Salmos 106:1-48
106 Name i Cori ya Tupanaxü̃ ticua̱xüü̃gü. ¡Rü moxẽ nüxna pexã! Erü nüma rü namecüma rü ngẽma norü ngechaü̃ rü taguma inayacua̱x.
2 ¿Rü texé nüxü̃ tacua̱x nax nüxü̃ tixuxü̃ i guxü̃ma i ngẽma nüma norü poramaxã naxüxü̃? ¿Rü texé nüxü̃ tacua̱x nax nüma nanaxwa̱xexü̃ãcüma nüxü̃ ticua̱xüxü̃?
3 Rü tataãxẽgü ya yíxema aixcüma mexü̃gu rüxĩnüexe rü naxügüxe i ngẽma aixcüma we̱xguxü̃.
4 106:4-5 ¡Choxna nacua̱xãchi, Pa Corix, i ngẽxguma nüxü̃ curüngü̃xẽxẽgu i curü duü̃xü̃gü! Rü ngẽxguma núma cuxũxgu nax ícunanguxü̃xẽẽxü̃ca̱x ¡rü choxü̃ rü ta natanüwa nangẽxmaxẽxẽ nax ngẽmaãcü nüxü̃ chadauxü̃ca̱x i norü taãxẽ i ngẽma curü duü̃xü̃gü i cuma quidexechixü̃, rü ngẽmaãcü choma rü ta wüxigu curü duü̃xü̃gümaxã chataãẽxü̃ca̱x!
5 Nüü̃ nadau 106:4
6 Rü toma rü cupe̱xewa poraãcü chixexü̃ taxü torü o̱xigürüü̃tama. Rü nüxna ítachocu i curü mugü nax tóxrütama ngúchaü̃ i chixexü̃gu tamaxẽxü̃ca̱x.
7 Rü nüma ga torü o̱xigü rü tama aixcüma nagu narüxĩnüe ga yema taxü̃gü ga mexü̃gü ga curü poramaxã cuxüxü̃. Rü nüxü̃ inayarüngümae nax cuma rü nüxü̃ cungechaü̃xü̃. Rü yema Már ga Dauchíüxü̃cutüwa rü cumaxã nayanue.
8 Natürü nüma ga Tupana rü Equítuanecüã̱xarü ãẽ̱xgacüme̱xẽwa ínananguxü̃xẽẽama yerü taxucürüwama inayanaxoxẽxẽ ga norü uneta ga marü Abraáü̃maxã nüxü̃ yaxuxü̃.
9 Rü nüma ga Tupana rü yema Már ga Dauchíüxü̃xü̃ namu nax yapayexü̃ca̱x. Rü ñoma wüxi i naxnecü i paxü̃rüxü̃ nixĩ. Rü yemawa nayachoü̃xẽxẽ ga tórü o̱xigü.
10 Rü yemaacü nixĩ ga norü uanügü ga naxchi aiexü̃me̱xẽwa ínanguxü̃xẽẽãxü̃.
11 Rü yexguma tórü o̱xigüwe yachoü̃gu ga tümaarü uanügü rü nüma ga dexá rü naétüwa naya̱x. Rü guxü̃ma ga tümaarü uanügü rü yexma nayue rü bai ga wüxi ga maxü̃xü̃ ga íyaxüxü̃.
12 Rü yexgumama ga tórü o̱xigü rü düxwa nayaxõgü ga Tupanaarü unetagü rü norü wiyaegümaxã nüxü̃ nicua̱xüü̃gü.
13 Natürü paxãma nüxü̃ inayarüngümaexü̃ ga yema taxü̃ ga mexü̃gü ga Tupana naxca̱x üxü̃. Rü tama ínanangu̱xẽẽgü ga yema Tupana nagu rüxĩnüxü̃.
14 Rü yema ínachianexü̃wa rü Tupanaxü̃ naxügü ga tórü o̱xigü. Rü naxca̱x ínacagü nax Tupana paxa nüxü̃́ naxüxü̃ca̱x ga yema nümatama ga duü̃xü̃gü nagu rüxĩnüexü̃.
