Salmos 135:1-21
135 135:1-2 Name i nüxü̃ ticua̱xüü̃gü ya Cori ya Tupana. ¡Rü nüxü̃ picua̱xüü̃gü i naéga i guxãma i pema i tórü Cori ya Tupanapatawa rü napataa̱xtüwa puracütanüxü̃ ixĩgüxe!
2 Nüü̃ nadau 135:1
3 ¡Rü nüxü̃ picua̱xüü̃gü ya Cori ya Tupana erü nüma rü namecüma! ¡Rü wiyaegü i naégagu ixuxü̃gu pewiyaegü erü nüma rü tamaxã namecüma!
4 Rü nüma rü nüxü̃ naxuneta ga Acóbu ga Iraégu ãégacü nax norü meruxü̃ yixĩxü̃ca̱x.
5 Rü choma rü meama nüxü̃ chacua̱x rü nüma ya Cori ya tórü Tupana rü guxü̃ma i ngẽma duü̃xü̃gü namaxã tupanaã́xü̃étüwa naxü.
6 Rü nüma ya Cori ya Tupana rü nanaxü i guxü̃ma i ta̱xacü i nüma nanaxwa̱xexü̃ i daxũguxü̃ i naanewa rü ñoma i naanewa. Rü ngẽxgumarüxü̃ ta nanaxü i ngẽma nüma nanaxwa̱xexü̃ i márwa rü natamawa.
7 Rü nüma rü guxü̃wama i ñoma i naanewa nayachü̱xüxãchixẽxẽ ya cherena. Rü nanayauneanecüüxẽxẽ nax ngẽmawa nüxü̃ icuáxü̃ca̱x nax napuxchaü̃xü̃. Rü ngẽma ngextá namaxã ínanguxü̃xü̃wa ya buanecü rü inanamuãchi.
8 Rü nüma nixĩ ga nũxcüma nadaiaxü̃ ga yema Equítuanecüã̱x nanegü ga nüxíraxü̃xü̃ rü nadaiaxü̃ ga yema nüxíraxü̃xü̃ ga naxü̃naxacügü.
9 Rü Equítuanewa nanango̱xẽxẽ ga taxü̃ ga guxchaxü̃gü naxca̱x ga Equítuanecüã̱xarü ãẽ̱xgacü rü norü ngü̃xẽẽruü̃gü.
10 135:10-11 Rü nanadaiãcu ga muxü̃ma ga nachixü̃anegü. Rü nanadai ga ãẽ̱xgacügü ga iporaexü̃ ga Chióü̃ ga Amoréutanüxü̃arü ãẽ̱xgacü rü Óx ga Bacháü̃anearü ãẽ̱xgacü rü guxü̃ma ga yema ãẽ̱xgacügü ga Canaáü̃anewa yexmagüxü̃.
11 Nüü̃ nadau 135:10
12 Rü yema ãẽ̱xgacügüarü naanegü rü Tupana rü norü duü̃xü̃gü ga Iraétanüxü̃na nanaxã nax guxü̃gutáma noxrü yixĩxü̃ca̱x.
13 Pa Cori Pa Tupanax, cuéga rü tagutáma inayarüxo, rü duü̃xü̃gü rü guxü̃gutáma cuxna nacua̱xãchigü.
14 Rü nüma ya Cori ya Tupana rü aixcümama mea namaxã inacua̱x rü mea nüxna nadau i norü duü̃xü̃gü. Rü nüxü̃́ nangechaü̃tümüxü̃gü i ngẽma norü duü̃xü̃gü.
15 Rü ngẽma tama yaxõgüxü̃arü tupananetagü rü úirunaxca̱xgümare rü diẽrumünaxca̱xgümare nixĩ. Rü naxchicüna̱xãgü i duü̃xü̃gü naxme̱xmaxã ümarexü̃ nixĩgü.
16 Rü nixãa̱xchire̱x natürü tama nidexagü. Rü nixãxetüchire̱x natürü tama tüxü̃ nadau.
17 Rü nixãpachinüchire̱x natürü tama tüxü̃ naxĩnüe. Rü nangearü maxü̃ã̱x.
18 Rü ngẽma duü̃xü̃gü i ngẽma naxchicüna̱xãgü ügüxü̃ rü ngẽma naxchicüna̱xã i nagu yaxõgüxü̃rüxü̃ rü taxuwama name.
19 Pa Iraétanüxü̃x ¡Cori ya Tupanaxü̃ picua̱xüü̃gü! Rü pema Pa Chacherdótegüx ¡rü Cori ya Tupanaxü̃ picua̱xüü̃gü!
20 Rü pema Pa Lebítanüxü̃x ¡rü Cori ya Tupanaxü̃ picua̱xüü̃gü! Rü pema nax Cori ya Tupanaxü̃ Pengechaü̃güxü̃ ¡rü nüxü̃ picua̱xüü̃gü ya Cori ya Tupana!
21 Rü namexẽchi ya Cori ya Tupana ya ma̱xpǘne ya Chióü̃gu ãchiü̃cü i Yerucharéü̃wa. Rü name nax nüxü̃ icua̱xüü̃güxü̃.
