Salmos 111:1-10
111 Name nixĩ i Cori ya Tupanaxü̃ ticua̱xüü̃gü. Rü choma rü guxü̃ma i chorü maxü̃nemaxã tá Cori ya Tupanaxü̃ chicua̱xüxü̃ nape̱xewa i ngẽma duü̃xü̃gü i mexü̃gu rüxĩnüexü̃arü ngutaque̱xewa rü guxü̃ma i duü̃xü̃güpe̱xewa.
2 Rü guxü̃ma i ngẽma Cori ya Tupana üxü̃ rü nataxüchi. Rü yíxema aixcüma namaxã taãẽxe i ngẽma Tupana üxü̃ rü nawa tangu̱x.
3 Rü ngẽma Tupanaarü puracü rü namexẽchi. Rü nüma rü guxü̃guma mea tamaxã inacua̱x.
4 Rü yema mexü̃ ga naxüxü̃ rü taxucürüwama nüxü̃ itarüngümae. Erü nüma ya Cori rü namecümaxüchi rü nüxü̃́ tangechaü̃tümüxü̃.
5 Rü tüxü̃ naxüwemü ya yíxema nüxü̃ icua̱xüxü̃güxe. Rü nüma rü taguma nüxü̃ inarüngüma i ngẽma norü uneta ga nüxü̃ yaxuxü̃.
6 Rü nüma rü norü duü̃xü̃güpe̱xewa inanawe̱x ga norü pora ga yexguma nüxna naxããgu ga ñaa Iraéane woo muxü̃ma ga totücumü ga duü̃xü̃gü ga tama yaxõgüxü̃ nawa namaxẽchire̱x.
7 Rü guxü̃ma i ngẽma nüma naxüxü̃ rü name rü aixcüma niwe̱x i norü mugü. Rü ngẽmaca̱x name nax nagu yaxõxü̃.
8 Rü ngẽma norü mugü rü taguma inayarüxo erü guxü̃ma rü aixcüma nixĩ rü nawe̱xgu.
9 Rü nüma rü ínananguxü̃xẽxẽ ga norü duü̃xü̃gü naxme̱xwa ga norü uanügü. Rü yema norü uneta rü namaxã nüxü̃ nixu nax tagutáma iyanaxoxü̃. Erü nüma ya Tupana rü naxüüne rü naxãũcümaxü̃chi.
10 Rü yíxema aixcüma cua̱x tüxü̃́ ngẽxmaxe rü Cori ya Tupanaxü̃ ticua̱xüü̃gü. Rü yíxema Cori ya Tupanaxü̃ icua̱xüü̃güxe rü aixcüma tümaãẽxü̃ ticua̱x. Rü name nixĩ i guxü̃guma nüxü̃ ticua̱xüü̃gü.
