Salmos 146:1-10
146 Name nixĩ i nüxü̃ ticua̱xüü̃gü ya Cori ya Tupana. Rü choma rü guxü̃ma i chorü maxü̃maxã tá Cori ya Tupanaxü̃ chicua̱xüxü̃.
2 Rü ñu̱xma nax chamaxü̃xü̃ rü Cori ya Tupanaxü̃ tá chicua̱xüxü̃. Rü ñoma rü ta nax chamaxü̃ rü naxca̱x tá chawiyae ya yimá chorü Tupana.
3 ¡Rü taxṹ i nagu cuyaxõxü̃ i yatügü i nügü nüxü̃ cua̱xẽxẽxü̃! Erü nümagü rü duü̃xü̃gümare nixĩgü rü tama maxü̃ tüxna naxã.
4 Rü ngẽxguma nayuegu i ngẽma duü̃xü̃gü rü wenaxarü waixü̃müxü̃ nixĩgü. Rü ngẽma ngunexü̃gutama inayarüxo i guxü̃ma i ta̱xacü i nagu naxĩnüexü̃.
5 Rü tataãxẽ ya yíxema Acóbuarü Tupanaxü̃tawa nayaxúxe i tümaarü ngü̃xẽxẽ rü nüxü̃́ yaxṍxe ya Cori ya Tupana.
6 Rü nüma ya Cori ya Tupana nixĩ i naxüaxü̃ i daxũguxü̃ i naane rü ñoma i naane, rü ngẽma már, rü guxü̃ma i ta̱xacü i nawa ingẽxmachigüxü̃. Rü nüma rü guxü̃guma nayanguxẽxẽ i ngẽma nüxü̃ yaxuxü̃.
7 Rü nüma rü tümaétüwa nachogü ya yíxema togü chixri tümamaxã icuáxe. Rü yíxema taiyagu ímaxẽxe rü nüma ya Tupana rü tüxü̃ nachibüexẽxẽ. Rü yíxema poxcupataü̃wa ngẽxmagüxe rü tüxü̃ ínanguxü̃xẽxẽ.
8 Rü yíxema ingexetüxe rü tüxü̃ nidauuchigüxẽxẽ. Rü yíxema ya iyayitanüxe rü tüxü̃ ínarüdagüxẽxẽ. Rü nüma ya Cori rü nüxü̃ nangechaü̃ i ngẽma duü̃xü̃gü i mexü̃ ügüxü̃.
9 Rü nüma ya Cori ya Tupana rü nüxna nadau i ngẽma duü̃xü̃gü i tama Iraétanüxü̃ ixĩgüxü̃ i to i nachixü̃anewa ne ĩxü̃. Rü ngẽxgumarüxü̃ ta tüxü̃ narüngü̃xẽxẽ ya taxcutagü rü yutegüxe. Natürü ngẽma duü̃xü̃gü i chixexü̃ ügüxü̃arü ĩnü rü nagu nayanachixexẽxẽ.
10 Pa Chióü̃x, rü nüma ya Cori ya Tupana rü guxü̃gutáma ãẽ̱xgacü nixĩ. Rü yimá curü Tupana rü gucü ya taunecügu rü tá pemaxã inacua̱x. ¡Rü ngĩxã nüxü̃ ticua̱xüü̃gü ya Cori ya Tupana!
