Salmos 125:1-5
125 Ngẽma Cori ya Tupanaaxü̃́ yaxõgüxü̃ rü yima ma̱xpǘne ya Chióü̃ ya taxúema ixũgachixẽẽnerüxü̃ nixĩgü. Rü guxü̃guma nangẽxmagüecha.
2 Rü yima ĩane ya Yerucharéü̃ ya ma̱xpǘnegümaxã íxümaeguãchine, rü ngẽxgumarüxü̃ ta i nüma ya Cori ya Tupana rü guxü̃gutáma norü poramaxã ínanapoxexü̃ i norü duü̃xü̃gü.
3 Rü ngẽma chixecümaxü̃ i ãẽ̱xgacü rü taxũtáma guxü̃gu duü̃xü̃gümaxã inacuáecha nawa i ñaa naane ya Tupana norü duü̃xü̃güxü̃ nagu namugüxü̃. Erü nüma ya Tupana rü tama nanaxwa̱xe nax norü duü̃xü̃gü nagu maxẽxü̃ i nacüma i ngẽma chixexü̃ i duü̃xü̃gü.
4 Pa Corix ¡nüxü̃ rüngü̃xẽxẽ i ngẽma duü̃xü̃gü i mea maxẽxü̃ rü aixcüma mexü̃gu rüxĩnüexü̃!
5 Natürü ngẽma duü̃xü̃gü i chixexü̃ i nacümagu ĩxü̃ ¡rü poxcu namaxã naxuegu! Erü ngẽmatama nixĩ i woetama naxca̱x ixĩxü̃ i ngẽma chixexü̃ ügüxü̃. ¡Rü Iraétanüxü̃na naxã i taãxẽ!
