Salmos 115:1-18
115 Pa Cori Pa Tupanax ¡cugütama icua̱xüxü̃ rü taxṹ i toxü̃ quicua̱xüxü̃! ¡Rü cugü icua̱xüxü̃ naxca̱x i curü ngechaü̃ rü naxca̱x i ngẽma nax quixaixcümaxü̃!
2 ¿Rü tü̱xcüü̃ i ngẽma tama yaxõgüxü̃ rü ínacagü rü ñanagürügü: —¿Ngexcü nixĩ ya perü Tupana? —ñanagürügü?
3 Natürü tanangãxü̃ rü ñatagürügü: —Torü Tupana rü daxũguxü̃ i naanewa nangẽxma. Rü nüma rü nanaxü i guxü̃ma i ta̱xacü i nüma nanaxwa̱xexü̃ —ñatagürügü.
4 Rü ngẽma norü tupanachicüna̱xãgü i ngẽma tama yaxõgüxü̃, rü nümatama i duü̃xü̃gü naxme̱xmaxã nanaxügü. Rü úirumü rü diẽrumünaxca̱x nixĩ.
5 Rü nüxü̃́ nangẽxma i naã̱x natürü tama nidexagü rü nixãxetü natürü tama ta̱xacüxü̃ nadau.
6 Rü naxãchinü natürü tama ta̱xacüxü̃ naxĩnüe. Rü naxãxmaraxü̃ natürü taxuxü̃ma nüxü̃ napa.
7 Rü nixãxme̱x natürü tama tüxü̃ ningõgügü. Rü nixãcutü natürü tama inaxĩ. Rü bai i wüxi i naga i naã̱xgüwa ixũxũxü̃.
8 Rü ngẽma duü̃xü̃gü i nügüca̱xtama naxchicüna̱xãgü ügüxü̃ rü nüxü̃́ yaxõgüxü̃ rü naxrüü̃tama nixĩgü nax taxuwama yamexü̃.
9 Pa Iraétanüxü̃x ¡Cori ya Tupanagu peyaxõgü! Erü nüma rü tüxü̃ narüngü̃xẽxẽ rü tüxna nadau.
10 Pa Chacherdótegüx ¡Cori ya Tupanagu peyaxõgü! Erü nüma rü tüxü̃ narüngü̃xẽxẽ rü tüxna nadau.
11 Rü pemax, Pa Duü̃xü̃gü i Cori ya Tupanaxü̃ Ngechaxü̃güxex ¡rü nagu peyaxõgü! Erü nüma rü tüxü̃ narüngü̃xẽxẽ rü tüxna nadau.
12 Rü nüma ya Cori ya Tupana rü tagu narüxĩnü rü tá tüxü̃ narüngü̃xẽxẽ. Rü tá nüxü̃ narüngü̃xẽxẽ i guxü̃ma i Iraétanüxü̃ rü norü chacherdótegü.
13 Rü tá mexü̃ tümamaxã naxuegu ya yíxema nüxü̃ ngechaü̃güxe woo yáxe rü buxe.
14 Rü chanaxwa̱xe, Pa Iraétanüxü̃x, nax Cori ya Tupana pexü̃ imuxẽẽxü̃ rü yamuxẽẽãxü̃ i pexacügü.
15 Rü nüma ya Cori ya Tupana i daxũguxü̃ i naane rü ñoma i naanearü üruxü̃ rü aixcüma tá pexna nanaxã i norü ngü̃xẽxẽ.
16 Rü Cori ya Tupanaarü nixĩ i daxũguxü̃ i naane, natürü duü̃xü̃güna nanaxã i ñoma i naane.
17 Rü ngẽma marü yuexü̃ i naxmaxü̃wa ngẽxmagüxü̃ rü taxucürüwama Cori ya Tupanaxü̃ nicua̱xüü̃gü i ñoma i naanewa.
18 Natürü i yixema i ñu̱xma nax imaxẽxü̃ rü tá nüxü̃ ticua̱xüxü̃gü i ñu̱xmax rü guxü̃gutáma ¡Rü ngĩxã nüxü̃ ticua̱xüxü̃gü ya Cori ya Tupana!
