Salmos 18:1-50
18 Pa Corix, Pa Tupanax, cuma nixĩ i chorü poraxẽẽruxü̃ quixĩxü̃. Rü choma rü cuxü̃ changechaü̃.
2 Rü cuma nixĩ ya nuta ya taxüchicü ya chorü poxü̃ruxü̃ quixĩxü̃. Rü cuma nixĩ i chorü dauruxü̃ quixĩxü̃. Rü cuma nixĩ i choxü̃ cunapuxü̃ nüxna i chorü uanügü. Rü cuma nixĩ i chorü tüpe̱xeruxü̃ quixĩxü̃. Rü cuma nixĩ i curü poramaxã choxü̃ cumaxẽẽxü̃. Rü cuma nixĩ i chorü cu̱xchicaxü̃ i ma̱xpǘnewa nagu changaxixü̃ quixĩxü̃.
3 Rü cumax, Pa Cori, Pa Tupanax, nixĩ i namexü̃ nax cuxü̃ ticua̱xüü̃xü̃. Rü ngẽxguma ãũcümaxü̃wa changexmagu, rü aita cuxca̱x chaxüxgu, rü cuma rü chorü uanügüme̱xẽwa choxü̃ ícupoxü̃.
4 Rü yema yu rü choxü̃ niyauxchaü̃, rü choxü̃ nimáxchaü̃. Rü poraãcü chamuü̃ nape̱xewa ga guxü̃ma ga yema ãũcümaxü̃ ga choxna ngaicamaxü̃.
5 Rü yema choxmaxü̃ rü choxü̃ niyauxchaü̃. Rü chope̱xegu nanaxǘ ya yütagü nax choxü̃ yama̱xgüxü̃ca̱x.
6 Rü yema ãũcümaxü̃wa nax chayexmaxü̃, rü Corica̱x aita chaxü nax nüma ga Tupana choxü̃ rüngü̃xẽẽxü̃ca̱x. Rü nüma rü napata ya üünenewa choxü̃ naxĩnü. Rü yema aita nax chaxüxü̃ rü naxmachixẽwa nangu.
7 Rü yexguma rü poraãcü naxĩã̱xãchiane. Rü guma ma̱xpǘnegü rü naxĩã̱xãchitanü. Rü Cori ya Tupanaarü numaxã nixĩãtanücüxü.
8 Rü naxmaraü̃wa rü caxixü̃ ínaxũxũ. Rü naã̱xwa ínaxũxũ ga üxüema ga ñoma ga naane ixaxẽẽxü̃, rü ínaxũxũ ga ã́xwe ga inaicü.
9 Rü ningena ga daxũguxü̃ ga naane rü nüma ga Tupana rü ñoma ga naanegu ínarüxĩ. Rü nacutütüü̃wa rü nataxüchi ga caixanexü̃ ga pamüemaxü̃ ga naxẽanexẽẽxü̃.
10 Rü wüxi ga dauxü̃cüã̱x ga ãxpe̱xatüxü̃étügu naxaunagü rü yema namaxã nigoe. Rü buanecüemaétügu namaxã niña.
11 Rü yema waanexü̃ nixĩ ga yadüxchipetaxü̃. Rü caixanexü̃ ga pucümaxã waxü̃gu namaxã nayangaxi. Rü yemagu nügü nicu̱x rü yemaarü aixepewa nayexma.
12 Rü nawa ínaxũxũ ga ba̱i̱xbeanexü̃ rü nanangóonexẽxẽ. Rü yema caixanexü̃wa narüyi ga gáuxü̃ rü ã́xwe ga inaicü.
13 Rü nüma ga Cori ya Tupana ya Guxãétüwa Ngẽxmacü rü daxũguxü̃ ga naanewa inanaxũ ga naga ga ñoma iduruanexü̃rüxü̃ ixĩxü̃. Rü yéma narüyi ga gáuxü̃ ga ãpü̱xüxü̃ rü ã́xwe ga inaicü.
14 Rü ínananguxẽxẽ ga norü chuxchigü rü ãẽmacügü. Rü yemacha̱xwa ga yema chorü uanügü rü nügü nawoone rü nibuxmü.
15 Rü yexguma Tupana norü numaxã nangaxgu ga yema uanügü rü naétü cue ñaxgu rü nipachitama ga már rü nango̱x ga yema naane naétügu üxü̃.
16 Rü nüma ga Tupana rü daxũguxü̃ ga naanewa cha̱u̱xca̱x narüxueme̱xẽ rü choxü̃ ínayaxuchi nawa ga yema taxü̃ ga már ga ãũcümaxü̃.
