Salmos 13:1-6
13 Pa Cori Pa Tupanax ¿Ñuxguratáta nüxü̃ curüchauxü̃ nax choxü̃ curüngü̃maxü̃? ¿Rü ñuxguratáta nüxü̃ curüchauxü̃ nax cha̱u̱xcha̱xwa iquicúxü̃?
2 ¿Rü ñuxguratáta iyanaxoxü̃ nax chanaxĩ̱xãchiãẽxü̃? ¿Rü ñuxguratáta iyanaxoxü̃ nax guxü̃ i ngunexü̃gu changechaxü̃xü̃? ¿Rü ñuxguratáta iyanaxoxü̃ nax chorü uanüme̱xẽwa changexmaxü̃?
3 Pa Cori Pa Chorü Tupanax ¡choxü̃ nadawenü rü choxü̃ nangãxü̃ rü cua̱x choxna naxã! Erü tama chanaxwa̱xe nax nagu changuxü̃ i ngẽma yu.
4 Rü ngẽmaãcü i chorü uanü rü taxũtáma ñanagürü: —Marü nüxü̃ charüporamae —ñanagürü. ¡Rü choxna nadau nax tama nataãẽxü̃ca̱x i ngẽma chorü uanü i ngẽxguma guxchaxü̃gu changuxgux!
5 Rü choma rü chayaxõ nax aixcüma choxü̃ cungechaü̃xü̃, rü chataãxẽ erü cuma rü choxü̃ cumaxẽxẽ.
6 Rü chorü wiyaemaxã tá Cori ya Tupanaxü̃ chicua̱xüxü̃ naxca̱x i norü ngü̃xẽxẽ i choxna naxãxü̃.