15 Rü nüma ga Tupana rü naga naxĩnü, rü nanaxü ga yema naxca̱x ínacagüxü̃. Natürü yemawena rü naxca̱x ínananguxẽxẽ ga da̱xaweane ga namaxã nayuexü̃.
16 Rü yéma ínapegüxü̃wa rü yema duü̃xü̃gü rü tama gumá Moichéga rü gumá Tupana nüxü̃ unetacü ga Aróü̃ga naxĩnüechaü̃ yerü naxca̱x nixãũxãchie nax norü ãẽ̱xgacü yixĩgüxü̃.
17 Rü yemaca̱x Tupana nanapoxcue. Rü naxca̱x nayange̱xẽxẽ ga naane rü yemagu nayicu ga Datáü̃ rü Abiráü̃ namaxã ga namücügü.
18 Rü yema namücügü ga tama Tupanaga ĩnüexü̃ rü Tupana naxca̱x yéma nanamu ga üxüema nax yemamaxã yaxaexü̃ca̱x ga yema chixexü̃ ügüxü̃.
19 Rü guma ma̱xpǘne ga Oréxwa rü nüma ga Iraétanüxü̃ nanaxügü ga wüxi ga wocaxacüchicüna̱xã ga úirunaxca̱x. Rü yemaxü̃ nicua̱xüü̃gü.
20 Rü yemaacü Tupana ya Üünecüxü̃ naxüchicüxügü namaxã ga wüxi ga woca i maxẽ i ngṍxü̃chicüna̱xã.
21 106:21-22 Rü nüxü̃ inayarüngümae ga Tupana ga norü poxü̃ruxü̃ ixĩcü ga naxücü ga taxü̃ ga guxchaxü̃gü ga Equítuanewa rü baixãchixẽẽruü̃gü ga Cáü̃chixü̃anewa rü ãũcümaxü̃ ga Már ga Dauchíüxü̃wa.
22 Nüü̃ nadau 106:21
23 Rü nüma ga Tupana rü nüxü̃ nixu rü tá nanadai ga yema duü̃xü̃gü. Natürü ga nüma ga Moiché rü naétüwa nachogüama rü yemaca̱x narüngüxmü ga Tupana rü tama nanadai.
24 Rü yemawena rü nüxü̃ naxoe ga yema naane ga mexẽchixü̃ yerü tama nayaxõgü ga yema Tupanaarü uneta.
25 Rü nachĩü̃wachigü rü chixri Cori ya Tupanachiga nidexagü rü tama naga naxĩnüe ga yema norü mugü.
26 Rü yemaca̱x ga nüma ga Cori ya Tupana rü namaxã nanaxuegu rü tá nadaiaxü̃ yema ínachianexü̃gu.
27 Rü yexgumarüxü̃ ta ga nataagümaxã rü nanaxuegu rü tá nadaiaxü̃ rü to ga nachixü̃anegü ga tama nüxü̃́ yaxõgüxü̃gu nawooneãxü̃.
28 Rü yema tórü o̱xigü rü tupananeta ga Baá-peúme̱xẽwa nügü nayexmagüxẽxẽ. Rü nanangõ̱xgü ga õna ga yema norü tupananetachicüna̱xãgü i ngearü maxü̃ã́xü̃ca̱x nada̱i̱xü̃.
29 Rü yemaacü norü chixexü̃gümaxã Tupanaxü̃ nanuxẽẽgü. Rü yemaca̱x ga nüma ga Tupana rü natanüwa ínananguxẽxẽ ga da̱xaweane ga nawa iyuxü̃.
30 Natürü nüma ga chacherdóte ga Fineéx rü inaxũãchi rü nayama̱x ga yema duü̃xü̃ ga chixexü̃ üxü̃. Rü yexguma ínayachaxãchi ga yema da̱xaweane.
