Salmos 14:1-7
14 Rü ngẽma duü̃xü̃gü i naechitamare maxẽxü̃ rü nagu narüxĩnüe nax nataxuxü̃ ya Tupana. Rü guxü̃ma i ngẽma duü̃xü̃gü rü chixexü̃gu narüxĩnüe rü nanaxügü i ngẽma Tupanape̱xewa chixexü̃chixü̃. Rü bai i wüxi i mexü̃ üxü̃.
2 Rü nüma ya Cori ya Tupana rü daxũguxü̃ i naanewa duü̃xü̃güxü̃ nadawenü nax nüxü̃ nadauxü̃ca̱x rü tayíxema ya tümaãẽxü̃ cuáxe rü Tupanaxca̱x dauxe.
3 Natürü guxü̃ma i duü̃xü̃gü rü chixexü̃gu namaxẽ rü guxü̃ma wüxigu chixexü̃gu narüxĩnüe. Rü marü tataxuma ya texé ya mexü̃ ǘxe, rü bai ya wüxíe.
4 Rü tama naãẽxü̃ nicua̱x i ngẽma chixexü̃ ügüxü̃. Rü norü chixexü̃maxã nanagu̱xẽxẽ i chorü duü̃xü̃gü ñoma paũ ingṍxü̃rüxü̃. Rü taguma Cori ya Tupanaca̱x nadaugü.
5 Rü ngẽma chixexü̃ ügüxü̃ rü muü̃maxã tá nidu̱xruxe. Natürü Tupana rü tümaxü̃tawa nangẽxma ya yíxema naga ĩnüexe.
6 Rü ngẽma chixexü̃ ügüxü̃ rü tüxü̃́ nüxü̃ nacugüe i tümaarü ĩnü ya yíxema tama tügü icua̱xüxü̃güxe. Natürü nüma ya Cori ya Tupana rü tüxna nadau rü tüxü̃ ínapoxü̃.
7 Chierüx Tupana ya ma̱xpǘne ya Chióü̃wa ngẽxmacü nua ũxgu nax norü uanügüme̱xẽwa ínanguxü̃xẽẽãxü̃ca̱x i norü duü̃xü̃gü i Iraétanüxü̃. Rü ngẽxguma nüma ya Cori ya Tupana ínanguxü̃xẽẽgu rü guxü̃ma i Acóbutaagü i Iraétanüxü̃ rü tá nataãxẽgü.
