Salmos 148:1-14
148 148:1-2 Rü name nixĩ i Tupanaxü̃ ticua̱xüü̃gü. Rü pemax, Pa Dauxü̃cüã̱x, rü name nixĩ i ngéma dauxü̃wa nüxü̃ picua̱xüü̃gü. Rü pemax, Pa Orearü Ngeruü̃gü i Dauxü̃cüã̱x, rü name nixĩ i nüxü̃ picua̱xüü̃gü. Rü pemax, Pa Tupanaarü Churaragü i Dauxü̃cüã̱x, rü name nixĩ i nüxü̃ picua̱xüü̃gü.
2 Nüü̃ nadau 148:1
3 Rü cumax, Pa Üa̱xcüx, rü cumax, Pa Tauemacüx, rü pemax, Pa Ẽxtagüx, rü name nixĩ i nüxü̃ picua̱xüü̃gü.
4 Rü cumax, Pa Daxũguxü̃ i Naanex, rü cumax, Pa Dexá i Caixanexü̃étüwa Ngẽxmaxü̃x, rü name nixĩ i nüxü̃ picua̱xüü̃gü.
5 ¡Rü nüxü̃ pixuchiga ya Cori ya Tupana! Erü nüma nixĩ ga namaxã nadexaãchixü̃ nax nangóxü̃ca̱x i guxü̃ma i ta̱xacü ingexmaxü̃.
6 Rü yemaacü nanango̱xẽxẽ ga guxü̃ma nax guxü̃gutáma nüma nanaxwa̱xexü̃ãcüma nangẽxmaxü̃ca̱x. Rü inanaxã ga mugü ga taxúema üchicüxüxü̃.
7 ¡Rü ñoma i naanewa rü nüxü̃ picua̱xüü̃gü ya Cori ya Tupana, Pa Naeü̃gü i Taxüchigüxü̃ i Már arü Mátamaxü̃wa Maxẽxü̃!
8 Rü name nixĩ i nüxü̃ picua̱xüü̃gü, Pa Ãẽmacü, rü Gáuxü̃ i Ãpü̱xüxü̃, rü Gáuxü̃ i Ãte̱xexü̃, rü Cherena, rü Tacü ya Buanecü ya Tupanaarü Ngúchaü̃ Ücüx.
9 148:9-10 Rü pemax ya ma̱xpǘnegü, rü máxpü̱xanegü, rü guxü̃ma i naigü i taxü̃ne, rü nanetügü, rü naxü̃nagü, rü naeü̃gü, rü werigü, rü guxü̃ma i ta̱xacü i naxtanecamaxã ixĩxü̃, rü name nixĩ i nüxü̃ picua̱xüü̃gü.
10 Nüü̃ nadau 148:9
11 ¡Rü guxü̃ma i ãẽ̱xgacügü i wüxichigü i nachixü̃anemaxã icuáxü̃, rü guxü̃ma i norü ngü̃xẽẽruü̃gü i ãẽ̱xgacügü, rü guxü̃ma i norü duü̃xü̃gümaxã rü Tupanaxü̃ picua̱xüxü̃gü!
12 ¡Rü yatügü rü ngexü̃gü rü ngextü̱xücügü rü paxü̃gü rü o̱xigü, rü Tupanaxü̃ picua̱xüxü̃gü!
13 Rü ngẽmaãcü i guxãma i pema rü name nixĩ i nüxü̃ picua̱xüü̃gü. Erü nüma ya Tupana rü guxãétüwa nangẽxma. Rü nüma rü mea namaxã inacua̱x i guxü̃ma i daxũguxü̃ i naanewa ngẽxmaxü̃ rü guxü̃ma i ñoma i naanewa ngẽxmaxü̃.
14 Rü nüma ya Tupana rü nüxü̃ narüngü̃xẽxẽ ga norü duü̃xü̃gü ga Iraétanüxü̃ nax norü uanügüxü̃ naporamaegüxü̃ca̱x. Rü ngẽmaca̱x, Pa Iraétanüxü̃ i Aixcüma Tupanaarü Duü̃xü̃gü Ixĩgüxe, rü name nixĩ i nüxü̃ picua̱xüü̃gü. Erü nümatama nixĩ i pexü̃ naxunetaxü̃ nax norü duü̃xü̃gü pixĩgüxü̃ca̱x. ¡Rü ngĩxã nüxü̃ ticua̱xüxü̃gü ya Cori ya Tupana!