31 Rü yema Fineéx üxü̃ rü Tupanape̱xewa name, rü name nax guxü̃guma wüxichigü i papa nanegümaxã nüxü̃ yaxuxü̃.
32 106:32-33 Rü yema tórü o̱xigü rü Meribáwa rü ta Tupanaxü̃ nanuxẽẽgü ga yexguma Moichéxü̃ nachixewegügu nax dexá nüxna naxãxü̃ca̱x. Rü yema duü̃xü̃gügagu guxchaxü̃ Moichéxü̃ nangupetü. Yerü düxwa Moichéxü̃ nanuxẽẽgü rü yemaca̱x naechita chixri nidexa.
33 Nüü̃ nadau 106:32
34 Rü yema tórü o̱xigü rü tama nanadai ga yema Canaáü̃cüã̱x ga Tupana namaxã nüxü̃ ixuxü̃ nax nadaiaxü̃ca̱x.
35 Natürü namaxã naxãmücügüama, rü namaxã nixãtegü, rü namaxã naxãxma̱xgü ga yema duü̃xü̃gü ga tama Tupanaaxü̃́ yaxõgüxü̃. Rü nacümagü ga chixexü̃güca̱x nangúe.
36 Rü yema duü̃xü̃güarü tupananetachicüna̱xãgüxü̃ nicua̱xüü̃gü rü yemagagu chixexü̃gu nayi.
37 Rü tüxü̃ inamugü ga naxacüxegü nax yema ngo̱xogüca̱x tüxü̃ ínaguxü̃ca̱x.
38 Rü yemaacü yema Canaáü̃anearü tupananetagüca̱x tüxü̃ nadai ga guxema nanegü rü naxacüxegü ga taxuxü̃ma ga chixexü̃ ügüxe. Rü ñoma ga naane rü guma tümagümaxã naxãũãchi.
39 Rü yemaacü ga yema duü̃xü̃gü rü Tupanape̱xewa yexeraxü̃ ga chixexü̃ naxügü ga yexguma yema tupananetagüwe naxĩxgu.
40 Rü nüma ga Tupana rü poraãcü namaxã nanu ga yema norü duü̃xü̃gü. Rü yemaca̱x noxtacüma nüxü̃ naxo.
41 Rü yema uanügü ga tama yaxõgüxü̃na nanawogü nax yema namaxã icua̱xgüxü̃ca̱x.
42 Rü yema norü uanügü rü nüxü̃ narüporamae rü chixri namaxã inacua̱xgü.
43 Rü nüma ga Tupana rü muẽ̱xpü̱xcünama ínananguxü̃xẽxẽ. Natürü ga nümagü rü tama nüxü̃́ inarüxĩnüechaü̃ ga yema Tupana nagu rüxĩnüxü̃, rü norü chixexü̃ nüxü̃ narüyexera.
44 106:44-45 Natürü yexguma Tupana nüxü̃ ĩnügu ga norü axu rü nüxü̃ nada̱u̱xgu nax taxü̃ ga guxchaxü̃wa nayexmagüxü̃, rü nüma ga Tupana rü nüxna nacua̱xãchi ga norü uneta ga namaxã nüxü̃ yaxuxü̃. Rü yemaca̱x nüxü̃́ nangechaü̃tümüxü̃ erü nataxüchi i norü ngechaü̃.
45 Nüü̃ nadau 106:44
46 Rü yema norü duü̃xü̃güarü uanügüãẽwa ínananguxẽxẽ nax mea namaxã inacua̱xgüxü̃ca̱x.
47 Pa Cori Pa Torü Tupanax ¡toxü̃ rüngü̃xẽxẽ rü toxü̃ ínanguxü̃xẽxẽ naxme̱xwa i ngẽma to i nachixü̃anegü nax ngẽmaãcü nüxü̃ ticua̱xüü̃güxü̃ca̱x i cuéga i üünexü̃! Erü tanaxwa̱xe i taãẽãcüma cuxü̃ ticua̱xüü̃gü.
48 ¡Guxü̃guma namexẽchi ya yimá tórü Cori ya Iraétanüxü̃arü Tupana! Rü name nixĩ i guxü̃ma i duü̃xü̃gü rü ñanagürügü: —Ngẽmaãcü yixĩ —ñanagürügü. ¡Rü ngĩxã tórü Cori ya Tupanaxü̃ ticua̱xüü̃gü!
