Salmos 139:1-24
139 Pa Cori Pa Tupanax, cuma rü marü choxü̃ cungugü rü meama nüxü̃ cucua̱x i chorü maxü̃.
2 Rü cuma nüxü̃ cucua̱x i guxü̃ma i ngẽma chaxüxü̃. Rü woo curü yáxü̃wa changexmagu rü nüxü̃ cucua̱xama i ngẽma nagu charüxĩnüxü̃.
3 Rü ngẽma íchixũgüxü̃wa rü cuma rü nüxü̃ cucua̱x i guxü̃ma i ngẽma chaxüxü̃.
4 Rü woo taxũta namaxã chachonagüxü̃ i ore, rü cumax, Pa Corix, rü marü nüxü̃ cucua̱x i ta̱xacümaxã tá chadexaãchixü̃.
5 Rü chorü guxü̃cüwawa cungexma rü chauétü cuwéme̱x.
6 Rü guxü̃ma i ngẽma cua̱x rü chauãxẽ rü tama ningu nax nüxü̃ chacuáxü̃ i ngẽma. Rü ngẽma nax nataxüchixü̃ i ngẽma cua̱x rü tama nüxü̃ chacua̱x i ñuxãcü nax yixĩxü̃.
7 ¿Rü ngextá tá chaxũ naxcha̱xwa i cuãxẽ? ¿Rü ngextá tá chaña nax cuxna chayáxü̃xü̃ca̱x?
8 Rü ngẽxguma chi daxũguxü̃ i naanegu chaxĩnagügu, rü ngéma cungexma i cumax. Rü ngẽxguma chi waixü̃mütüü̃gu chaxücu̱xgu rü ngéma rü ta cungexma i cumax.
9 139:9-10 Rü ngẽxguma chi chagonagügu rü éstewa chañaxgu rüe̱xna üa̱xcü írüxücuxü̃gu chaxãchiü̃gu, rü woo i ngéma rü chauétü cuwéme̱x rü curü tügüneme̱xẽ rü tagutáma choxü̃ ninge̱x.
10 Nüü̃ nadau 139:9
11 139:11-12 Rü ngẽxguma chi nagu charüxĩnügu nax ẽanexü̃gu chicúxü̃ rüe̱xna ngẽma ngóonexü̃ rü ẽanexü̃xü̃ yanguxuchigu, rü ngẽma ẽanexü̃ rü taxucürüwama cuxcha̱xwa choxü̃ inicu̱x, erü ngẽma ẽanexü̃ rü ñoma nangunexü̃rüü̃tama nixĩ i cuxca̱x. Rü ngẽma ẽanexü̃ rü ngẽma ngóonexü̃ rü cuxca̱x rü nawüxigumare.
12 Nüü̃ nadau 139:11
13 Rü cuma nixĩ ga cunaxüxü̃ i ñaa chaxune. Rü cuma nixĩ ga chauéanüwa choxü̃ cuxüxü̃.
14 Rü ngẽmaca̱x cuxü̃ chicua̱xüxü̃ naxca̱x nax ñuxãcü choxü̃ cuxüxü̃, erü curü ü rü namexẽchi. Rü ngẽma rü meama nüxü̃ chacua̱x.
15 Rü taxuxü̃ma cuxca̱x naxẽxü̃gu ga yexguma chauéanüwa noxri chanaxĩxĩchigu rü chiyachigügu ga taxúema choxü̃ ídauxü̃wa.
16 Rü cuetügü rü nüxü̃ nadau ga chaxune ga yexguma noxri chanaxĩxĩchigu. Rü naxü̃pa nax chabuxü̃ rü curü poperagu naxümatü ga ñuxãcü tá nax choxü̃ cuxüxü̃. Rü naxü̃pa nax chamaxü̃xü̃ rü cuma nüxü̃ cucua̱x i ñuxre i ngunexü̃ tá choxü̃́ nangẽxmaxü̃.
17 Pa Tupanax, ngẽma nagu curüxĩnüxü̃ rü chorü cua̱x rü tama nawa nangu. Erü ngẽma curü ĩnügü rü taguma inayagu̱x.
18 Rü ngẽxguma chi chayaxugügu i ngẽma curü ĩnügü i cha̱u̱xca̱x nagu curüxĩnüxü̃ rü naxnecüte̱xearü yexera chi nixĩ i norü mu. Rü woo ngẽxguma pa̱xmama chaba̱i̱xãchigu rü ngẽxguma rü ta chaugu curüxĩnü.
19 139:19-20 ¡Pa Tupanax, nüxna nayaxu i norü maxü̃ i ngẽma chixexü̃ ügüxü̃! ¡Rü choxna yaxĩgachixẽxẽ i ngẽma máetagüxü̃ i chixexü̃maxã cuchigagu idexagüxü̃ rü natüca̱xma cumaxã nuexü̃!
20 Nüü̃ nadau 139:19
21 Pa Cori Pa Tupanax ¿ẽ̱xna taxũtáma naxchi chaxaixü̃ i ngẽma duü̃xü̃gü i cuxchi aiexü̃ rü nüxü̃ chaxoxü̃ i ngẽma cumaxã nuexü̃?
22 Rü ngẽmáacü guxü̃ i chorü maxü̃maxã naxchi chaxai i ngẽma duü̃xü̃gü, rü nüxü̃ chacua̱x i ngẽmagü rü chorü uanügü nax yixĩgüxü̃.
23 Pa Tupanax, ¡nangugü i chorü maxü̃ i ñuxãcü nax yixĩxü̃ i cupe̱xewa! ¡Rü choxü̃ naxü nax cupe̱xewa nangóxü̃ca̱x i ngẽma nagu charüxĩnüxü̃!
24 ¡Rü chomaxã nüxü̃ ixu ega chixexü̃ i namagu chixũxgu! ¡Rü ngẽma nama i maxü̃wa choxü̃ gaxü̃gu choxü̃ ixũxẽxẽ!