17 Rü choxü̃ ínanguxuchixẽxẽ naxme̱xwa ga chorü uanügü ga poraxü̃ ga chauxchi aiexü̃ rü choxü̃ rüporamaegüxü̃.
18 Rü yexguma guxchaxü̃wa chayexmayane rü cha̱u̱xca̱x ínayaxüãchi. Natürü nüma ga Cori ya Tupana rü choxü̃ narüngü̃xẽxẽ rü choxü̃ ínapoxü̃.
19 Rü nüma ga Cori ya Tupana rü wüxi taxü̃ i nachicawa choxü̃ naga, rü chorü uanüme̱xẽwa choxü̃ ínanguxuchixẽxẽ rü choxü̃ nayapu erü choxü̃ nangechaü̃.
20 Rü nüma ga Cori ya Tupana rü ãmare choxna naxã erü nape̱xewa name i chorü maxü̃. Rü choxü̃́ nanaxütanü naxca̱x ga chorü maxü̃ i ngẽarü chixexü̃ã́xü̃.
21 Yerü choma rü nagu chixũ i ngẽma Cori naxwa̱xexü̃. Rü taguma chixexü̃ chaxü rü taguma nüxü̃ chaxo ya Tupana.
22 Rü guxü̃ma i norü ucu̱xẽgü rü chauãẽwa nangẽxmagü, rü taguma nüxna chixũgachi i norü mugü.
23 Rü nape̱xewa rü taguma ta̱xacürü chixexü̃ chaxü rü chaugüna chadau nax tama pecadu chaxüxü̃ca̱x.
24 Rü nüma ga Cori ya Tupana rü ãmare choxna naxã erü nape̱xewa name i chorü maxü̃. Rü choxü̃́ nanaxütanü naxca̱x ga chorü maxü̃ i ngẽarü chixexü̃ã́xü̃.
25 Rü cumax, Pa Cori Pa Tupanax, rü tümamaxã quixaixcüma ya yíxema aixcüma cuga ĩnüxe. Rü cuxü̃́ tangechaü̃tümüxü̃ ya yíxema tümamücü tüxü̃́ ngechaü̃tümü̃xẽ.
26 Rü cuma rü aixcüma tüxü̃ curüngü̃xẽxẽ ya yíxema cuga ĩnüxe, natürü ngẽma tama cuga ĩnüxü̃ rü cuma nüxü̃ cucua̱x nax ñuxãcü tá cunapoxcuxü̃.
27 Rü cumax, Pa Tupanax, rü tüxü̃ curüngü̃xẽxẽ ya yíxema tama tügü icua̱xüxü̃güxe, natürü cunaxãneexẽxẽ i ngẽma nügü icua̱xüü̃güxü̃.
28 Rü cumax, Pa Cori Pa Tupanax, rü cha̱u̱xca̱x cunangóonexẽxẽ. Rü ngẽxguma ẽanexü̃wa changexmagu rü choxü̃ quibáixmaxü̃.
29 Rü curü ngü̃xẽẽmaxã rü tá naxca̱x íchayagoõchi i chorü uanü. Rü nagu tá chapogü i norü ĩanegüarü poxeguxü̃.
30 Rü ngẽma Tupanaarü ĩnü rü guxü̃wama name. Rü ngẽma norü uneta rü name nax yaxõxü̃. Rü nüma ya Tupana rü tüxna nadau ya yíxema nüxü̃́ yaxõgüxe.
31 ¿Rü texé tixĩ ya Cori ya Tupanaétüwa ixĩxẽ? ¿Rü ta̱xacürü to napora nax tüxü̃ ínapoxü̃xü̃ca̱x? Rü Tupanaxicatama nixĩ.
32 Rü Tupana nixĩ ya yimá choxü̃ poraxẽẽcü. Rü yimá nixĩ i yanawe̱xãchixẽẽcü i chaucüma nax taxuwama nachixexü̃ca̱x i chorü maxü̃.
33 Rü ngẽxguma chañaãchigu rü nüma ya Tupana nixĩ ya choxü̃ poraxẽẽcü nax ñoma cowürüxü̃ chaporaxü̃ca̱x. Rü ma̱xpǘneanewa chomaxã inacua̱x nax taxuguma chayanguxü̃ca̱x.
