Salmos 129:1-8
129 Rü ñu̱xma i Iraéane rü ñanagürü: —Choma rü muxü̃ma ga ngúxü̃wa chaxüpetü noxritama changextü̱xügu.
2 Rü aixcüma muxü̃ma ga ngúxü̃wa chaxüpetü noxritama changextü̱xügu, natürü taxuxü̃ma choxü̃ narüporamae i chorü uanügü.
3 Rü poraãcü choxü̃ nacua̱i̱xgü rü choxü̃ nanapi̱xẽẽgü.
4 Natürü nüma ya Cori ya aixcüma mecümacü rü choxü̃ ínanguxuchixẽxẽ naxme̱xwa i ngẽma chorü uanügü i chixexü̃gu maxẽxü̃ —ñanagürü i Iraéane.
5 Rü ngẽma Chióü̃arü uanügü rü chanaxwa̱xe nax yaxãneetanüãchixü̃ rü taxcha̱xwa yabuxmüxü̃.
6 Rü ngẽma uanügü rü name nixĩ i ñoma maxẽ i ĩpataétüwa rüxüxü̃ i taxũtáma nayaegu yuexü̃rüxü̃ nixĩgü.
7 Rü name nixĩ i ñoma trigu i taguma norü owa nguxü̃ rü taguma ibuxarü oṍxü̃rüxü̃ nixĩgü.
8 Rü ngẽxguma texé nüxü̃ da̱u̱xgu rü taxúematama ñatagürü nüxü̃: —¡Tupana pexü̃ rüngü̃xẽxẽ! ¡Rü Cori ya Tupanaégagu mexü̃ pexü̃ ngupetü! —ñatagürü nüxü̃.
