Salmos 145:1-21
145 Rü choma rü tá cuxü̃ chixuchiga nax ñuxãcü nüxü̃ cucua̱xüchixü̃, Pa Tupana Pa Chorü Ãẽ̱xgacüx. Rü guxü̃gutáma cuxü̃ chicua̱xüxü̃.
2 Rü wüxichigü i ngunexü̃gu rü mexü̃ i cuchigaxü̃ tá chixu rü guxü̃gutáma cuxü̃ chicua̱xüxü̃.
3 Rü nüma ya Cori ya Tupana rü nüxü̃ nacua̱xüchi rü ngẽmaca̱x name nax nüxü̃ icua̱xüü̃güxü̃. Rü ngẽma tórü cua̱x rü tama nawa nangu nax nüxü̃ icuáxü̃ca̱x i ñuxãcü nüxü̃ nacua̱xüchixü̃ i nümax.
4 Rü papagü rü naxacügüwa tá nanangúexẽẽgü nax cuxü̃ yacua̱xüü̃güxü̃ naxca̱x i ngẽma cuxüxü̃. Rü tá nüxü̃ nixugügü i ngẽma mexü̃gü i curü poramaxã cuxüxü̃.
5 Rü choma rü tá nüxü̃ chixu nax ñuxãcü torü ãẽ̱xgacü ya üünecü nax quixĩxü̃ i cumax. Rü tá nüxü̃ chixu i ngẽma mexü̃gü i toxca̱x cuxüxü̃.
6 Rü duü̃xü̃gü rü nachiga tá nidexagü i ngẽma ãũcümaxü̃ i curü poramaxã cuxüxü̃. Rü choma rü tá cuxü̃ chixuchiga nax ñuxãcü guxü̃étüwa cungexmaxü̃.
7 Rü duü̃xü̃gü rü tá cuxü̃ nixuchiga nax ñuxãcü cumecümaxü̃chixü̃. Rü tagaãcü tá nüxü̃ nixugügü nax cuma rü ãẽ̱xgacü i aixcüma mea guxãmaxã icuácü quixĩxü̃.
8 Rü nüma ya Cori ya Tupana rü namecüma rü nüxü̃́ tangechaü̃tümüxü̃ rü yáxna tamaxã naxĩnü rü tüxü̃ nangechaü̃.
9 Rü nüma ya Cori ya Tupana rü guxãmaama namecüma rü ngẽma naxüxü̃wa inanawe̱x nax poraãcü tüxü̃ nangechaü̃xü̃.
10 Rü guxü̃ma i ngẽma cuxüxü̃ rü tá cuxü̃ nicua̱xüü̃gü, Pa Cori Pa Tupanax. Rü ngẽma curü duü̃xü̃gü rü tá cuxü̃ nicua̱xüü̃gü.
11 Rü tá nüxü̃ nixugügü nax cuma rü aixcüma ãẽ̱xgacü ya üünecü quixĩxü̃ rü aixcüma namexẽchixü̃ i ngẽma curü puracü i curü poramaxã cuxüxü̃.
12 Rü ngẽmaãcü tá duü̃xü̃gü nüxü̃ nacua̱x nax ñuxãcü cuporaxüchixü̃ rü ñuxãcü ãẽ̱xgacü ya üünecü quixĩxü̃.
13 Rü cuma rü guxü̃guma ãẽ̱xgacü quixĩ rü guxü̃gutáma namaxã icucua̱x i guxü̃ma.
14 Rü nüma ya Cori ya Tupana rü tüxü̃ ínarüdagüxẽxẽ ya guxãma ya yíxema iyayitanüxe. Rü tüxü̃ naporaexẽxẽ ya guxãma ya yíxema turaexe.
15 Rü guxü̃ma i ngẽma cuxüxü̃ rü cuxü̃ narüdaunü nax cuma cunachibüexẽẽxü̃ca̱x i ngẽxguma nataiyaegu.
16 Rü cuma rü cuyaxüwemügü rü curü ngúchaü̃maxã mea cunataãẽxẽxẽ i guxü̃ma i ngẽma maxẽxü̃.
17 Rü nüma ya Cori rü guxü̃ma i ngẽma nagu naxĩnüxü̃wa rü aixcüma nawe̱xgu. Rü guxü̃ma i ngẽma naxüxü̃wa rü namecüma.
18 Rü nüma ya Cori ya Tupana rü tüxna nangaicama ya yíxema aixcüma naga taxĩnüeãcüma norü ngü̃xẽẽca̱x ícagüxe.
19 Rü yíxema nüxü̃ ngechaü̃güxe, rü tüxna nanaxã i ngẽma naxca̱x ítaca̱xaxü̃. Rü ngẽxguma norü ngü̃xẽẽca̱x nüxna tacagüegu, rü nüma rü tüxü̃ naxĩnü rü tümaarü guxchaxü̃wa tüxü̃ ínanguxü̃xẽxẽ.
20 Rü nüma ya Cori ya Tupana rü tüxü̃ ínapoxü̃ ya yíxema nüxü̃ ngechaü̃güxe, natürü nanadai i ngẽma tama naga ĩnüechaü̃xü̃.
21 Rü Cori ya Tupanaxü̃ chicua̱xüxü̃. Rü name nixĩ i guxü̃ma i duü̃xü̃gü nüxü̃ nicua̱xüü̃gü ya yimá Üünecü i ñu̱xma rü guxü̃gutáma.