34 Rü nüma nixĩ i choxü̃ nangu̱xẽẽxü̃ nax daiwa chaporaxü̃ca̱x. Rü pora choxna naxã nax bróũchenaxca̱x ya würa ichamaxü̃xü̃ca̱x.
35 Rü cumax, Pa Cori Pa Tupanax, curü poxü̃ruü̃maxã choxü̃ quidüxü nax tama chorü uanügüme̱xẽgu changuxü̃ca̱x. Rü curü tügünechacüümaxã choxü̃ quingĩ. Rü ngẽma curü ngechaü̃gagu rü chorü uanüxü̃ charüporamae.
36 Rü choxü̃́ cunamexẽxẽ ga chomaxü̃ nax tama ichinguxü̃ca̱x.
37 Rü nawe changẽ ga yema chorü uanügü rü ñu̱xmata nüxü̃ ichayangau. Rü tama chataegu ñu̱xmata guxü̃ma chadai.
38 Rü chanapíexẽxẽ rü ngẽmamaxã taguma ínarüdagü. Rü nagu chapúgüe.
39 Rü cumax, Pa Tupanax, rü choxü̃ cuporaxẽxẽ ga daiwa, rü yemaca̱x ga yema chomaxã nuexü̃ rü cho̱xme̱xgu cunayixẽxẽ.
40 Rü cha̱u̱xcha̱xwa cuyabuxmüxẽxẽ ga chorü uanügü. Rü yemaacü chanadai ga yema chauxchi aiexü̃.
41 Rü nümagü rü aita naxüe nax ngü̃xẽẽca̱x ínacagüxü̃ca̱x, natürü taxúema nüxü̃ tarüngü̃xẽxẽ. Rü Cori ya Tupanana nacagüe nax nüxü̃ nangü̃xẽẽxü̃ca̱x, natürü nüma rü tama nanangãxü̃.
42 Rü chanapuxãchixẽẽgü rü ñu̱xmata ñoma ãte̱xeanexü̃ i buanecü cuexü̃rüxü̃ yixĩgü. Rü nagu chipúgügü ñoma namaarü ãcharaxü̃gu ipugüxü̃rüxü̃.
43 Rü cuma rü choxü̃ ícunguxuchixẽxẽ naxme̱xwa ga duü̃xü̃gü ga tama chauga ĩnüechaü̃xü̃. Rü togü ga nachixü̃anegümaxã choxü̃ icucua̱xẽxẽ. Rü yemaacü ga yema duü̃xü̃gü ga noxri tama nüxü̃ chacuáxü̃ rü ñu̱xma rü chorü puracütanüxü̃ nixĩgü.
44 Rü ngẽxguma choxü̃ naxĩnüegu rü chauga naxĩnüe. Rü togü i nachixü̃anecüã̱x i duü̃xü̃gü rü cho̱xme̱xwa nügü nangẽxmagüxẽxẽ rü mea chauchiga nidexagü.
45 Rü ngẽma togü i nachixü̃anecüã̱xgü rü choxü̃ namuü̃e, rü ngẽma íyacu̱xgüxü̃wa rü du̱xruxeãcü ínachoxü̃.
46 ¡Namaxü̃ ya Cori ya Tupana! ¡Rü namecüma ya yimá chorü poxü̃ruxü̃! ¡Rü name i nüxü̃ ticua̱xüü̃gü ya yimá chorü maxẽẽruxü̃ ya Tupanax!
47 Rü Tupana nixĩ ya chorü uanügüxü̃ choxü̃ rüporamaexẽẽcü rü cho̱xme̱xgu nayixẽẽcü i ngẽma togü i nachixü̃anegüarü duü̃xü̃gü.
48 Rü nüma rü naxme̱xwa choxü̃ ínanguxuchixẽxẽ i chorü uanügü i chomaxã nuexü̃. Rü cumax, Pa Corix, rü choxü̃ ícupoxü̃ nüxna i ngẽma choxü̃ ima̱xgüchaü̃xü̃.
49 Rü ngẽmaca̱x i choma rü ngẽma nachixü̃anegütanüwa cuxü̃ chicua̱xüxü̃ rü cuégagu chawiyae.
50 Cuma rü guxü̃guma chorü uanügüxü̃ choxü̃ curüporamaexẽxẽ erü cumatama choxü̃ cuxuneta i choma i Dabí nax Iraétanüxü̃arü ãẽ̱xgacü chixĩxü̃ca̱x. Rü cuma rü guxü̃guma choxü̃ cungechaü̃ rü nüxü̃ cungechaü̃ i chaunegü rü chautaagü.
