Salmos 109:1-31
109 Pa Tupanax ¡taxṹ i choxü̃́ nüxü̃ cuxoxü̃ i chorü yumüxẽ!
2 Erü duü̃xü̃gü i chixexü̃gu maxẽxü̃ i dorata̱a̱xgüxü̃ rü chauchiga nidexagü. Rü wüxi i doramare nixĩ i ngẽma chauchiga i nüxü̃ yaxugüxü̃.
3 Rü chauxchi naxaieãcüma nidexagü. Rü natüca̱xmamare chixexü̃ chauchiga nixugü.
4 Rü ngẽma chorü ngechaü̃ i ngẽma duü̃xü̃güca̱x ichaxãxü̃ rü chixexü̃maxã choxü̃́ nanaxütanügü. Natürü i chomax rü naxca̱x chayumüxẽama.
5 Rü ngẽma mexü̃ i naxca̱x chaxüxü̃ rü chixexü̃maxã nanatáeguxẽẽgü. Rü choma nüxü̃ changechaü̃yane rü chauxchi naxaie.
6 Pa Tupanax ¡ñu̱xma rü ngẽma chixexü̃ üxü̃ca̱x nüxü̃ naxuneta i wüxi i ãẽ̱xgacü i chixecüma nax ngẽma nüxna ca̱xaxü̃ca̱x i norü chixexü̃chiga! ¡Rü ngẽxgumarüxü̃ ta nüxü̃ naxuneta i wüxi i norü uaxü̃ruxü̃ i naxca̱x íca̱xaxü̃ nax napoxcuxü̃ca̱x!
7 Rü ngẽxguma ãẽ̱xgacü nüxna caxgux i norü chixexü̃chiga rü name nixĩ i noxtacüma poxcu namaxã naxueguxü̃. Rü ngẽxguma nügüca̱x ínaca̱xgu nax tama napoxcuxü̃ca̱x rü name nixĩ i noxtacüma yexeraãcü nanapoxcuama.
8 ¡Rü nanuxẽxẽ i norü maxü̃ rü noxtacüma nayu̱x nax ngẽmaãcü togü noxtacüma nayaxuxü̃ca̱x i norü puracü!
9 Rü ngẽmaãcü i naxacügü rü noxtacüma nataxcue tixĩ rü naxma̱x rü noxtacüma yutexe tixĩ.
10 Rü ngẽmaãcü i naxacügü rü nu ne nanaxĩmare rü íxraxü̃ i diẽruca̱x naca̱a̱xü̃wa̱xegü. ¡Rü noxtacüma nawa ínawoxü̃ ya yima napatachicawa!
11 ¡Rü guxü̃ma i ngẽma norü ngẽmaxü̃gü, rü ngẽma diẽru naxü̃tawa nayaxuxü̃ noxtacüma yana! ¡Rü togümare i duü̃xü̃gü nüxü̃́ yana i ngẽma norü puracütanü!
12 Rü name nixĩ i taxúeãxü̃ma nangechaü̃tümüxü̃ rü woo i naxacügü i ta̱xcuexü̃.
13 ¡Rü noxtacüma guxü̃ yue i nataagü nax ngẽmaãcü yanaxoxochixü̃ca̱x i nape̱xeégagü!
14 Rü cumax, Pa Corix, ¡rü nüxna nacua̱xãchi i nanatüarü chixexü̃ rü tagutáma ínapi i ngẽma naéarü pecadu!
15 ¡Rü guxü̃guma nüxna nacua̱xãchi i ngẽma chixexü̃ i naxüxü̃! ¡Rü duü̃xü̃güãẽwa ínapi i naéga!
16 Rü nüma i ngẽma chixexü̃ üxü̃ rü taguma nüxü̃́ tangechaü̃tümüxü̃ ya yíxema ingearü diẽruã̱xgüxe rü yíxema tama tügü icua̱xüü̃güxe rü yíxema guxchaxü̃maxã naxĩ̱xãchiãẽgüxe. Rü nüma rü chixri tümamaxã inacua̱x rü ngẽmaãcü tüxü̃ nadai.
