Salmos 11:1-7
11 Choma rü Cori ya Tupaname̱xẽwa chaugü changexmaxẽxẽ nax choxü̃ ínapoxü̃xü̃ca̱x nüxna i chorü uanügü. ¿Rü tü̱xcüü̃ choxü̃ ñapegürü: —¡Ma̱xpǘneanewa naña nax ngéma werigürüxü̃ cugü quicúxü̃ca̱x! —ñaperügü choxü̃?
2 ¡Rü dücax i ngẽma chixexü̃ ügüxü̃ i duü̃xü̃gü! Rü nanape̱xecunüxẽxẽ ya norü würa nax yacu̱xgüãcüma naxnegümaxã tüxü̃ nama̱xgüxü̃ca̱x ya yíxema duẽxẽgü i mea maxẽxe.
3 Rü ngẽxguma chi nüma ya ãẽ̱xgacü marü chixexü̃gu nanguxgu ¿rü ñuxãcü tá nügü ínapoxü̃ ya yimá mecü ya duü̃?
4 Natürü nüma ya Cori ya Tupana rü napata ya üünenewa nangẽxma. Rü nüma ya Cori rü daxũguxü̃ i naanewa nüxü̃́ nangẽxma i norü tochicaxü̃, rü ngéma meama ínadawenü rü nanangugü i duü̃xü̃gü.
5 Rü nüma ya Tupana rü nanangugü i ngẽma mexü̃ ügüxü̃ rü ngẽma chixexü̃ ügüxü̃, rü naxchi naxai i ngẽma ma̱xgu rüxĩnüexü̃.
6 Rü nüma ya Cori ya Tupana rü ñoma pucürüxü̃ tá ngẽma chixexü̃ ügüxü̃étügu nanayixẽxẽ ya ã́xwe rü üxüema i achúfremaxã ãéü̃xü̃. Rü tá naxca̱x ínananguxẽxẽ ya wüxi ya buanecü nax yaxaexü̃ca̱x i guxü̃ma. Rü nüma ya Cori ya Tupana rü ngẽmaãcü tá nanapoxcue i ngẽma duü̃xü̃gü i chixexü̃ ügüxü̃.
7 Rü nüma ya Cori ya Tupana rü ixaixcümacü nixĩ, rü nüxü̃ nangechaü̃ i ngẽma aixcüma ixĩxü̃. Rü ngẽmaca̱x ya yíxema ixaixcümagüxe rü tá Tupanachiwexü̃ tadaugü.
