Salmos 142:1-7
142 Rü tagaãcü nüxna chaca ya Cori ya Tupana. Rü tagaãcü naxca̱x íchaca nax nüxü̃́ changechaü̃tümüxü̃xü̃ca̱x.
2 142:2-3 Rü nape̱xewa naxca̱x chayarüdexa i ngẽma guxchaxü̃gü i choxü̃́ ngẽxmaxü̃. Rü ngẽxguma chauétü nanguxgu i ngẽma guxchaxü̃gü rü nape̱xewa nüxü̃ chixu nax poraãcü ngúxü̃ chingexü̃. Pa Corix, cuma nüxü̃ cucua̱x i chomaxü̃ i nagu chixũxü̃. Rü ngẽma nama i nagu chixũxü̃wa rü chorü uanügü rü ngẽxma chope̱xegu nanaxǘgü i wüxi i yauxruxü̃.
3 Nüü̃ nadau 142:2
4 Rü ngẽxguma chorü tügünecüwagu chadawenügu rü tataxuma ya texé ya chorü ngü̃xẽẽwa ũxẽ. Rü tataxuma ya texé ya choxü̃ ípoxü̃xẽ. Rü tataxuma ya texé ya cha̱u̱xca̱x oegaãẽxe.
5 Rü cuxna nixĩ i chaca̱xaxü̃, Pa Cori Pa Tupanax, rü cuxü̃ ñachagürü: —Cuma nixĩ i chorü cu̱xchicaxü̃ quixĩxü̃. Rü cuma nixĩ i choxna cunaxãxü̃ i guxü̃ma i ta̱xacü i choxü̃́ ngẽxmaxü̃ i ñoma i naane i nawa chamaxü̃wa —ñachagürü.
6 ¡Rü naxca̱x irüxĩnü i chauga nax aita chaxüxü̃! Erü marü nataxuma i chorü pora. ¡Rü nüxna choxü̃ ínanguxuchixẽxẽ i ngẽma chowe ingẽxü̃tanüxü̃! Erü nüma rü choxü̃ narüporamaegü.
7 ¡Rü choxü̃ ínanguxuchixẽxẽ nawa i ñaa chorü guxchaxü̃gü nax ngẽmaãcü cuxü̃ chicua̱xüü̃xü̃ca̱x! Rü ñu̱xũchi i ngẽma duü̃xü̃gü i aixcüma mexü̃gu rüxĩnüexü̃ rü tá choxü̃ ínachomaeguãchi i ngẽxguma chomaxã cumecümagu.