17 Rü nüma rü naxca̱x nadau nax chixexü̃ naxüxü̃. ¡Rü ngẽmaca̱x name i noxtacüma chixexü̃ namaxã yaxugüe i duü̃xü̃gü! Rü taguma naxca̱x nadau nax ta̱xacürü mexü̃ naxü. ¡Rü ngẽmaca̱x noxtacüma taguma texé mexü̃ nachiga ixu!
18 ¡Rü ngẽma nacüma i chixexü̃, rü noxtacüma yadü̱xã i naxü̃ne ñoma wüxi i naxchirumaxã idü̱xü̱xü̃rüxü̃! ¡Rü naanügu rü naxchina̱xãgu noxtacüma naxücu i ngẽma chixexü̃ i nagu naxĩnüxü̃ ñoma dexá rüe̱xna chíxü̃ tagu ücuxü̃rüxü̃!
19 Rü ngẽma nacüma i chixexü̃ ¡rü noxtacüma yadü̱xã i naxü̃ne ñoma wüxi i naxchiru naxü̃ne idü̱xü̱xü̃rüxü̃, rü noxtacüma nüxna nanai ñoma wüxi i goyexü̃rüxü̃!
20 Rü name nixĩ i Cori ya Tupana ngẽmaãcü nüxü̃́ nanaxütanü i ngẽma chomaxã rüxuanüã̱xgüxü̃ rü chixri chauchiga idexagüxü̃.
21 Natürü cumax, Pa Corix rü chanaxwa̱xe i choxü̃ curüngü̃xẽxẽ rü mea choxna cudau nax ngẽmaãcü natachigaxü̃ca̱x i cuéga. ¡Rü curü mecümagagu choxü̃ ínanguxuchixẽxẽ nawa i ngẽma chixexü̃gü!
22 Choma rü poraãcüxüchi guxchaxü̃wa changexma rü chanaxĩ̱xãchiãxẽ rü chorü maxü̃newa rü poraãcü nangu̱x.
23 Rü ngẽma chorü guxchaxü̃gümaxã rü inixũ nax chixachigüxü̃ ñoma wüxi i gáuxchipetaxü̃ ixũxchigüxü̃rüxü̃. Rü ñu̱xma rü marü chixaxüchi, rü ngẽmaca̱x ya yimá buanecü rü choxü̃ niga ñoma wüxi i munüxü̃ yagaxü̃rüxü̃.
24 Rü ngẽma nax tama chachibüxü̃ca̱x rü chidu̱ruxeã́pü̱xü rü chixachigü.
25 Rü duü̃xü̃güarü cugüruxü̃ chixĩ. Rü ngẽxguma choxü̃ nadaunügu rü nanexáerugü rü choxü̃ nacugüe.
26 109:26-27 ¡Choxü̃ rüngü̃xẽxẽ, Pa Cori Pa Chorü Tupanax! ¡Rü curü ngechaü̃gagu choxü̃ ínanguxuchixẽxẽ nawa i chorü guxchaxü̃gü nax ngẽmaãcü duü̃xü̃gü nüxü̃ cuáxü̃ca̱x nax aixcüma cuma yixĩxü̃ i choxü̃ curüngü̃xẽẽxü̃!
27 Nüü̃ nadau 109:26
28 Rü ñu̱xma nax choxü̃ curüngü̃xẽẽxü̃ rü nüetama nixĩ ega woo chixexü̃ chomaxã yaxugüegu i ngẽma chomaxã rüxuanüã̱xgüxü̃. Rü name nixĩ nax naxãneexü̃. Natürü i choma nax curü duü̃xü̃ chixĩxü̃ rü chataãxẽ.
29 Rü ngẽma chorü uanügü rü name nixĩ nax poraãcü naxãneexü̃. ¡Rü ngẽma norü ãne rü noxtacüma yadü̱xã i naxü̃ne ñoma wüxi i naxchirumaxã idü̱xü̱xü̃rüxü̃!
30 Rü ñaa cha̱u̱a̱xmaxã rü guxü̃gutáma Cori ya Tupanana moxẽ chaxã. Rü muxü̃ i duü̃xü̃gütanüwa tá nüxü̃ chicua̱xüxü̃.
31 Erü nüma ya Tupana rü tümaétüwa nachogü ya yíxema ngearü ngẽmaxü̃ã̱xgüxe. Rü naxme̱xwa tüxü̃ ínapoxü̃ i ngẽma tüxü̃ íxuaxü̃güxü̃.
