Salmos 16:1-11
16 ¡Choxna nadau, Pa Tupanax! Erü cuxü̃́ nixĩ i chayaxõxü̃ nax choxü̃ ícupoxü̃xü̃ca̱x.
2 Choma rü marü cumaxã nüxü̃ chixu rü ñachagürü: —Cuma nixĩ i chorü Cori quixĩxü̃, rü nataxuma i to i curüxü̃ aixcüma choxü̃ rüngü̃xẽẽxü̃ —ñachagürü.
3 Rü ngẽma duü̃xü̃gü i cuxü̃́ yaxõgüxü̃ rü naporae, rü choma rü aixcüma namaxã chataãxẽ.
4 Natürü ngẽma naxchicüna̱xãgüxü̃ icua̱xüü̃güxü̃ rü tá ngúxü̃ ningegü. Rü choma rü tagutáma norü tupananetagüca̱x ãmareruxü̃ i nagü chaba. Rü bai i cha̱u̱a̱xmaxã tá nüxü̃ chixu i naégagü i ngẽma tupananetagü.
5 Pa Corix, cuma nixĩ i ñoma i õnarüxü̃ choxü̃ cuporaxẽẽxü̃. Rü ñoma chorü copa i mexü̃rüxü̃ quixĩ. Rü cuxme̱xwa nangẽxma i chorü maxü̃.
6 Rü yema naane ga choxna üxü̃ nixĩ ga yema rümemaexü̃. Rü namexẽchi nixĩ i ngẽma choxna cuxãxü̃.
7 Rü nüxü̃ chicua̱xüxü̃ ya Cori ya Tupana erü nüma rü chomaxã inacua̱x. Rü chütacü rü nüma rü chauãẽwa choxü̃ naxuxcu̱xẽ.
8 Rü guxü̃guma nachauxü̃tagu ya Cori. Rü chorü tügünecüwawa nangẽxma rü ngẽmaca̱x taxuxü̃táma i ta̱xacü chixexü̃gu choxü̃ nanguxẽxẽ.
9 Rü ngẽmaca̱x i ñu̱xma rü poraãcü chataãxẽ rü taxuca̱xtama ta̱xacüca̱x chaxoegaãxẽ.
10 Erü cuma rü taxũtáma tauquewa choxü̃ cuta̱x. Rü taxũtáma wüxi i ãxmaxü̃gu nüxü̃ curüngü̃ma ya yima cumücü ixĩcü.
11 Rü cuma rü choxü̃ cunawe̱x i ngẽma nama i maxü̃wa nadaxü̃. Rü cuxü̃tawa nangẽxma i taxüchixü̃ i taãxẽ. Rü ngẽma curü tügünecüwawa nangẽxma i taãxẽ i taguma iyacuáxü̃.
