Salmos 132:1-18
132 132:1-2 Pa Cori Pa Acóbuarü Tupana ya Poraxüchicüx ¡nüxna nacua̱xãchi ya Dabí rü norü oegaãxẽ naxca̱x ga guma cupata! ¡Rü nüxna nacua̱xãchi ga yema norü uneta ga cumaxã nüxü̃ yaxuxü̃ ga yexguma ñaxgu:
2 Nüü̃ nadau 132:1
3 132:3-5 —Choma rü taxũtáma chopatagu charüxã̱ũ̱x rü taxũtáma ichaca nax icharüngü̃xü̃ca̱x, rü taxũtáma chapexetü, rü bai i ñuxgu tá chapexü̃ ñu̱xmatáta chanaxü ya wüxi ya ĩpata naxca̱x ya Cori ya Acóbuarü Tupana ya poraxüchicü nax ngéma nangẽxmaxü̃ca̱x i ngẽma baú i norü mugüchixü̃ —ñaxgu!
4 Nüü̃ nadau 132:3
5 Nüü̃ nadau 132:3
6 Rü noxri rü nüxü̃ taxĩnüechiga nax Efrátawa nayexmaxü̃ ga yema baú ga Tupanaarü mugüchixü̃. Rü yixcüra rü Yáaarü ĩanepemagu nüxü̃ itayangau.
7 ¡Rü ñu̱xma rü ngĩxã Tupanapatagu tachocu nax ngéma nape̱xewa nüxü̃ yarücua̱xüü̃güxü̃ca̱x!
8 ¡Rü inachi, Pa Cori Pa Tupanax, rü cupatagu naxücu naxü̃tawa i curü mugüchixü̃ i curü poraarü cua̱xruxü̃ ixĩxü̃ nax ngéma cupatawa cungexmaxü̃ca̱x!
9 Rü ngẽma chacherdótegü i curü puracütanüxü̃ rü tá nicómüchiru rü ngẽma curü duü̃xü̃gü rü norü taãẽmaxã tá aita naxüe.
10 Rü curü duü̃ ga Dabígagu ¡rü taxṹ i choxü̃ cuxoxü̃ i choma i nachicüxü choxü̃ cuxunetaxü̃ nax ãẽ̱xgacü chixĩxü̃ca̱x!
11 Yerü cumax, Pa Corix, rü chaunatü ga Dabímaxã icuxuneta namaxã i wüxi i uneta i taxucürüwama cuxüchicüüxü̃.
12 Yerü ñacurügü nüxü̃: —Cuchicüxü tá wüxi i cunexü̃ chaxuneta nax nüxí ãẽ̱xgacü yixĩxü̃ca̱x. Rü ngẽxguma cunegü chauga naxĩnüegu rü yanguxẽẽgüãgu i ngẽma chorü mugü i namaxã nüxü̃ chixuxü̃ rü ngẽma nanegü rü tá ta nüxí guxü̃gutáma ngẽma curü tochicaxü̃wa narütogü nax Iraéanecüã̱xarü ãẽ̱xgacügü yixĩgüxü̃ca̱x —ñacurügü.
13 Rü nüma ga Cori rü nüxü̃ naxuneta ga yima ma̱xpǘne ga Chióü̃ nax yimagu naxãchiü̃xü̃ca̱x.
14 Rü nüma ya Tupana rü ñanagürü: —Daa nixĩ ya yima ma̱xpǘne i chanaxwa̱xene nax guxü̃guma nawa changexmaxü̃. Rü ngẽxma tá chaxãchiü̃ erü chorü me nixĩ.
15 Rü ngẽma chorü duü̃xü̃güarü nanetügü rü tá poraãcü nüxü̃́ chayaxoxẽxẽ nax ngẽmaãcü tama nataiyaexü̃ca̱x i woo i ngẽma duü̃xü̃gü i ngearü diẽruã̱xgüxü̃.
16 Rü tá cua̱x nüxna chaxã i Iraétanüxü̃arü chacherdótegü nax natanüxü̃étüwa nachogüexü̃ca̱x i chope̱xewa. Rü ngẽma chorü duü̃xü̃gü rü norü taãẽmaxã tá aita naxüe.
17 Rü marü namaxã ichaxüga ga guma ãẽ̱xgacü ga Dabí ga choma nüxü̃ chaxunetacü. Rü nataagü rü guxü̃gutáma ãẽ̱xgacügü nixĩgü ñoma wüxi i omü i ngéma naiechaxü̃rüxü̃. Rü Dabítaatanüwa tá chanango̱xẽxẽ ya wüxi ya ãẽ̱xgacü ya poraxüchicü.
18 Rü norü uanügü rü poraãcü tá chanaxãneexẽxẽ. Natürü i nüma ya ãẽ̱xgacü rü tá chanataxẽxẽ rü tá nüxna chanaxã i taxü̃ i pora —ñanagürü ga Cori ya Tupana.
