxẽxü̃ ga norü mugü rü nagu naxĩxü̃ ga norü ngu̱xẽẽtae ga nüma namaxã nüxü̃ yaxuxü̃. Rü name i Cori ya Tupanaxü̃ ticua̱xüü̃gü.
